Leej Ntshiab Tes Les Xas lub npe hu ua ‘As Ntses Zes’ (Anjezë Gonxhe Bojaxhiu). Nws yug hnub tim 26 lub 8 hli 1910, nyob hauv lub nroog Xas Kos Ntses (Skopje Town) Mas Xes Dos Nias teb.
Niaj hnub chiv, nws hnov tej tus tub tshaj Ntuj Lus piav tias nyob As Fis Kas teb thiab Is Ntias teb mas cov neeg tsis tau hnov ib lo hais txog Yes Xus Pleev kev nyiam kev hlub neeg muaj coob kawg nkaus. Tes Les Xas hnov tej lo lus ntawd mas nws xav mus tshaj Ntuj Lus nyob pej kum teb. Tes Les Xas nrog tus Txiv Plig hauv nws lub zos tham txog nws zaj tswv yim, ces tus Txiv Plig thiaj hais nws tias “Koj xav coj lub neej tsob hwb luag tej ob cag thiab koj xav tshaj Ntuj Lus rau cov neeg pluag lod? Koj xav li ntawd, mas yog ib qho zoo kawg. Kuv hais rau koj paub tias yog koj xav txog qhov ntawd, mas koj muaj lub siab nyob tiaj tus. Qhov ntawd yog ib yam zeem tseeb tias Huab Tais Tswv Ntuj yeej xav kom koj los mus coj lub neej zoo li ntawd tiag.”
Thaum Tes Les Xas hnub nyoog 18 xyoo ntau me ntsis, nws sawv kev mus rau lub kuj cuab Ais Lis, nws mus xyaum coj lub neej ua Leej Phauj nyob hauv Los Les Tos (Loreto convent school). Hnub tim 25 lub 5 hlis xyoo 1931 thaum cog lus thawj zaug, nws xaiv lub npe ‘Tes Les Xas’ vim nws nyiam Leej Ntshiab Tes Les Xas nyob As Xis Xis. Hnub tim 10 lub 9 hli 1946 Phauj Tes Les Xas tau koom lub rooj sau siab thiab hnov ib lub suab hu nws nyob hauv nruab siab kom nws mus saib cov neeg pluag txom nyem. Tau ib xyoos tom qab mas Phauj Tes Les Xas thiaj sawv kev ntawm Ais Lis teb mus rau lub kuj cuab Is Ntias. Nws tuaj nyob hauv lub nroog Kas Kws Tas (Calcutta).
Thaum Phauj Tes Les Xas tuaj txog lub nroog ntawd, mas nws pib qhia ntawv Aas Kiv rau ib pab ntxhais hluas nplua nuj tab sis nws lub siab yuj pluj plaws mus rau cov neeg pluag, cov neeg tsis muaj tsev nyob thiab cov me nyuam txom nyem pw tom tej ntug kev. Phauj Tes Les Xas nco txog Yes Xus tej lus tias “Nej tau ua npaum li cas rau cov me tshaj hauv kuv tsoom kwv, mas yog nej tau ua rau kuv kiag” (MT 25: 40). Tsis tas li ntawd xwb nws kub siab hais niam Mab Liab lo lus tias “Kuv yog Huab Tais tus ntxhais txib; kuv xav kom muaj tuaj raws li koj hais”, ces nws tso lub tsev kawm ntawv tseg, nws mus fim cov neeg pluag nyob hauv Yes Xus lub npe. Phauj Tes Les Xas hais tias “Txhua zaus peb mus tsham cov neeg pluag, los peb pub mov rau luag tej noj, los peb muab ris tsho rau luag hnav thiab peb nplij cov neeg muaj mob hnyav, mas zoo li peb tab tom mus tsham Huab Tais Yes Xus ntag, vim Huab Tais Yes Xus nyob txawm hauv cov neeg pluag.”
