Saw Mab Liab

By admin Oct12,2024

Kev hais txoj saw Mab Liab faib ua 4 ntu kav tag nrho 7 hnub hauv lub lis piam. Ib ntu yuav faib ua 5 yag hais.

Ntu 1. Cov txuj ci tob qhia txog kev kaj siab (Joyful Mysteries) yog cov zaj nco txog ‘Yes Xus lub neej yav yau’, yuav hais nyob hauv Hnub Ob thiab Hnub Xya.

Ntu 1 yag 1 thaum tus Tshiab xa xov tuaj rau Mab Liab, thov kom peb qhib siab mloog lus (Obedience).

Zaj 1 nco tias vim tib neeg tsis mloog lus mas kev txhaum tau tshwm sim los nyob hauv lub ntiaj teb (LM 5: 12). Zaj 2 nco tias Leej Txiv hlub lub qab ntuj neeg mas nws xa Leej Tub tuaj cawm cov neeg ntseeg txog Leej Tub (Z 3: 17). Zaj 3 nco tias Tswv Ntuj kom tus Tshiab Nkas Nplias xa xov tuaj rau Mab Liab (LK 1: 26, 27). Zaj 4 nco tus Tshiab cov lus hais rau Mab Liab tias “Koj yuav xeeb tub, koj yuav tis nws npe hu ua Yes Xus” (LK 1: 31). Zaj 5 nco tus Tshiab cov lus tias “Nws yog Tswv Ntuj Leej Tub” (LK 1: 32). Zaj 6 nco tias Mab Liab pom zoo raws li tus Tshiab hais, ces nws teb tias “Kuv yog Huab Tais tus ntxhais txib, kuv xav kom muaj raws li koj hais” (LK 1: 38). Zaj 7 nco tias Tswv Ntuj Leej Tub mloog Leej Txiv mas nws thiaj xeeb los ua neeg (LK 1: 35). Zaj 8 nco tias Leej Tub kev mloog lus mas coob leej thiaj tau txais cawm (LM 5: 19). Zaj 9 nco tias Mab Liab mloog Tswv Ntuj lus mas nws rais mus ua Tswv Ntuj tus Leej Niam (LK 1: 35). Zaj 10 nco tias tsis muaj ib yam dab tsi Tswv Ntuj ua tsis tau (LK 1: 37).

Ntu 1 yag 2 thaum Mab Liab mus xyuas tus phauj Es Lis Xas Npes, thov kom peb muaj lub siab nyiam thiab hlub lwm tus (Love Others).

Zaj 1 nco txog Mab Liab mus xyuas tus phauj Es Lis Xas Npes xeeb tub thaum hnub nyoog laus lawm (LK 13: 40). Zaj 2 nco txog Es Lis Xas Npes yug nws tus tub Zam (LK 1: 13). Zaj 3 nco tias Es Lis Xas Npes hais rau Mab Liab tias “Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo” (LK 1: 45). Zaj 4 nco tias yog Leej Ntuj Plig Ntshiab ua kom Mab Liab xeeb tub (MT 1: 18). Zaj 5 Mab Liab hais tias “Kuv tus plig cav txog Huab Tais lub hwj chim” (LK 1: 46). Zaj 6 Mab Liab hais tias “Huab Tais lub siab hlub roos cov neeg hwm nws tiam dhau tiam” (LK 1: 50). Zaj 7 Mab Liab yog Tswv Ntuj tus Leej Niam, nws nrog Es Lis Xas Npes nyob kom tau pab tu Es Lis Xas Npes thaum tseem nyob hli (LK 1: 56). Zaj 8 Mab Liab tut us phauj Es Lis Xas Npes tas mas nws mam rov mus tsev (LK 1: 56). Zaj 9 thaum peb tseem muaj sij hawm ua qhov zoo rau sawv daws, mas peb kav tsij uam us (NLT 5: 10). Zaj 10 peb nrog sawv daws nyob haum pheej raws li peb ua tau (LM 12: 18).

Ntu 1 yag 3 thaum Yes Xus yug nyob hauv lub tsev yug tsiaj, thov kom peb ua neeg pluag (Poverty).

Zaj 1 tus kav Tswv Ntuj haiv neeg yuav yug los nyob hauv lub zos Npes Les Hes (MiK 5: 1). Zaj 2 Yos Xes thiab Mab Liab sawv kev ntawm lub zos Nas Xas Les mus rau Npes Les Hes kom tau sau Mab Liab npe nrog nws lub npe (LK 2: 4). Zaj 3 Mab Liab yug nws tus tub nyob Npes Les Hes (LK 2: 7). Zaj 4 nyob ntawd tsis muaj chaw rau nkawd so, ces Mab Liab muab ntaub qhwv tus me nyuam thiab muab tso pw hauv lub dab nyuj (LK 2: 7). Zaj 5 cov Tshiab tawm tuaj hais rau cov zov yaj tias “Hnub no, tus Cawm nej yug los lawm” (LK 2: 10, 11). Zaj 6 cov Tshiab cav lus zoo txog Tswv Ntuj tias “Nyob saum cov txheej ntuj siab, Tswv Ntuj nto meej nto moo; nyob ntiaj teb, tsoom neeg Tswv Ntuj nyiam nyob thaj yeeb” (LK 2: 14). Zaj 7 cov kws hnub qub tuaj Toob Fab tuaj nrhiav tus Pleev yuav yug los (MT 2: 1, 2). Zaj 8 cov kws hnub qub chaws los hauv tsev, ces lawv hawm tus me nyuam Yes Xus (MT 2: 11). Zaj 9 tas txhua haiv neeg yuav tsob hwb Leej Pleev (NPN 72: 11). Zaj 10 tus twg txais Leej Pleev mas tus twg los ua Tswv Ntuj cov me nyuam (Z 1: 12).

Ntu 1 yag 4 thaum Mab Liab thiab Yos Xes cev tus me nyuam Yes Xus rau Tswv Ntuj nyob hauv lub Tuam Tsev Teev Ntuj, thov kom peb ua neeg me tsis muab hlob (Humility).

