Cov lus nyob hauv Lus Kas ntawv Moo Zoo zaj 1, qib 1 txog qib 4 hais li no: Tes Os Fis Los, tus nto koob meej zoo, twb muaj ntau leej cev tes sau ib zag piav tej xwm tshwm sim nyob hauv nruab nrab peb lawm. Lawv sau tseg raws li cov uas txij lub hauv paus los, lawv ua tim khawv pom thiab lawv ua lo lus cov tub txib, ces lawv coj tej xwm ntawd los piav rau peb paub. Yog vim li ntawd, kuv thiaj tau tshuaj tej xwm ntawd txij lub hauv paus los tib si, ces kuv txiav tias kuv yuav sau ib zag muaj paus muaj ntsis tseg rau koj. Koj thiaj yuav pom tseeb tias cov lus qhia uas koj txais los lawm, yog lus qhia khov kho tiag (LK 1: 1-4).
Thaum Yes Xus rov mus cuag nws Leej Txiv nyob saum ntuj raws li peb hais kam los lawm, Yes Xus cov thwj tim uas lawv tau nrog Yes Xus ua ke nraim 3 xyoos, lawv tau hnov Yes Xus tshaj nws cov lus ntau zaus. Lawv tau pom Yes Xus ua nws tej hauj lwm hauv lub teb chaws, mas tam sim ntawd Yes Xus cov thwj tim tshaj Yes Xus cov lus thiab Yes Xus cov hauj lwm rau ib zeej tsoom paub. Lawv yuav tsum hais cov lus tseem ceeb, vim cov neeg tuaj thov kom lawv qhia Yes Xus cov lus, mas ntau leej twb yog tej tus tau pom Yes Xus zaum puav nyob hauv lawv lub zos los nyob hauv lawv lub nroog lawm. Ces Yes Xus cov thwj tim thiaj yuav tsum ua ib co neeg xyuam xim piav txog cov hauj lwm uas Yes Xus ua rau sawv daws mloog.
Yes Xus cov thwj tim lawv tsis tos ntev, ces lawv thiaj pib sau Yes Xus tej lo lus tseg. Ntshai muaj tej tus lawv twb pib sau tseg thaum lawv tseem nrog Yes Xus nyob ua ke lawm. Zoo li Mas Tais uas nws yog ib tug neeg sau se, thiab Zam uas yog ib tug hluas paub ntawv zoo, mas lawv yeej pib sau Yes Xus tej lo lus tseg cia thaum ntxov lawm. Tab sis lawv tsis paub muab los ua tej phau ntawv piav Yes Xus lub neej, txij lub caij Yes Xus yug los mus txog lub caij Yes Xus rov mus cuag nws Leej Txiv. Tab sis nyem no, peb muaj 4 phau ntawv Moo Zoo, yog Mas Tais ntawv Moo Zoo, Mas Kos ntawv Moo Zoo, Lus Kas ntawv Moo Zoo thiab Zam ntawv Moo Zoo. Cov neeg nyob tas ntiaj teb kawm Yes Xus cov lus thiab lub tswv yim nyob hauv 4 phau ntawv Moo Zoo ntawd los.
Cov kws txuj kawm cov ntawv Hes Nplaws thiab cov ntawv Hes Las xws li luag hais txheej thaud, mas lawv xav tias tus xub sau nws phau ntawv Moo Zoo yog ‘Mas Kos’. Tab sis Mas Kos tsis yog ib tug hauv 12 tus Hauv Paus Xa Lus tau nrog Yes Xus nyob. Mas Kos yog Pob Zeb ib tug thwj tim.
Mas Kos yog lub npe Los Mas uas lawv tis tom qab rau Pob Zeb tus thwj tim Zam. Nws niam xub tau txais kev ntseeg, ntshai yog txais ntawm tus Hauv Paus Xa Lus Pob Zeb los. Mas Kos niam hu ua Mab Liab, nws muaj ib lub tsev nyob Yes Lus Xas Les. Cov neeg ntseeg nyob Yes Lus Xs Les sib txoos kam nyob hauv nws lub tsev. Mas Kos muaj ib tug kwv tij hu ua ‘Npas Nas Npes’, nws yog ib tug Les Vis tuaj ntawm Kws Plos tuaj.