Xyoo 1948 tus Tswv Qhia hauv lub nroog Kas Kws Tas tso lus rau Phauj Tes Les Xas mus tsham xyuas cov neeg pluag ywj nws siab. Phauj Tes Les Xas txhob txwm mus txhawb nqa cov neeg txom nyem thiab cov uas tsis muaj tsev nyob; zoo li cov me nyuam ntsuag uas niam thiab txiv tau tso pov tseg mas Phauj Tes Les Xas pub mov rau lawv noj, cov neeg uas tsis muaj zog ntxuav lawv lub cev mas Phauj Tes Les Xas ntxuav lawv kom huv. Nws tau ua zoo li ntawd ib xyoos.
Muaj ib hnub Phauj Tes Les Xas txais ib tug ntxhais hluas tuaj nyob hauv nws lub tsev. Tus ntxhais hluas ntawd txiav txim siab nrog Phauj Tes Les Xas koom ua tib lub luag hauj lwm saib xyuas cov neeg pluag. Tsis ntev hli tom qab kuj muaj 4-5 tug ntxhais tuaj koom nyob ua ke. Thaum Phauj Tes Les Xas pom tias qhov ntawd yog ib qho tseem ceeb, mas nws thiaj li tsim lub koom haum tshiab hu ua ‘lub koom haum Leej Phauj tshaj kev nyiam kev hlub’ (The Missionaries of Charity). Thaum ntawd yog hnub tim 7 lub 10 hli xyoo 1950. Sawv daws hu nws ua ‘Niam Phauj’.
Niam Phauj Tes Les Xas lub koom haum txoj cai lub ntsiab yog ‘Peb yuav kub siab hlub tsoom neeg sawv daws, yam li cov neeg ntseeg thiab cov neeg tsis tau ntseeg txog Tswv Ntuj, peb yuav hlub sawv daws sib npaug zos. Qhov loj thiab tseem ceeb tshaj yog cov neeg pluag.’ Nws hais rau cov Leej Phauj hauv lub koom haum tias “Ib tug tib neeg twg taug txoj kev nyiam kev hlub luag tej raws qhov tseeb, mas nws tej siab ntsws yuav los ntshav. Niaj hnub peb yuav tsa muag los ntsia Huab Tais Yes Xus dai ntawm tus Ntoo Cuam; Huab Tais Yes Xus muab tas nws tus kheej los txi Ntuj yog vim nws nyiam thiab hlub tas tsoom neeg sawv daws. Vim li ntawd, peb yuav taug txoj kev nyiam kev hlub luag tej raws li Huab Tais Yes Xus tus piv txwv; peb yuav muab tas peb lub neej los txi Ntuj nyob hauv Huab Tais Yes Xus Pleev lub npe.”
Niam Phauj Tes Les Xas qhib ib lub tsev txais cov neeg laus thiab cov neeg pluag. Lub tsev ntawd nyob ze ntawm ib lub tuam tsev cov His Ntus niaj hnub sib sau los teev hawm lawv tus poj huab tais Khas Lis. Tus thawj saib lub tsev teev hawm His Ntus thiab tseem hwv ib cov pej xeem mas chim siab heev uas lawv pom tias nyob ze ntawm lawv lub tsev teev hawm muaj ib pab Leej Phauj saib cov neeg laus thiab cov neeg pluag nyob ntawd, ces lawv xav ntiab Niam Phauj Tes Les Xas kom khiav tawm ntawm qhov chaw ntawd mus.