Zaj 1 thaum tus me nyuam Yes Xus yug tau 8 hnub, lawv ua kab ke txiav rau nws (LK 2: 21). Zaj 2 lawv tis lub npe rau tus me nyuam hu ua Yes Xus (LK 2: 21). Zaj 3 tsuas muaj lub npe ‘Yes Xus’ tib lub npe xwb thiaj cawm tau ntiaj teb neeg (HL 4: 12). Zaj 4 Yes Xus hais rau peb tias yog peb tuav txog Yes Xus lub npe thov dab tsi ntawm Leej Txiv, mas Leej Txiv yuav pub rau peb (Z 16: 23). Zaj 5 tus twg hu txog Huab Tais, Huab Tais yuav mloog thiab zam lub txim pub rau nws (NPN 86: 5). Zaj 6 Yos Xes thiab Mab Liab coj tus me nyuam Yes Xus mus cev rau Tswv Ntuj (LK 2: 22). Zaj 7 tus yawg Xis Mes Oos ua Yaj Saub hais tias Yes Xus yuav ua chaw rau ntau leej ntog thiab ntau leej rov sawv (LK 2: 34). Zaj 8 tus yawg Xis Mes Oos tseem hais rau Mab Liab tias muaj ntau rab ntaj yuav hno Mab Liab tus plig (LK 2: 35). Zaj 9 Yos Xes thiab Mab Liab coj tus me nyuam Yes Xus mus nyob hauv lub zos Nas Xas Les (LK 2: 39). Zaj 10 peb ua dab tsi mas peb yuav tuav txog Yes Xus lub npe (KLX 3: 17).

Ntu 1 yag 5 thaum Yes Xus muaj 12 xyoos, ces Mab Liab thiab Yos Xes nrhiav tau nws nyob nruab nrab cov thoob xwm ntawv hauv lub Tuam Tsev Teev Ntuj, thov kom peb muaj lub siab kaj thaum peb nrhiav tau Huab Tais Yes Xus lawm (Joy in Finding Jesus).

Zaj 1 Yes Xus muaj 12 xyoos ces nws nrog nws niam thiab nws txiv mus pem Yes Lus Xas Les (LK 2: 42). Zaj 2 Yes Xus nyob pem Yes Lus Xas Les, nws niam thiab nws txiv tsis paub (LK 2: 43). Zaj 3 Mab Liab thiab Yos Xes nrhiav tsis pom Yes Xus, ces nkawd rov los nrhiav pem Yes Lus Xas Les (LK 2: 45). Zaj 4 Mab Liab thiab Yos Xes nrhiav tau Yes Xus nyob hauv lub Tuam Tsev Teev Ntuj (LK 2: 46). Zaj 5 Yes Xus hais tias nws leg Leej Txiv cov hauj lwm nyob hauv lub Tuam Tsev Teev Ntuj (LK 2: 49). Zaj 6 yim neeg ntshiab rov los nram Nas Xas Les (LK 2: 51). Zaj 7 Yes Xus yog Tswv Ntuj Leej Tub, nws mloog nws niam nws txiv (LK 2: 51). Zaj 8 Tswv Ntuj hais rau peb tias “Nej hwm nej niam nej txiv” (MT 15: 4). Zaj 9 Yes Xus kuj hais rau peb tias “Yog nej nyiam kuv mas nej yuav coj rawv kuv cov lus qhia” (Z 14: 15). Zaj 10 peb txhob muab lo lus thiab tus nplaig los nyiam xwb, peb ua kiag tej yam hauj lwm los nyiam kom tseeb (1Z 3: 18).

Ntu 2. Cov txuj ci tob qhia txog kev txom nyem’ (Sorrowful Mysteries) yog cov zaj nco txog ‘Yes Xus yeem txais kev txom nyem thiab tuag’ kom tau txhiv ntiaj teb neeg, yuav hais nyob hauv Hnub Peb thiab Hnub Rau.

Ntu 2 yag 1 Yes Xus teev Ntuj nyob hauv lub vaj txiv ntoo roj, thov kom peb tu siab rau peb cov txhaum (Sorrow for Sin).

Zaj 1 nco txog thaum Yes Xus thiab cov thwj tim mus pem lub vaj Kes Txes Mas Nis (MT 26: 36). Zaj 2 nco txog Yes Xus coj Pob Zeb, Yas Kos thiab Zam mus teev Ntuj rau ib cag (MT 26: 37). Zaj 3 Yes Xus hais rau lawv tias “Kuv tus plig tu siab yuav tuag” (MT 26: 38). Zaj 4 Yes Xus hais rau Leej Txiv tias “Kuv Txiv, yog koj kheev no, thov kom lub ntim no hla mus deb ntawm kuv” (MT 26: 39) Zaj 5 Yes Xus rov hais rau Leej Txiv tias “Tab sis txhob ua raws li kuv xav, koj ua raws li koj xav” (MT 26: 39). Zaj 6 Yes Xus hais rau cov thwj tim tias “Nej tsis muaj peev xwm nrog kuv zov hmo ib teev lod?” (MT 26: 40). Zaj 7 Yes Xus hais ntxiv tias “Nej zov hmo thiab nej teev Ntuj kom nej txhob poob rau hauv txoj kev ntxias” (MT 26: 41). Zaj 8 nco tias Yus Das ntxeev siab rau Yes Xus, nws nwj Yes Xus (MT 26: 48). Zaj 9 lawv ntes Yes Xus mus tom tus tuam leej choj tsev (LK 22: 54). Zaj 10 Yes Xus cov thwj tim tso Yes Xus pov tseg, lawv khiav tas (MT 26: 56).

Ntu 2 yag 2 thaum lawv ntes Yes Xus coj mus tsim txom, thov kom peb ua neej nyob mas peb muaj lub siab dawb siab huv (Purity).

Zaj 1 thaum lawv coj Yes Xus mus sawv ntawm As Nas xub ntiag, muaj ib tug zov keeb ib tawg ncuav pias rau Yes Xus sab plhu (Z 18: 22). Zaj 2 tus tuam leej choj xa Yes Xus mus cuag tus tuam leej choj Kais Fas (Z 18: 24). Zaj 3 cov thawj leej choj thiab cov txwj laus nrhiav ib zag liam rau Yes Xus kom tau kev muab Yes Xus tua (MT 26: 59). Zaj 4 Pob Zeb tsis lees paub Yes Xus 3 zaug (Z 18: 17, 25, 27). Zaj 5 lawv coj Yes Xus mus cuag Pis Las Tos (Z 18: 31). Zaj 6 Pis Las Tos tsis pom tias Yes Xus muaj txhaum (Z 18: 39). Zaj 7 Pis Las Tos xav kom cov Yus Das txaus siab, ces nws muab Yes Xus rau lawv nplawm (Z 19: 1). Zaj 8 Yes Xus yeem ris peb tej kev mob, yeem nyiaj peb tej kev txom nyem (HX 53: 4). Zaj 9 Yes Xus raug nkaug vim peb cov hauj lwm phem, Yes Xus raug tsuj vim peb cov txhaum (HX 53: 5). Zaj 10 Yes Xus tej thaj doog ua kom peb tej mob nkeeg zoo hlo (HX 53: 5).

Ntu 2 yag 3 thaum cov tub rog muab lub kauj pos ntoo saum Yes Xus taub hau, thov kom peb muaj lub siab loj siab tawv qhawv rau peb kev txom nyem (Courage).

