Zam Ntxuav Plig los yog tus ntxuav plig Zam, nws yog Ntxas Nkas Lias thiab Es Lis Xas Npes tus tub. Zam yug ua ntej Huab Tais Yes Xus li 6 hli, mas tsoom neeg ntseeg txog Yes Xus thiaj muab hnub tim 24 lub 6 hli ua hnub tsuj xeeb Zam Ntxuav Plig (Nativity of St. John the Baptist).

Zam lub npe txhais tias ‘Tswv Ntuj pub txiaj ntsim rau’ los yog ‘Tswv Ntuj khuv leej’.

Thaum Zam loj tuaj, nws ua Tswv Ntuj ib tug Yaj Saub nyob hauv teb chaws suab puam, Zam tuaj ua kab ke ntxuav rau sawv daws kom lawv tig los yuav lub siab tshiab tos tus Huab Tais yuav tuaj. Zam tshaj tias “Nej hloov siab mog, vim Ntuj lub Ceeb Tsheej los txog ze lawm.” Tsoom neeg nug Zam tias lawv yuav ua dab tsi, Zam thiaj hais rau lawv tias “Tus muaj ob lub tsho yuav faib rau tus tsis muaj. Tus muaj mov noj, nws kuj yuav ua li ntawd thiab.” Zam hais rau cov sau se tuaj txais kab ke ntxuav tias “Nej tsis txhob kom luag them tshaj txoj cai txiav”, thiab hais rau cov tub rog tias “Nej txhob quab yuam leej twg, txhob ntxias yuav dab tsi. Nej nyiaj hli raug npaum li cas, nej yuav txaus siab txais li ntawd.”

Thaum Huab Tais Yes Xus tuaj txais kab ke ntxuav ntawm Zam, ces Zam pom Tswv Ntuj tus plig nqes los xws li ib tug nquab los rau saum Yes Xus, thiab hnov ib lub suab nrov saum ntuj tuaj tias “Tus no yog kuv Leej Tub uas kuv nyiam, nws yog kuv qhov chaw zoo siab.” Ces Zam zeem tseeb tias Huab Tais Yes Xus yog Leej Yaj tuaj ris qab ntuj neeg cov txhaum.

Zam cem tus vaj Hes Los vim tus vaj yuav Hes Los Dias uas yog nws tus kwv tus poj niam los ua nws poj niam, ces Hes Los Dias ntxub Zam, nws hais kom Hes Los muab Zam txiav caj dab. Lub Koom Txoos xaiv hnub tim 29 lub 8 hli ua hnub nco txog Zam Ntxuav Plig raug txiav caj dab.