Lub caij Yes Xus nyob, His Xas Lais teb zwm rau tus vaj Los Mas. Tseem hwv Los Mas tis npe tshiab rau His Xas Lais teb ua ‘Pas Les Tis Nas’.
Pas Les Tis Nas, los hais tias His Xas Lais teb tsis dav, tsis loj. Txij ciam teb nyob Pej Fab mus txog ciam teb nyob Naj Fab muaj 240 km. Txij ciam teb nyob Toob Fab mus txog ciam teb nyob Xib Fab muaj 120 km.
Nyob Xib Fab yog lub hiav txwv Mes Dis Tes Las Nes dav thiab ntev li 4,000 km. Lub tuam tsheej Los Mas nyob nruab nrab lub hiav txwv Mes Dis Tes Las Nes. Nyob Pas Les Tis Nas Toob Fab yog lub pas dej Nkas Lis Lais, thiab tus dej Yos Las Das thiab lub Hiav Txwv Tuag ua ciam teb.
Lub pas dej Nkas Lis Lais ntev li 21 km, dav li 13 km. Cov neeg hauv cov zos nyob ib ncig ntawm lub pas dej Nkas Lis Lais puav leej muaj nkoj, lawv nquag mus puav ntses los ntaus ntses. Yes Xus thawj pab thwm tim ib nrab yog cov neeg puav ntses hauv lub pas dej Nkas Lis Lais.
Lub npe ‘Yos Las Das’ txhais ua lus Hmoob yog ‘tus nqes hav’ vim pem hauv dej Yos Las Das yog chaw siab, dej ntws ceev. Nws hla lub pas dej Nkas Lis Lais, nws mus txog lub Hiav Txwv Tuag.
Lub caij Yes Xus yug los tsis muaj tej txoj kev dav meem pob zeb zoo caij tsheb. Cov los pav xuas luj xuas nees xuas ntxhuav nqa toob xib; lawv kuj xuas nyuj luab tsheb tsis dav mus taug kev av xwb. Cov pej xeem tawm rooj mus ko taw los caij luj. Cov tub rog caij nees.
Lub caij sov, ntuj qhuav, tshav ntuj kub. Tab sis lub caij no kuj no hauj sim.
Cov teb chaws nyob ib ncig ntawm Pas Les Tis Nas teb, nyob sab Pej yog Xis Lias thiab Tws Los. Nyob sab Naj yog Hais Nkws Tos. Cov teb chaws no puav leej zwm rau tus vaj Los Mas xws li Pas Les Tis Nas teb.
Pas Les Tis Nas tsis dav, tsis kav tseem hwv Los Mas muab faib ua 5 lub xeev; yog lub xeev Nkas Lis Lais nyob sab Pej, lub xeev Des Kas Pos Lis nyob Toob Fab Pej, lub xeev Xas Mas Lias nyob nruab nrab, lub xeev Pes Les nyob Toob Fab Naj, thiab lub xeev Yus Das nyob nram qab teb. Muaj lub nroog Yes Lus Xas Les hauv plawv lub xeev Yus Das.
Lub xeev Nkas Lis Lais tsuas ntev li 50 km thiab dav li 20 km xwb. Cov Los Mas tau tsa Hes Los As Tis Pas ua tus vaj txheeb kav Nkas Lis Lais teb. Hes Los As Tis Pas yog tus vaj Hes Los loj ib tug tub. Hes Los As Tis Pas xub nyob hauv lub nroog Xes Fos Lis, tab sis nws txhim ib lub nroog tshiab zoo nkauj heev raws li cov nroog Los Mas tus piv txwv. Nws tis npe rau lub nroog tshiab hu ua Tis Npes Lias, vim nws xav hwm tus vaj Los Mas uas hu ua Tis Npes. Yog thaum Yes Xus muaj 25 – 30 xyoo ces Hes Los txhim lub nroog Tis Npes Lias. Cov ntawv Moo Zoo tsis muaj ib lo lus hais txog Yes Xus mus tshaj lub Moo Zoo nyob Xes Fos Lis thiab nyob Tis Npes Lias. Yog zoo li Yes Xus txhob txwm tsis mus vim cov neeg nyob hauv lawv ob lub nroog zoo nkauj tshaj nyob hauv lub xeev Nkas Lis Lais, cov ntau yog ib co pej kwm neeg thiab yog ib co nom tsis liam faj quav ntsej rau Tswv Ntuj Lo Lus.
