Kwv tij Hmoob, cov neeg teev Ntuj ntseeg tias Yes Xus yog Huab Tais Tswv Ntuj thiab yog tus Cawm Seej. Txoj kev teev hawm Tswv Ntuj tsis yog kev ntseeg xwb, tab sis txawm yog txoj kab ke ua neej thiab. Cov neeg teev Ntuj txoj kev ntseeg tsum txi tau lub txiv nyiam thiab tsob hwb lwm tus mas lawv txoj kev ntseeg thiaj yuav muaj txiaj ntsim.
Cov neeg ntseeg txoj hauj lwm yog ‘muaj feem xyuam’ (responsibility).
Ib tuaj, yog muaj feem xyuam ‘txais’ kev nyiam uas Tswv Ntuj pub rau peb yam tsis muaj chaw xyeej thiab pab txhiv peb hauv kev tuag uas yog Huab Tais Yes Xus, raws li Leej Ntshiab Vaj Qhia Zam Paj Lug Ob lo lus zeem tias “Kev raws Yes Xus qab muaj qab hau tshaj txhua yam, thiab yog lub hauv paus chiv cov ntseeg txoj hauj lwm.” Yog li thaum ib tug neeg twg qhib siab rau Tswv Ntuj mas nws yuav tsum txais Tswv Ntuj kev nyiam thiab, vim tias ‘kev nyiam’ yog cov neeg ntseeg txoj hauj lwm lub plawv.
Huab Tais Yes Xus hais rau cov thwj tim tias “Koj yuav muab tas koj lub siab tas koj tus ntsuj plig tas koj lub tswv yim los nyiam koj tus Huab Tais Tswv Ntuj. Lo lus qhia no yog lo lus qhia loj tshaj cov, yog thawj lo lus qhia. Lo lus qhia ob kuj zoo ib yam thiab; koj yuav nyiam tus nyob ze koj ib yam nkaus li koj nyiam koj.” (MT 22: 37-39)
Ob tuj, yog muaj feem xyuam ‘xaiv’ Tswv Ntuj los ‘tsis xaiv’ Tswv Ntuj ua koj tus Huab Tais. Yog peb xaiv Tswv Ntuj ua peb tus Huab Tais, mas peb yuav nyiam thiab tsob hwb Tswv Ntuj ib leeg xwb. Yam no yog tib neeg kev ‘twj lij’ uas Tswv Ntuj cog rau hauv neeg, yog ‘lub tsim’ Tswv Ntuj pub rau neeg raws li tib neeg yog Tswv Ntuj tus duab. Yog li neeg thiaj muaj peev xwm ‘xav’ thiab ‘nyiam’, thiab ‘tsim’ kev txheeb nrog lwm tus tau.
Kwv tij Hmoob, thaum peb txiav siab ua neej raws txoj kev ntseeg, mas yog peb tab tom saib Tswv Ntuj kev cog lus yog qhov loj.
Ntawv Ntshiab Cog Qub Lus qhib rau peb pom tias Yas Ves peb tus Tswv Ntuj tau cog lus ntau yam nrog tib neeg, tshwj xeeb mas yog nrog haiv His Xas Lais. Nyob hauv Tswv Ntuj cov lus cog nrog neeg, Tswv Ntuj ua raws nraim li tau hais. Tswv Ntuj kuj xav kom nws haiv neeg ua siab ncaj ncees rau lo lus cog tseg thiab. Ntawm cov His Xas Lais mas lawv hais tias thaum lawv ua neej raws li phau ntawv Tos Las (Torah) los yog phau ntawv Txoj Cai Ob (Law) mas yog lawv tau ua siab ncaj rau Tswv Ntuj lo lus cog lawm. Txoj Cai nyob hauv Tswv Ntuj 10 Lo Lus Qhia tsis yog tias cov His Xas Lais yuav xaiv ua tau ywj lawv siab, tab sis yog kab ke rau lawv ua neej kom xis Tswv Ntuj siab.