Chiv thawj Mas Kos mus nrog Paj Lug thiab Npas Nas Npes nkawd tshaj Ntuj Lus rau pej kum teb. Tab sis thaum lawv tuaj txog Pes Zes nyob Paas Fis Lias teb, mas nws rov qab los nyob Yes Lus Xas Les. Thaum ntawd, Paj Lug tsis zoo siab rau Mas Kos, tab sis ib ntus tom qab Mas Kos rov mus nrog Paj Lug tshaj Ntuj Lus. Mas Kos nrog Paj Lug nyob thaum Paj Lug nyob txim thawj zaug. Mas Kos kuj tau pab Pob Zeb tshaj Ntuj Lus thiab. Mas Kos thiaj khaws Pob Zeb cov lus los sau tseg ua phau Ntawv Moo Zoo.
Mas Kos faib nws phau ntawv ua 5 ntu loj: ntuj 1 hais txog Yes Xus txais lub Cim Ntxuav; ntu 2 hais txog Yes Xus tshaj lub Moo Zoo nyob Nkas Lis Lais teb; ntu 3 hais txog thaum Yes Xus tawm ntawm Nkas Lis Lais teb mus rau cov pej kum teb; ntu 4 Yes Xus mus rau Pes Les As, Yes Lis Kos, thiab Yes Lus Xas Les; ntu 5 Yes Xus raug kev tuag thiab sawv rov los.
Mas Kos Ntawv Moo Zoo lub ntsiab loj mas yog nws xav qhia tias Yes Xus yog tus cawm lub ntiaj teb uas tsoom sid tsis to taub nws thiab tsis txais nws.
Mas Kos cev Yes Xus zoo li cas? Mas Kos cev Yes Xus yog Leej Pleev raug tuag nyob saum ntoo cuam; Yes Xus yog Tswv Ntuj Leej Tub; tab sis zoo li Yes Xus ua tsis tau kom tsoom sid saib nws loj; Yes Xus txoj kev tuag yog nws txoj kev yoog raws li Tswv Ntuj yeej ib txwm npaj; Yes Xus yeej paub tias tsoom Yus Das yuav tsis to taub nws txoj kev cawm neeg.
‘Mas Tais’ yog ib tug thwj tim uas tau nrog Yes Xus mus los 3 xyoos ua ke. Thaum nws tsis tau ntsib Yes Xus, mas nws yog ib tug neeg sau se. Mas Tais yog As Fes tus tub. Mas Kos thiab Lus Kas hu Mas Tais ua ‘Les Vis’.
Thaum Yes Xus rov mus saum ntuj lawm, Mas Tais tau ua ib tug Xib Hwb qhia Yes Xus lub Moo Zoo tas ib sim neej rau cov xav txais lub Cim Ntxuav. Nws pib sau Yes Xus cov lus khaws tseg cia ntxov lawm. Thaum tiam 2 mas cov sau ntawv nyob hauv lub Koom Txoos hais tias Mas Tais yog tus sau thawj phau Ntawv Moo Zoo; nws sau ze ntawm xyoo 40 rau 50. Lawv hais tias Mas Tais sau Yes Xus cov lus ua lus Hes Nplaws, yam li lus As Las Mais. Yog xyoo 62 rau 70 Mas Tais cov thwj tim thiaj mam sau Mas Tais ntawv Moo Zoo ua lus Hes Las xws li peb niaj hnub twm. Thaum ntawd mas lub tsheej Yes Lus Xas Les tseem tsis tau tawg.
Mas Tais ntawv Moo Zoo, phim cov neeg Yus Das, vim nws yog ib tug Xwb Hwb Yus Das qhia cov Yus Das. Cov ntau xav tias Mas Tais sau los qhia cov ntseeg nyob As Nthias Kias. Mas Tais phau ntawv Moo Zoo ntev dua cov me ntsis. Nws sau tus txheej txheem meej kawg; yam li thaum nws yuav cev ib zag qhia kev cai mas nws xub cev ib co hwj huam yees ntxwv pab yus lub tswv yim kom to taub zaj ntawd zoo. Mas Tais sau muaj ntu qhib Yes Xus lub neej thiab ntu xaus Yes Xus lub neej.