Lub caij Yes Xus nyob Nas Xas Les yog ib lub zos me muaj 35 los 40 lub tsev, muaj 300 tus neeg nyob. Nas Xas Les nyob ntawm ib phab toj, tsis muaj ib txog kev loj mus txog. Nas Xas Les tsis deb ntawm lub nroog Xes Fos Lis uas tus vaj txheeb Hes Los As Tis Pas nyob; tej zaud Yos Xes thiab Yes Xus ua kws ntoo nkawd tau mus ua hauj lwm ntau zaus nyob Xes Fos Lis. Lub zos Kas Nas nyob tsis deb ntawm Nas Xas Les. Nyob hauv lub zos Kas Nas Yes Xus ua hwj huam yees ntxwv thawj zaug : nws ua kom dej txia ua cawv.
Lub zos Nas Ees kuj nyob ze Nas Xas Les; nyob Nas Ees Yes Xus tsa ib tug tuag kom rov sawv muaj sia.
Cov nroog thiab cov zos uas Yes Xus tau mus ntau tshaj yog cov zos thiab cov nroog nyob ib ncig ntawm lub pas dej Nkas Lis Lais.
Nyob ntawm lub pas dej Nkas Lis Lais sab pej muaj lub nroog Npes Xais Das thiab lub nroog Kas Fas Naus. Pob Zeb thiab As Nres yug los nyob Npes Xais Das, tab sis nkawd tsiv los nyob Kas Fas Naus. Thaum Yes Xus pib tshaj nws lub Moo Zoo, nws tso Nas Xas Les tseg, nws los nyob hauv Pob Zeb lub tsev nyob Kas Fas Naus. Nws tawm mus tshaj lub Moo Zoo pes tsawg fim tas nws rov qab los so hauv Pob Zeb lub tsev.
Ib txog kev ua luam loj hla lub nroog Kas Fas Naus, yog txoj kev tuaj ntawm lub tsheej Das Mas mus rau lub Hiav Txwv Mes Dis Tes Las Nes. Tseem hwv Los Mas tsa ib lub tsev sau se ntawm cov tub lag tub luam. Mas Tais ua tus sau se nyob Kas Fas Naus.
Nyob ntawm lub pas dej Nkas Lis Lais sab hnub poob muaj lub nroog Mas Ntas Las, yog ib lub nroog muaj ntau txhiab leej nyob. Ib tug poj niam hu ua Mab Liab tig los yuav lub siab tshiab nyob Mas Ntas Las ces nws raws nraim Yes Xus thiab cov thwj tim. Tus xub pom Yes Xus tuag rov sawv muaj sia yog tus Mab Liab Mas Ntas Las ntawd.
Lub xeeb Nkas Lis Lais tsis dav. Yes Xus paub cov zej zog hauv lub xeev Nkas Lis Lais tib si. Cov neeg nyob Nkas Lis Lais sawv daws paub Yes Xus, tau tuaj mloog Yes Xus hais txog Tswv Ntuj lub Ceeb Tsheej.
Cov neeg nyob hauv lub xeev Xas Mas Lias tsis nyiam cov neeg nyob hauv lub xeev Nkas Lis Lais thiab cov neeg nyob hauv lub xeev Yus Das. Xas Mas Lias nyob hauv Nkas Lis Lais thiab Yus Das ki nruab nrab. Niaj xyoo cov neeg Nkas Lis Lais xav mus ua cov ntees teev Ntuj loj nyob Yes Lus Xas Les, lawv tsis tshua xav hla lub xeev Xas Mas Lias ces lawv lug kev, lawv taug ib txog kev raws lub hav dej Yos Las Das. Tsis kav Yes Xus tau hla lub xeev Xas Mas Lias ib zaug los ob zaug. Nws tau qhia tus poj niam tuaj hais dej nyob hauv tus yawg koob Yas Kos lub qhov dej nyob ze ntawm lub nroog Xis Kes.
