Txiv Plig Hos Xes (Rev. Jose Maniyangat) yog haiv neeg Is Ntias. Nws yug hnub tim 16 lub 7 hli xyoo 1949 hauv Is Ntias teb. Xyoo 1975 nws txais Cim Tiag Tes ua Leej Choj. Nws tham tias nyob hauv Hnub Chiv tim 14 lub 4 hlis ntuj 1985, nws txav tsheb nees zab mus ua Thaj Txi Ntuj, thaum txog ib tog kev cia li muaj ib lub tsheb loj ncaj kha los nrau Txiv Plig lub tsheb nees zab, ua rau Txiv Plig raug sab kawg, ces lawv coj Txiv Plig mus pw tom lub tsev kho mob.

Txiv Plig Hos Xes piav ntxiv tias thaum ntawd mas Txiv Plig tus ntsuj plig tawm hauv lub cev mus, Txiv Plig pom tus Tshiab pov hwm, thiab Txiv Plig pom tias muaj ib pab neeg tab tom sib pab kwv Txiv Plig lub cev mus tom lub tsev kho mob. Txiv Plig hnov lawv lub suab quaj thiab lawv lub suab thov Ntuj pab cawm Txiv Plig.

Tus Tshiab pov hwm hais rau Txiv Plig tias Huab Tais Yes Xus xav ntsib Txiv Plig thiab xav nrog Txiv Plig tham, yog li mas nws yuav coj Txiv Plig mus saum ntuj. Tab sis ua ntej ntawd mas nws kuj yuav coj Txiv Plig mus tsham dab teb thiab teb chaws them txim tso.

Tus Tshiab coj Txiv Plig mus txog dab teb, yam Txiv Plig pom mas yog cov hluav taws cig tsis muaj caij kug, pom cov kas nkag puv qhov txhia chaw. Txiv Plig hnov ntau lub suab quaj qw vim raug tsim txom. Txiv Plig pom cov ntsuj plig tab tom sib ntaus, thiab pom ib pab dab phem tab tom muab ib cov ntsuj plig rau txim.

Tus Tshiab hais rau Txiv Plig tias tos cov ntsuj plig ntawd raug txom nyem tas npaud vim lawv tsis tu siab rau lawv cov txhaum hnyav tau ua thaum tseem muaj txoj sia nyob. Tus Tshiab qhia tias dab teb kev rau txim muaj 7 theem raws li 7 txoj kev txhaum hnyav.

Cov ntsuj plig nyob hauv dab teb mas txaus ntshai thiab rhiab qhov muag dhau ua rau Txiv Plig ib ce xob plaub tas. Txiv Plig pom muaj coob tus yog cov neeg Txiv Plig paub lawv zoo.

Qhov txhaum coj cov ntsuj plig los nyob hauv dab teb, mas yog cov txhaum li no: rho me nyuam, nrog luag tej ua dev, txo luag txoj sia, kev ntxub ntxaug, cib nyeej tsis zam rau luag, txhob txwm ua phem tsis zoo, thiab thuam ntuj.

Tus Tshiab hais rau Txiv Plig ntxiv tias tus neeg twg yog nws tu siab thiab tig los yuav siab tshiab ua ntej yuav tuag, mas tus ntawd yuav dim hauv dab teb; nws yuav tau mus nyob hauv teb chaws them txim.

Cov neeg tig los yuav lub siab tshiab, yog lawv tau them txim thaum tseem muaj sia nyob, mas lawv kuj yuav hla dhau teb chaws them txim mus.

Muaj ib yam Txiv Plig pom nyob hauv dab teb, ua rau Txiv Plig poob siab loj; yog muaj tej tus Txiv Plig los yog Tswv Qhia nyob hauv thiab. Txiv Plig xav tsis txog tias yuav pom cov Leej Choj poob rau hauv dab phem teb chaws zoo li no. Thaum lawv tuag, lawv tus ntsuj plig poob los nyob hauv no, vim tias lawv coj tus yam ntxwv tsis zoo, lawv qhia yuam kev; mas ua rau muaj ntau tus neeg to taub kev ntseeg yuam kev.

Txiv Plig thiab tus Tshiab mus ncig dab teb tas, nkawd mus rau ib qhov chaw tshiab; yog teb chaws them txim. Nyob no kuj muaj cov hluav taws cig tib yam. Cov hluav taws no faib tau ua 7 theem thiab. Tseem muaj ib lub qhov hluas taws cig mus li, tab sis cov hluav taws hauv teb chaws them txim mas kub thiab ntaiv tsis npaum cov hluav taws hauv dab phem teb chaws.

Nyob hauv teb chaws them txim, tsis muaj kev sib ntaus sib tua li tau pom nyob dab teb. Yam ua rau cov ntsuj plig hauv no txom nyem, yog lawv raug cais nyob deb Tswv Ntuj.