Mas Tais phau ntawv faib ua 7 zaj tshaj txog Ntuj lub Ceeb Tsheej zoo li no:
1) Yes Xus lub neej zais ntshis;
2) Yes Xus tshaj txoj cai tshiab kav Ntuj lub Ceeb Tsheej;
3) Yes Xus nrog nws cov thwj tim mus tshaj txog Ntuj lub Ceeb Tsheej;
4) Yes Xus cov paj lug hais txog Ntuj lub Ceeb Tsheej;
5) Ntuj lub Ceeb Tsheej pib sawv;
6) Tshuav tsis ntev Ntuj lub Ceeb Tsheej yuav tawm tuaj;
7) Lub cim uas Ntuj lub Ceeb Tsheej pib sawv.
Mas Tais cev Yes Xus zoo li cas? Mas Tais hais tias Yes Xus yog tus uas ib txwm cov Yaj Saub xub hais txog, Yes Xus yog tus tuaj tshaj cov txhooj tshiab kav Tswv Ntuj lub Ceeb Tsheej, Yes Xus yog Tswv Ntuj Leej Tub, Yes Xus yog tus tsim lub Koom Txoos, Yes Xus muab lub Koom Txoos uas yog Tswv Ntuj haiv neeg tshiab txawb rau zaum Pob Zeb.
‘Lus Kas’ yog ib tug neeg teev cov pej kum dab nyob As Nthias Kias hauv Xis Lias teb, nws yog ib tug kws tshuaj. Ntshai xyoo 40 tej ces Lus Kas txais kev ntseeg, nws tau mus nrog Paj Lug tshaj Ntuj Lus ntev xyoo nyob hauv cov teb chaws zwm rau tseem hwv Los Mas. Thaum Paj Lug caij nkoj ntawm Xes Ntxas Les mus txog Los Mas, mas Lus Kas nrog Paj Lug thiab nws ua Paj Lug luag lub caij Paj Lug nyob hauv tsev loj faj nyob Los Mas.
Tej zaum Lus Kas sau nws phau ntawv Moo Zoo nyob As Kas Yas hauv Hes Las teb ze ntawm xyoo 61-63 los yog xyoo 75 tej. Lus Kas ua zoo tshuaj xwm tas nws mam sau. Thaum Lus Kas sau nws phau ntawv Moo Zoo, nws vam txog 3 yam: 1) Nws muab Mas Kos ntawv Moo Zoo pab nws, 2) Nws kuj muab Mas Tais thawj phau ntawv uas Mas Tais sau ze xyoo 45 rau 50 los pab nws, 3) Nws tseem muab ib co lus uas nws khaws tau ntawm cov Koom Txoos xub tau txais kev ntseeg los.
Lus Kas phau ntawv Moo Zoo muaj 7 ntu: yam li Yes Xus lub neej zais ntshis, Yes Xus npaj mus tshaj lub Moo Zoo, Yes Xus tshaj lub Moo Zoo, Yes Xus tshaj lub Moo Zoo nyob Nkas Lis Lais teb, Yes Xus tshaj lub Moo Zoo nyob Yes Lus Xas Les, Yes Xus kev tuag, Yes Xus sawv rov los.
Lus Kas cev Yes Xus zoo li cas? Nws cev zoo li Mas Kos; yam li Yes Xus yog Tswv Ntuj Leej Tub tuaj yeem txais kev tuag vim yog txoj kev cawm lub ntiaj teb. Nws kuj cev Yes Xus zoo li Mas Tais; yam li Yes Xus yog Tswv Ntuj Leej Tub tshaj Tswv Ntuj lub Ceeb Tsheej nyob ntiaj teb no. Lus Kas tseem cev Yes Xus tias yog tus siab zoo, siab ntev, txawj zam rau cov neeg txhaum, nyiam cov neeg me thiab cov neeg pluag, Yes Xus siab loj siab tawv, Yes Xus yog tus piv txwv nyob hauv txoj kev teev Ntuj.