Muaj ib hnub ib tug ntaus thawj hauv lub nroog Kas Kws Tas tuaj txog lub tsev saib cov neeg txom nyem ntawd. Nws muaj ib tsab ntawv nyob hauv nws tes; yog tsab ntawv sau tuaj ntiab cov Leej Phauj kom tawm mus. Tus ntaus thawj ntawd chaws mus hauv lub tsev, nws pom ib pab Leej Phauj tab tom pub mov rau 200 tawm leej neeg noj. Lawv ntxuav cov neeg txom nyem thiab cov neeg muaj mob hnyav. Tus ntaus thawj pom Niam Phauj Tes Les Xas txhos caug rawv tu ib tug neeg zoo li ntawd, ces ua rau nws siab muag tag, nws hais tsis tau ib lo lus hnyav rau Niam Phauj Tes Les Xas. Thaum nws tawm mus sab nraud, mas nws tsis muab nws zaj tswv yim zais. Nws hais kiag rau cov neeg coj txoj cai His Ntus tias “Nyob hauv nej lub tsev teev hawm nej tus poj huab tais Khas Lis, mas tsuas yog ib tug mlom uas neeg ob txhais tes puab xwb. Hos nyob hauv cov Leej Phauj lub tsev, mas thiaj muaj ib tug poj huab tais muaj nqaij muaj txha tiag.”
Muaj ib zaug, ib tug tub tseem hwv nyob hauv lub nroog Kas Kws Tas tuaj xyuas Niam Phauj Tes Les Xas. Nws nug tias “Phauj, kuv paub tias koj thov Huab Tais Tswv Ntuj los pab kuv, mas kuv ua koj tsaug ntau. Thov kom koj hais qhov tseeb rau kuv saib koj puas xav kom kuv tig los ua neeg ntseeg txog Yes Xus zoo li koj?”
Niam Phauj Tes Les Xas hnov lo lus ntawd, mas nws teb tias “Ib tug tib neeg twg paub ib hom tshuaj zoo, yog leej twg tau noj thiaj yuav rov zoo. Xam pom tias tus neeg ntawd yuav zoo siab mus qhia nws cov kwv tij thiab nws cov phooj ywg sawv daws txog hom tshuaj ntawd. Kuv paub ib hom tshuaj zoo tshaj plaws ntag, yam tshuaj ntawd yog kuv txoj kev ntseeg txog Yes Xus. Hauv kuv nruab siab, txoj kev ntseeg yog qhov muaj nqes tshaj plaws yuav muab los piv rau lwm yam tsis tau, ces kuv xav faib txoj kev ntseeg no rau lwm tus, saib leej twg thiaj yuav paub Huab Tais Yes Xus Pleev thiab yuav nyiam nws tas siab. Txawm li cas los kuv nco ntsoov tias ib tug tib neeg twg yuav tig los ntseeg mas nyob ntawm Huab Tais Tswv Ntuj lub siab xav. Saib Huab Tais Tswv Ntuj yuav xaiv leej twg los mus taug txoj kev ntseeg xws li cov Leej Phauj uas nyob ntawm no. Hais qhov tseeb rau koj tias kev ntseeg yog Tswv Ntuj ib lub txiaj ntsim uas loj kawg.”
Muaj ib hnub Niam Phauj Tes Les Xas tab tom ntxuav ib tug pog laus. Nws muab ib cov tshuaj rau tus pog laus noj thiab. Ib ntsis tus pog laus thiaj nug Niam Phauj Tes Les Xas tias “Me Ntxhais, tim li cas koj ua zoo ua luaj no rau kuv?” Niam Phauj Tes Les Xas teb tias “Yog vim kuv hlub koj thiab yog vim Tswv Ntuj hlub koj.” Ces tus pog laus hais ib lo tias “Hauv kuv lub neej mas tsis tau muaj ib zaug uas ib tug tib neeg hais lo lus no rau kuv ib zaug li, thov koj rov hais dua!”
Xyoo 1989 Niam Phauj Tes Les Xas tau ib tug mob plawv, tsis kav nws tseem muab siab rau ua nws cov hauj lwm mus ntxiv, ces xyoo 1996 Niam Phauj Tes Les Xas mob hnyav, nws pw txaj. Nws hais tias “Thaum peb muaj mob muaj nkeeg, mas peb yuav zoo siab luag ntxhi, vim tej yam hnyav ntawd mas Tswv Ntuj tau hu peb los ris. Yog ib tug tib neeg twg muaj lub siab loj siab tawv mas nws ua tau ob yam ntawd ua ke, yam li nws ris kev nyuaj siab thiab kev mob nkeeg, nws zoo siab thiab luag ntxhi rau Tswv Ntuj.”
