Lub sij hawm peb npaj ua lub ntees Yes Xus yug los, kuj zoo rau peb rov nco txog cov His Xas Lais zaj kwv huam hais txog Tswv Ntuj tsim ntiaj teb thiab tsim thawj nkawm niam txiv As Das thiab Es Vas.

Thaum As Das thiab Es Vas raug Xas Tas, tus phem los lub tswv yim phem, lub siab phem nyob hauv nkawd ntxias tau nkawd kom fav xeeb rau Tswv Ntuj. Ces nkawd hla Tswv Ntuj txoj cai txwv tsis pub noj tsob txiv paub qhov zoo thiab qhov phem. Tswv Ntuj thiaj ntiab nkawd tawm ntawm lub vaj lom zem mus khwv noj khwv haus nyob sab nraud.

Txij hnub ntawd los ces noob neej ntiaj teb thiaj muaj tus phem, muaj lub siab phem, lub tswv yim phem nrog nraim tib neeg nyob. Thiaj pom tshwm muaj kev sib ntaus sib tua, kev zes luag poj luag sev, kev tub sab tub nyiag, huab luag noj luag haus, kev khib rau luag tej thiab quab yuam luag tej.

Cov haiv neeg loj yuam haiv neeg me kom ua lawv qhev, cov haiv neeg ntse ntxias kom haiv neeg ruam mloog lus thiab ua qhev, ua raws li lawv hais. Yus thiaj pom tias tib neeg ntiaj teb nyob tsis muaj kev haum pheej.

Thaum neeg ntiaj teb tsis muaj kev haum pheej ces neeg lub siab nyob tsis tus, neeg rov nco tsis tau Tswv Ntuj tus tsim neeg lawm.

Yes Xus yug los nyob ntiaj teb nws puas tau coj dab tsi tuaj rau neeg ntiaj teb?

Yes Xus tuaj nyob lub ntiaj teb no nws tau ua cov hauj lwm nram no kom tau pab tsoom tib neeg ntiaj teb rov fim tau Tswv Ntuj.

1. Yes Xus tuaj cawm ntiaj teb neeg.

Yes Xus tuaj cawm ntiaj teb neeg ntawm lub txim txhaum. Lub txim txhaum uas los ntawm neeg lub siab phem, los ntawm tus Xas Tas. Yes Xus cawm peb ntawm lub tswv yim ruam qhwv thiab cov txhaum uas phwj txog peb caj dab. Yes Xus cawm peb ntawm Xas Tas hniav ntaj hniav riam uas niaj hnub ntxias kom peb ua neeg phem. Yes Xus cawm peb kom dim ntawm peb lub siab phem, dim ntawm peb tus kheej tus yeeb yam tsis zoo.

Yes Xus tuaj nyob ntiaj teb nws cawm peb kom dim kev txhaum, dim txoj kev ua qhev rau peb lub cev niaj hnub rub peb kom ua tej yam phem, dim peb lub siab nkhaus, ib yam li Yes Xus cawm cov neeg dig muag kom rov pom kev, cov lag ntseg rov hnov lus, cov neeg mob zoo hlob thiab cov tuag rov sawv muaj txoj sia.

2. Yes Xus tuaj coj peb mus cuag Tswv Ntuj.

Txij thaum As Das thiab Es Vas tau hla Tswv Ntuj txoj cai ces noob neej tau raug lo lus foom, lo lub keeb txhaum ua kom tib neeg thiab Tswv Ntuj tsis sib cuag.

Yes Xus yog Tswv Ntuj Leej Tub, Tswv Ntuj xa nws yug los hauv tus poj niam lub cev xws li leej tib neeg. Kom Yes Xus thiaj yuav coj tau tib neeg rov mus cuag tau Leej Txiv Tswv Ntuj.

Nyob hauv Yes Xus mas peb sawv daws thiaj tau kev mus cuag Tswv Ntuj thiab Yes Xus yog zoo li peb tus tij laug hlob uas tau ris neeg cov txhaum, tau yeem muab roj ntshav pua txoj kev rau peb taug mus cuag Tswv Ntuj.

