Ntawv Txoj Cai Ob yog Mais Xes cov lus hais ntuas tsoom His Xas Lais. Cov Yus Das hu ntawv Txoj Cai Ob ua ‘Debarim’ ntxeev ua lus Hmoob yog ‘lo lus’. Tab sis lus Hes Las hu ua ‘Deuteronomion’ txhais tias ‘txoj cai ob’ vim tias txoj cai hauv ntawv Txoj Cai Ob zoo ib yam li txoj cai hauv lwm phau. Qhov txawv mas yog txoj cai hauv ntawv Txoj Cai Ob qhia tias cov His Xas Lais yuav tsum coj txoj cai zoo li cas lawv thiaj yog ‘Tswv Ntuj haiv neeg’.

Xyoo 750 ua Yes Xus ntej, cov His Xas Lais nyob hauv lub tsheej Xas Mas Lias sau ntawv Mais Xes txoj cai raws li ‘txoj kwv huam Txoj Cai Ob’ (Deuteronomic Tradition). Thaum Xas Mas Lias tawg mas cov Les Vis khiav los nyob Yes Lus Xas Les coob leej. Lawv coj ntawv Mais Xes txoj cai los zais cia hauv lub tsheej Yes Lus Xas Les nyob Yus Das teb. Xyoo 610 ua Yes Xus ntej, Yos Xias (Josiah) ua vaj nyob Yes Lus Xas Les, lawv txhim kho lub Tuam Tsev Teev Ntuj mas lawv thiaj pom ntawv Mais Xes txoj cai.

Tom qab cov Yus Das mus nyob txim nyob Npas Npis Los mas lawv thiaj muab Mais Xes cov lus ntuas sau ntxiv rau ntawv Mais Xes txoj cai ua ib phau tshiab; yog ntawv ‘Txoj Cai Ob’.

Ntawv Txoj Cai Ob yog ib phau xav pab tsoom His Xas Lais kom lawv nyiam Tswv Ntuj txoj cai (TCO 6: 2-13) thiab pab kom lawv txawj pom Tswv Ntuj lub txiaj ntsim (TCO 7: 6-11). Cov His Xas Lais tuaj nyob Kas Nas Has teb lawv nyiam Tswv Ntuj mas lawv ntshai tsam tsoom pej xeem yuav mus teev dab raws li cov Kas Nas Has. Cov neeg nyiam Tswv Ntuj thiaj hais tej zaj ntuas Tswv Ntuj haiv neeg kom lawv nyiam Tswv Ntuj, kom lawv txhob saib Tswv Ntuj xws li ib tug tswv tswj nws haiv neeg, tab sis yuav saib Tswv Ntuj yog ib tug txiv coj nws haiv neeg mus taug ib txog kev ntshiab.

Ntawv Txoj Cai Ob rov qab piav txog Tswv Ntuj ‘cawm’ nws haiv neeg ntawm Hais Nkws Tos teb thiab piav txog Tswv Ntuj nrog His Xas Lais cog lus nyob saum lub roob Xis Nais. Ntawv Txoj Cai Ob rov qab piav txog tej ntawd kom cov His Xas Lais to taub zoo tias ‘Tswv Ntuj txoj cai yog ib txog kev nyiam, tsis yog txoj kev yuam neeg.’

Ntawv Txoj Cai Ob txhib tsoom His Xas Lais kom teev Tswv Ntuj nyob pem Yes Lus Xas Les xwb. Ntawv Txoj Cai Ob tseev kom cov thawj coj nyias muaj nyias txoj kab xwm; yam li cov Txwj Laus Tiv Thaiv, cov Vaj, cov Leej Choj, thiab cov Yaj Saub.

Txawm tias ntawv Txoj Cai Ob pab cov His Xas Lais kom nyiam Tswv Ntuj, tsis kav Txoj Cai Ob tau ua ib lub nra hnyav rau tsoom sid thiab. Muaj 3 lub nra hnyav rau cov His Xas Lais ris:

1. Cov His Xas Lais nyob deb ntawm lub tsheej Yes Lus Xas Les ntsib teeb meem cev txim rau Tswv Ntuj.

2. Cov Kws Ntawv ntxiv ntau yam rau Txoj Cai ua rau sawv daws ceeb laj coj Txoj Cai kom thoob.

3. Cov His Xas Lais muaj ib lub tswv yim tshiab tias tus twg coj tau Txoj Cai tas nrho mas tus ntawd thiaj yog tus neeg ncaj, ces sawv daws tsis nco pom lub ntsiab tob tob hauv Txoj Cai qhia kom sis nyiam sis hlub.

Ntawv Txoj Cxai Ob faib tau ua 4 ntu:

1. Mais Xes ntuas cov His Xas Lais kom nyiam Tswv Ntuj vim Tswv Ntuj pheej xeeb rau nws haiv neeg (TCO 1-4).

2. Cov lus ntuas cov His Xas Lais kom ua raws Txoj Cai tas siab tas ntsws mas lawv thiaj tsim nyog ua haiv neeg Tswv Ntuj xaiv (TCO 5-11).

3. Mais Xes ntuas cov His Xas Lais tias thaum lawv mus txog lub teb chaws Tswv Ntuj cog lus pub rau lawv, mas lawv yuav ua zoo li cas (TCO 12-26).

4. Mais Xes cov hnub kawg thiab nws cov lus foom hmoov zoo thiab phem (TCO 27-34).