Txog hnub tim 5 lub 9 hli 1997 Niam Phauj Tes Les Xas txoj sia tu. Vaj Qhia Zam Paj Lug tim 2 qhuas txog Niam Phauj Tes Les Xas cov hauj lwm kawg, ces tom qab Niam Phauj Tes Les Xas tuag tau 6 xyoo, Vaj Qhia tsa Niam Phauj Tes Les Xas ua Leej Hmoov Zoo. Txog xyoo 2016 lub 9 hli tim 4 Vaj Qhia Fas Ntshis Kus zeem tseeb tias Niam Phauj Tes Les Xas yog lub Koom Txoos ib tug Leej Ntshiab.
Leej Ntshiab Tes Les Xas hais txog kev teev hawm Tswv Ntuj tias “Yog ib tug tib neeg twg hais tias ntawm kuv mas kuv teev hawm Tswv Ntuj zoo li no; yam li kuv thov Tswv Ntuj pab txhawb nqa kuv tej siab ntsws, kuv tsis xav txog lwm yam. Kuv hais qhia nej paub tias tus neeg ntseeg no ua tau zoo lawm, tab sis qhov muaj nqes tshaj thiab ntxim Tswv Ntuj siab mas yog qhov tias peb yuav tso peb lub neej thiab txoj sia nyob hauv Tswv Ntuj txhais tes, peb yuav cia Huab Tais Tswv Ntuj los ua tus tswj peb thiab kav peb lub neej kom xis Tswv Ntuj siab. Tus neeg ntseeg kuj yuav qhib nws lub siab los txais Huab Tais Tswv Ntuj Lo Lus, nws yuav muab siab rau mloog Tswv Ntuj Lo Lus los kaj nws lub neej. Yog tias nws ua qhov ntawd, mas nws zaj teev Tswv Ntuj yuav muaj nqes tshaj.”
Leej Ntshiab Tes Les Xas hais ntxiv tias “Niaj Hnub Chiv kuv mus txais lub Cim Yug thiab kuv ua ob yam no: Kuv ua Yes Xus tsaug rau qhov tias nws tau pab nres kuv lub neej thiab kuv txoj sia mus li ces kuv thiaj muaj lub siab ruaj nreb nyob ua Leej Phauj li qub thiab tsis thim rov qab. Tsis tas li ntawd, kuv thov Huab Tais Yes Xus pab qhia kom kuv txawj teev Tswv Ntuj raws txoj kev tseeb tiag.”
Leej Ntshiab Tes Les Xas hais tej lo lus txhib sawv daws zoo li no tias “Peb yuav tsis txhob hais tias cov yuav tau mus pem Tswv Ntuj lub Ceeb Tsheej yog peb, vim peb yog cov neeg ntseeg txog Yes Xus hos lwm pab neeg mas lawv tsis yog lawm! Peb yuav tsis txhob cais neeg zoo li ntawd, rau qhov tias tas tsoom neeg huv tib si nyob thoob ntiaj teb mas Huab Tais Tswv Ntuj yog tus tsim los kom xws li nws tus duab. Yog vim li ntawd, hnub peb tas txoj sia nyob ntiaj teb no lawm, mas Huab Tais Tswv Ntuj yuav ntsuas peb cov hauj lwm. Yam li nws yuav luj peb lub neej nyob ntiaj teb mus raws kev ncaj ncees. Peb tsoom neeg huv tib si nyias yuav hnov Huab Tais Ntuj Tswv Ntuj lo lus hais rau nyias tias ‘Koj tau ua zoo li cas rau cov neeg pluag?’ Huab Tais Yes Xus kuj yuav hais lo lus no rau peb sawv daws, vim tej lo lus tseem ceeb uas tau sau tseg hauv Ntawv Moo Zoo hais tias ‘Nej tau ua li cas rau cov me tshaj hauv kuv tsoom kwv, mas yog nej tau ua rau kuv lawm’ (MT 25: 40).