Zaj 1 nco tias Yes Xus hais rau Pis Las Tos tias nws yog tus vaj, tab sis nws lub Ceeb Tsheej tsis yog nyob hauv lub qab ntuj no (Z 18: 36). Zaj 2 cov tub rog thuam Yes Xus, lawv muab lub kauj pos rau Yes Xus ntoo (MT 27: 29). Zaj 3 cov tub rog muab ib rab pas tauj rau Yes Xus tuav (MT 27: 29). Zaj 4 cov tub rog txhos caug thuam Yes Xus tias “Koj nyob kaj lug, cov Yus Das tus vaj” (MT 27: 29). Zaj 5 cov tub rog nto aub ncaug rau Yes Xus (MT 27: 30). Zaj 6 Pis Las Tos coj Yes Xus los sawv rau sawv daws ntsia, nws hais tias “Nej ntsia tus neeg no” (Z 19: 5). Zaj 7 tsoom sid qw qw tias “Muab nws dai saum ntoo cuam” (Z 19: 6). Zaj 8 Pis Las Tos nug sawv daws tias “Kuv yuav muab nej tus vaj dai saum ntoo cuam lod?” Zaj 9 sawv daws hais tias “Peb tsuas nuaj Xes Ntxas ua peb tus vaj xwb” (Z 19: 15). Zaj 10 tab txawm Yes Xus raug hiam heev kawg, tab sis nws tsis qhob ncauj. (HX 53: 7).

Ntu 2 yag 4 Yes Xus kwv tus Ntoo Cuam mus pem lub roob Nkos Nkos Tas, thov kom peb muaj peev xwm nyiaj ris peb kev txom nyem (Patience).

Zaj 1 Yes Xus kwv nws tus Ntoo Cuam mus pem lub roob Nkos Nkos Tas (Z 19: 17). Zaj 2 Yes Xus tau hais tseg tias “Leej twg tis kwv nws tus ntoo cuam thiab tsis lawv kuv qab, mas nws ua tsis tau kuv thwj tim” (LK 14: 27). Zaj 3 Yes Xus tseem hais tias “Nej txais kuv tus quab, nej tus plig yuav nrhiav tau chaw so los siav” (MT 11: 29). Zaj 4 Yes Xus kuj hais tias “Kuv tus quab kwv yooj yim thiab kuv lub nra sib” (MT 11: 30). Zaj 5 Yes Xus kuj hais tias “Tus nrhiav nws txoj sia, nws ua nws txoj sia ploj. Tus ua nws txoj sia ploj vim kuv, mas nws nrhiav tau nws txoj sia lawm” (MT 10: 39). Zaj 6 txoj kev txom nyem uas peb ris lub caij no yuav muab los piv tsis tau rau lub hwj chim uas yuav tawm tuaj rau luag pom xyeem nyob hauv peb (LM 8: 18). Zaj 7 nco txog tus yawg Xis Mes Oos nyob Xis Les Nas pab Yes Xus kwv tus Ntoo Cuam (LK 23: 26). Zaj 8 Yes Xus hais rau cov poj niam tias “Nej txhob quaj hlub kuv, nej quaj hlub nej thiab hlub nej cov me nyuam mog” (LK 23: 28). Zaj 9 yog kuv xav tau ntsej muag, mas kuv kawg xav kom tau nyob hauv peb tus Huab Tais Yes Xus Pleev tus Ntoo Cuam xwb (NLT 6: 14). Zaj 10 ntiaj teb cov tib neeg yog cov yeeb ncuab ntxub Yes Xus tus Ntoo Cuam (FLP 3: 18).

Ntu 2 yag 5 Yes Xus dai saum tus Ntoo Cuam, thov kom peb ua siab ntev tiv kev txom nyem (Perseverance).

Zaj 1 Yes Xus raug ntsia saum Ntoo Cuam (LK 23: 33). Zaj 2 Yes Xus hais tias “Txiv, koj zam rau lawv” (LK 23: 34). Zaj 3 Yes Xus hais rau tus tub sab hloov siab tshiab tias “Hnub no koj yuav nrog kuv nyob hauv lub nras lom zem” (LK 23: 43). Zaj 4 Yes Xus ntsia nws niam, nws hais tias “Niad, tus ntawd yog koj tus tub” (Z 19: 26). Zaj 5 Yes Xus hais rau tus thwj tim nws nyiam tias “Tus ntawd yog koj niam” (Z 19: 27). Zaj 6 Yes Xus raug dai saum Ntoo Cuam txij tav su mus txog peb teev (MT 27: 45). Zaj 7 thaum Yes Xus raug dai nyob saum tus Ntoo Cuam, mas lub sim ceeb quaj nyiav tu siab ces ntiaj teb tsaus ntuj nti (MT 27: 45). Zaj 8 nco txog Yes Xus lo lus tau hais tseg tias “Tsis muaj leej twg muaj txoj kev nyiam loj dua tus uas siv nws txoj sia rau nws cov phooj ywg” (Z 15: 13). Zaj 9 Yes Xus hais tias “Ib puas tsav yam tiav tas lawm” (Z 19: 30). Zaj 10 Yes Xus hu ib suab nrov nrov tias “Txiv, kuv tso kuv txoj sia rau hauv koj txhais tes” ces Yes Xus txoj sia tu nrho (LK 26: 46).

Ntu 3. Cov txuj ci tob qhia txog lub koob meej (Glorious Mysteries) yog cov zaj cav txog ‘Yes Xus sawv rov los’, hais nyob hauv Hnub Chiv thiab Hnub Plaub.

Ntu 3 yag 1 nco txog hnub chiv lub lis piam, Yes Xus sawv hauv cov tub tuag rov los, thov kom peb muaj lub siab ntseeg (Faith).

Zaj 1 nco txog thaum Yes Xus sawv rov los (LK 24: 6). Zaj 2 Yes Xus tawm tuaj xyuas cov thwj tim, nws hais tias “Nej nyob kaj lug” (Z 20: 19). Zaj 3 Yes Xus tseem tawm los rau tsib puas leej ib txhij pom (1KLN 15: 6). Zaj 4 yog Leej Pleev tsis tau sawv rov los, mas peb txoj kev ntseeg yog ib zag cuav (1KLN 15: 14). Zaj 5 Tos Mas tsis ntseeg, nws hais tias “Yog kuv tsis pom mas kuv tsis ntseeg” (Z 20: 25). Zaj 6 Yes Xus tawm los rau Tos Mas thiab cov thwj tim pom, nws hais rau Tos Mas tias “Cov uas tsis tau pom tab sis lawv ntseeg, mas lawv txoj hmoov zoo” (Z 20: 29). Zaj 7 Yes Xus hais tias “Tus twg ntseeg thiab txais lub Cim Ntxuav, mas Ntuj yuav cawm nws” (MK 16: 16). Zaj 8 vim peb muaj lub siab ntseeg mas peb thiaj tau txais lub txiaj ntsim cawm peb (EFX 2: 8). Zaj 9 Yes Xus hais tias “Tus ntseeg txog kuv, nws yuav tsis tuag” (Z 11: 26). Zaj 10 peb yuav hais lo lus li no tias “Huab Tais, kuv ntseeg, thov koj pab kuv vim kuv ntseeg me me xwb” (MK 9: 23).

