Leej Ntshiab Npos Nis Fas muaj lub npe tias Vees Fis (Winfrid) yog ib tug tub tshaj Ntuj Lus haiv neeg Aas Kiv, nws yug xyoo 675 hauv lub zos Khes Dis Toos (Crediton).
Thaum Vees Fis muaj 7 xyoo, nws mus kawm ntawv nyob hauv lub tsev Txiv Twj Cuab nyob Es Xes Tes (Exeter). Vees Fis yog ib tug neeg uas muaj lub tswv yim ntse, muaj lub tswv yim zoo thiab muaj lub siab thoob tsib.
Vees Fis coj lub neej xw li lub caij ntawd cov hluas ntau leej lawv ua, yam li nws txiav siab xaiv lub neej ua Txiv Twj Cuab. Nws kawm txuj nyob hauv cov Txiv Twj Cuab lub tsev qhia txuj nyob Nws Lees (Nursling). Vees Fis ua Xib Hwb qhia ntawv mus txog thaum nws muaj 30 xyoo, nws thiaj txiav siab ua Leej Choj.
Xyoo 716 Vees Fis hnov Leej Ntuj Plig Ntshiab hu nws hauv nruab siab, nws thiaj caij nkoj hla hiav txwv mus txog cov Fis Xoos lub teb chaws hauv Zes Mas Nias qaum teb. Thaum ntawd cov Fis Xoos tus vaj Las Npaus (Radbod) tab tom ua rog ntaus tus vaj Fab Kis. Nws nyuam qhuav ntiab cov tub tshaj Ntuj Lus tawm hauv lub teb chaws.
Vees Fis yog ib tug Aas Kiv, ces tus vaj Las Npaus txais nws. Tab sis, tau tsis ntev, Vees Fis pom tias nws yog ib tug tub tshaj Ntuj Lus, yog tsis muaj ib tug loj xa nws tuaj, mas luag tsis hwm nws tsis mloog nws, Vees Fis thiaj txiav siab tias yuav mus cuag Vaj Qhia nyob Los Mas, thov kom Vaj Qhia xa nws mus Zes Mas Nias teb.
Xyoo 718, Vees Fis mus Los Mas teb. Vees Fis nyob Los Mas teb tas lub caij ntuj tsaug xyoo 718 txog xyoo 719. Vaj Qhia Nqes Nkos Lis tim 2 (Pope Gregory II) pom Vees Fis yog ib tug neeg muaj hwj chim, yog ib tug neeg siab ntshiab. Vaj Qhia tso siab rau Vees Fis, ces Vaj Qhia tsa Vees Fis ua thawj tus tub tshaj Ntuj Lus rau cov Zes Mas Nias (the Apostle to the Germans). Vaj Qhia hais rau Vees Fis tias “Koj txoj hauj lwm yog tu txoj kev tshaj Tswv Ntuj Lo Lus uas tas cov haiv neeg nyob Zes Mas Nias teb yuav taug.” Vaj Qhia tis npe Las Tis Nas rau Vees Fis hu ua ‘Npos Nis Fas’ (Boniface) raws li Npos Nis Fas tus tuag ua Yes Xus tim khawv nyob Tas Xis hauv tiam plaub.
Xyoo 719 Npos Nis Fas rov mus tshaj Ntuj Lus rau cov Fis Xoos. Nws nrog Vis Lis Nplos tshaj Yes Xus lub Moo Zoo rau cov Fis Xoos, nws pom tias cov Fis Xoos leej puav xwb thiaj txais txoj kev ntseeg txog Yes Xus, ces xyoo 722 Npos Nis Fas thiaj mus tshaj Yes Xus lub Moo Zoo nyob Zes Mas Nias plawv teb. Npos Nis Fas pom tias cov neeg Zes Mas Nias feem coob tseem teev lawv cov dab. Tab sis nws kuj pom tias muaj ntau pab neeg teev Yes Xus. Nyob ntawd, kuj muaj ob kwv tij ua nom; nkawd yeej ib txwm txais lub Cim Ntxuav lawm, tab sis nkawd tsis coj Ntuj kev cai. Npos Nis Fas thiaj qhia Ntuj kev cai rau nkawd, nkawd rov yuav txoj kev ntseeg txog Yes Xus. Nkawd muab ib thaj av nyob As Maws Npus (Amonebourg) rau Npos Nis Fas tsim ib lub tsev Txiv Twj Cuab.
Thaum muaj neeg ua Ntuj kev cai coob nyob Zes Mas Nias teb lawm, Vaj Qhia thiaj tsa Npos Nis Fas ua Tswv Qhia saib cov ua Ntuj kev cai nyob Zes Mas Nias teb.
Nyob Zes Mas Nias teb, muaj ntau leej tub tshaj Ntuj Lus haiv neeg Fab Kis. Lawv nyias tuaj nyias, thiab nyias qhia Ntuj kev cai raws li nyias paub xwb. Tswv Qhia Npos Nis Fas thiaj rov qhia cov tub tshaj Ntuj Lus ntawd kom sawv daws qhia zoo ib yam thiab kom sawv daws coj ib tug yam ntxwv phim cov tub tshaj Ntuj Lus. Lawv sawv daws zoo siab mloog nws, vim lawv pom tias Tswv Qhia Npos Nis Fas coj tus yam ntxwv zoo heev.