Tas nrho cov lus Tswv Ntuj tau nrog neeg cog mas cov lus cog nyob hauv kev nyiam yog cov lus cog tseem ceeb tshaj plaws, cov lus ntawd yog Tswv Ntuj Leej Tub Twm Zeej, Huab Tais Yes Xus; yog Lus Cog Tshiab. Tswv Ntuj tau muab Leej Pleev cov ntshav, nws kev tuag thiab sawv rov los ua pov thawj tias Tswv Ntuj yuav ua raws li nws cov lus tau cog cia.
Yog vim li no cov neeg ntseeg thiaj yuav txais Tswv Ntuj kev nyiam thiab xaiv ua raws li Tswv Ntuj 10 Lo Lus Qhia thiab Huab Tais Yes Xus cov lus qhia saum roob hais txog ‘cov tau txoj hmoov zoo’.
Cov neeg ntseeg txog Yes Xus, yuav ua neej mus raws Yes Xus lo lus qhia tias “Yog leej twg xav los raws kuv, nws yuav tsum nrauj nws, nws yuav kwv nws tus ntoo cuam. Yog nej nyiam kuv, nej yuav coj rawv kuv cov lus qhia.” (MK 5: 34, Z 14: 15)
Tswv Ntuj 10 Lo Lus qhia yog zoo li no:
1. Koj yuav teev Huab Tais Ntuj ib tug xwb, thiab koj yuav nyiam Huab Tais Ntuj tshaj tas puas tsav yam.
2. Koj yuav hwm Huab Tais Ntuj lub npe.
3. Koj yuav caiv Huab Tais Ntuj hnub.
4. Koj yuav hwm koj niam koj txiv.
5. Koj tsis txhob tua neeg.
6. Koj tsis txhob zes luag txij luag nkawm.
7. Koj tsis txhob ua tub sab tub nyiag.
8. Koj tsis txhob dag rau luag tej.
9. Koj tsis txhob cia koj lub siab ntshaw zes luag txij luag nkawm.
10. Koj tsis txhob tso koj lub siab ntshaw ua tub sab tub nyiag.
Nyob hauv Tswv Ntuj 10 Lo Lus qhia no, lo lus tias “Koj yuav teev Huab Tais Ntuj ib tug xwb, thiab koj yuav nyiam Huab Tais Ntuj tshaj tas puas tsav yam” yog lo lus qhia loj tshaj uas cov neeg ntseeg yuav tsum coj, cov neeg ntseeg yuav muab Tswv Ntuj ua lawv lub plawv thiab ua lub chaw xaus hauv lawv txoj kev ua neej. Thaum neeg taug txoj kev ua neej nyob ntiaj teb no, lawv yuav ntsib kev haub ntxias sim siab tas mus li tsis hais nyiaj txiag, hwj chim, kev ua tswv, kev lom zem, kev noj qab pw sov. Tej li hais no puav leej yog yam zoo rau neeg lub neej, tab sis thaum peb muaj peb tau raws li siab xav lawd, peb tsis nco tias muaj ib tug loj tshaj yog tus tsim tej ntawd los rau peb, ces peb thiaj txia ua tus neeg tsis pheej xeeb rau Tswv Ntuj.
Yog tias peb coj rawv Tswv Ntuj Lo Lus Qhia tim ib, mas peb yuav nco ntsoov txog Tswv Ntuj txiaj ntshav txij ntsig, peb yuav teev hawm thiab nco ntsoov ua Tswv Ntuj tsaug. Tswv Ntuj Lo Lus Qhia no nqua hu peb kog muab siab ntseeg, tso siab thiab nyiam Tswv Ntuj tshaj puas tsav yam.
Dhau ntawd, Tswv Ntuj Lo Lus Qhia ib tseem txwv tsis pub peb teev hawm lwm yam, ntseeg saub saib yaig, saib hmoov, txi dab.
