Aws Zes yug xyoo 1782 lub 8 hli tim 1 hauv lub nroog Ej xeev Plos Vaas (Aix en Provence) Fab Kis teb. Nws txiv yog ib tus nom tswj kev siv nyiaj txiag. Thaum tseem yau, Aws Zes kawm ntawv hauv lub tsev kawm txuj Npus Npoos. Xyoo 1791 hauv Fab Kis teb muaj kev ntxeev teb chaws, Aws Zes txiv coj lawv thoj nam mus rau Nis Xaws (Nice), Tos Lis Nos (Turin), Ves Nis Xias (Venice), Nas Pos Lis (Naples), thiab lub pov txwv Xis Xis Lis (Sicily).
Thaum Aws Zes ua neeg thoj nam nyob Ves Nis Xias, nws niaj tag kis mus pab tus txiv ntxawm Leej Choj ua Thaj Txi Ntuj, ces tus Leej Choj hlub Aws Zes, nws coj Aws Zes mus fim tsev neeg Xis Nes Lis. Lawv tsev neeg pab kom Aws Zes tau kawm txuj ntawm lawv tus tub ua Leej Choj hu ua ‘Npas Tos Los’. Nws qhia Ntuj kev cai rau Aws Zes, ces Aws Zes sau cov lus cia hauv nws phau ntawv cim xwm tias “Kuv nrog Txiv Plig Npas Tos Los nyob, kuv xyaum ua ib tug hluas tsis nyiam ntiaj teb neeg tej kev ua si tsis muaj nqis. Kuv nyiam txhua yam uas pab nco txog Tswv Ntuj.”
Thaum ntawd, Aws Zes muaj ib lub tswv yim xav ua Leej Choj xws li Txiv Plig Npas Tos Los. Tab sis xyoo 1798 Aws Zes txiv coj nws tsiv mus nyob Nas Pos Lis, ces Aws Zes thiaj ncaim ntawm nws tus Txiv Plig mus.
Ib xyoos tom qab lawv tsiv mus txog lub nroog Pas Les Mos, hauv lub pov txwv Xis Xis Lis. Nyob ntawd, Aws Zes tau fim yim neeg Kas Nis Xas Los. Kas Nis Xas Los tus poj niam nplua nuj thiab siab zoo, nws pom tias Aws Zes yog ib tug neeg siab zoo txawj hlub lwm tus, nws vam txog Aws Zes pab nws mus tsob hwb cov neeg txom nyem.
Thaum muaj 20 xyoo, Aws Zes rov qab los nrog nws niam nyob hauv Fab Kis teb. Aws Zes npaj siab yuav poj niam, tab sis xyoo 1807 thaum lub 3 hlis tim 27 yog Hnub Rau Ntshiab, Aws Zes txhos caug ntawm Huab Tais Yes Xus tus Ntoo Cuam, ces nws ras tau tias thaum tseem yau, nws muaj ib lub siab xav ua tub tshaj Ntuj Lus rau cov neeg pluag. Aws Zes thiaj txiav siab meej tias nws yuav tsum ua Leej Choj xwb. Aws Zes sau nyob hauv nws phau ntawv cim xwm tias ‘Yam Tswv Ntuj tos ntawm kuv, yog kom kuv coj lub Moo Zoo mus txog cov neeg pluag txom nyem.’ Aws Zes pib kawm ua Leej Choj hauv Pas Lis (Paris). Nyob ntawd, nws pib ua txoj hauj lwm mus tsham cov neeg hauv tsev loj faj.
Xyoo 1811 Aws Zes txais Cim Tiag Tes ua Leej Choj nyob hauv Aws Mis Yees (Amiens) thiab ua thawj Thaj Txi Ntuj nyob hauv Leej Ntshiab Mab Liab Mas Ntas Las lub tsev teev Ntuj. Txiv Plig Aws Zes pib nws txoj hauj lwm tshaj lub Moo Zoo rau cov neeg txom nyem hauv lub zos nws yug, nws nthuav lub Moo Zoo ua lus Plos Vaas ces sawv daws to taub yooj yim. Nws hais tias “Thaum peb nthuav lub Moo Zoo, peb yuav tau siv cov lus to taub yooj yim, mas cov neeg tsis muaj kev kawm, cov tsis paub txuj, lawv thiaj yuav nkag siab txog lub Moo Zoo. Peb yuav ua zoo li ib leej txiv nqua hu nws cov me nyuam los nyob ua ke, ces nws yuav qhia lawv txog lawv cov cuab tam nws yuav pub rau lawv.”
Thaum txog lub caij Plaub Caug, Txiv Plig Aws Zes tawm mus qhia Ntuj kev cai rau cov neeg txom nyem. Txiv Plig Aws Zes ntuas sawv daws kom pom txog lawv lub meej mom thiab lawv tej txiaj ntsim qab hau. Txiv Plig Aws Zes ntuas lawv tias “Nej cov pluag Leej Pleev, nej yog cov neeg txom nyem, nej yog cov tsis muaj hmoo, nej yog cov neeg muaj mob txiab nkeeg, nej yog kuv cov kwv cov muam, nej mloog kuv hais rau nej mog!