Ntu 3 yag 2 Yes Xus nce mus saum ntuj, thov kom peb muaj kev tso siab (Hope).

Zaj 1 Yes Xus hais tias “Kuv yuav mus cuag kuv Txiv thiab nej Txiv, kuv tus Tswv Ntuj thiab nej tus Tswv Ntuj” (Z 20: 17). Zaj 2 Yes Xus hais tias “Kuv mus npaj ib chav rau nej” (Z 14: 2). Zaj 3 Yes Xus hais tias “Kuv nyob qhov twg, mas nej nyob qhov twg” (Z 14: 3). Zaj 4 Yes Xus txib cov thwj tim tias “Nej ua kom tas ib tsoom haiv neeg los ua kuv thwj tim” (MT 28: 19). Zaj 5 ces yuav muaj ib pab yaj thiab ib tug tswv zov yaj xwb (Z 10: 16). Zaj 6 Yes Xus hais tias “Kuv yuav nrog nej nyob mus li” (MT 28: 20). Zaj 7 Yes Xus hais tias “Tsis yog nej xaiv kuv, yog kuv xaiv nej” Z 15: 16). Zaj 8 Yes Xus hais tias “Kuv yog txoj kev, qhov tseeb, thiab txoj sia” (Z 14: 6). Zaj 9 Yes Xus nce mus saum ntuj, zaum ntawm Leej Txiv phab xis (MK 16: 19). Zaj 10 Yes Xus hais tias “Kuv yuav rub tas ib tsoom neeg los cuag kuv” (Z 12: 32).

Ntu 3 yag 3 Leej Ntuj Plig Ntshiab nqes los saum cov thwj tim, thov kom Tswv Ntuj kev nyiam npuv npo hauv peb siab (Love of God).

Zaj 1 hnub Tsib Caug, cov thwj tim thiab niam Mab Liab sib txoos ua ke teev Ntuj (HL 2: 1). Zaj 2 thaum lawv teev Ntuj, ib lub suab nrov saum ntuj tuaj thoob plaws lub tsev (HL 2: 2). Zaj 3 muaj tej ntshua nplaim taws ncau ua tej tus nplaim taws me yaj tuaj taws saum lawv (HL 2: 3). Zaj 4 ces lawv sawv daws tau txais Leej Ntuj Plig Ntshiab puv hauv lawv (HL 2: 4). Zaj 5 cov neej tuaj nyob ntawd, lawv hnov cov thwj tim nyias hais nyias xeem lus (HL 2: 6). Zaj 6 ces cov thwj tim muaj lub siab tawv tshaj lub Moo Zoo (HL 4: 19). Zaj 7 Pob Zeb tshaj tias “Tswv Ntuj tsa Yes Xus uas nej tau dai saum Ntoo Cuam ua Huab Tais thiab ua Leej Pleev” (HL 2: 6). Zaj 8 Paj Lug hais tias “Nej sawv daws puav leej yog Tswv Ntuj cov me nyuam nyob hauv txoj kev ntseeg txog Yes Xus” (NLT 3: 26). Zaj 9 Yes Xus hais tias “Nej sis nyiam sis hlub zoo li kuv tau nyiam tau hlub nej” (Z 15: 12). Zaj 10 Yes Xus hais ntxiv tias “Nej nyiam nej tus yeeb ncuab ib yam li nej nyiam nej” (MT 5: 44).

Ntu 3 yag 4 Tswv Ntuj npo niam Mab Liab mus saum ntuj, peb thov niam Mab Liab vim nws yog peb sawv daws niam (Mary as Our Mother).

Zaj 1 Tswv Ntuj yuav tsis tso cov neeg pheej xeeb rau Tswv Ntuj pov tseg rau ntuj txias teb tsaus (NPN 16: 10). Zaj 2 niam Mab Liab tau mloog Tswv Ntuj coj nws kev, ces nws yog Yes Lus Xas Les lub koob meej thiab yog tus ua kom peb muaj koob meej (JD 15: 9). Zaj 3 Tswv Ntuj hais rau niam Mab Liab tias “Koj sawv tsees, kuv leej muam zoo nkauj. Los mas, nyem no lub caij ntuj no dhau lawm, nag twb tu lawm” (KwT 2: 10). Zaj 4 Tswv Ntuj hais rau Mab Liab tias “Koj yog tus zoo nkauj tas nrho, nyob hauv koj tsis muaj ib qho xyeej” (KwT 4: 7). Zaj 5 tus poj vaj sawv ntawm Tswv Ntuj sab xis (NPN 45: 10). Zaj 6 Tswv Ntuj tau foom ib lo lus zoo dua tas txhua tus leej pom niam nyob ntiaj teb no rau Mab Liab (JD 13: 18). Zaj 7 Tswv Ntuj foom lo lus zoo tias “Koj nyob kaj lug, tus tau txiaj ntsim puv siab, Huab Tais nrog koj nyob” (LK 1: 28). Zaj 8 peb nrog Leej Pleev tuag, peb thiaj yuav nrog Leej Pleev sawv rov los (LM 6: 5). Zaj 9 Yes Xus cog lus tias “Kuv yuav rov los coj nej mus nrog kuv nyob” (Z 14: 3). Zaj 10 ces Tswv Ntuj lub Tuam Tsev nyob saum ntuj qhib los, lub Xab Cog Lus hauv Kem Ntshiab tawm los (QYTN 11: 19).

Ntu 3 yag 5 niam Mab Liab tau lub hwj chim ua Poj Huab Tais, peb cav txog niam Mab Liab ua peb tus poj vaj (Mary as Our Queen and Lady).

Zaj 1 muaj ib lub cim loj tas nrho tshwm nyob saum ntuj, yog ib tug poj niam hnav lub hnub (QYTN 12: 1). Zaj 2 lub hli nyob hauv tus poj niam qab xib taws, kaum ob lub hnub qub vij nws lub taub hau (QYTN 12: 1). Zaj 3 nws nyob saum txheej ntuj siab, nws lub theej kiab nyob saum tus ncej huab (NXL 24: 4). Zaj 4 nws yog kev hlub dawb huv tus leej niam (NXL 24: 24). Zaj 5 nws yog kev txawj kev ntse tus leej niam (NXL 24: 24). Zaj 6 nws yog kev vam khom tus leej niam (NXL 24: 24). Zaj 7 nws yog tus vaj kav Yas Kos tsev neeg leej niam (LK 1: 32). Zaj 8 tus nrhiav yuav ntsib nws (CPL 8: 17). Zaj 9 tus tsob hwb nws yuav tsis ntog hauv qhov txhaum (NXL 24: 21). Zaj 10 tus ntsib yuav pom txoj sia (CPL 8: 35).