Tswv Ntuj Lo Lus Qhia tim ob yog txwv tsis pub hais txog Tswv Ntuj lub npe ‘Yas Ves’ txhais tias ‘Kuv Yog Tus Kuv Yog’ thiab yuav ua dab tsi los cav txog Tswv Ntuj mas tsum ua kom ntxim neeg ob lub qhov muag ntsia. Vim tias txhua yam cov neeg ntseeg hais los yog ua tawm los, yuav ua daim iav tsom tias yus yog leej twg. Cov neeg ntseeg yuav tsis hais lus foom, lus hiam rau lwm tus, yuav tsis twv ntuj twv teb los muab txim rau tus ub tus no, hu txog Tswv Ntuj los cog lus, thuam los yog saib tsis taus Tswv Ntuj.
Yeeb vim peb npuab Tswv Ntuj, nyob Tswv Ntuj tog mas peb thiaj yuav tshwj tej hnub cia teev Ntuj nrog cov neeg koom zej zos. Cov neeg ntseeg yuav sib txoos ua kab ke lov mov nyob hauv Hnub Chiv. Hnub ntawd yog sawv daws teev Ntuj ua Tswv Ntuj tsaug ua ke, lawv yuav tso plhuav nug tseg, tig los teev Ntuj thiab mloog Tswv Ntuj Lo Lus. Dua ntawd, hnub no sawv daws yuav qee lub sij hawm rau nrog cov neeg yus nyiam yus hlub nyob ua ke, sib koom ua hauj lwm tsim koob hmoov.
Tswv Ntuj lo lus cog nrog tib neeg yuav pom nyob hauv Tswv Ntuj Lo Lus Qhia tias ‘koj yuav hwm koj niam koj txiv’, vim Tswv Ntuj hlub nws cov me nyuam mas niam thiab txiv thiaj yuav tsum hlub lawv cov me nyuam. Cov me nyuam yuav huab hwm lawv niam lawv txiv, lawv yuav muab niam txiv saib hlob, yuav paub ris niam txiv lub txiaj ntsig. Hais txog ntawm cov kwv tij nkauj muam, cov nruab ze mas lawv yuav sib yoog sib uv, ib tug yuav txawj hwm ib tug mas lawv tsob kwv tij thiaj yuav sib nyiam, mas tas lub zos thiaj txawj koom siab koom ntsws ua ib ntwg. Dhau hauv lub cuab mas yog kev mloog tej hlob lus, tsis hais nyob rau thaj tsham twg vim lub hwj chim no tuaj ntawm Tswv Ntuj tuaj. Tus hlob tsum khuv leej thiab hwm tus yau xws li tus yau hwm thiab saib taus tus loj.
Hais txog ‘txoj sia’ yog lub paj tshab Tswv Ntuj pub rau neeg, yog li nyob hauv Tswv Ntuj Lo Lus Qhia tsib thiaj txwv tsis pub txov txoj sia thiab ua tsis zoo rau neeg lub cev, tus ntsuj, thiab tus plig. Cov neeg ntseeg yuav paub txuag lwm tus txoj sia thiab.
Tswv Ntuj Lo Lus Qhia tim rau hais tias ‘koj tsis txhob zes luag txij luag nkawm’ vim tias ‘lub neej txij nkawm’ yog lub cim cav txog ‘kev sib nyiam sib hlub nyob hauv kev sib cog lus’. Yog ib tug ua tsis ncaj rau ib tug mas yuav rhuav txoj kev sib cog lus pov tseg. Lub neej txij nkawm yog Tswv Ntuj hu los txais Tswv Ntuj txoj koob hmoov tau foom tseg cia.
Kev ua tub sab tub nyiag, rhuav neeg kev cia siab, daws txoj hlua sau neeg ua ib npoj nyob hauv kev thaj yeeb koom siab. Yog li Tswv Ntuj Lo Lus Qhia no thiaj txwv tsis pub neeg ua tub sab nyiag luag tej lwm yam los ua yus tug. Tswv Ntuj Lo lus Qhia no qhia peb kom faib qhov peb muaj ntau rau tus neeg tsis tau muaj.