Yes Xus tuaj nyob ntiaj teb nws tau coj Tswv Ntuj cov me nyuam uas tau ncaim ntawm Tswv Ntuj rov los cuag Tswv Ntuj. Zoo li Yes Xus tuaj nrhiav tau tus me nyuam poob zoo rov los rau nws niam nws txiv, los Yes Xus tuaj ua kom tus me nyuam tsis kam mloog lus rov los nrog nws niam nws txiv nyob. Yes Xus tuaj ua kom peb ntiaj teb rov paub Leej Txiv Tswv Ntuj thiab mloog Leej Txiv lus.

3. Yes Xus tuaj pub txoj kev kaj.

Yog peb xav ua hauj lwm nruab hmo ntuj dub mas peb ua tsis tau, peb mus kev tsaus ntuj mas peb yuav ntog, yuav dawm los poob qhov taub.

Zaum puav lub ntuj kaj lis nrig, hos yus mloog li yus lub siab tsaus ntuj li nti. Vim yus muaj ntau tsav ntau yam kev nyuaj siab, muaj ntau tsav ntau yam kev txhawj. Peb ntshaw txoj kev kaj siab kawg nkaus.

Neeg lub tswv yim, neeg tus plig nyob hauv qhov tsaus ntuj nti, lawv tsis paub tsis pom kev yuav mus cuag Tswv Ntuj tau zoo li cas.

Txij Yes Xus yug los nyob ntiaj teb, Yes Xus thiaj zoo li lub teeb ci kaj rau cov neeg kom paub meej tias Tswv Ntuj nyob qhov twg, txoj kev dim nyob qhov twg. Yes Xus coj qhov pom kev, txoj kev kaj tuaj rau neeg ntiaj teb tiag!

Txoj kev kaj uas Yes Xus coj tuaj rau peb yog zoo li cas? 

Yog Yes Xus cov lus qhuab qhia, yog Yes Xus tus yam ntxwv, yog Yes Xus lub siab dav thiab txawj hlub neeg, yog Yes Xus lub siab txawj zam txhaum.

Yes Xus tuaj qhuab qhia Tswv Ntuj cov lus, qhia kev coj siab, qhia kev ua neej rau peb. Qhov kaj uas Yes Xus coj tuaj thiaj yog txoj kev kaj tseem ceeb yuav coj peb mus cuag Leej Txiv Tswv Ntuj thiab txawj nyob sib puag caj qwb ua kwv ua tij nyob hauv lub sim ceeb no.

4. Yes Xus coj kev zoo siab lom zem tuaj rau peb.

Kev zoo siab, kev lom zem xyiv fab yog yam uas peb ntshaw tshaj plaws. Lub caij peb nco txog Yes Xus yug los kuj ze lub caij Hmoob noj tsiab ces haj yam txhab peb txoj kev zoo siab thiab lom zem tuaj ntau npaug.

Yus thiaj pom tias muaj ob yam kev lom zem nyob hauv peb lub caij no.

– Sawv daws xyiv fab zoo siab txhia tus. Tas zej tas zos luag ntxhi, hnav tshiab, sawv daws noj nqaij haus cawv thiab dhia lom zem. Sawv daws tau mus tsham kwv tsham tij. Hmo Yes Xus yug los muaj cov Tshiab tuaj hu nkauj lom zem cav txog Tswv Ntuj Leej Tub yug los.

– Txoj kev lom zem uas Yes Xus coj tuaj rau peb tseem muaj lwm fab uas yog txoj kev lom zem, zoo siab tob tob kawg nyob hauv neeg nruab siab. Qhov lom zem ntawd yus pom tau nyob hauv cov lus tus Tshiab hais rau Mab Liab tias “Koj nyob kaj lug, tus tau txiaj ntsim puv siab! Huab Tais nrog koj nyob. Zaum no, koj yuav xeeb tub.” Mab Liab hais rau tus Tshiab tias “Kuv yog Huab Tais tus ntxhais txib. Kuv xav kom muaj raws li koj hais” (LK 1: 28, 31, 38).

Txoj kev lom zem, zoo siab no yog txoj kev lom zem vim Tswv Ntuj nyob saum peb, vim Tswv Ntuj nyiam peb. Thiab yog txoj kev ua xis Tswv Ntuj lub siab.