Ntu 4. Cov txuj ci tob qhia txog lub hwj chim ci ntsa iab (Luminous Mysteries) yog cov zaj nco txog Yes Xus lub neej yav hluas, ntu no peb hais nyob hauv Hnub Tsib.

Ntu 4 yag 1 thaum Yes Xus mus txais kab ke Ntxuav ntawm Zam hauv tus dej Yos Las Das, thov kom peb paub ua Tswv Ntuj tsaug vim Tswv Ntuj tau pub kev ntseeg li paj tshab rau peb (Gratitude for the Gift of Faith).

Zaj 1 nco txog thaum muaj ib lub suab hu hauv teb chaws suab puam (MK 1: 3). Zaj 2 lub suab ntawd yog tus Ntxuav Plig Zam, nws ntuas sawv daws kom hloov siab tshiab (MT 3: 1-2). Zaj 3 Zaj tshaj tias yuav muaj ib tug tuaj tom qab, Zam tsis tsim nyog yuav daws nws txoj hlua khau (MK 1: 7). Zaj 4 Yes Xus tuaj cuag Zam kom tau ua kab ke ntxuav (MT 3: 13). Zaj 5 Zam hais tias nws tsum yog tus thov Yes Xus ntxuav nws (MT 3: 14). Zaj 6 Yes Xus hais tias cia Zam ntxuav Yes Xus, mas nkawd thiaj ua raws txoj kev ncaj (MT 3: 15). Zaj 7 thaum Yes Xus ua kab ke ntxuav ntawm Zam tas Ms lub ntuj qhib nplho, ces Leej Ntuj Plig nqes los rau saum Yes Xus (MT 3: 16). Zaj 8 muaj ib lub suab nrov saum ntuj tias “Tus no yog kuv Leej Tub uas kuv nyiam, nws yog kuv qhov chaw zoo siab” (MT 3: 17). Zaj 9 peb ntseeg tias muaj tib tug Huab Tais, tib txoj kev ntseeg, tib lub Cim Ntxuav (EFX 4: 5). Zaj 10 thaum peb txais lub Cim Ntxuav mas peb nrog Yes Xus tuag, ces peb yuav coj ib lub neej tshiab xws li Leej Pleev sawv hauv yeeb ceeb rov los (LM 6: 4).

Ntu 4 yag 2 Yes Xus mus koom rooj tshoob nyob lub zos Kas Nas, ces nws ua kom dej txia ua cawv, thov kom peb muaj lub siab ncaj (Fidelity).

Zaj 1 nco txog thaum muaj rooj tshoob nyob hauv lub zos Kas Nas (Z 2: 1). Zaj 2 nyob hauv rooj tshoob, cov cawv yuav tas, ces Mab Liab los hais rau Yes Xus (J 2: 3). Zaj 3 Yes Xus hais tias tsis tau txog nws lub caij (Z 2: 4). Zaj 4 Mab Liab hais rau cov tub ce cawv kom ua raws li Yes Xus hais (Z 2: 5). Zaj 5 Yes Xus hais kom lawv hliv dej kom puv cov hub (Z 2: 6). Zaj 6 txiv thiaj com hais tias cov cawv tom qab yog cov cawv qab (Z 2: 10). Zaj 7 Zam hais tias Yes Xus thawj lub cim yog ua kom dej txia ua cawv (Z 10: 11). Zaj 8 Yes Xus hais tias “Kuv yuav qhaib koj nyob hauv txoj kev ntseeg” (OX 2: 20). Zaj 9 Paj Lug hais tias cov ua txiv yuav hlub lawv cov ppoj niam xws li Leej Pleev hlub lub Koom Txoos (EFX 5: 25). Zaj 10 cov tau txoj hoov zoo yog cov uas Ntuj caw lawv tuaj noj Leej Yaj rooj tshoob (QYTN 19: 9).

Ntu 4 yag 3 Yes Xus mus tshaj Tswv Ntuj lub Ceeb Tsheej, mas nws kho cov neeg mob, ntiab dab tsis huv, thiab tsa cov neeg tuag sawv, thov kom peb ua tim khawv txog peb lub neej ua neeg ntseeg rau lwm tus pom (Christian Witness).

Zaj 1 Yes Xus tshaj tias “Tswv Ntuj lub Ceeb Tsheej los txog ze lawm, nej hloov siab tshiab los mloog lub Moo Zoo” (MK 1: 15). Zaj 2 Yes Xus mus tshaj txog lub Ceeb Tsheej rau Nkas Lis Lais teb (MT 4: 23). Zaj 3 Yes Xus qhia txog cov tau txoj hmoov zoo (MT 5: 1-12). Zaj 4 Yes Xus ntuas cov thwj tim kom ua ntsev las lub ntiaj teb thiab ua lub teeb kaj lub sim ceeb (MT 5: 13-16). Zaj 5 Yes Xus hais tias “Tsis yog tus hu kuv ua Huab Tais yuav tau mus hauv Ntuj lub Ceeb Tsheej, yog cov ua raws li kuv Txiv lub siab nyiam” (MT 7: 21-23). Zaj 6 Yes Xus xa cov thwj tim mus tshaj txog Ntuj lub Ceeb Tsheej (MT 10: 7). Zaj 7 Yes Xus hais rau cov thwj tim tias “Yog vim kuv yuav tsum mus tshaj Tswv Ntuj lub Ceeb Tsheej rau lwm qhov thiab, mas kuv thiaj tawm tuaj” (LK 4: 43). Zaj 8 Yes Xus hais tias yog peb tsis txais Tswv Ntuj lub Ceeb Tsheej xws li cov me nyuam yaus, mas peb yuav mus hauv Tswv Ntuj lub Ceeb Tsheej tsis tau (MK 10: 15). Zaj 9 Yes Xus xa cov thwj tim mus tshaj txog lub Ceeb Tsheej thiab kho lawv cov txiab mob (LK 9: 2). Zaj 10 cov Hauv Paus Xa Lis tawm mus tshaj txog Yes Xus sawv rov los (HL 2: 32).

Ntu 4 yag 4 Yes Xus lub hwj chim tawm tuaj rau Pob Zeb, Yas Kos, thiab Zam lawv pom nyob saum roob, thov kom peb muaj lub siab loj nyob hauv sab ntsuj plig (Spiritual Courage).

