Npes Nes Dis yug xyoo 480 hauv Nus Xias, Is Tas Lias teb. Nws muaj ib tug muam ntxaib yog Nkos Las Tis Kas (St. Scholastica).

Npes Nes Dis tau mus kawm txuj nyob rau lub tsheej Los Mas, Is Tas Lias teb. Tab sis Npes Nes Dis coj lub neej ua lwj ua liam thiab tsis kub siab kawm txuj, yog li nws thiaj mus tsis txog nws lub hom phiaj. Npes Nes Dis tag kev cia siab rau tus kheej, nws thiaj khiav mus coj lub neej ua Txiv Tab Seeb (Monk).

Npes Nes Dis tau ntsib tus Txiv Twj Cuab hu ua Los Mas Nus nyob Xus Npias Kos (Romanus of Subiaco). Nws nrog Los Mas Nus tham, ces thaum kawg Npes Nes Dis thiaj txiav siab ua Txiv Twj Cuab, nws mus nyob hauv ib lub qhov tsua tsis ntsib leej twg tau 3 xyoos. Tsuas muaj tej lub zim txwv uas Los Mas Nus tuaj pab ntxiv tswv yim rau nws xwb.

Npes Nes Dis yuam nws kom rov ua neeg ncaj thiab ua ib tug neeg ntshiab, ces muaj ntau tus Txiv Twj Cuab thiaj kom nws ua tus tswj lawv cov Txiv Twj Cuab.

Muaj ib co Txiv Twj Cuab tsis nyiam Npes Nes Dis ces lawv nyiag tso tshuaj muaj taug rau nws haus ntau zaus, tab sis Npes Nes Dis tsis ua cas.

Npes Nes Dis pom tias cov Txiv Twj Cuab tsis nyiam nws, ces Npes Nes Dis thiaj rov qab los nyob Xus Npias Kos, thiab tsa ib pab Txiv Twj Cuab. Nyob ntawd kuj muaj ib tug hu ua Fos Les Tis Nus (Florentius) khib Npes Nes Dis, nws thiaj tso tshuaj rau hauv lub ncuav mov kom Npes Nes Dis noj ces Npes Nes Dis tuag mus. Npes Nes Dis thov Ntuj foom hmoov zoo tas, txawm muaj ib tug uab lag ya los kwv lub ncuav mov muaj tshuaj ntawd mus lawm.

Fos Les Tis Nus pom tias nws ua dab tsi tsis tau rau Npes Nes Dis, ces nws hais ib co poj ntiav tuaj thab Npes Nes Dis cov Txiv Twj Cuab. Npes Nes Dis thiaj coj lawv tawm hauv tham tsam ntawd mus. Npes Nes Dis tsa 12 lub tsev Txiv Twj Cuab nyob ib puag ncig Xus Npias Kos.

Xyoo 516 Npes Nes Dis tsa tsab cai los tswj nws cov Txiv Twj Cuab kom mloog cov hlob thiab nyiam ua neeg me (obedient and humble).

Xyoo 530 Npes Nes Dis txhim lub tsev Txiv Twj Cuab nyob hauv lub nroog Moos Tes Kas Xis Nos (Monte Cassino) hauv Tas Kas Nis. Lub tsev Txiv Twj Cuab no yog cov Txiv Twj Cuab Npes Nes Dis lub tsev nto moo loj.

Npes Nes Dis tau tsa tsab cai los tswj cov Txiv Twj Cuab hauv nws lub haum xeeb tias “Nquag teev Ntuj thiab nyiam nqes tes ua”, ib hnub lawv tsum qee sij hawm teev Ntuj li 8 teev, pw 8 teev, thiab ua hauj lwm los sis nyeem Ntawv Ntshiab thiab ua hauj lwm nyiam luag tej li 8 teev.

Xyoo 547 tom qab Npes Nes Dis tus muam Nkos Las Tis Kas tuaj ntsib nws thiab tuag tas, Npes Nes Dis thiaj raug ib tug mob ces nws mam tuag. Lawv coj Npes Nes Dis lub cev mus los ua ke nrog nws tus muam.

Xyoo 1964 Vaj Qhia Paj Lug 6 (Pope Paul VI) xaiv Npes Nes Dis ua tus Leej Ntshiab pov hwm Aws Los Pas teb.