Vaj Qhia Nqes Nkos Lis yug xyoo 540 hauv yim neeg tub nom xeem As Nis Xis. Nqes Nkos Lis raug xaiv ua tus tswj lub tuam ceeb Los Mas, tab sis vim nws nyiam coj lub neej raws li Yes Xus cov lus qhia, ces Nqes Nkos Lis thiaj txiav siab tawm los ua Txiv Twj Cuab.
Tom qab Nqes Nkos Lis txiv tuag tas, Nqes Nkos Lis muab lawv ib lub tsev los ua tsev rau cov Txiv Twj Cuab nyob. Lub tsev no Nqes Nkos Lis muab cev rau Leej Ntshiab As Nres.
Xyoo 579 Nqes Nkos Lis ua Vaj Qhia Pes Las Ntsis Yus tim 2 (Pope Pelagius II) tus tiam lis nyob hauv nroog Koos Taas Tis Nos Pos Lis tau 6 xyoo, ces nws mam rov qab los rau tuam ceeb Los Mas.
Tim 3 lub 9 hlis xyoo 590 Nqes Nkos Lis raug xaiv ua Vaj Qhia tswj lub Koom Txoos yog tus Vaj Qhia tim 64.
Thaum ntawd nyob Aws Los Pas teb muaj xwv txheej ntau yam, Vaj Qhia Nqes Nkos Lis txhawj txog tej xwv txheej ntawd, nws thiaj tuav tes nrog Zes Mas Nias teb, Xyis Pas Yas teb, Fab Kis teb, As Fis Kas thiab cov teb chaws nyob Aws Los Pas toob fab daws tej teeb meem tswj teb chaws.
Vaj Qhia Nqes Nkos Lis xa Txiv Plig Aus Nkus mus tshaj kev ntseeg txog Yes Xus nyob Aas Kiv teb thiab nws xav tsim lub Koom Txoos kav tas Aas Kiv teb, tab sis nws tsis xav kom cov tub tshaj Ntuj Lus muaj teeb meem nrog cov neeg tseem tsis tau ua Ntuj kev cai, nws thiaj sau ntawv mus ntuas lawv tias “Nej yuav tsis txhob rhuav cov tsev teev pej kum dab, nej yuav muab dej foom hmoov zoo los ntxuav lawv tej tsev teev dab, thiab nej yuav tsa thaj txi Ntuj rau hauv. Nej yuav muab cov Leej Ntshiab tej pob txha los rau sawv daws hwm. Nyob tej qhov chaw uas yav thaud lawv nquam paj nquam nruas teev pej kum dab, mas nej yuav hu lawv tuaj mus nquam paj nquam nruas hwm peb tus Huab Tais Yes Xus. Niaj xyoo, lawv muaj lub hnub nyoog ua tsev nplooj thiab ua rooj qav, mas nej yuav cia lawv ua li ntawd ntxiv mus, tab sis nej yuav qhia kom lawv hwm cov tim khawv ntshiab. Nej cia lawv taug lawv txoj kev lom zem sab nraud li yav thaud, nej thiaj yuav tau kev ntuas kom lawv xyaum nyiam txoj kev lom zem nyob hauv nruab siab. Tej haiv neeg uas ib txwm lawv yeej coj kam ib tug yam ntxwv qus, mas nej yuav kom lawv ua ib zaug tso pov tseg tas huv tib si tsis tau. Yuav xav nce mus saum ib lub roob, mas yuav dhia ib plhaws kom mus txog saum lub roob tsis tau; yus yuav maj mam rhais ruam zuj zus thiaj txog saum lub roob tau.”
Vaj Qhia Nqes Nkos Lis tseem kho cov kab ke txi Ntuj dua tshiab thiab tsim cov zaj teev Ntuj ‘Nqes Nkos Lias’.
Vaj Qhia Nqes Nkos Lis hlub thiab khuv leej cov neeg pluag txom nyem, nws tau rhuav tsab cai them nyiaj rau cov Leej Choj thaum lawv mus ua ntees xa plig thiab ua lub Cim Cog Lus rau tsoom pej xeem.
Lub Koom Txoos nyob Npis Xaas los yog ‘Os Thos Dos’ xav kom Vaj Qhia Nqes Nkos Lis mus txais lub mom ‘Ais Kas’ tswj cov ntseeg nyob Koos Taas Tis Nos Pos Lis tiam sis Vaj Qhia Nqes Nkos Lis tsis kam, nws hais tias lub Koom Txoos tsuas muaj tib lub theej kiab xwb yog lub mom Vaj Qhia nyob hauv Los Mas.
Vaj Qhia Nqes Nkos Lis nyiam ua ib tug neeg me, nws hais tias tus ua Vaj Qhia tsis yog tus tswj thiab kav tsoom neeg ntseeg, tiam sis Vaj Qhia yog Huab Tais Tswv Ntuj cov tub tsob hwb tus tub txib.
Hnub tim 12 lub 3 hlis xyoo 604 Vaj Qhia Nqes Nkos Lis thiaj tau tso ntiaj teb no tseg. Lub Koom Txoos saib Vaj Qhia Nqes Nkos Lis yog Koom Txoos cov kws txuj, xws li Leej Ntshiab As Nplos Xyus thiab Leej Ntshiab Aus Nkus Tis Nus nyob His Pos.
Leej Ntshiab Vaj Qhia Nqes Nkos Lis (St. Pope Gregory the Great)
