Hus Nis Pes Luas Xaws Las (Junipero Serra) yug hnub tim 24 lub 11 hlis 1713, tuag xyoo 1784 tim 28 lub 8 hli. Nws yog ib tug Leej Choj haiv neeg Xyis Pas Yas nyob hauv cov tub tshaj Ntuj Lus Fas Ntshis Kas. Nws tuaj tshaj Ntuj Lus nyob Kas Lis Fos Nias, As Mes Lis Kas teb, ces nws thiaj nto moo tias ‘Tus Hauv Paus Xa Lus nyob Kas Lis Fos Nias’.

Leej Ntshiab Hus Nis Pes Luas Xaws Las muaj lub npe tias ‘Miv Kes’ los yog ‘Mis Kas Es’ (Miquel), yug nyob hauv lub me nyuam zos hu ua ‘Pes Tas’ (Petra) hauv lub pov txwv Mas Los Nkas (Mallorca), Xyis Pas Xyas teb.

Thaum muaj 7 xyoo, tas niaj tas hnub mas nws ua hauj lwm nyob hauv lawv daim teb, tsis kav nws nrhiav tej lub sij hawm mus tsham cov Leej Choj hauv lub koom haum Fas Ntshis Kas hauv lub tsev teev Ntuj nyob puas lawv lub tsev. Nws mus kawm ntawv thiab kawm kev ntseeg nyob hauv cov Leej Choj lub me nyuam tsev qhia txuj. Nws muaj suab zoo ces ntau zaus cov Leej Choj coj nws mus koom nrog cov tub ntxhais hu nkauj hauv lawv lub zos.

Thaum Xaws Las muaj 16 xyoo, nws niam thiab nws txiv cia nws mus kawm nyob hauv cov Leej Choj Fas Ntshis Kas lub tsev kawm hauv lub nroog. Ib xyoos tom qab, Xaws Las txiav siab koom ua tub haum xeeb nyob hauv koom haum.

Lub 9 hlis, tim 14 xyoo 1730, Xaws Las tshais chaw mus nyob hauv lub koom haum nyob Pas Mas (Palma). Nyob ntawd, lawv tis lub npe tshiab rau nws tias ‘Hus Nis Pes Luas’ raws li Leej Tij Hus Nis Pes Luas uas yog Leej Ntshiab Fas Ntshis Kus tus kwv luag.

Xyoo 1737, Hus Nis Pes Luas Xaws Las txais Cim Tiag Tes ua Leej Choj. Nws tau txais txoj hauj lwm qhia txuj rau cov tub kawm.

Nyob rau lub caij ntawd, hauv lub pov txwv raug xwv txheej ntuj qhuav teb nkig thiab muaj kab mob sib kis, ces Txiv Plig Xaws Las tsev neeg sawv daws tau mob. Nws mus ua lub Cim Pleev rau nws txiv thiab nws tus muam uas tab tom yuav tuag.

Xyoo 1748, Txiv Plig Xaws Las muaj lub tswv yim tias nws yuav tsum mus tshaj Ntuj Lus rau cov neeg tsis muaj kev ntseeg, ces nws thiaj ua ntaub ntawv thov tawm mus tshaj lub Moo Zoo rau As Mes Lis Kas teb.

Xyoo 1749, Txiv Plig Xaws Las thiab cov tub tshaj Ntuj Lus tuaj txog lub tuam teb As Mes Lis Kas, tab sis lawv yuav tsum tau ntoj kev hla ib lub hav zoov loj mas thiaj yuav mus txog lub nroog Mes Xis Kos. Cov nom tswv nrhiav nees rau lawv caij, tiam sis Txiv Plig Xaws Las thiab ib tug phooj ywg nkawd tsis kam txais nkawd ob tug nees, vim nkawd xav ua raws cov Fas Ntshis Kas txoj cai txwv tsis txhob caij nees. Nkawd mus kev taw txog lub nroog Mes Xis Kos.

Nkawd mus tau ob peb ncua kev ces Txiv Plig Xaws Las txhais taw sab laug txawm mob thiab khaus. Nkawd thiaj so ib hmos hauv ib daim teb, tag kis sawv ntxov ua ciav Txiv Plig Xaws Las txhais taw txawm to ua ib lub qhov txhab los los ntshav. Lub qhov txhab no yuav nrog Txiv Plig nyob mus tas nws sid.

Txiv Plig Xaws Las tau txais txoj hauj lwm tshaj lub Moo Zoo rau cov neeg Pas Mes (Pames) nyob hauv lub zos Ntsas Pas (Jalpan) ces Txiv Plig Xaws Las thiab nws ib tus kwv luag uas yog Txiv Plig Paj Lug nkawd thiaj tuaj mus rau hauv lub zos. Nkawd pib kawm haiv neeg ntawd xeem lus.

Txiv Plig Xaws Las siv sij hawm 2 lub xyoos los rhuav cov neeg Pas Mes txoj kev teev dab kom lawv hloov siab tshiab los ntseeg Tswv Ntuj. Muaj ib hnub, Txiv Plig Xaws Las tau txais txoj kab xwm tshiab ua tus Txiv Coj Ke rau cov neeg Xyis Pas Yas nyob hauv As Tas Kas Lis Fos Nias, los yog Kas Lis Fos Nias tshiab.

Thaum muaj 55 xyoos, Txiv Plig Xaws Las ua tus thawj tswj coj tsoom neeg ntseeg tshais chaw mus nyob rau Kas Lis Fos Nias. Nws coj sawv daws mus qhib teb tshiab ua liaj ua teb yug tsiaj, txhim tsa zej zog thiab tsev kawm ntawv. Txiv Plig Xaws Las txhim tsa lub Koom Txoos nyob Kas Lis Fos Nias xyoo 1769 tim 16 lub 7 hli. Xyoo 1770 txog xyoo 1782 Txiv Plig Xaws Las txhim 8 lub Koom Txoos ntxiv.

Muaj ntau zaus Txiv Plig Xaws Las ntsib teeb meem cuam tshuam txog kev tshaj Ntuj Lus, nws nquag hais rau sawv daws tias “Tsuas muaj mus tom ntej, txhob tig rov qab.”

Tim 28 lub 8 hli 1784 Txiv Plig Xaws Las mob hnyav ces nws thiaj mam tuag. Hnub ntawd tsoom neeg ntseeg hauv Kas Lis Fos Nias tshaj tias “Hnub no Tswv Ntuj ib tug Leej Ntshiab tau tas sim neej lawm.”