Tus sau: Yaj Faiv Ntxhos, USA (Tseb Nplej 2016)
Kwv tij Hmoob sawv daws! Thaum peb tig los ntseeg Tswv Ntuj lawm, Tswv Ntuj muab txoj kev ncaj, kev nyiam thiab kev hlub rau peb yam puv npo. Txoj kev ncaj, kev nyiam thiab kev hlub no zoo li ib lub teeb cig pom kev lug hauv peb lub siab thiab coj peb kev kom peb txawj mus coj luag tus tsis tau paub Tswv Ntuj, kom lawv pom kev xws li peb.
Kev ntseeg yog kev nyob thaj yeeb, Yes Xus hais tias “Peb cov neeg ntseeg yuav hwm thiab nyiam Tswv Ntuj tas siab, tas ntsws thiab yuav nyiam luag tej ib yam li peb nyiam peb tus kheej.” Lo lus no twb xub muaj ua ntej Yes Xus yuav yug los lawm. Yog qib 1 thiab qib 2 nyob hauv Huab Tais 10 lo lus qhia.
Vim li cas 2 lo lus hwm Tswv Ntuj thiab hwm neeg thiaj loj sib luag?
Vim Tswv Ntuj twb yog tus tsim neeg thiab ne! Vim peb pom tsis tau Tswv Ntuj, tab sis neeg mas peb pom tau nyob thoob ntiaj teb. Muaj neeg nyob ib puag ncig ntawm peb xws li ntawm kuv thiab koj nrob qaum thiab xub ntiag, sab xis sab laug huv si. Neeg yog Tswv Ntuj tsim los, neeg muaj Tswv Ntuj lub ntsej muag thiab lub hwj chim nyob puv hauv txhua leej txhua tus. Yog peb tsis sib pom peb thiab tsis sib hwm peb, ces peb yuav tsis pom Tswv Ntuj thiab tsis hwm Tswv Ntuj ib yam. Vim li ntawd, peb ib tsoom neeg sawv daws yuav tsum sib hwm, sib nyiam thiab sib hlub.
Cov neeg nyob ntiaj teb no, yog leej twg ua raws Tswv Ntuj 2 lo lus qhia saum no muaj Tswv Ntuj 2 lo lus no nyob hauv nws nruab siab, mas nws yog Tswv Ntuj ib tug tub los ib tug ntxhais zoo lawm. Vim lawv tau coj ncaj thiab txawj hlub luag tej, tsis hais cov twb ntseeg lawm los cov tsis tau ntseeg. Tas sawv daws cov neeg ntseeg thiab cov tsis tau ntseeg, los peb sawv daws puav leej yog tib pab neeg xwb. Vim peb sawv daws yog Tswv Ntuj me nyuam tag nrho.
Yog li peb yuav tau sib hwm, sib nyiam thiab sib hlub kom txaus. Yog peb muaj Tswv Ntuj txoj kev nyiam thiab kev hlub txaus, mas peb thiaj yuav tsis tawg ua pab ua pawg. Peb thiaj yuav txawj nrog Tswv Ntuj tu lub ntiaj teb no kom xis li Tswv Ntuj lub siab nyiam. Peb yuav nco ntsoov Yes Xus lo lus uas nws tau hais tias thaum txog hnub kawg, mas nws yuav nqes los txiav txim. Nws yuav faib pab yaj rau sab xis thiab yuav faib pab tshis rau sab laug. Yes Xus yuav hais rau pab nyob sab xis tias “Thaum kuv raug kev txom nyem, kuv tshaib plab thiab nqhis dej, kuv nyob hauv tsev loj faj, nej tau tsob hwb thiab saib xyuas kuv.” Lawv yuav nug Yes Xus tias “Thaum twg peb tau tsob hwb koj thiab saib xyuas koj?” Yes Xus yuav teb rau lawv tias “Thaum nej tau tsob hwb thiab saib xyuas luag tej, ces yog nej tsob hwb kuv thiab saib xyuas kuv.”
Yes Xus kuj yuav hais rau pab nyob sab laug tias “Thaum kuv raug kev txom nyem, kuv tshaib plab thiab nqhis dej, kuv nyob hauv tsev loj faj, mas nej tsis tau tsob hwb kuv thiab tsis tau saib xyuas kuv. Nej tawm mus nyob deb ntawm kuv mus tag ib txhiab ib txhis.” Ces pab ntawd yuav nug Yes Xus tias “Thaum twg koj raug kev txom nyem, koj tshaib plab nqhis dej thiab koj nyob hauv tsev loj faj, peb tsis tuaj tsob hwb thiab saib xyuas koj?” Yes Xus yuav teb rau lawv tias “Thaum nej tsis tau tsob hwb thiab saib xyuas luag tej, ces yog nej tsis tau tsob hwb thiab saib xyuas kuv.”
