Tus sau: Xib Hwb Yaj Zoov Ntxheb, USA teb. (Tseb Nplej 2016)
Lub Thaj Cav Txiaj Ntsim yog ‘thaj txi Ntuj’. Thaj txi Ntuj muaj nqes thiab tsim txiaj tshaj txhua yam nyob hauv tib neeg txoj kev thov Ntuj, los sis kev fiv yeem kom Ntuj pab pov hwm.
Yes Xus tau qhia rau nws cov thwj tim kom nco ntsoov ua ‘Thaj Cav Txiaj Ntsim’ nco txog Tswv Ntuj. Cov neeg muaj lub Thaj Cav Txiaj Ntsim no, yog cov uas nrog Yes Xus koom siab tsis ncaim ntawm Leej Txiv Tswv Ntuj, mas lawv thiaj ua. Yog cov nyiam Yes Xus Pleev txoj kev npuab Leej Txiv Tswv Ntuj tiag, vim tias lub thaj txi Ntuj nyob siab thiab duav tas nrho peb cov kev teev hawm uas muab tsiaj txi Ntuj los txi dab. Nws roos tas nrho saum kev hu plig, kev ua neeb ua yaig, kev ua khawv koob los ua nyuj dab npua tai huv si.
Lub thaj txi Ntuj nyob siab dua tej kev nphau ntees los ntxus sub thiab tuam choj. Thaj txi Ntuj muaj koob meej tshaj tej pluas mov ntxiv ntaub ntxiv ntawv, sam nqaij sam mov, ntxiv hnub nyoog kom tej laus muaj ntaub noj ntawv haus nyob ntev niaj ntau xyoo.
Lub Thaj Cav Txiaj Ntsim no daws thiab hloov tau tej nyuj dab npua tai, kev fiv yeem, hloov tau tus xwm kab txhiaj meej pem xeeb los dab roog. Thaj txi Ntuj siab tshaj tej pluas mov muaj koob meej txais nom txais tswv, zoo tshaj tej rooj mov hu plig rau me nyuam yug los tshiab vim tus neeg tsis muaj nyiaj los nws tuaj yeem ua tau lub Thaj Cav Txiaj Ntsim no. Zoo dua tshoob kos thiab tej rooj mov ua kev zoo siab txais tos ib tug qhua tshwj xeeb nyob kev deb tuaj, zoo dua tej rooj mov pauj txiaj ntsim rau tej tus neeg siab dawb tau cawm dua yus tej neeg los lawd.
Yog koj nco tias xav pauj los nco txog ib yam kev nyuab twg, koj mus hais rau ib tug Txiv Plig tias koj xav kom muaj ib thaj txi Ntuj pab rau yam ntawd. Ces koj caw Txiv Plig thiab cov ntseeg tuaj koom lub thaj txi Ntuj ua ke, ces lub thaj txi Ntuj ntawd roos tas nrho thiab pov hwm koj li qhov koj tau xav.
Yog koj nyob deb cov Txiv Plig, mas koj xa paj tshab mus thov Txiv Plig taws tswm ciab npaj lub rooj cav txiaj ntsim xwb los kuj tau thiab.
Ua li cas lub Thaj Cav Txiaj Ntsim ntawd xwb ho yuav hais tias tsim txiaj roos tau li ntawd?
Vim Tswv Ntuj yog Leej Txiv tus tsim neeg thiab tsim kom muaj txhua yam tuaj nyob ntiaj teb thiab nyob saum ntuj. Yes Xus yog Leej Txiv Tswv Ntuj qee nws ib feem los ua Leej Tub kom tau yuav lub cev neeg ua Tswv Ntuj Lo Lus. Leej Txiv thiab Leej Tub muaj kev sib nyiam loj tas nrho, ces cia li xeeb ib feem ntawm nkawd los ua Leej Ntuj Plig Ntshiab loj sib luag zos. Peb cov neeg ntseeg thiaj tuav txog Leej Txiv, Leej Tub thiab Leej Ntuj Plig Ntshiab los thov txhua yam.
Leej Ntuj Plig Ntshiab zoo li ib tug ntsuj kom nyob tau nrog leej tib neeg, txeem tau mus nyob txawm hauv leej tib neeg nruab siab. Kom txawj xaiv qhov phem los qhov zoo, txawj ua xis Leej Txiv lub siab nyiam.
Yam uas hloov tau peb tej kev muab tsiaj txhu, qaib noog los ua cov txim txi rau Ntuj los txi rau dab thiab fiv yeem ntawd, Tswv Ntuj tau qhia hais tias Yes Xus yog Tswv Ntuj tus Tub txia ua tus Yaj dawb huv los txi Ntuj.