Huab Tais Tswv Ntuj tsim peb ua neeg nyob ntiaj teb no, kom xwv peb tau kub siab tsim txoj kev sis nyiam sis hlub. Cov neeg uas peb yuav tsum hlub yog leej twg? Cov neeg ntawd yog peb tsev neeg ntag, tom qab ntawd mas yog cov neeg nyob ze yus los yog cov neeg nyob deb ntawm yus.
Ib tug tib neeg twg yog nws xav tias kuv xav kom txoj kev kaj lug ri mus hauv tas tsoom neeg nyob ntiaj teb, mas tus neeg ntawd yuav tsum xub hlub nws tsev neeg ua ntej; kom nws tsev neeg tau nyob kaj lug thiab ua ib tug piv txwv zoo. Thawj yam tseem ceeb hauv ib tsev neeg twg mas yog txoj kev teev hawm Tswv Ntuj; yog ib tsev neeg twg nquag sib sau los teev Ntuj ua ke, mas tsev neeg ntawd yuav nyob kaj siab lug thiab txoj kev ntseeg yuav nyob ruaj nreb.”
Leej Ntshiab Tes Les Xas hais ntxiv tias “Peb txoj kev nyob kaj lug yog txhawv ntawm peb txoj kev ntseeg txog Huab Tais Yes Xus vim Huab Tais Yes Xus tau sawv rov los thiab muaj txoj sia tshiab. Tsis tas li ntawd xwb, nyob hauv peb nruab siab peb tseem tos nrhw txog lub neej nyob hauv Tswv Ntuj lub Ceeb Tsheej. Yog ib tug tib neeg twg nws muab nws lub neej los npuab Huab Tais Yes Xus, mas Tswv Ntuj lub Ceeb Tsheej twb nyob ntawm tus neeg ntawd lawm.
Nyob hauv ntawv Moo Zoo peb niaj hnub hnov Huab Tais Yes Xus hais rau sawv daws tias ‘Nej tuaj cuag kuv, vim tias kuv lub siab zoo thiab tsis muab hlob. Tas nej sawv daws uas nej raug kev iab kev khwv thiab ris nra hnyav nkag qees, nej tuaj cuag kuv. Kuv yuav ua kom nej muaj chaw so los siav.’ Niaj hnub peb nco txog lo lus no mas thaum txog lub caij peb mus txais lub Cim Yug peb yuav muab peb lub siab nyiam lub siab hlub los cob rau Huab Tais Yes Xus. Hais qhov tseeb rau nej tias Huab Tais tshaib nqhis txog peb txoj kev nyiam kev hlub kawg. Peb txoj kev nyiam kev hlub Huab Tais yog qhov zoo tshaj plaws nyob ntiaj teb no.”
Leej Ntshiab Tes Les Xas tseem hais txog lub neej nplua nuj mus raws qhov tseeb zoo li no tias “Ib tug tib neeg twg nws muab tas nws tus kheej los zwm rau nws tej nyiaj txiag, mas xam pom tias nws yog ib tug neeg nplua nuj ntag. Tab sis hais tseeb tias nws tej zaj tswv yim ntawd yuam kev loj kawg. Yog ib tug tib neeg twg nws muab tas nws txoj sia thiab nws lub neej los hlub cov neeg pluag, mas nws thiaj yog ib tug neeg nplua nuj mus raws qhov tseeb tiag.”
Leej Ntshiab Tes Les Xas Kas Kws Tas (St. Teresa of Calcutta)