Yes Xus lo lus no npuav tag nrho yus tus kheej nrog rau ntiaj teb neeg sawv daws. Yog li yus tus tau paub Tswv Ntuj lawm, mas yus to taub tias tag ib puas tsav yam nyob hauv lub sim ceeb no yog Tswv Ntuj ua tus tsim. Tas ib puas tsav yam yog tuaj ntawm Tswv Ntuj tuaj, ces yus yuav tau hwm tas nrho. Tsis hais tib neeg, nroj tsuag, toj roob hauv pes thiab tsiaj txhu huv si. Tswv Ntuj cov lus qhia muaj 10 nqe, tab sis muab sua zog los ua 2 nqe loj sib luag : yam li koj yuav nyiam thiab hwm Tswv Ntuj tshaj tas puas tsav yam, thiab koj yuav nyiam luag tej, hwm luag tej ib yam li koj nyiam koj.
Niaj hnub no ntiaj teb neeg nyob tsis thaj yeeb, vim yog ntiaj teb neeg tsis hwm Tswv Ntuj cov cai. Ntiaj teb neeg ua raws ntiaj teb lub keeb txhaum : yam li lub siab muab hlob, khav theeb, xav ua tus loj thiab xav nrhiav koob meej nto npe. Xav muaj hwj chim, nyias khav nyias kev ntse thiab tsis muaj kev sib hwm. Muaj kev sib tw koj tsis ntshai kuv, kuv tsis swb koj. Thiaj ua rau ntiaj teb neeg muaj kev sib tawg, sib txeeb noj, sib txhav teej tug thiab tsis mloog hais lawm. Ces muaj kev sib pauj, muaj kev sib tua ntxhov quav niab, ua rau lub ntej teb tsis muaj kev thaj yeeb. Zoo li lub teeb uas ci kaj rau ntiaj teb pib tuag qauj zuj zus mus lawm.
Ib tsoom kwv tij Hmoob ntseeg sawv daws! Thaum peb los txais kev ntseeg Ntuj, mas Tswv Ntuj muab txoj kev ncaj, kev sib nyiam thiab sib hlub. Tswv Ntuj txoj kev nyiam kev hlub zoo li lub teeb taws pom kev lug rau peb, kom peb tau nyob kaj siab lug. Yog peb muaj Tswv Ntuj cov lus nyob hauv peb, mas peb muaj kev sib nyiam sib hlub, peb muaj kev ncaj ncees ua kom neeg nyob thaj yeeb. Tswv Ntuj txoj kev nyiam kev hlub no, yog txoj kev kaj lug coj peb mus cuag Tswv Ntuj.
Vim li cas thiaj hais tau tias kev ntseeg Ntuj yog kev ncaj ncees, thiab kev sib nyiam sib hlub?
Qhov no peb yuav tsis tos leej twg qhia peb, tab sis peb pom meej meej tau nyob hauv cov hauj lwm uas Tswv Ntuj muab rau peb : yam li kev ncaj ncees, kev nyiam thiab kev hlub. Ces peb paub tias Tswv Ntuj nyiam lub ntiaj teb thiab hlub neeg npaum li cas! Tswv Ntuj hlub lub ntiaj teb neeg, nws thiaj tso nws Leej Tub Yes Xus los tuag nyob saum Ntoo Cuam, kom tau ntxuav ntiaj teb neeg cov txhaum pov tseg. Tus Ntoo Cuam, mas yog tus ntaiv ntuj ntag. Yes Xus txoj kev tuag, zeem tseeb tias Tswv Ntuj hlub lub ntiaj teb neeg. Tswv Ntuj yog tus tsim lub ntuj ntsuab thiab lub ntiaj teb av qhuav. Cas thaum tib neeg ua txhaum, Tswv Ntuj ho tsis cem thiab xuas tes plhws kom tib neeg rov dawb huv tuaj. Yog Tswv Ntuj ua li ntawd, mas nws tsis ncaj ncees thiab ntiaj teb neeg yuav tsis paub txog Tswv Ntuj txoj kev hlub neeg. Nws thiaj tso nws Leej Tub Yes Xus tuaj nyob ntiaj teb thiab tuag txhiv neeg lub txim txhaum. Thiab qhia kom ntiaj teb neeg paub txog Yes Xus tus Ntoo Cuam uas yog tus ntaiv ntuj. Seb ntiaj teb neeg puas xaiv txoj kev taug tus ntaiv ntuj los sis xaiv taug txoj kev tsaus ntuj.