“Tswv Ntuj Leej Tub tuaj yeem txia ua tus Yaj dawb huv los txi rau Leej Txiv,
kom tau ntxuav neeg tej kev txhaum thiab kev khaum tawm mus.”
Kom leej tib neeg txhua tus rov ua neeg dawb huv thiab tsim nyog nyob hauv lub ntiaj teb no tiag. Tswv Ntuj thiaj cia nws Leej Tub tuaj hloov tus tsiaj txi Ntuj uas neeg lub keeb muab tsiaj los txi Ntuj yav thaud.
Yog li ntawd, nyob hauv lub thaj txi Ntuj uas lub Koom Txoos Kav Tos Liv hu ua Thaj Cav Txiaj Ntsim no, thiaj yog txoj kev hloov tau tas nrho peb tej kev muab tsiaj los txi ntuj.
Yog Peb txawj txhais, mas Yes Xus Pleev yog tus tseem tsiaj kub nto ntuj, tw suab teb tiag. Yog peb nyiam Thaj Cav Txiaj Ntsim no, mas niaj Hnub Chiv peb muaj tej rooj mov muaj koob meej nto moo lug los noj. Daws tej teeb meem ntawm kev tsis sib haum xeeb, kom hmab tsis dawm tes hlua tsis dawm taw. Puav leej yog tej pluas mov noj koom nrog Ntuj los nrog tej pog tej yawg dua nras lawd. Lub Thaj Cav Txiaj Ntsim kuj zoo li ib pluas mov noj los pov hwm ib tse ib puas nees nkaum leej kom noj qab nyob zoo, nce toj kom muaj zog, nqes hav los tsis ntshaus hlaub ntshaus raws.
Nyob hauv lub Thaj Cav Txiaj Ntsim no, thaum peb pib yog hais kom peb sawv daws rov sib haum xeeb ua ke, peb sib haum xeeb nrog Tswv Ntuj thiab qhuas Tswv Ntuj uas yog tus muaj hwj chim nyob siab dua Ntuj cov Tshiab thiab neeg ntiaj teb. Peb thov Ntuj kom hlub txhua haiv neeg tib si.
Peb kuj thov kom Tswv Ntuj qhib peb lub siab los txais Ntuj tej Lus, kom peb sib raug zoo nyob ua ke xws li sawv daws yog ib yim neeg, txheej hlob txheej yau los puav leej tsim txiaj tas txhua leej txhua tus.
Peb yuav zeem tias Tswv Ntuj Leej Tub tuaj yeem txia ua tus Yaj dawb huv los txhiv tib neeg txoj kev txhaum, kom tau rov ua Ntuj me nyuam thiab muaj txoj sia nyob mus li uas yog qhov tseeb tiag.
Peb cev lub ntiaj teb txhua phiaj neeg kom Ntuj pov hwm, kom sawv daws txawj ua neeg sib raug zoo nyob ua ke; cev sawv daws tej poj koob yawm txwv thiab tej txheeb ze uas dua nras lawd rau Ntuj txais, kom Tswv Ntuj zeem thiab pov hwm lawv cov ntsuj plig; peb nrog txheej neeg tseem muaj txoj sia nyob tsis hais cov muaj cov pluag, cov me nyuam neeg los cov thawj neeg, peb thov kom Tswv Ntuj saib xyuas ua Ntuj cov tub ki sib nyiam sib hlub nyob ntiaj teb no kom sawv daws tau nyob thaj yeeb nrog Tswv Ntuj txoj kev nyiam kev hlub.
Ces tus Txiv Plig los Xib Hwb thiaj sawv Leej Pleev chaw foom lus zoo tias “Tswv Ntuj ua nej siab kaj lug!” Peb thiaj sib foom kev nyob kaj lug thiab faib tus Leej Yaj txi Ntuj ua ke; yam li cov neeg ntseeg txais lub Cim Yug.
Thaum txais lub Cim Yug, mas zoo li sawv daws koom noj ib rooj mov lom zem ua ke. Sawv daws zoo li ib pab kwv tij nkauj muam sib hwm sib hlub, zoo li peb koom ib leeg niam ib leeg txiv, zoo li peb yog ib caj hlab ces ncau los ntawm Nkauj Iab Nraug Oo, los sis As Das thiab Es Vas nkawd los ntag.
Xav kom sawv daws sib haum xeeb thiab sib koom xws thaum nyob ntawm lub Thaj Cav Txiaj Ntsim mus li.