Muaj tej tus ntsuj plig mas yog tau ua txhaum hnyav tab sis ua ntej yuav tuag, nws tau thov txim ntawm Tswv Ntuj, nws rov los khaub zig Tswv Ntuj lawm. Txawm tias lawv raug txom nyem nyob hauv no, tsis kav lawv muaj kev xyiv fab vim tias lawv tso siab tias muaj ib hnub mas lawv yuav tau mus nyob ze Tswv Ntuj.

Tus Tshiab pub Txiv Plig tau nrog ob peb tug ntsuj plig tham, lawv hais tias lawv tsis muaj peev xwm yuav thov Ntuj pab lawv tau ntxiv lawm, mas lawv thiaj thov Txiv Plig pab thov Ntuj pub rau lawv, thiab lawv txhib Txiv Plig kom los hais sawv daws pab nco txog lawv thiab thov Ntuj rau lawv; kom lawv tau mus saum ntuj sai sai.

Thaum peb thov Ntuj rau cov hauv teb chaws them txim, mas lawv yuav nco peb lub txiaj ntsim ces lawv yuav thov Ntuj rau peb thiab. Txiv Plig hais li ntawd.

Hais txog tus Tshiab pov hwm, mas Txiv Plig hais tias tsis paub yuav piav li cas txog nws tau vim nws zoo dhau; nws lub cev ci dawb paug, nws yog tus tseem phooj ywg tiag tiag, thiab yog tus kwv luag nrog Txiv Plig mus ua ke thiab pab Txiv Plig txhua yam. Txiv Plig mus txog twg mas nws nrog nraim tsis pub plam li.

Nkawd chaws mus hauv ib lub qhov ci ntsa iab ces mus tshwm saum ntuj. Nyob ntawd, mas zoo li Txiv Plig tus ntsuj plig kaj lug thiab xyiv fab tshaj. Tib pliag xwb ua cas Txiv Plig pom lub ntuj qhib plho, muaj cov suab mos xis mloog tshaj tshua lub suab Txiv Plig tau hnov los dua nrov tuaj nphav Txiv Plig lub siab. Cov suab no yog cov Tshiab lub suab hu nkauj cav txog Tswv Ntuj. Txiv Pig pom tsoom Ntshiab xws li niam Mab Liab, Leej Ntshiab Yos Xes, cov Tswv Qhia thiab tas nrho cov Leej Choj Ntshiab; lawv sawv daws ci ntsa xws li lub hnub qub ci pom kev nyob saum lub ntuj dub.

Ces Txiv Plig pom tias ziag no nws sawv nyob ntawm Huab Tais Yes Xus xub ntiag. Huab Tais Yes Xus hais lus rau Txiv Plig tias “Kuv xav kom koj rov mus rau ntiaj teb. Kuv xav kom koj ua kev thaj yeeb lub twj thiab pab kho kuv cov neeg qhov mob. Koj yuav tau mus ib lub teb chaws rau ib lub teb chaws thiab hais lawv xeem lus, ces txhua yam yuav tsheej xeeb tau vim kuv lub txiaj ntsim.”

Huab Tais Yes Xus hais li ntawd tas, mas niam Mab Liab ho hais rau Txiv Plig tias “Txiv Plig, thov koj ua txhua yam raws li Yes Xus hais mog. Kuv zoo siab ua tus pab koj leg cov hauj lwm ntawd.”

Txiv Plig hais tias nws tsis muaj lo lus twg yuav piav tau lub ntuj, qhov nws hais tau mas Ntuj Ceeb Tsheej yog qhov chaw nyob kaj lug kaj nrig, yog qhov chaw sawv daws nyob xyiv fab muaj kev zoo siab puv nto.

Huab Tais Yes Xus lub ntsej muag ci ntsa tshaj txhiab vam lub hnub ci. Txhiab vam daim duab neeg kos txog Huab Tais Yes Xus los twb piv tsis tau qhov me tshaj hauv Huab Tais Yes Xus lub hwj chim. Niam Mab Liab sawv ntawm Huab Tais Yes Xus ib sab, nws zoo nkauj thiab ci ntsa kawg li. Tsis muaj ib yam yuav zoo nkauj dua niam Mab Liab lawm.

Thaum ntawd, Txiv Plig to taub hlo tias Ntuj Ceeb Tsheej thiaj yog neeg lub tseem tsev tiag. Tswv Ntuj tsim neeg los kom tau rov mus nyob hauv Ntuj Ceeb Tsheej, mus koom saj kev zoo siab xyiv fab mus li.