Kwv tij Hmoob ntseeg sawv daws! Thaum peb los txais kev ntseeg txog Tswv Ntuj, mas Tswv Ntuj tau muab ib lub teeb los ci kaj peb lub siab, kom peb pom kev lawv nraim Yes Xus qab mus cuag Tswv Ntuj, kom peb tsis txhob yuam kev. Vim li ntawd, peb yuav tsum nquag txhab roj rau lub teeb uas Tswv Ntuj muab rau peb, kom peb lub teeb txhob tuag thiab cig pom kev tas mus li. Yog peb ua li ntawd, mas peb yuav pom kev lug raws Yes Xus qab taug Yes Xus lw. Lub teeb uas Tswv Ntuj muab rau peb, mas yog Tswv Ntuj cov lus qhia.
Peb yuav txhab roj li cas rau peb lub teeb?
Peb muaj lub Koom Txoos, muaj cov Tswv Qhia, cov Txiv Plig, cov Leej Phauj thiab cov Xib Hwb. Lub Koom Txoos tau txhim tsa kom muaj ib qho chaw sib txoos ua ke; yam li yog lub tsev teev Ntuj. Peb yuav tau mus sib koom, sib sau mloog Tswv Ntuj cov lus ua ke. Thaum peb mus sib koom txais Tswv Ntuj cov lus ua ke, mas zoo li peb muaj kev sib hwm thiab sib haum xeeb zoo heev. Tej no ntag, yog kev txhab roj rau peb lub teeb kom pom kev lug mus li. Yog peb tsis nquag mus txhab roj rau peb lub teeb, mas peb lub teeb yuav qauj thiab tuag mus xwb. Thaum peb ua Tswv Ntuj lub teeb ci uas yog qhov pom kev nyob hauv peb lub siab tuag mus lawd, mas peb zoo li tus yaj poob zoo. Thaum ib tug yaj poob zoo lawd, mas nws yuav ceeb laj rov los nrhiav poo tau nws pab yaj thiab nws tus tswv lawm. Yog peb los txais kev ntseeg lawm, mas peb yuav tsum nquag mus koom nrog ib tsoom neeg ntseeg teev Ntuj txais Ntuj Lus ua ke. Peb yuav muab siab rau mloog thiab kawm Tswv Ntuj cov Lus, vim Tswv Ntuj cov lus yog lub teeb kaj peb lub siab. Nyob hauv Tswv Ntuj lub teeb kaj peb lub siab, mas muaj kev ncaj ncees thiab kev sib nyiam sib hlub puv npo. Yog peb tsis mus koom nrog cov neeg ntseeg teev Ntuj, mas zoo li peb tseem yog ib tug neeg uas tsis tau paub txog Tswv Ntuj li. Piv ib lo lus tias “Tus neeg nquag khwv thiaj muaj noj, tus neeg nkees yeej tshaib plab.”
Tus nquag txais Tswv Ntuj Lus, nws lub siab nyob kaj lug. Hos tus tsis nquag mus txais Tswv Ntuj Lus, mas nws lub siab nyob tsaus ntuj nti. Tswv Ntuj yog tus tsim lub ntuj lub teb, tsim tas ib puas tsav yam thiab muab cob rau neeg ua tus kav, Tswv Ntuj tsis lam muab rhuav yooj yim. Yog Tswv Ntuj ua li ntawd, mas zoo li Tswv Ntuj tsis hlub neeg thiab tsis hwm neeg. Li ntawd, thaum peb los txais kev ntseeg, mas txhais tias Tswv Ntuj lees txais peb ua nws cov me nyuam. Vim cov Txiv Plig tau sau peb npe los koom nrog Tswv Ntuj ua ib cuab. Peb yog Tswv Ntuj cov me nyuam, Hnub Chiv yog Tswv Ntuj hnub, peb sawv daws thiaj li mus sib koom nyob hauv lub tsev teev Ntuj thiab txais Ntuj Lus ua ke. Lub tsev teev Ntuj yog peb qhov chaws sib ntsib, sib fim thiab sib koom txais Tswv Ntuj cov lus qhia. Peb mus tsob hwb Tswv Ntuj, mus hawm Tswv Ntuj. Peb yuav nco ntsoov txhob nruam Tswv Ntuj hnub, vim tus txais Tswv Ntuj cov lus qhia, mas zoo li nws rov txais ib lub zog tuaj ntawm Tswv Ntuj tuaj nyob hauv nws. Tus muaj Tswv Ntuj cov lus nyob hauv nws, mas yuav muaj lub siab ntseeg khov ntseeg ruaj thiab txawj ua cov hauj lwm hlub luag tej. Vim Tswv Ntuj cov lus hwj nws nyob hauv nws tes hauj lwm. Thov kom peb sawv daws muaj lub siab ntseeg thiab tso siab rau Tswv Ntuj, cia Tswv Ntuj cov lus ua lub teeb kaj coj peb kev mus txog Tswv Ntuj lub Ceeb Tsheej, peb thiaj yuav tau nyob kaj lug mus ib txhiab ib txhis!