Yog thaum tus vaj Xas Los Moos tuag 900 xyoo ua Yes Xus ntej ces Xas Mas Lias ncaim ntawm Yes Lus Xas Les. Cov vaj kav Xas Mas Lias teb tau txhim ib lub tuam tsev teev Tswv Ntuj nyob saum lub roob Nkas Lis Xis, lawv tsis tuaj teev Tswv Ntuj nyob Yes Lus Xas Les.
Tas nws sim neej Yes Xus tau mus txog Yes Lus Xas Les ntau zaus. Yes Xus yog ib tug neeg His Xas Lais coj Mais Xes txoj cai teev Ntuj zoo. Niaj xyoo Yes Xus mus ua cov ntees teev Ntuj loj nyob Yes Lus Xas Les. Ib ntu ob xyoo ib nrab uas Yes Xus tshaj nws lub Moo Zoo, nws kuj mus ua cov ntees nyob Yes Lus Xas Les. Hauv lub nroog Yes Lus Xas Les kwv yees muaj 100,000 leej neeg nyob. Tos uas cov neeg nyob Yes Lus Xas Les coob npaum no yog vim muaj lub Tuam Tsev Teev Ntuj nyob ntawd.
Nyob ntawm Yes Lus Xas Les sab hnub tuaj muaj lub ncov roob hu ua Roob Txiv Ntoo Roj siab txij 812 mev.
Thaum yus nyob saum lub Roob Txiv Ntoo Roj yus pom tas lub tsheej Yes Lus Xas Les zoo. Hauv lub tsheej, ob lub tuam tsev loj dua cov yog lub Tuam Tsev Teev Ntuj thiab tus vaj Hes Los lub tuam tsev.
Tus xub txhim ib lub Tuam Tsev Teev Ntuj 900 xyoo ua Yes Xus ntej yog tus vaj Xas Los Moos. Xyoo 587 cov tub rog Npas Npis Los rhuav Xas Los Moos lub Tuam Tsev Teev Ntuj. Xyoo 515 cov Yus Das rov qab txhim ib lub zoo tsis cuag Xas Los Moos lub.
Thaum tus vaj Hes Los loj sawv ua vaj nws xav ua ib yam kom cov Yus Das nyiam nws ces nws rov txhim lub Tuam Tsev Teev Ntuj. Muaj ib vam tus neeg ua hauj lwm 46 xyoo ces txhim thiab tu lub Tuam Tswv Teev Ntuj tiav tas. Tus vaj Hes Los kom lawv muab tej daim nyiaj thiab kub los plooj cov phab ntsa sab nraud, ces niaj tag kis hnub tuaj ziab lub Tuam Tsev, cov neeg tuaj teev Tswv Ntuj lawv nyob ntawm Tuam Tsev sab nraud lawv ntsia tsis tau lub Taum Tsev vim ci qhov muag dhau.
Yuav hla 3 lub tshav loog dav dav thiaj txog lub Tuam Tsev.
Thawj lub tshav yog ‘cov pej kum neeg lub tshav’; cov tub luam muag tsiaj txhu thiab cov pauv nyiaj nyob hauv lub tshav ntawd. Yes Xus caum cov tub luam ib zaug kom khiav.
Nyob ntawm cov pej kum neeg lub tshav loog sab naj muaj ib lub ruv loj zoo nkauj tas nrho, 186 tus ncej zeb dawb siab siab txheem lub ruv; lawv hais tias lub ruv ntawd zoo nkauj dua lub Tuam Tsev thiab nws nto moo dua vim sawv daws muaj cai mus hauv lub qab ruv ntawd, nws hu ua tus vaj lub qab ruv.
Hla cov pej kum neeg lub tshav loog tas ces txog ‘cov poj niam lub tshav loog’. Cov poj niam His Xas Lais thiaj muaj cai chaws mus hauv.
Hla tas poj niam lub tshav loog ces muaj 9 lub qhov rooj plooj nyiaj plooj kub; dhau cov qhov rooj thiaj yog ‘His Xas Lais lub tshav loog’; kawg yog ‘cov txiv neeg His Xas Lais thiaj muaj cai mus txog His Xas Lais lub tshav loog.