Tus neeg ncaj yuav ua tim khawv txog qhov tseeb. Tus neeg hais tej yam cuav, hais lus dag los yog xyav luag moo mas nws tab tom tsis lees qhov tseeb. Tswv Ntuj yog qhov tseeb yog li tus neeg hla Tswv Ntuj Lo Lus Qhia ‘koj tsis txhob hais lus dag’ thiaj yog nws tab tom tsis lees paub Tswv Ntuj.
Tswv Ntuj Lo Lus Qhia tias ‘koj tsis txhob cia koj lub siab ntshaw’, yeeb vim tias ‘kev ntshaw’ tuaj ntawm tus dab ntxias neeg tuaj. Yog peb cia txoj kev ntshaw looj koov peb mas yog peb tau qhib qhov rooj txais dab phem nkag los nyob hauv peb. Kev ntshaw yuav xeeb ntau yam kev phem tuaj, qhov kawg yuav ua rau peb hla Tswv Ntuj Txoj Cai.
Huab Tais Yes Xus hais tias “Cov tau txoj hmoov zoo yog cov pluag hauv nruab siab”, tab sis Huab Tais Yes Xus tsis tau hais kom peb nyiam ‘kev pluag’. Qhov Huab Tais Yes Xus hais mas yog kom ua lub siab pluag, thiaj yuav vam txog Tswv Ntuj thiab tso siab rau Tswv Ntuj tau.
Cov muaj txoj hmoov zoo yog cov quaj ntsuag, yeeb vim tias thaum peb raug kev txom nyem yog peb ua tiag uv dhau mas peb yuav ntsib kev nplij siab raws li lo lus tias los nag tas lub ntuj yuav kaj tuaj.
Cov neeg siab zoo lawv tau txoj hmoov zoo vim lawv lub siab yuav tsis raus rau hauv qhov tsaus ntuj, lawv lub siab tsuas kaj thiab xyiv fab mus li xwb.
Cov tshaib nqhis txoj kev ncaj mas lawv tau txoj hmoov zoo, vim lawv tshaib thiab nqhis txog kev ncaj mas lawv thiaj nrhiav kev ncaj ntshiab, yog nrhiav tus neeg ncaj tus neeg zoo txhij. Tus ntawd yog Leej Pleev nyob hauv lub Cim Yug.
Cov tau txoj hmoov zoo yog cov hlub luag tej raws li peb hais nyob hauv zaj ‘Peb Txiv’ tias ‘thov koj zam rau peb, zoo li peb zam rau luag’. Thaum peb zam rau tus ua tsis zoo rau peb, tus yog peb tus yeeb ncuab; mas yog peb tab tom qhia lawv tias Tswv Ntuj nyiam lawv thiab khuv leej lawv.
Cov neeg siab huv, lawv tau txoj hmoov zoo vim tias tus neeg siab huv mas nws zoo siab cev nws lub siab rau Tswv Ntuj, yuav tsis muaj yam dab tsi los ntxias tau nws.
Tus tau txoj hmoov zoo yog tus tsim kev thaj yeeb, nws yuav ua Tswv Ntuj cov me nyuam. Tswv Ntuj cov me nyuam ua neej nyob hauv kev nyiam thiab kev thaj yeeb, lawv txoj hauj lwm yog tsim kev thooj siab koom ntsws nyob hauv cov neeg sib cov nyom, cov neeg tawg ua pab ua pawg. Lawv yuav pab kom cov neeg ntawd ras tau tias lawv sawv daws yog ib cuab kwv tij, lawv muaj tib tug tij yog Huab Tais Yes Xus, lawv koom tib Leej Txiv.
Cov raug hiam vim txoj kev ncaj, lawv txoj hmoov zoo vim Ntuj Ceeb Tsheej yog lawv tug. Kev koom nrog Leej Pleev ris kev txom nyem, koom ris Yes Xus tus Ntoo Cuam, sawv tsees los tshaj txog txoj kev ntseeg txawm tias thaum kawg yuav raug tua tuag los xij. Tus neeg zoo li no mas nws yuav tau mus nyob pem Tswv Ntuj lub Ceeb Tsheej xws li cov Leej Ntshiab thiab cov Tim Khawv.