Tus Tshiab coj Txiv Plig nqes los rau lub ntiaj teb. Thaum ntawd, Txiv Plig lub cev tseem nyob tom tsev kho mob. Cov kws kho mob twb soj Txiv Plig lub cev tas lawm, lawv hais tias vim Txiv Plig ntshav tawm ntau dhau, mas Txiv Plig thiaj tuag. Lawv xa lub moo tuag mus rau Txiv Plig cov kwv tij paub, tab sis yog lawv nyob deb dhau mas thiaj tsis tau tuaj txais Txiv Plig lub cev mus ua kab ke. Lawv coj Txiv Plig lub cev mus cia tom chav tsev khaws tuag.

Thaum lawv tab tom coj Txiv Plig tus qauv mus tom chav tsev khaws tuag, Txiv Plig tus ntsuj plig rov los puas nws lub cev, mas thaum ntawd Txiv Plig hnov nws ib ce mob ntsoos tas vim raws Txiv Plig lub cev mas muaj ntau lub qhov ntuag thiab ntau tus pob txha dam. Txiv Plig los kua muag thiab tsa suab qw nrov nrov ua rau pab neeg thawb lub txaj tso Txiv Plig lub cev pw saud poob siab thiab ntshai, lawv sawv daws khiav mus cuag tus kws kho mob thiab hais rau nws tias Txiv Plig tus qauv rua taus ncauj qw tej suab nrov nrov. Yog li mas tus kws kho mob thiaj maj zeeg tuaj xauj, nws pom tias zaum no Txiv Plig sawv rov los lawm tiag, nws thiaj hais rau lawv pab ntawd tias Txiv Plig tsis tau tuag. Yog ib yam tsis txaus ntseeg tiag tiag!

Tus kws khob mob kom lawv rov qab thawb lub txaj mus hauv chav tsev kho mob, zaum no Txiv Plig rov tau los nyob hauv tsev kho mob lawm. Lawv pib theej ntshav rau Txiv Plig thiab coj Txiv Plig mus txuas pob txha.

Ob lub hlis tom qab, mas lawv mam cia Txiv Plig tawm hauv tsev kho mob los, tab sis tus kws kho mob hais tias Txiv Plig yuav mus tsis taus kev ntxiv lawm. Txiv Plig hais rau tus kws kho mob tias yog Huab Tais Yes Xus pub txoj sia tshiab rau nws thiab txib kom nws los leg Huab Tais Yes Xus txoj hauj lwm, yog li mas Txiv Plig tso siab tias Huab Tais Yes Xus yeej yuav pab kom Txiv Plig rov mus taus kev xwb xwb.

Txiv Plig cov kwv tij sib pab thov Ntuj pab kom Txiv Plig zoo sai sai, tab sis zoo li tsis muaj raws li lawv thov, mas lawv pib txhawj, tsis kav Txiv Plig tsis tag kev tso siab rau Tswv Ntuj.

Muaj ib hnub, Txiv Plig hnov nws pob txha caj tw mob cuag koob nkaug, ces ib ob hnub ntxiv qhov mob ntawd ntaug, Txiv Plig hnov lub suab hais tias “Koj sawv thiab mus kev mas!”, ces Txiv Plig saw ua cas nws rov mus taus kev lawm tiag. Txiv Plig cav txog Tswv Ntuj thiab ua Tswv Ntuj tsaug.

Txiv Plig mus nrhiav tus kws kho mob thiab hais qhia nws tias Huab Tais Yes Xus kho Txiv Plig zoo lawm, ua rau tus kws kho mob nyob hab nuv, ces nws hais rau Txiv Plig tias “Koj tus Tswv Ntuj yog Tswv Ntuj tseeb tiag. Kuv yog neeg His Ntus, kuv thov ua koj thw tim puas tau, koj puas kam tuaj qhia Ntuj kev cai rau kuv?”

Txij hnub ntawd los, tus kws kho mob tuaj kawm Ntuj kev cai ntawm Txiv Plig thiab txais lub Cim Ntxuav ua ib tug neeg ntseeg txog Yes Xus nyob hauv lub Koom Txoos.

Tsis ntev tom qab, cov hlob hauv lub Koom Txoos xaiv Txiv Plig Hos Xes ua ib tug tub tshaj Ntuj Lus rau As Mes Lis Kas teb. Txiv Plig Hos Xes tau ua tus tswj saib xyuas neeg tus ntsuj plig thiab tau lus tso cai hla tau cov teb chaws kom tau ua txoj hauj lwm thov Huab Tais Yes Xus hauv lub Cim Yug kho cov neeg mob.

Muaj ib yam Txiv Plig Hos Xes txhib cov neeg nws thov Ntuj rau tsis tseg, mas yog kom lawv thov Ntuj rau cov nyob hauv teb chaws them txim vim tias muaj ib hnub lawv cov ntawd them txim tas mas lawv yuav tau mus nyob pem ntuj, ces lawv yuav thov Ntuj rau peb. Cov neeg ua Leej Ntshiab lawm, mas lawv lo lus thov muaj zog heev.