Lub caij Yes Xus yug los peb ua ntau yam lom zem, peb tau kev lom zem vim peb paub tias Tswv Ntuj nyiam peb. Vim peb zoo siab ua raws li Tswv Ntuj siab xav mas peb kuj yuav nco ntsoov txog lwm leej uas lawv tsis muaj kev lom zem. Peb yuav pub kev lom zem, kev zoo siab rau luag tej. Peb tau pab kom luag tej muaj kev zoo siab npaum twg mas Leej Ntuj Plig haj yam yuav txhab kev zoo siab rau peb npaum ntawd.

5. Yes Xus tuaj yug peb.

Niaj hnub peb noj zaub mov kom tau yug peb lub cev, txhab roj txhab ntshav kom peb txawj hlob, muaj zog ua puas tsav yam qav num thiab muaj zog tiv thaiv kab mob. Tiam sis peb lub siab lub ntsws, peb lub tswv yim thiab peb tus ntsuj plig tseem yuav tsum tau txiaj ntsim los yug ces peb tus kheej thiaj yog ib leej tib neeg zoo puv.

Yes Xus tuaj muab cov txiaj ntsim yug peb tus plig, yug peb lub siab kom muaj zog. Yes Xus tau muab nws tus kheej lub cev, lub siab thiab tus ntsuj plig los ua txhiam xws yug peb lub siab thiab tus plig. Yog vim li ntawd, Tswv Ntuj uas yog tus muaj txoj sia nyob mus li tau yeem muab nws lub cev rau peb kom yug peb tus plig mas thiaj yog cov txhiam xws pub txoj sia nyob mus li.

Peb cov neeg ntseeg Yes Xus niaj hnub peb txais Yes Xus lub cev nyob hauv lub ncuav mov thiab cov cawv hauv lub thaj txi Ntuj. Ua lub cim tias peb txais Yes Xus los yug peb. Peb niaj hnub teev Ntuj thiab tsa peb lub siab npuab Tswv Ntuj ces peb txais Tswv Ntuj cov txiaj ntsim los yug peb.

Yes Xus hais tias “Kuv lub cev yog tseem txhiam xws thiab kuv cov ntshav yog tseem dej ntshiab. Leej twg noj kuv lub cev thiab haus kuv cov ntshav mas tus ntawm yuav nyob hauv kuv thiab kuv yuav nyob hauv nws.”

6. Yes Xus tuaj txais kev txom nyem.

Yog tias peb txawj xaiv tau los yug ua neeg mas peb tsuas xav yug los ua nom ua tswv, yug los ua huab tais, yug los saum pawg nyiaj pawg kub kom peb tau noj tau haus thiab tsis txhob khwv mus ib sid.

Tswv Ntuj Leej Tub Yes Xus, nws yog Tswv Ntuj, nws yeej xaiv tau los yug. Nws xav yug los ua huab tais, xav yug los ua neeg nplua nuj kuj tau. Tab sis Yes Xus xaiv los yug txom nyem. Yes Xus xaiv yug los txom nyem kom tau this ntiaj teb neeg txoj kev txom nyem.

Yes Xus xaiv los yug hauv ib lub tsev teb thaum lub caij ntuj no no, tsis muaj pam vov, tsis muaj tsev zoo thaiv cua no. Yes Xus niam muab Yes Xus tso pw hauv lub dab nyuj.

Yes Xus xaiv los yug ua neeg nruab liaj nruab teb, ua kws ntoo thiab tsuas khwv tau txaus noj txaus haus xwb.

Yes Xus xaiv los yug ua tus tuag this neeg txoj kev txom nyem.

Yes Xus kev txom nyem thiaj pib muaj tuaj puag thaum ntxov, txij nws yug los mus txog hnub nws txoj sia tu.

Yes Xus pib qhuab qhia Tswv Ntuj cov lus mas pib muaj neeg ntxub nws, pib muaj neeg thuam Yes Xus.

Yes Xus tshaj lo lus tsis nto 3 xyoos lawv twb muab nws ntes thiab muab tua nyob saum ntoo cuam. Tiam sis vim Yes Xus txawj xaiv los yug, nws kuj txawj xaiv kev muaj txoj sia vim nws yog Tswv Ntuj. Ces 3 hnub tom qab Yes Xus rov sawv hauv cov tub tuag rov los. Yes Xus thiaj coj tas ib zeej tsoom neeg hauv tub tuag teb rov mus cuag Tswv Ntuj.