Zaj 1 Yes Xus coj 3 tus thwj tim nce mus saum roob (MT 17: 1). Zaj 2 Yes Xus ib ce hloov tas nyob ntawm lawv xub ntiag (MT 17: 2). Zaj 3 Mais Xes thiab Es Lias tawm los rau lawv pom (MK 9: 4). Zaj 4 Pob Zeb hais tias nws yuav txhim peb lub tsev tsam phooj rau Yes Xus, Mais Xes, thiab Es Lias nyob (MT 17: 4). Zaj 5 muaj ib twv huab vauv Pob Zeb lawv cia, lawv ntshai (LK 9: 34). Zaj 6 muaj ib lub suab hais tias “Tus no yog kuv Leej Tub uas kuv nyiam, nws yog kuv qhov chaw zoo siab” (MT 17: 5). Zaj 7 cov thwj tim hnov lub suab ntawd mas lawv ntshai kawg (MT 17: 6). Zaj 8 Yes Xus txav los plhws lawv thiab hais rau lawv tias “Nej sawv, nej txhob ntshai” (MT 17: 7). Zaj 9 Pob Zeb ntuas tias “Yog nej raug luag tsawm vim Leej Pleev lub npe, mas nej txoj hmoov zoo” (1PZ 4: 14). Zaj 10 cov Hauv Paus Xa Lus zoo siab vim Ntuj saib lawv tsim nyog raug luam hiam vim lub npe (HL 5: 41).

Ntu 4 yag 5 Yes Xus tsim lub Cim Yug los yug sawv daws txoj sia, thov kom peb nyiam peb tus Huab Tais nyob hauv lub Cim Yug (Love of Our Eucharistic Lord).

Zaj 1 lub caij noj ncuav mov tsis xyaw poov xab los txog ze lawm (LK 22: 1). Zaj 2 Yes Xus xa cov thwj tim mus npaj pluas Hla (MT 26: 17-18). Zaj 3 yav tsaus ntuj Yes Xus nrog cov thwj tim noj nplua Hla (MT 26: 19-20). Zaj 4 Yes Xus hais rau lawv tias nws yuav tsis noj rooj qav Hla mus txog thaum lub ntees Hla tiav (LK 22: 16). Zaj 5 Yes Xus ntxuav cov thwj tim taw (Z 13: 5-6). Zaj 6 Yes Xus ntais lub ncuav mov faib rau cov thwj tim, nws hais tias “QHov no yog kuv lub Cev” (LK 22: 19). Zaj 7 Yes Xus kuj tuav lub ntim, nws hais tias “Qhov no yog kuv cov Ntshav” (LK 22: 20). Zaj 8 Yes Xus hais tias “Kuv hais qhov tseeb tiag rau nej, yog nej tsis noj Neeg Leej Tub lub Cev thiab tsis haus nws cov Ntshav, mas nej yuav tsis muaj txoj sia nyob mus li” (Z 6: 53). Zaj 9 lub ntim foom hmoov tsis ua kom peb koom siab nyob hauv Leej Pleev cov Ntshav lod? Cov mov uas peb muab ntais tsis ua kom peb koom siab nyob hauv Leej Pleev lub Cev lod? (1KLN 10: 16). Zaj 10 kwv tij, txij no mus nej noj cov ncuav mov no thaum twg thiab nej haus cov cawv no thaum twg, mas nej tshaj Huab Tais txoj kev tuag, nej ua li no mus txog hnub Huab Tais rov tuaj (1KLN 11: 26).

Yuav hais txoj saw Mab Liab zoo li cas?

Thaum hais saw Mab Liab yuav tuav tus Ntoo Cuam ua Ntoo Cuam lub Cim. Txav los tuav lub hlaws loj txuas ntawm tus Ntoo Cuam, hais zaj ‘Peb Txiv nyob saum ntuj’. Ntawm 3 lub hlaws me txuas mus yog hais zaj ‘Koj nyob kaj lug Mab Liab’ 1 lub hais 1 lwm. 3 lub hais 3 lwm. Lub hlaws loj tom qab 3 lub hlaws me, hais zaj ‘Huab Tais Leej Txiv, Huab Tais Leej Tub, Huab Tais Leej Ntuj Plig’. Hais tas mam pib hais cov yag raws txoj saw Mab Liab.

Ua ntej yuav hais ib yag twg, mas yuav xub hais niam Mab Liab lo lus qhia tias “Kuv tus Huab Tais Yes Xus, thov koj zam txhaum rau peb, thov koj cawm peb ntawm dab phem cov hluav taws, thiab pab txhua leej txhua tus kom mus txog koj lub Ceeb Tsheej, tshwj xeeb, thov koj pab cov neeg uas tau ua txhaum hnyav rau Tswv Ntuj.”

Hais li ntawd tas, yuav tshaj tias yus xav thov Ntuj ua dab tsi, ces mam pib hais zaj ‘Peb Txiv nyob saum ntuj’ thiab 10 lwm ‘Koj nyob kaj lug Mab Liab’.

Thaum hais tas 10 lwm ‘Koj nyob kaj lug Mab Liab’ lawm, mam hais zaj ‘Huab Tais Leej Txiv, Huab Tais Leej Tub, Huab Tais Leej Ntuj Plig’.

Thaum hais tas 5 yag lawm, yuav hais zaj ‘Poj Huab Tais’ thiab hu zaj xaus tias “Huab Tais Leej Niam Ntshiab, thov koj pab peb kom peb txawj ua neeg ntshiab muaj feem tau txais txoj sia nyob mus li, raws li Leej Pleev cov lus tau cog tseg. Ua li.” Ces ua Ntoo Cuam lub Cim.

Ua cas peb thiaj tsum hais txoj saw Mab Liab?

Nyob hauv phau ntawv nthuav lub Koom Txoos cov lus qhia (CCC) sau tseg cia tias thaum lub hauv paus los, mas lub Koom Txoos hwm niam Mab Liab ua Tswv Ntuj leej niam, niam Mab Liab zoo li tus poj qaib coj ib pab me nyuam; thaum los nag, mas cov me nyuam nkag mus nkaum hauv tus poj qaib ob sab tis, nkaum hauv tus poj qaib qab plab kom tsis txhob ntub nag. Cov neeg ntseeg Yes Xus hauv lub Koom Txoos saib niam Mab Liab zoo li ntawd, mas sawv daws thiaj nco ntsoov hu txog niam Mab Liab pab thaum lawv poob rau kev txom nyem los yog ntsib xwv txheej. Li ntawd, lub Koom Txoos thiaj muaj cov kab ke los hwm niam Mab Liab xws li hais txoj saw Mab Liab uas yog zoo li tus hais tab tom nyeem Ntawv Moo Zoo hais txog Huab Tais Yes Xus thiab nws leej niad.

Lub Koom Txoos hais tias thaum peb hais txoj saw Mab Liab, mas yog Leej Ntuj Plig Ntshiab tab tom coj peb mus nyob koom nrog Huab Tais Leej Tub thiab mus nkaum nyob hauv Tswv Ntuj leej niam.