Tswv Qhia Npos Nis Fas coj tej pab Txiv Twj Cuab nrog nws mus ncig cov zej zog. Thaum chiv thawj yog cov Txiv Twj Cuab tuaj Aas Kiv teb tuaj, vim nws sau ntawv mus hais kom cov thawj pab xa cov Txiv Twj Cuab tuaj pab nws. Tab sis tsis ntev mas kuj muaj tej tus Txiv Twj Cuab Fab Kis thiab Zes Mas Nias, ces lawv ua hauv paus qhia tej pab tub tshaj Ntuj Lus rau Zes Mas Nias teb.
Lub caij uas Npos Nis Fas tshaj Ntuj Lus, mas Zes Mas Nias teb zwm rau cov vaj Fab Kis, ces muaj tej npoj tub rog Fab Kis saib xyuas Zes Mas Nias teb. Tswv Qhia Npos Nis Fas thiaj thov cov vaj Fab Kis kom lawv kheev cov tub rog pab txuag cov tub tshaj Ntuj Lus, txhob pub kom cov tub tshaj Ntuj Lus raug tub sab los yog cov neeg teev dab tuaj ua phem rau lawv.
Tswv Qhia Npos Nis Fas nquag sau ntawv mus rau tus Vaj Qhia nyob Los Mas, thov Vaj Qhia pab nws xav tswv yim. Nws kuj xa ntawv mus rau cov thawj Tswv Qhia uas nyob Aas Kiv teb thov kom lawv pab nws xav tswv yim, nrog thov Tswv Ntuj nres cov hauj lwm nws ua nyob Zes Mas Nias teb, thiab nws thov kom xa me ntsis nyiaj tuaj pab txoj hauj lwm tshaj lub Moo Zoo. Nws kuj sau ntawv rau tej lub koom haum Leej Phauj nyob Aas Kiv teb, ces muaj ib tug Leej Phauj hu ua ‘Lis Os Npas’ (Lioba) zoo siab tuaj tsim ib lub tsev Niam Twj Cuab nyob Zes Mas Nias teb.
Tswv Qhia Npos Nis Fas tsa tej tus Tswv Qhia tshiab, ces xyoo 739 Vaj Qhia nyob Los Mas pub txoj hlab ntaub dawb tsa nws ua Tuam Tswv Qhia (Archbishop) tswj tas cov Tswv Qhia nyob Zes Mas Nias teb. Xyoo 742 Tswv Qhia Npos Nis Fas tsim peb lub tsev Txiv Twj Cuab loj txais cov txiv neej txiav siab ua Txiv Twj Cuab. Lub tsev Txiv Twj Cuab nto moo tshaj yog lub nyob Fus Das (Fulda).
Tswv Qhia Npos Nis Fas zoo siab vim lub Koom Txoos hlob mus sai nyob tas Zes Mas Nias teb. Tab sis tshuav haiv neeg Fis Xoos uas nyob xeev ntuj Hos Laas (Holland), hauv Zes Mas Nias qaum teb. Npos Nis Fas nco ntsoov tias thaum nws tseem nyob Aas Kiv teb mas nws hnov Tswv Ntuj hu nws mus tshaj Ntuj lus rau cov Fis Xoos, ces nws thiaj thov kom Vaj Qhia tso nws mus tshaj Ntuj Lus nyob Hos Laas. Vaj Qhia hais rau Npos Nis Fas tias nws cov hauj lwm nyob Zes Mas Nias plawv teb tsis tau tiav, yog nws tso tseg mas ntshai tsam cov ua Ntuj kev cai yuav tsis vam meej lawm yav tom ntej. Vim li ntawd, Tswv Qhia Npos Nis Fas thiaj yuav tos txog 15 xyoos nws thiaj rov tau mus cuag cov Fis Xoos.
Xyoo 754 Tswv Qhia Npos Nis Fas muaj 79 xyoos lawm, nws nrog 50 leej Txiv Twj Cuab caij nkoj taug tus dej Lees (Rhine) mus txog cov Fis Xoos uas lawv nyob pem tus hauv dej Lees. Lawv ua lub Cim Ntxuav rau tej lub zos nyob ze tus dej Lees. Hnub tim 5 lub 6 hli, lawv mus yuav luag txog cov xeev ntuj uas cov Fis Xoos nyob, ces ib sij huam muaj tej npoj neeg Fis Xoos tawm tuaj; lawv nqa ntaj nqa hmuv, yuav muab Tswv Qhia Npos Nis Fas thiab cov Txiv Twj Cuab tua. Cov Txiv Twj Cuab yuav nrog cov Fis Xoos ntawd sib tua thiab, Tswv Qhia Npos Nis Fas hais rau nws cov Txiv Twj Cuab tias “Ntxig nej cov ntaj rov qab rau hauv hnab, txhob nrog lawv sib tua, vim Tswv Ntuj Lo Lus hauv phau Ntawv Ntshiab ntuas tias txhob ua phem pauj qhov phem tiam sis yuav muab qhov zoo pauj qhov phem.”
Ib tug neeg Fis Xoos xuas ntaj tib teg rau Tswv Qhia Npos Nis Fas, ces nws muab phau Ntawv Ntshiab los thaiv nws taub hau. Rab ntaj thiaj txiav raug phau Ntawv Ntshiab ntuag ua ib kab. Tswv Qhia Npos Nis Fas thiab 50 leej Txiv Twj Cuab raug cov Fis Xoos muab tua tuag tas huv si nyob rau ntawd; yog hauv lub nroog Dos Khoos (Dokkum) hauv Hos Laas teb.