Cov neeg ua zog thawm hnub, luag tej saib nej zoo li cas? Nej yog cov neeg ua tiag nyiaj ris kev txom nyem, nej ua hauj lwm hnyav, nej puas yuav ua hauj lwm raws li luag tej hais kom nej ua?
Cov ua luag qhev, peb txoj kev ntseeg saib nej yog leej twg? Nej tus tswv muab nyiaj ntaus nej taub hau, nej raug txoj kev ncaj saib tsis taus, nej cov tswv tsim txom nej puas yog?
Nej cov ua liaj ua teb, nej yog leej twg mas? Nej tsuas yog luag tej rab qhais laij liag xwb, lawv saib nej cov hauj lwm thiab nej lub hws muaj txiaj ntsim yog thaum nej ua tau kom daim liaj ntsu qoob.
Ntiaj teb saib nej yog cov niag neeg seem, lawv tsis xav ntsia nej, lawv feeb qhov muag ntawm nej mus kom xwv lawv tsis txhob tau hlub nej, lawv tsis xav ua dab tsi pab nej. Ntiaj teb neeg saib nej zoo li ntawd tiag!
Tiam sis nyob hauv txoj kev ntseeg txog Yes Xus, mas nej yog leej twg? Nej yog Huab Tais Tswv Ntuj cov me nyuad, nej yog Leej Pleev tus tseem kwv tij, nej yog tus muaj cai txais Tswv Ntuj lub Ceeb Tsheej ua nej lub cuab tam.
Nej tsa nej lub siab kom siab mog, nej ntsia nej cev tsoos tsho mog, vim nyob hauv nej muaj ib tug ntsuj plig nyob mus li zoo li Tswv Ntuj tus duab; yog tus ntsuj plig Leej Txiv Tswv Ntuj hlub tshaj tas puas tsav yam hauv lub ntiaj teb no. Yog li mas cov kwv tij, nej yuav tau tsa nej lub siab kom siab, nej yuav xub nrhiav Huab Tais Tswv Ntuj mog.”
Aws Zes tsis xav ua cov hauj lwm saib xyuas tsev teev Ntuj, nws thiaj tsa lub haum xeeb tub tshaj Ntuj Lus nyob Plos Vaas (Mission of Provence) hauv xyoo 1816. Tom qab no Vaj Qhia Les Os tim 12 (Pope Leo XII) thiaj muab lub npe tshiab tias ‘niam Mab Liab tus tsis lo neeg lub keeb txhaum cov tub tshaj Ntuj Lus’ los yog koom haum Os Nplas (Missionary Oblates of Mary Immaculate, OMI); hnub ntawd yog hnub tim 17 lub 2 hlis 1826.
Aws Zes tus txiv ntxawm Fos Tws Nes (Fortune) ua Tswv Qhia nyob Ceeb Koom Txoos Mas Xes (Marseille) tsa Aws Zes ua tus Tim Xyoob pab hauj lwm txog xyoo 1832 Vaj Qhia thiaj tsa Aws Zes ua Tswv Qhia nyob Nis Kos Xis. Aws Zes ua Tswv Qhia saib Ceeb Koom Txoos nyob Nis Kos Xis tau 5 xyoos ces mam hloov los ua Tswv Qhia nyob Mas Xes hauv xyoo 1837. Tswv Qhia Aws Zes hais nws cov lus tias “Peb tus Huab Tais Tswv Ntuj hu kuv los ua tub txib thiab ua cov neeg pluag txom nyem tus Leej Choj.”
Xyoo 1841 Tswv Qhia Aws Zes pib xa cov tub tshaj Ntuj Lus hauv lub koom haum Os Nplas mus ua dej num nyob txawv teb chaws xws li nyob hauv Aas Kiv, Kas Nas Das, As Fis Kas Naj, Xis Laas Nkas.
Tswv Qhia Aws Zes tau ib tug mob ntsws, nws saib tias nws kev mob yog Tswv Ntuj lub txiaj ntsim ua kom nws lub siab ntshiab tuaj. Tswv Qhia Aws Zes hais tias “Thaum yus nyob saum ntoo cuam phim yus yuav zoo siab.”
Tswv Qhia Aws Zes tus mob ua rau nws sab ces tas cov tub tshaj Ntuj Lus hauv lub koom haum Os Nplas tuaj zov nws, nws hais rau lawv 3 lwm tias “Nej sis nyiam sis hlub mog!”, tas ces nws ntuas lawv tias “Nej yuav kub siab ua dej num cawm luag ntsuj plig mog!”
Hnub tom qab, yog hnub tim 21 lub 5 hlis 1861 Tswv Qhia Aws Zes thiaj tas sim neej. Nws muaj 79 xyoos.