Niam Mab Liab tsis yog Tswv Ntuj leej niam xwb, tseem yog tas cov neeg hauv lub Koom Txoos leej niam thiab, yog li mas thaum peb cav txog niam Mab Liab thiaj yog zoo li peb cav txog peb niam, thaum peb hwm niam Mab Liab thiaj zoo li peb hwm peb niam, ces yuav muaj tuaj raws li cov lus hauv ntawv Npes Xis Las (NXL 3: 4) tias “Tus cav txog nws niam lub koob meej, nws zoo li tus neeg sau ib txhab nyiaj.”

Vim niam Mab Liab yog peb niam, mas peb thiaj muaj cuab kav tsa ncauj thov nws, thiab niam Mab Liab cov lus thov kuj yog ib co lus txheem lub Koom Txoos kom sawv taus ntseg, thiab coj kev vam khom tuaj rau lub Koom Txoos.

Dhau ntawm tej lus raws li phau ntawv lub Koom Txoos cov lus qhia ceev tseg lawm, tseem muaj ntau ntau yam ua kom peb hais txoj saw Mab Liab thiab. Hnub no peb yuav hais txog 6 yam li no:

1. Kev hais saw Mab Liab yog ib txog kev teev Ntuj xis Tswv Ntuj siab, vim tias zaj ‘koj nyob kaj lug Mab Liab’ mas yog cov lus muab hauv phau Ntawv Moo Zoo los hais, thiab kev hais txoj saw Mab Liab no tsis yog tib neeg lub tswv yim lam xev tab sis yog niam Mab Liab ua tus qhia hais. Niam Mab Liab tseem ntuas peb kom kub siab thiab muab siab rau hais txoj saw Mab Liab tsis nruam, vim tus twg kheev hais saw Mab Liab mas yuav pab ntau yam tau rau nws txoj sia.

2. Peb sawv daws yeej vam txog peb leej niam. Piv li nyob nyob muaj tej hnub peb cia li nco txog peb niam, ces peb hu xov tooj nrhiav peb niam. Tej zaus twb tsis muaj lus dab tsi hais, tsis kav yog peb tau hnov peb niam lub suab ces cia li ua rau peb zoo zoo siab tuaj. Kev hais txoj saw Mab Liab kuj zoo li ntawd, txawm tias yog ib yam ceeb laj hais tsis kav kuj yuav pab tau peb kom tau nyob ze ze nrog niam Mab Liab ua ke. Thaum peb nyob ze niam Mab Liab mas nws yuav nco ntsoov peb thiab coj peb mus npuab tau nrog Huab Tais Yes Xus. Yog li yog peb nquag hais saw Mab Liab mas peb kev khaub zig niam Mab Liab thiaj tsis nrug.

3. Kev hais txoj saw Mab Liab coj peb mus nyob koom nrog ib cov tseem phooj ywg zoo. Vim tias tsis yog muaj peb tib tug xwb thiaj hais txoj saw Mab Liab, tiam sis tseem muaj tsoom Leej Ntshiab, cov neeg siab ntshiab, thiab tsoom neeg ntseeg nyob hauv lub Koom Txoos nrog peb hais ua ke thiab, tsis hais tus Vaj Qhia, cov Tswv Qhia, mus txog rau tus neeg me nrhiav noj ib hnub dhau ib hnub.

4. Kev hais saw Mab Liab hloov tau hnub ntxhov quav niab ua ib hnub ntshiab. Vim tias niaj hnub hauv peb lub neej mas muaj ntau yam ntxhov ua rau peb tsis tau zoo sij hawm los teev Ntuj. Li ntawd, nyob hauv lub caij ceev caij sib huas nrog lub sij hawm, mas peb thau txoj saw Mab Liab los hais tej ntu luv luv los yeej tau. Piv li thaum tab tom tsav tsheb, thaum tab tom dob nroj, los thaum tab tom ntxuav tais diav.

5. Kev hais saw Mab Liab txawm tias zoo li peb tsis muab siab rau tiag, tab sis kuj yog peb tau teev Ntuj lawm. Tos peb hais li no, vim tias tej zaus zoo li peb lub siab tsis dai dhuam rau Tswv Ntuj yam tob zais ntshis, los peb lub tswv yim twb tau hais tawm cov lus hauv Ntawv Moo Zoo. Tej zaus zoo li peb lub tswv yim tsis mloog lus, dhia mus xav lwm qhov, tsis kav txoj saw Mab Liab kuj rub tau peb lub siab kom rov los nyob tus hauv zaj ‘koj nyob kaj lug Mab Liab’.

6. Kev hais txoj saw Mab Liab pab tau peb thaum ntsib xwv txheej. Thaum peb noj qab nyob zoo mas peb tsis tshua nco txog peb niam, tab sis thaum peb muaj mob pw nkees mas peb lub siab yuav ras ntsoov peb niam kev hlub peb. Ib yam li ntawd, thaum peb tau zoo mas peb yeej tsis tshua nco qab hais txoj saw Mab Liab, tab sis hnub twg peb raug xwv txheej lub neej tsaus nti, mas peb yuav pom txoj saw Mab Liab kaj tuaj. Yog peb muab coj los hais, mas thaum ntawd niam Mab Liab yuav tuaj coj peb kev tawm hauv qhov tsaus ntuj, coj peb kev rov los ntsib Huab Tais Tswv Ntuj, coj tus neeg poob zoo rov los taug tau nws txoj kev.

Nyob hauv xyoo 1978 tsab ntawv xov xwm ‘Miv Kas’ tau luam tawm tus poj niam Pos Kas hu ua ‘Npas Npas Las’ cov ntawv hais txog cov lus niam Mab Liab tau qhia txog txoj saw Mab Liab lub hwj huam rau nws. Npas Npas Las cov lus hais zoo li no:

“Txoj saw Mab Liab tsum yog koj lus siab kev xyiv fab, yog koj lub tswv yim qhov pom kev, yog koj lub siab xav qhov ntshaw, yog txoj xov khi koj rau Ntuj lub Ceeb Tsheej, thiab yog lub qhov txhawv lub cuab tam rau koj. Thaum koj hais txoj saw Mab Liab, koj yuav ua tus neeg me, ruaj siab, thiab tswj koj lub tswv yim kom feeb meej. Koj txhob cuaj khaum qee lub sij hawm los hais txoj saw Mab Liab, koj txhob tos kom txhog lub hnub siav tu tso mam hais txoj saw Mab Liab.

