NQE 1. VIM LI CAS PEB THIAJ UA LUB XYOO TEEV NTUJ?
Yog vim niaj hnub peb xav cav txog tas puas tsav yam txiaj ntsim uas ib txwm los txog tav no Tswv Ntuj pub rau ntiaj teb neeg.
Ntuj cov txiaj ntsim yog cov txiaj ntsim twg?
Ntuj xav cawm lub ntiaj teb ntawm txoj kev ua txhaum, ces Tswv Ntuj thiaj npaj ib haiv neeg tos tus Huab Tais yuav tuaj cawm lub ntiaj teb. Tswv Ntuj tso nws Leej Tub tuaj nyob ntiaj teb no. Tswv Ntuj Leej Tub qhia nws cov lus cawm lub qab ntuj neeg. Tswv Ntuj Leej Tub tuag kom them peb cov txim txhaum. Tswv Ntuj Leej Tub sawv rov los kom nws tau pab peb ntseeg tias peb muaj txoj sia tshiab nyob hauv nws. Tswv Ntuj Leej Tub nws rov mus sawm ntuj, nws mus npaj ib qho chaw rau peb nyob. Tswv Ntuj Leej Tub tso Leej Ntuj Plig Ntshiab tuaj pab cov neeg ntseeg kom lawv txais tau txoj kev cawm neeg. Niaj hnub Leej Ntuj Plig Ntshiab ua hauj lwm nyob hauv neeg lub siab nyob ntiaj teb no mus txog lub caij lub ntiaj teb neeg yuav hlob tiav. Tswv Ntuj Leej Tub yuav rov qab los tos cov neeg ntseeg txog nws thiab yuav coj lawv mus nyob mus li pem Tswv Ntuj lub Ceeb Tsheej ci ntsa iab.
Tej ntawd tib si yog cov txiaj ntsim uas Tswv Ntuj pub rau lub ntiaj teb neeg.
Niaj xyoo peb xav nco txog cov txiaj ntsim muaj nqes tas nrho ntawd. Peb thiaj ua lub xyoo teev Ntuj.
Yog leej twg tsim kom muaj lub xyoo teev Ntuj?
Yog tsoom neeg ntseeg txog Yes Xus. Txij thaum Yes Xus rov mus saum ntuj lawm, mas cov neeg ntseeg maj mam pib teem tej lub hnub nyoog nco txog Tswv Ntuj cov txiaj ntsim ces muaj lub xyoo teev Ntuj xws li lub zim txwv no peb ua.
NQE 2. NYOB HAUV LUB XYOO TEEV NTUJ PEB SAIB COV HNUB NYOOG TWGYOG LOJ DUA COV?
Muaj ob lub hnub nyoog uas peb saib yog loj dua cov: Yog hnub nyoog ‘Yes Xus yug los’, thiab hnub nyoog ‘Yes Xus sawv rov los’.
Hnub nyoog Yes Xus yug los.
Niaj xyoo yog hnub tim 25 lub 12 hlis ntuj, peb thiaj ua lub hnub nyoog Yes Xus yog los.
Hnub nyoog Yes Xus sawv rov los.
Lub hnub nyoog ntawd tseem hu ua lub ‘hnub nyoog Hla‘, los hu ua lub ‘Ntees Hla’. Lub Koom Txoos teem hnub nyoob Hla zoo li no; peb saib lub hli nyob saum ntuj rov txog lub 4 hlis xiab 15. Hnub Chiv ze ntawm xiab 15 mas peb thiaj ua lub hnub nyoog Hla.
NQE 3. LUB XYOO TEEV NTUJ CAV TXOG TSWV NTUJ COV TXIAJ NTSIM CAWM NEEG
Faib ua 3 lub caij zoo li no:
1. Caij Tos Huab Tais (Advent).
Yog 4 lub lis piam ua hnub nyoog Yes Xus yug los ntej. Lub caij ntawd, peb tos tus Huab Tais nqes los cawm lub ntiaj teb.
