Kwv tij Hmoob, Tswv Ntuj yeej ib txwm paub tias peb yog neeg zoo li cas, Tswv Ntuj xav kom peb ua neeg zoo, tab sis Tswv Ntuj kuj tsis yuam peb kom ua raws li Tswv Ntuj nyiam. Tswv Ntuj cia peb xaiv yuav ywj siab saib peb yuav ua neeg zoo los neeg phem, mloog los tsis mloog Tswv Ntuj lus. Yog li thiaj muaj ntaus zaus peb xaiv taug txoj kev ncaj thiab ntau zaus peb tau yuam kev.
Yog peb yuam kev mas peb yuav tau lees tias peb tau yuam kev thiab peb yuav rov txhim kho kom peb txhob yuam kev, raws li muaj sau nyob hauv Mas Tais Ntawv Moo Zoo tias hmo lawv ntes Yes Xus, Pob Zeb tsis lees paub Yes Xus txog 3 zaug. Thaum qaib qua, Pob Zeb mam nco tau Yes Xus cov lus hais rau nws tias “Qaib tsis tau qua, koj twb tsis kam lees paub kuv peb zaug”, ces Pob Zeb tawm mus, nws quaj tu siab tas nrho. Ntawm Yus Das, nws pom tias lawv muab lub txim tuag rau Yes Xus, ces nws tu siab, nws nqa nyiaj rov qab mus rau cov thawj leej choj thiab cov txwj laus, nws hais tias “Kuv ua txhaum lawm, vim kuv muag ib co ntshav tsis txhaum.” Cov thawj leej choj thiab cov txwj laus tsis kam txais, ces Yus Das tso cov nyiaj tseg, nws mus dai caj dab tuag. (MT 26: 69-75, 27: 3-5)
Kwv tij Hmoob, Pob Zeb thiab Yus Das nkawd tau ua yuam kev, nkawd tu siab, tab sis nkawd ua tsis zoo xws tib yam.
Pob Zeb paub tias nws ua yuam kev lawm, nws tu siab ces nws tos ntsoov Yes Xus rov los nyob hauv nws, los coj nws kev. Ntawm Yus Das, nws paub tias nws ua yuam kev, nws tu siab tab sis nws tsis kam daws nws qhov yuam kev, nws kaw nws lub siab tsis cia Yes Xus nkag los nyob hauv, nws yeem cia dab phem coj nws kev, ces Yus Das thiaj xaiv kev tuag saib puas yuav daws tau nws qhov txhaum.
Kwv tij, peb cov neeg ntseeg txog Yes Xus, muaj ntau zaus peb tau yuam kev xws li Pob Zeb thiab Yus Das tiag, thov kom peb tu siab thiab thov Tswv Ntuj pab peb qhib siab rau Hub Tais Yes Xus los coj peb kev, mas peb thiaj yuav txawj daws peb qhov yuam kev ntawd xws li Pob Zeb tos nrhw txog hnub Yes Xus sawv rov los thiab tawm los hais rau nws tias “Koj zov kuv cov yaj mog.” (Z 21: 16)
