Nyob hauv tiam 16 nyob Aas Kiv teb muaj cov ntseeg tawm tsam lub Koom Txoos nyob Los Mas, ces  Fis Ses thiab Maus Laws nkawd sau ntau tsab ntawv ntuas lawv. Tus vaj Hees Lis 8 (King Henry VIII) xav saw los tswj lub Koom Txoos nyob hauv Aas Kiv thiab nws xav kom kev sib nrauj raug cai. Fis Ses thiab Maus Laws tsis pom zoo, ces nkawd raug txiav caj dab tuag ua tim khawv nyob hauv xyoo 1535.

 ‘Zam Fis Ses’ yog ib tug Leej Choj nyob hauv lub tsev kawm ntawv txheej siab hauv lub teb chaws Aas Kiv. Xyoo 1504 Fis Ses ua Tswv Qhia nyob Los Ses Tes (Rochester). Nws coj lub neej pluag txom nyem thiab kub siab mus saib xyuas cov neeg ntseeg.

Zam Fis Ses tiv tus vaj txoj cai tshiab ob zaug, tus vaj muab nws kaw hauv tsev loj faj ob zaug. Hnub tim 22 lub 6 hli 1535 luag yuav txiav Zam Fis Ses caj dab. Zam Fis Ses hnav Tswv Qhia cov tsoos tsho zoo nkauj xws li nws yuav mus noj rooj tshoob. Zam Fis Ses hais lo lus no tias “Huab Tais, kuv tso siab rau koj!” hais tas nws tso nws caj dab rau ntawm lub laug cam txiav neeg taub hau.

‘Tos Mas Maus Laws’ yog tus pwm tsav tuav Aas Kiv teb tej nyiaj txiag nyob hauv tus vaj lub tuam tsev. Nws yog ib tug pej xeem siab ncaj thiab paub txuj. Tus vaj tso siab rau nws thiab tsa nws tuav tej kab xwm loj. Nws cov phooj ywg foom lus zoo rau nws kom nws ua nom loj zuj zus. Tab sis nws teb lawv tias “Kuv paub tseeb tias tus vaj saib kuv taub hau muaj nqe tsis cuag ib lub nroog Fab Kis.”

Tos Mas Maus Laws yog ib tug neeg luag ntxhi mus li, nws tsis npau taws ib zaug rau leej twg, nws tsis kam ua ib yam dab tsi nkhaus, nws nyiam kawm txuj tas nws sim neej.

Hnub tim 17 lub 4 hli xyoo 1534 tus poj vaj As Nas Npos Les tso cov tub ceev xwm mus ntes Tos Mas Maus Laws mus kaw nyob hauv tsev loj faj. Tos Mas Maus Laws nyob ib xyoos thiab ob hlis hauv tsev loj faj. Nws sau ib phau ntawv hais txog Huab Tais Yes Xus kev raug txom nyem. Nws kuj sau lwm phau ntawv qhuab qhia cov neeg raug kev sim siab.

Hnub uas cov nom txiav txim rau Tos Mas Maus Laws nyob hauv lub tsev txiav txim mas Tos Mas Maus Laws sawv ntsug nyob ntawm sawv daws xub ntiag, nws hais meej rau lawv tias “Kuv tau kawm lub Koom Txoos tej liv xwm xya xyoo lawm. Kuv nrhiav tsis tau lub Koom Txoos ib tug kws txuj hais ib zaug tias ib tug vaj muaj peev xwm tswj lub Koom Txoos nyob hauv nws lub teb chaws.”

Tus vaj Hees Lis 8 kom luag txiav Tos Mas Maus Laws caj dab nyob hauv hnub tim 6 lub 7 hli 1535. Yog ob lis piam tom qab Zam Fis Ses tuag.