Nyob hauv His Xas Lais lub tshav loog muaj ib lub thaj txi Ntuj loj tas nrho, siab txij li 8 mev; txij sawv ntxov mus txog tsaus ntuj cov Leej Choj hlawv cov nyuj cov yaj nyob saum lub thaj.
Dhau lub thaj txij Ntuj ces yog lub Tuam Tsev Teev Ntuj, ntev li 50 mev, dav li 50 mev. Hauv lub tuam Tsev Teev Ntuj muaj peb kem. Kem ib nyob ze ntawm lub qhov rooj.
Kem ob hu ua ‘Kem Ntshiab’. Nyob hauv Kem Ntshiab ntawd ib co Leej Choj ua peb yam kab ke. Yam ib; sib hloov hlawv xyab nyob saum ib lub thaj. Yam ob; lawv taws tswj ciab nyob ntawm tus ncej uas muaj 7 ceg hlawv tswm ciab. Yam peb; cov Leej Choj tseem tso 12 lub ncuav mov mog nyob saum ib lub rooj.12 lub ncuav mov mog yog lub cim hais txog 12 lub xeem His Xas Lais.
Dhau Kem Ntshiab yog ‘Kem Ntshiab Ntshiab’. Muaj ib daig ntaub loj quas Kem Ntshiab ntawm Kem Ntshiab Ntshiab; thaum Yes Xus dai saum ntoo cuam nws siav tu nrho mas daim ntaub ntawd ntuag phua rhe ua ob daig.
Yav thaud nyob hauv Xas Los Moos lub Tuam Tsev Teev Ntuj, Mais Xes lub Xab Cog Lug nyob hauv Kem Ntshiab Ntshiab, tab sis cov tub rog Npas Npis Los muab lub Xab Cog Lus rhuav ces Hes Los lub Tuam Tsev Teev Ntuj tsis muaj dab tsi nyob hauv Kem Ntshiab Ntshiab. Kawg yog tus Thawj Leej Choj tib leeg xwb thiaj muaj cai nkag ib xyoo ib zaug hauv Kem Ntshiab Ntshiab.
Thaum Yes Xus yug los cov teb chaws Pas Les Tis Nas zwm rau tus tuam vaj Los Mas tau 63 xyoo los lawm. Tus tuam vaj nyob txawm hauv lub tsheej Los Mas, nyob Is Tas Lias teb. Cov nom Los Mas caij nkoj hla lub hiav txwv Mes Dis Tes Las Nes lawv thiaj tuaj txog Pas Les Tis Nas teb.
Tus tuam vaj nyob Los Mas, nws kav ntau lub teb chaws, nws tsa tej tus nom Los Mas sawv nws chaws kav cov teb chaws zwm rau Los Mas. Tus sawv tus tuam vaj chaw kav Pas Les Tis Nas lub caij txiav txim rau Yes Xus yog tus nom hu ua Pis Las Tos.
Tus tuam vaj Los Mas xav ntxias tsoom pej xeem nyob Pas Les Tis Nas kom lawv mloog nws zoo mas nws tsa ib tug neeg His Xas Lais kav cov His Xas Lais nyob Pas Les Tis Nas teb. Tus vaj His Xas Lais kav Pas Les Tis Nas teb yog tus Hes Los. Tus vaj Hes Los yuav tsum saib xyuas tsoom pej xeem kom lawv mloog tus tuam vaj nyob Los Mas, kom tsoom pej xeem them se rau tus tuam vaj. Tus tuam vaj nyob Los Mas pom Hes Los mloog nws lus mas nws cia tus vaj Hes Los tu Pas Les Tis Nas teb kom zoo nkauj thiab vam meej, txhim tej lub tuam tsev muaj hwj chim. Tus vaj Hes Los rov txhim lub Tuam Tsev Teev Ntuj nyob Yes Lus Xas Les thiab txhim ib lub nroog rau cov nom Los Mas nyob Xes Fos Lis. Tus vaj Hes Los muaj cai sau se, ces tsoom pej xeem them se rau tus tuam vaj nyob Los Mas thiab them se rau tus vaj Hes Los. Lawv tseem them ib tug se ntxiv rau lub Tuam Tsev Teev Ntuj. Ua li lawv them 3 tug se.
