Lis Tas yug los nyob rau ib lub zos hu ua Kas Xias (Cascia) nyob Is Tas Lias teb, xyoo 1381. Thaum Lis Tas hlob tuaj lawm, nws xav mus kawm ua Leej Phauj, tab sis nws niam thiab nws txiv tsis pub. Nkawd yuam Lis Tas yuav ib tug vaj. Tus vaj no, yog ib tug vaj uas ib txwm tsis txawj nrog luag tej sib haum xeeb. Nws tsuas nrog luag tej ua plaub ua ntug mus li xwb. Nws tseem yog ib tug neeg siab luv thiab, ces zaum puav nws npau taws heev, nws cia li muab Lis Tas ntau los txhiv nws txoj kev npau taws. Li ntawd, ntau zaus, Lis Tas cia li lam raug tus vaj muab nws ntau dawb dawb xwb. Tab sis Lis Tas tsis nrog nws tus txiv sib cav ib lo lus dab si li. Lis Tas ua siab zoo, ua siab ntev thiab hlub nws tus txiv mus li xwb.
Nkawd ua neej zoo li ntawd tau 20 xyoo ua ke, ces tus vaj pib hloov siab zuj zus, mus txog ntua hnub uas nws raug nws ib tug yeeb ncuab muab nws tua tuag. Lis Tas 2 tug tub hnov tias nkawd txiv raug tus yeeb ncuab muab tua tuag lawm mas nkawd tsuas npaj siab nrhiav ntsoov tus yeeb ncuab ntawd tua pov tseg xwb. Tab sis Lis Tas tsis xav kom nws 2 tug tub ua ib qho txhaum loj npaum li ntawd, ces Lis Tas thov Ntuj tas zog kom Tswv Ntuj tuaj coj nws 2 tug tub mus nrog Tswv Ntuj nyob ua ntej thaum nkawd yuav ua txhaum tua neeg, ces tsis ntev Lis Tas 2 tug tub cia li tuag lawm.
Thaum 2 tug tub tuag tas, Lis Tas thiaj mus ua lub neej Leej Phauj raws li nws lub siab xav. Lis Tas coj lub neej ua Leej Phauj nyob hauv Aus Nkus Tis Nus cov Leej Phauj lub koom haum. Lis Tas rau siab ntso ua tag ib puas tsav yam kom nws tsis txob nco txog nws tus kheej thiab nws niaj hnub teev Ntuj ntau. Muaj ib hnub, Lis Tas hnov Leej Ntshiab Yas Kos ib zaj nthuav ntawv Moo Zoo hais txog Yes Xus txoj kev raug txom nyem kom tau txhiv ntiaj teb neeg, ces Lis Tas txawm thov kom Huab Tais Yes Xus pub nws nrog Huab Tais Yes Xus txais kev txom nyem. Txij thaum Lis Tas thov li no tag los, ces Lis Tas lub tob hau cia li muaj ib lub kaus mom pos ncig, ua rau nws lub hauv pliaj ua ib lub qhov txhab loj thiab tsw phem heev kawg nkaus li. Qhov no ua rau tsis muaj ib tug neeg twg yuav nyob taus ze Lis Tas li. Lis Tas thiaj li mus nyob ib leeg ntawm ib ces kaum hauv lawv lub vaj loog. Lub sij hawm no, tsis muaj ib tug Phauj yuav tiv tau nws tus ntxhiab li, ces lawv tso Lis Tas pov tseg, lawv tsis mus xyuas nws li lawm. Tsuas yog tshuav cov neeg mob xwb thiaj li tuaj xyuas Lis Tas, vim thaum lawv tuaj xyuas nws tas, mus txog tsev, mas lawv tus mob cia li zoo hlo tuaj lawm.
Lis Tas mob li ntawd thiab nws nyob ib leeg mus txog hnub nws tso lub ntiaj teb tseg, yog xyoo 1457 tim 22 lub 5 hlis.