Peb niaj hnub yuav ua Tswv Ntuj tsaug uas nws tso nws Leej Tub Yes Xus yug los raug kev txom nyem this peb kev txom nyem. Tsis li mas peb txoj kev txom nyem loj tas nrho nyob tom peb hauv ntej tos peb, vim peb cov txhaum dhau peb lub zog yuav ris tau.

Niaj hnub peb ua neej, yog peb yuav tsum khwv me ntsis kom tau pab luag tej, mas peb zoo siab hlo ua vim peb tej kev khwv, peb tej kev nyuaj pab luag tej yog ua raws li Tswv Ntuj lub siab xav.

7. Yes Xus tuaj hlub peb.

Yes Xus tuaj nyob ntiaj teb no vim nws hlub peb, Tswv Ntuj hlub peb ces Tswv Ntuj thiaj tso nws Leej Tub twm zeej nqes los yug ua neeg kom tau cawm peb.

Txoj kev hlub muaj zog dua tas txhia yam. Dej dag, av luaj qua tsis tau kev hlub. Tswv Ntuj hlub tib neeg txij lub hauv paus uas nws tau tsim lub sim ceeb los. Tswv Ntuj pom tias nws cov me nyuam ncaim ntawm Tswv Ntuj cov lus qhia, ncaim mus deb ntawm Tswv Ntuj vaj loog ces Tswv Ntuj tso nws Leej Tub Yes Xus tuaj hu peb rov mus txog peb Txiv Tswv Ntuj lub tsev.

Yes Xus tau hlub tib neeg ntiaj teb tas nrho, nws hlub tib neeg txog qhov kawg. Yes Xus hlub peb nws tsis vam ib yam dab tsi pauj rov rau nws, nws tsuas thov ib qho xwb. Yes Xus hais tias “Kuv thov kom nej rov sib nyiam sib hlub ib yam li kuv nyiam thiab kuv hlub nej.”

Tswv Ntuj hlub peb tas npaud, mas peb rov sib nyiam sib hlub mog!

Kev sib nyiam sib hlub yog lub hauv paus peb yuav cuag tau Tswv Ntuj.

Lub ntees nco txog Yes Xus yug los ze lawm, peb yuav npaj dab tsi tos txais nws, peb yuav tsuj Yes Xus xeeb zoo li cas. Yes Xus yuav tsis tuaj cuag peb xws li tus me nyuam mos, nws kuj tsis tuaj cuag peb xws li tus huab tais muaj hwj chim, los tus neeg siab zoo.

Yes Xus tau hais nyob hauv Mas Tais Ntawv Moo Zoo zaj 25: 40-45 tias “Leej twg tau txais ib tug me nyuam me me no vim kuv lub npe mas nws tau txais kuv. Yam twg uas nej tau ua rau cov me tshaj hauv kuv tsoom kwv, mas nej tau ua rau kuv. Yog nej tau fee plhu rau ib tug neeg me tshaj hauv tsoom neeg me mas nej tau fee plhu rau kuv.”

Li ntawd, lub caij peb nco txog Yes Xus yug los mas Yes Xus yeej yuav tuaj xyuas peb xwb. Yes Xus yuav tuaj nyob hauv tej tus neeg laus laus, tej tus me nyuam ntsuag, tej tus poj ntsuam, nyob hauv tej tus txom txom nyem. Yes Xus tuaj nyob hauv peb tsoom kwv tij, tsoom phooj ywg thiab tsoom qhua mus los dua kev. Yes Xus tos saib peb puas txawj txais Yes Xus nyob hauv tsoom neeg me ntawd.

Yog koj xav cev yam paj tshab zoo tshaj rau Yes Xus, koj yuav nrhiav Yes Xus nyob qhov twg. Kuv hais rau koj tias Yes Xus nyob hauv nws tsoom kwv tij, tsoom neeg me. Koj cev paj tshab rau Yes Xus, koj hlub Yes Xus nyob hauv tsoom neeg me mog!