Cov tuam vaj Los Mas cia cov haiv neeg coj lawv kev teev hawm xws li cov poj yawm txwj koob teev kam. Lawv cia cov His Xas Lais teev Ntuj raws Mais Xes txoj cai. Lawv cia cov His Xas Lais kav cov hauj lwm teev Ntuj nyob hauv lub Tuam Tsev Teev Ntuj nyob Yes Lus Xas Les. Lawv cia cov His Xas Lais tsa lawv lub rooj txwj laus txiav txim nyob Yes Lus Xas Les, tab sis cov txwj laus His Xas Lais txiav lub txim tuag mas lawv yuav tsum thov kom tus nom Los Mas Pis Las Tos nyob Yes Lus Xas Les pom zoo muab tus neeg txhaum tua tso, xws li hnub uas cov Yus Das xav muab Yes Xus tua mas lawv yuav tsum thov tus nom Los Mas Pis Las Tos kom nws txiav lub txim muab Yes Xus tua.
Tus tuam vaj Los Mas tswj ntau lub teb chaws nyob deb ntawm lub tuam tsheej Los Mas, tus vaj Los Mas muaj tej pab tub rog saib xyuas txhua txhia lub teb chaws. Cov nroog loj me ntsis puav leej muaj tub rog Los Mas saib xyuas. Lub teb chaws twg thiaj tsis tau kev ntxeev siab rau tus tuam vaj Los Mas. Nyob Pas Les Tis Nas teb cov Yus Das ntxub cov tub rog Los Mas. Zaum puav muaj tej tus Yus Das nyiag sau tej pab neeg kom lawv sawv los tua cov tub rog Los Mas, tab sis lawv tsis yeej cov tub rog Los Mas, ces cov tub rog ntes cov neeg ntxeev siab. Lawv muab cov ntxeev siab dai ntawm tej tus ntoo cuam kom tuag.
Cov tub rog Los Mas muaj hwj xyeej. Muaj ib ntu ntev li 500 xyoo tsis muaj ib haiv neeg yuav yeej tau cov tub rog Los Mas nyob Aws Los pas, nyob As Fis Kas qaum teb thiab nyob As Xias sab hnub poob. Tus tuam vaj Los Mas sau nws cov tub rog ntawm ntau haiv neeg los : sawv daws mloog cov hlob uas yog tseem neeg Los Mas.
Cov tub rog muaj tus chij Los Mas. Lawv hnav tsho hlau los tsho tawv nyuj, lawv kwv rab hneev thiab raj xub, lawv sia ib rab ntaj, tuav ib rab hmuv ntawm txhais tes xis, hos txhais tes laug tuav daim Leem Phiaj thaiv lub cev. Lawv rau khau khov kho.
Tsoom pej xeem nyob Pas Les Tis Nas teb muaj 60 vam los 70 vam leej neeg nyob. Lawv nyob hauv 3 lub xeev ntawm tus dej Yos Las Das sab hnub poob, yam li lub xeev Nkas Lis Lais, lub xeev Yus Das, thiab lub xeev Xas Mas Lias.
Cov pej xeem feem coob yog neeg ua liaj ua teb, yug tsiaj, cog txiv ntoo. Cov poj niam ua noj, zom zeb, kwv dej, nto ntaub, xaws khaub ncaws, ntxiv khaub ncaws. Lub zos twg kuj muaj tus kws hlau kws ntoo xws li Mab Liab tus txiv Yos Xes.
Lub zos twg kuj muaj ib qho chaws uas cov tub ib txhia kawm ntawv; yog ib lub tsev nyob ze lub tsev uas cov pej xeem sib txoos teev Ntuj. Yes Xus kawm ntawv nyob hauv nws lub zos Nas Xas Les, nyob ze lub tsev sib txoos teev Ntuj. Ib tug laus qhia cov me nyuam.
Lub caij Yes Xus nyob cov txiv neej ua teb. Tus puav mus ntiav zog vim tus vaj Hes Los tab tom txhim ib lub nroog tshiab hu ua Xes Fos Lis nyob nrug deb ntawm Nas Xas Les mus taw ib teev peb caug fiab. Yes Xus yog ib tug kws ntoo, phim nws yuav mus nrhiav zog ua cov tsev tshiab nyob Xes Fos Lis. Phau Ntawv Moo Zoo tsis puav ntau txog Yes Xus lub neej nyob Nas Xas Les. Tab sis ntshai nws kuj mus ntiav zog ntu puav.