Lus Kas sau mus pub rau tus neeg teev dab txais kev ntseeg hu ua ‘Tes Os Fis Los’. Lus Kas ntawv Moo Zoo xis cov Hes Las siab thiab raug lawv pob ntseg. Nws tau sau 2 phau ntawv tseg, xws li phau ntawv ‘Lus Kas ntawv Moo Zoo’ thiab phau ntawv ‘Cov Hauv Paus Xa Lus Tej Hauj Lwm’.
‘Zam’ yog tus hluas uas tau nrog Yes Xus nyob 3 xyoos. Yes Xus hu Zam thiab nws tus tij laug Yas Kos ua ‘yawm xob cov tub’ vim nkawd muaj lub siab kub. Tab sis Zam rov hu nws ua ‘tus thwj tim uas Yes Xus nyiam’. Zam yog ib tug tau pom Yes Xus ua tej yam loj, thiab Zam yog tus thwj tim pom Yes Xus tuag saum Ntoo Cuam. Zam kuj yog tus mus xyuas Yes Xus lub ntxa thaum Yes Xus sawv rov los.
Xyoo 70 thaum cov Los Mas tuaj rhuav lub tsheej Yes Lus Xas Les mas Zam nyob Es Fes Xos, nws nyob ntawd mus txog xyoo 95 tej, ces Zam pom tias Mas Kos, Mas Tais thiab Lus Kas lawv tau sau lawv cov ntawv Moo Zoo, mas tseem tshuav tej zaj tseem ceeb uas lawv 3 leeg ntawd tsis tau khaws tseg, ces Zam thiaj mam pib khaws tseg rau hauv phau ntawv nws sau.
Xyoo 96 cov nom tswv Los Mas coj Zam mus nyob txim hauv lub pov txwv Pas Mos. Yog lub caij ntawd, Zam thiaj sau phau ntawv Qhib Yav Tom Ntej.
Zam phau ntawv Moo Zoo tus txheej txheem mas muaj 8 ntu, muaj ib cov lus qhib thiab xaus phau ntawv. Tus txheej txheem ib; hais txog cov xwm ze ntawm lub caij Yes Xus mus ua Hmoov Hla thawj zaug. Tus txheej txheem ob; Yes Xus mus Xas Mas Lias teb. Tus txheej txheem peb; kho tus tuag ceg hnub Xas Npas Tos. Tus txheej txheem plaub; Yes Xus ua Hmoov Hla zaum ob. Tus txheej txheem tsib; Yes Xus ua hmoov tsa tsev ysam phooj. Tus txheej txheem rau; Yes Xus ua hmoov hwm lub Tuam Tsev Teev Ntuj. Tus txheej txheem xya; Yes Xus ua Hmoov Hla zaum peb. Tus txheej txheem yim; Yes Xus sawv rov los. Tas cov txheej txheem no pab kom yus to taub zoo tias Yes Xus txo txoj cai qub tseg, nws tsa txoj cai tshiab.
Zam xav qhia dab tsi txog Yes Xus? Zam xav qhia tias Yes Xus yog tus xa txoj kev ntshiab tshiab tuaj rau sawv daws, yog cov mov pub txoj sia, yog txoj kev pom kev, yog txoj sia, yog txoj kev txiav txim rau lub ntiaj teb, yog Tswv Ntuj tus Yaj, yog lub Tuam Tsev Teev Ntuj Ntshiab, yog tus zoo tswv zov yaj, yog tseem tsob txiv cawv, yog tus cawm lub ntiaj teb neeg.
Tas ntiaj teb neeg tsis muaj ntau phau ntawv txheej thaud uas neeg tau khaws tseg zoo zoo xws li cov ntawv Moo Zoo, vim txij thaum muaj neeg ntseeg txog Yes Xus lawm, cov ntseeg thiaj kub siab khaws Yes Xus cov lus tseg thiab sib qhia los txog tav no.
LAWV UA LI CAS LOS SAU NTAWV MOO ZOO