2. Caij Yes Xus Yug Los (Christmas).
Txij hnub tim 14 lub 12 hli hmo ntuj txog hnub tim 13 lub 1 hlis, peb hwm Yes Xus yug los, hwm Yim Neej Ntshiab, hwm Mab Liab ua Yes Xus niam. Hnub tim 6 lub 1 hlis peb hwm Yes Xus tawm tuaj rau ntiaj teb neeg pom. Tim 13 lub 1 hli peb hwm Yes Xus txais lub Cim Ntxuav ces tag lub cail Yes Xus yug los.
3. Caij Plaub Caug (Lent).
Yog ntu 40 hnub ua Hmoov Hla ntej. Lub Koom Txoos npaj sau siab ua Hnub nyoog Hla. ‘Hnub Plaub Txais Tshauv’ yog hnub qhib lub Caij Plaub Caug. Lub Caij Plaub Caug muaj 6 hnub chiv. Hnub chiv kawg peb ua lub ntees nqaum nplooj thiab pib cav txog Yes Xus raug kev txom nyem.
4. Caij Hla (Easter).
Yog txij hnub Tsib Ntshiab mus txog hnub Leej Ntuj Plig Ntshiab nqes los mas yog lub Caij Hla. Peb ua lub Caij Hla zoo li no: Peb ua hnub Tsib Ntshiab cav txog Yes Xus tsim lub Cim Yug. Ua hnub Rau Ntshiab cav txog Yes Xus tuag. Ua hmo Hla cav txog Yes Xus sawv rov los. Muaj 7 lub lim piam cav txog lub Txiaj Ntsim Hla. Thaum txog hnub tim 40 nyob hauv lub caij Hla peb hwm Yes Xus rov mus lawm saum ntuj. Thaum txog hnub tim 50, peb ua hnub nyoog hawm Leej Ntuj Plig Ntshiab nqes los; yog hnub xaus lub caij Hla.
5. Caij Nyob Nruab Xyoo (Ordinary time).
Lub caij Nyob Nruab Xyoo peb nyeem cov Ntawv Ntshiab hais txog dab tsi?
Peb txais Yes Xus cov lus cawm ntiaj teb neeg, peb mloog Leej Ntuj Plig Ntshiab ua hauj lwm nyob hauv tsoom ntseeg lub siab.
Lub caij nruab xyoo muaj ob ntu: Ntu ib yog txij tim 13 lub 1 hlis mus txog hnub plaub txais tshauv. Muaj 5 los 6 los 7 los 8 hnub chiv, yog nyob ntawm tej xyoo ua hnub nyoog Hla ntxov los lig. Ntu ob yog txij lub lim piam lawv hnub nyoog Leej Ntuj Plig Ntshiab nqes los mus txog lub lim piam uas peb pib ua lub caij tos Huab Tais.
Ntu ob ntawd, tej xyoo ua hnub nyoog Hla ntxov mas ntu ob no muaj 26 hnub chiv. Tej xyoo ua hnub nyoog Hla lig mas ntu ob no muaj 22 hnub chiv.
Lub Koom Txoos npaj cov Txoos txaus ua lub caij nyob nruab xyoos muaj 34 lub lim piam. Tej xyoo lub caij nyob nruab xyoo muaj tsis nto 34 lub lim piam, mas ntawv xam nyoog qhia peb tias thaum ua hnub nyoog Leej Ntuj Ntshiab nqes los tas mas yuav nruam cov lis piam twg. Hnub chiv kawg xaus lub caij nyob nruab xyoo yog hnub chiv 34 hwm Yes Xus ua Vaj. Ua lub txoos no tas lawm mas lub xyoo teev Ntuj kuj tag lawm thiab. Dua lub lim piam ntawd lawm mas pib ua lub caij tos Huab Tais, yam li rov pib ua xyoo teev Ntuj tshiab. Yog thaum lub 11 hlis tas yuav txog lub 12 hlis.