Txoj saw Mab Liab yog Tswv Ntuj lub txiaj ntsim lub cuab tam tsis txawj tag. Yog kom koj tau txais txoj saw Mab Liab lub txiaj ntsim, mas koj yuav tsum muaj kev ntseeg; koj txoj kev ntseeg yuav coj kev zoo siab tuaj rau koj. Txoj saw Mab Liab yog koj tug, thiab yuav yog koj li mus ib txhis. Koj tau txais ua koj tug nyob hauv txhua lub caij nyoog hauv koj txoj sia, koj tau txhua yam raws li yam cheem tsum koj yuav tsum muaj. Nyob ntawm koj, saib koj puas paub siv txoj saw Mab Liab raws li koj ntshaw. Tab sis koj yuav nco tias thaum koj hais txoj saw Mab Liab, koj yuav tsum ruaj siab, tso siab, thiab rau siab hais. Txoj saw Mab Liab yog cov neeg hwm kuv lub plawv lub cuab tam. Txoj saw Mab Liab yog txoj saw zoj sawv daws ua ib npoj muaj yeej nyob hauv lub txiaj ntsim, tsis hais tus muaj txoj sia nyob huv ntiaj teb los tus tau saj kev xyiv fab nyob saum ntuj.

Txoj saw Mab Liab yog lub paj tshab Leej Tub muab nws cov ntshav txhiv los, yog li thaum koj hais txoj saw Mab Liab mas dab phem thiab koj lub cev thiaj tawm tsam tsis kheev koj hais. Huab Tais Yes Xus xav kom sawv daws paub kuv tshaj no ntxiv mus, kuv xav kom koj muab Leej Tub lub siab yeej dab phem kev ntxias los hnav cia. Kuv thiab kuv Leej Tub xav kom koj tau txoj hmoov zoo, mas Huab Tais Leej Txiv thiaj yuav nto koob meej mus li.

Txhua zaus thaum koj tawm tsam yeej dab phem kev ntxias, mas Ntuj lub Ceeb Tsheej los txog ze koj. Koj yuav yeej txoj kev ntxias no tau, yog koj tsis nruam kev hais txoj saw Mab Liab. Niaj zaus thaum koj hais txoj saw Mab Liab, mas kuv thiab Leej Tub yuav nrog koj nyob, koj yuav ntsib wb thaum koj hais txoj saw Mab Liab.

Kuv cov lus yog qhov ncaj thiab yog qhov tseeb, Leej Tub hais tias ‘kuv yog qhov tseeb’, yog li mas tus twg nyiam txoj saw Mab Liab, nws thiaj nyiam qhov tseeb. Qhov tseeb yuav nyob hauv nws lub siab, lub tswv yim, thiab hauv nws lo lus. Qhov tseeb yuav nyob hauv nws kev txawj thiab nws kev txiav txim siab. Txoj saw Mab Liab coj mus txog qhov tseeb, thiab kom lo lus ‘tus twg ua raws li kuv hais, nws yuav tsis ua txhaum, thiab lo lus ‘kuv yog txoj kev lug coj mus cuag qhov tseeb, coj mus ntsib Leej Tub thiab pom Tswv Ntuj’ no tsheej xeeb tuaj, mas kuv thiaj tawm tuaj hais txog txoj saw Mab Liab.

Vim lub ntiaj teb muaj kev txhaum thiab kev phem nyob ntxaws nkaus, txoj saw Mab Liab thiaj yog lub twj zeem tseeb txog qhov tseeb thiab tawm tsam ntiaj teb qhov qias. Thaum koj hais txoj saw Mab Liab, qhov tseeb yuav chaws mus nyob hauv koj tus plig, lo lus koj hais hauv txoj saw Mab Liab yuav ua hauj lwm nyob hauv koj lub siab thiab lub plawv. Koj lub siab yuav dai dhuam rau qhov tseeb, koj lub plawv yuav kub lug vim kev nyiam.

Txhua zaj lus ntuas siab hauv txoj saw Mab Liab muaj hwj chim thiab muaj chaw teem, 15 zaj lus ntuas siab sib sau ua ib lub cuab yeej tawm tsam dab phem. Tus twg hais txoj saw Mab Liab mas nws yuav paub thiab nco tias nws pom kuv, nws yuav tau txais txoj sia thiab kev cawm. Tus twg hais txoj saw Mab Liab, nws yuav ras tias kuv nyob hauv txoj saw Mab Liab, nws yuav ntsib kuv nyob hauv.

Kuv yuav nyob ze tus neeg muab tas nws lub siab thiab qhov tseeb los tshaj txog kuv. Koj kav tsij nrhiav kuv mus raws Leej Pleev txoj kev nyob hauv txoj saw Mab Liab, tus pom kuv mas nws yuav tau pom txoj sia thiab txais kev cawm ntawm Tswv Ntuj. Kev hais txoj saw Mab Liab thiaj yog txoj kev nrhiav kuv thiab kuv Leej Tub, yog lub zog thiab koj mus rau qhov siab. Neeg tus plig yuav tau kev cawm yog neeg ua kom txoj sia ntshiab tuaj nyob hauv kev hais saw Mab Liab. Txoj saw Mab Liab yog cuab yeej ntaus tsam nyob hauv tshav rog thiab txoj saw Mab Liab yog thaj cheej ntaus dab ntub kom koj so los siav, yog qhov pab kom koj yeej txoj kev ntxias, yog lub hauv paus txhawv lub txiaj ntsim tsis txawj xaus, thiab yog kuv lub chaw vam.

Txoj saw Mab Liab yog kuv lub paj tshab, yog leej niam lub paj tshab pub rau nws cov me nyuam ntxim hlub, yog lub cim thaiv cov neeg Ntuj xaiv uas pom tau ntawm neeg lub qhov muag, yog cov Tshiab kev zoo siab thiab yog tsoom Leej Ntshiab kev xyiv fab, yog qhov dab phem ntshai, yog kev txuas lus yooj yim ntawm ntiaj teb thiab Ntuj Ceeb Tsheej, yog cov neeg pluag lub cuab tam thiab yog cov neeg muaj cuab kav lub zog, thiab txoj saw Mab Liab yog kev hom khaj nyob hauv kev sis nyiam, yog kev vam khom txog lub hwj xyeej yuav tau txais nyob hauv lub neej no thiab fab lwm tiam.

Kuv lub siab tsis lo neeg lub keeb txhaum tos txais sawv daws. Yog koj hwm txoj saw Mab Liab mas yog koj hwm kuv, thiab koj kev hwm txoj saw Mab Liab yuav txia ua kev ruaj siab rau kev hais saw Mab Liab, koj yuav ntseeg txog lub hwj huam nyob hauv txoj saw Mab Liab, ces koj yuav nyiam txoj saw Mab Liab, koj yuav muab koj kev nyiam no cev ua paj tshab rau kuv lub siab. Thaum koj muaj kev ntseeg, kev vam khom, thiab lub siab nyiam; ces yog koj tab tom muab kuv saib rau lub sam xeeb.

Txhua txhua zaus kuv nqes los rau ntiaj teb vim kuv nyiam thiab hlub kuv cov me nyuam, mas kuv tau ntuas lawv kom kub siab hais txoj saw Mab Liab, vim tias txoj saw Mab Liab yog kuv kev hlub lub paj tshab.”

Related Post

Leave a Reply

Your email address will not be published. Required fields are marked *

Translate »