Lis Piam Ntshiab yog ib lub lis piam tseem ceeb nyob hauv cov ntseeg Kav Tos Liv, yog lub lis piam kawg hauv Caij Plaub Caug ua ntej yuav txog Caij Hla. Lub Lis Piam Ntshiab muaj 4 hnub tseem ceeb yog li no : Hnub Chiv Nqaum Nplooj, Hnub Tsib Ntshiab, Hnub Rau Ntshiab, thiab Hmo Hla.
Hnub Chiv Nqaum Nplooj, yog hnub nco txog Huab Tais Yes Xus caij tus luj tuaj tov lub nroog Yes Lis Kos mus rau hauv nroog Yes Lus Xas Les xws li ib tug Pleev, cov neeg muab nplooj ntoos los pua kev tos Huab Tais Yes Xus. Tus yeeb yam no qhia tau tias Huab Tais Yes Xus yog tus cawm seej (Mes Xis Yas), thiab Huab Tais Yes Xus yog tus Vaj hauv kev thaj yeeb.
Hnub Tsib Ntshiab, yog hmo Huab Tais Yes Xus noj pluas hmo kawg, yog nco txog Huab Tais Yes Xus tsim lub Cim Yug. Nyob hauv Mas Tais Ntawv Moo Zoo sau tseg tias : Thaum lawv noj mov txog tog, Yes Xus tuav lub ncuav mov, nws hais zaj foom hmoov zoo, nws muab ntais, thiab nws cev rau cov thwj tim, nws hais tias : “Nej txais, nej noj, qhov no yog kuv lub cev.”
Yes Xus kuj tuav ib lub ntim, nws ua ntuj tsaug, nws cev rau lawv, nws hais tias : “Nej sawv daws haus, vim qhov no yog kuv cov ntshav, yog cov ntshav cog lus, uas yuav ntws los daws coob leej cov txhaum.” (MT 26 :26-28)
Tsis tas li xwb, hmo ntawd Huab Tais Yes Xus tseem ntxuav cov thwj tim ko taw thiab. Raws li Leej Ntshiab Zam sau nyob hauv nws phau Ntawv Moo Zoo tias : Thaum yuav txog lub Ntees Hla, Yes Xus paub tias txog nws lub caij hla lub ntiaj teb no rov mus cuag Leej Txiv. Nws nyiam nws cov thwj tim uas nyob hauv lub qab ntuj no, mas nws nyiam lawv mus txog thaum kawg.
Thaum lawv tab tom noj ib pluag hmo, ces dab phem twb nkag mus tshoj Yus Das Kas Lis Yaus, Xis Moos tus tub lub siab kom muab Yes Xus muag. Yes Xus paub tias Leej Txiv tso tas ib puas tsav yam rau hauv nws txhais tes, nws paub tias nws tuaj ntawm Tswv Ntuj tuaj, nws yuav rov mus cuag Tswv Ntuj.
Ces nws sawv ntawm lub rooj mov mus, nws hle tsho, nws muab ib daig ntaub khi rau ntawm nws duav. Nws hliv dej rau hauv ib lub phiab, ces nws ntxuav cov thwj tim ko taw. Nws muab daim ntaub khi ntawm duav los so lawv ko taw.(Z 13:1-5)
Qhov kab ke no yog Huab Tais Yes Xus ua rau lawv pom thiab qhia lawv kom ua li nws tau ua tseg vim qhov no yog tus piv txwv qhia txog txoj kev nyiam. Zam sau tias : Kuv muab ib tug piv txwv rau nej kom nej ua raws li kuv tau ua rau nej. (Z 13:15)
Hnub Rau Ntshhiab, yog hnub Huab Tais Yes Xus raug kev txom nyem thiab taug saum Ntoo Cuam. Qhov no qhia sawv daws txog Huab Tais Tswv Ntuj txoj kev nyiam tib neeg, nws thiaj tso Leej Tub los tuag daws tib neeg cov txim.
Nyob hauv hnub no, muaj 4 tus neeg tau hloov siab tshiab nrog Yes Xus kev tuag; lawv ntseeg, lawv ua tim khawv thiab lawv nqes tes ua.
Tus ib yog tus tub sab raug ntxia saum Ntoo Cuam, nws thov Huab Tais Yes Xus kom nco txog nws; nws hais tias : “Yes Xus, thaum koj mus txog hauv koj lub Ceeb Tsheej, thov koj nco txog kuv.” Ces Yes Xus hais rau nws tias : “Kuv hais tseeb rau koj : Hnub no, koj yuav nrog kuv nyob hauv lub Nras Lom Zem.” (LK 23:42-43)
Tus ob yog Tus xab txheeb sawv ntsug ntawm Yes Xus xub ntiag. Thaum nws pom Yes Xus txoj sia tu li ntawd, nws hais tias : “Tus no yog Tswv Ntuj Leej Tub tiag !” (MK 15 :39)
Tus peb thiab tus plaub yog Yos Xes As Lis Mas Thias thiab tus Fas Lis Xais hu ua Nis Kos Des Mos. Zam Ntawv Moo Zoo piav tias : Thaum tej xwm ntawd tshwm tuaj tas, Yos Xes nyob As Lis Mas Thias tuaj thov Pis Las Tos kom kheev nws txo Yes Xus lub cev. Pis Las Tos tso lus rau Yos Xes. Ces Yos Xes mus txo Yes Xus lub cev. Yos Xes yog Yes Xus ib tug thwj tim, tab sis nws tsis pub luag tej paub vim nws ntshai cov Yus Das. Nis Kos Des Mos kuj tuaj thiab. Nis Kos Des Mos yog tus uas thaum chiv thawj, nws tuaj cuag Yes Xus hmo ntuj. Nws nqa ib cov tshuaj qhwv tuag tuaj : yog txab txiv yoov xyaw txab xyab phij, kwv yees hnyav li ib puas choj.(Z 19 : 38-39)
Hnub Xya Ntshiab los yog Hmo Hla, mas yog hmo ua ntej Huab Tais Yes Xus yuav sawv rov los. Hmo ntawd Huab Tais Yes Xus raug zwm rau hauv qhov ntxa, yog Huab Tais Yes Xus tau so. Yog hnub Yaj Ceeb thiab Yeeb Ceeb raug nres cia, yog li cov ntseeg thiaj yuav tsis ua hauj lwm dab tsi ib hnub nkaus mus txog thaum hnub poob qhov, mas cov ntseeg sawv daws thiaj mam zov hmo tos txais Huab Tais Yes Xus sawv rov los.
LIS PIAM NTSHIAB (HOLY WEEK)
