Leej Ntshiab Tuam yug los nyob hauv lub tuam ceeb Lis Npos, Pos Tws Nkas teb hauv xyoo 1195. Tuam lub npe yog ‘Faws Ntis Nas’ (Ferdinand Bouillon). Tuam lawv tsev neeg yog noob nom, yog li Tuam thiaj tau kawm txuj nyob hauv lub nroog Lis Npos. Thaum Tuam muaj 15 xyoos, nws txiav siab ua tub haum xeeb nyob hauv lub koom haum Leej Ntshiab Aus Nkus Tis Nus (Augustinian Order). Tuam muab tas nws lub sij hawm los teev Ntuj thiab kawm phau Ntawv Ntshiab, ces Tuam thiaj yog ib tug kws Ntawv Ntshiab.

Thaum Tuam muaj 25 xyoos, Tuam pom cov tub koom haum Fas Ntshis Kas (Franciscan Order) tuag ua tim khawv cov pob txha mas nws xav ua tim khawv xws li lawv, ces Tuam mus nyob hauv cov Fas Ntshis Kas lub koom haum. Nyob ntawd, lawv tis lub npe ‘Tuam’ (Anthony) rau nws.

Tuam thov mus tshaj lub Moo Zoo rau Mos Los Kos teb (Morocco) tab sis thaum mus txog tog, Tuam mob hnyav mas lawv thiaj xa nws rov qab. Lub nkoj Tuam lawv caij raug ib nthwv cua loj, lawv thiaj los theem nyob hauv lub pov txwv Xis Xis Lis. Nyob ntawd, Tuam hnov tias cov tub koom haum sib txoos ua lub rooj sab laj loj nyob As Xis Xis hauv Is Tas Lias teb, mas Tuam thiaj tawm hauv lub pov txwv Xis Xis Lis mus rau As Xis Xis. Tuam tau ntsib Fas Ntshis Kus tus tsa lub koom haum Fas Ntshis Kas.

Tuam yog neeg ncauj tsawg thiab tsis muab hlob, nws yeem ua sawv daws tus tub txib mas thiaj tsis muaj tus twg paub tias Tuam yog ib tug kws Ntawv Ntshiab. Muaj ib hnub, yog hnub tim 19 lub 3 hlis xyoo 1222, lawv txhib Tuam kom nthuav Tswv Ntuj Lo Lus hauv lub txoos; Tuam nthuav Tswv Ntuj Lo Lus tau zoo mloog thiab yooj yim rau sawv daws mloog. Fas Ntshis Kus mloog Tuam cov lus tas, nws sau ib tsab ntawv mus hais Tuam tias “Kuv xav cia koj tuaj qhia txuj rau peb npoj kwv tij, tab sis koj yuav tsis txhob rhuav lawv txoj kev teev Ntuj thiab lub siab ntseeg.” Txij hnub ntawd los, Tuam thiaj ntoj kev mus qhia txuj thiab nthuav Tswv Ntuj Lo Lus thoob Is Tas Lias Pej Fab thiab Fab Kis Naj Ffab.

Tuam tsis yog txawj nthuav Tswv Ntuj Lo Lus xwb, Tuam tseem ua tau hwj huam (miracle), txawj hais lus deev siab (tongue), hais lus saub (prophecy) thiab. Muaj ib zaug Tuam nthuav Tswv Ntuj Lo Lus nyob hauv lub nroog Lis Mis Nis (Rimini) tab sis tsis muaj tus twg yuav mob siab mloog, Tuam nqes mus nram hav dej, nws nthuav Ntuj Lus nyob nrad, ua ciav muaj ib pab ntses coob coob ua luam dej nyob ze ntug mloog Tuam. Cov neeg hauv lub nroog pom li ntawd, lawv tawm tuaj ntsauv Tuam thiab mloog Tuam ntuas lawv, ces tas lub nroog hloov siab tshiab.

Lub caij ntawd, muaj ib co qhia zaj tswv yim cuav kom tsoom sid muab siab ib rau ntiaj teb lub cuab tam, kom sawv daws ua neeg muab hlob, ntxub cov neeg txom nyem. Tuam sawv los tiv cov neeg ntawd, nws coj tus yam ntxwv rau lawv pom thiab hais lus deev lawv siab ntsws, ces sawv daws tig rov los nyob hauv Tswv Ntuj txoj kev nyiam; tus ntxub nws tig los nrog nws sib haum xeeb, tus tswv qhev tso nws cov qhev los txais kev twj lij, cov tub sab tig los ua hauj lwm raug cai, tus neeg noj luag zog ua ncaj rau nws tus phooj ywg, tus txeeb luag lub cuab tam ua nws tug mas nws rov lub cuab tam rau lawv.

Tuam mus nthuav Tswv Ntuj Lo Lus txog qhov twg mas muaj neeg coob tuaj mloog nws. Muaj ib hnub Tuam mus txog lub nroog Pas Duas mas tas tsoom sid sib sau tuaj mloog nws.

Tuam tau txuag nws tus kheej kom ntshiab huv tas mus li, ces muaj ib hnub thaum Tuam tab tom zaum teev Ntuj nyob ib leeg ntsiag to, tus me nyuam Yes Xus yees tawm los rau nws pom xyeem thiab tus me nyuam Yes Xus xuas tes los khawm Tuam caj dab, hnia Tuam.

Thaum Fas Ntshis Kus tuag tas, cov tub koom haum tsa Tuam ua tus tswj npoj kwv tij nyob Es Mis Lias (Emilia) thiab xaiv Tuam ua tus tiam lis mus ntsib Vaj Qhia Nqes Nkos Lis tim 9. Tuam tseem rov mus nyob Pas Duas thiab tshaj Ntuj Lus tsis tseg, ces xyoo 1231 lub 6 hli tim 13 Tuam tuag nyob ntawd. Thaum ntawd, Tuam muaj 36 xyoo.

Xyoo tom qab lub Koom Txoos tsa Tuam ua ib tug Leej Ntshiab. Xyoo 1946 Vaj Qhia Pis Yus tim 12 zeem tseeb tias Leej Ntshiab Tuam yog lub Koom Txoos cov kws txuj.

Niaj hnub no, Leej Ntshiab Tuam yog tus pov hwm lub teb chaws Pos Tws Nkas, cov neeg ntoj kev deb, cov poj niam tab seeb, cov neeg pluag. Tus twg ua ib yam dab tsi ploj, yog tus ntawd vam txog Leej Ntshiab Tuam mas nws yuav rov nrhiav tau, mas niaj hnub no sawv daws thiaj nyiam thov Leej Ntshiab Tuam pab lawv nrhiav tej yam lawv tau ua ploj.

Leej Ntshiab Tuam tuag tas, nws lub cev thiab poj txha rov mus ua av, tab sis nws tus ntsis nplaig tseem tshiab khiv li qub los txog niaj hnub no.