Cov Yus Das faib txoj kev coj Mais Xes txoj cai ua 2 txog; yam li cov Xas Dus Kais txoj thiab cov Fas Lis Xais txoj.
Cov Xas Dus Kais yog cov Yus Das nplua nuj xav kom tau kev zoo fim cov nom Hes Las thiab cov nom Los Mas. Nyob hauv Mais Xes txoj cai, lawv tsuas yuav cov Ntawv Ntshiab uas xub sau puag thaum ub los, lawv saib Mais Xes txoj cai xws li txoj cai zoo pab kav teb chaws, lawv tsis kub siab rau txoj kev nyiam Tswv Ntuj tas siab tas ntsws. Cov Xas Dus Kais tsis nyiam Yes Xus.
Cov Fas Lis Xais yog cov coob dua, lawv muaj txog 6,000 leej, lawv kub siab mloog Mais Xes txoj cai thiab kub siab teev Tswv Ntuj thiab nyiam Tswv Ntuj tas siab tas ntsws. Cov taug txoj kev Fas Lis Xais yog cov Kws Ntawv thiab cov Thoob Xwm Txoj Cai. Lawv muaj lawv cov Fas Lis Xais nyob tas lub teb chaws, lawv tuav cov tsev txoos. Cov Fas Lis Xais tos txog Leej Pleev yuav tuaj cawm tsoom His Xas Lais thiab sau cov His Xas Lais rov los nyob Yus Das teb. Lawv ntseeg Tswv Ntuj khov kho, lawv yeem tuag zoo dua tso kev teev Ntuj pov tseg, lawv tsuas saib kev ntseeg muaj nqe tshaj. Tab sis vim cov Fas Lis Xais kub siab heev rau Mais Xes txoj cai, mas lawv ntxiv ntau yam kev cai lij choj me me rau txoj cai. Lawv xav tias yog ib txog kev zoo pab kom paub Mais Xes txoj cai zoo dua, tab sis qhov kawg mas tsoom pej xeem yuav caiv ntau ntau yam uas tsis muaj ib tug neeg yuav coj tau npaum li ntawd.
Cov neeg nyob Pas Les Tis Nas teb, tseem muaj ib co hu ua cov ‘Hes Los Dias’; yog cov Yus Das pab tus vaj Hes Los, lawv nrhiav kev ua nom ces lawv hwm Hes Los loj, lawv coj Mais Xes txoj cai tab sis lawv tsis kub siab rau kev teev Tswv Ntuj npaum li kev hwm tus vaj thiab lawv cov nom. Tseem muaj cov ‘Has Xis Dis’; lawv yog ib pab neeg nyob tab seeb, lawv sib sau nyob ua ke ua ib pab Txiv Twj Cuab tsis fim luag. Nruab hnub lawv ua hauj lwm, yav tsaus ntuj lawv teev Ntuj thiab nyeem Ntawv Ntshiab ua ke. Lawv hais tias lawv thiaj yog cov neeg siab dawb siab huv. ‘Cov Ntxes Los Tes’ txhais ua lus Hmoob yog ‘cov siab kub’; lawv ntseeg zoo li cov Fas Lis Xais, tab sis lawv ntxub cov Los Mas tas siab, lawv nrhiav tua cov Los Mas los cov His Xas Lais pab cov Los Mas. Zaum puav lawv ua rog ntaus cov Los Mas. Vim lawv txhoj puab dhau ces xyoo 66 cov Los Mas thiaj pib ua rog loj mus txog hnub Yes Lus Xas Les tawg thiab kub hnyiab tas. Cov Ntxes Las Tos tus puav xav tias Yes Xus yuav sawv ua vaj ntiab cov Los Mas, xws li tus thwj tim Xis Moos. Tab sis Yes Xus lub tswv yim txawv cov Ntxes Las Tos lub tswv yim, nws yog tus tuaj coj neeg lub siab tsis yog tuaj ua rog los ua vaj Yus Das.
