(Muab hauv Leej Tsob Hwb Xov Tsheej Yaj cov lus hauv zaj ‘LUB ROOJ SAB LAJ SIB NTXIV KEV NTSEEG’ hauv ‘TSEB NPLEJ 2014)
Huab Tais Yes Xus hais rau Pob Zeb tias “Xis Moos, Zam tus tub, koj puas nyiam kuv tshaj cov ntawd?” Pob Zeb teb tias “Huab Tais, koj paub tias kuv nyiam koj.” Yes Xus hais rau Pob Zeb tias “Koj pab zov kuv cov yaj mog!” (Z 21: 15-17).
Huab Tais Yes Xus tau hais tib lo lus ntawd nug Pob Zeb 3 zaug. Pob Zeb poob siab nthav, vim Yes Xus nug nws 3 zaug tias koj puas nyiam kuv tshaj cov ntawd? Niaj hnub Huab Tais Yes Xus kuj nug peb raws li nws nug Pob Zeb thiab, ces peb yuav teb li cas rau Huab Tais Yes Xus?
Peb yuav ntseeg thiab coj raws li Leej Ntuj Plig Ntshiab qhia (Z 16: 4-15).
Txoj kev tshaj Ntuj Lus yog Huab Tais Yes Xus tau muab rau cov Hauv Paus Xa Lus. Huab Tais Yes Xus hais tias “Kuv mus cuag Leej Txiv, ces Leej Txiv yuav xa Leej Ntuj Plig Ntshiab tuaj rau nej.” Huab Tais Yes Xus txib cov Hauv Paus Xa Lus mus tshaj lub Moo Zoo kom thoob qab ntuj. Hnub no, peb yog zoo li Huab Tais Yes Xus cov Hauv Paus Xa Lus txheej thaud. Thaum peb txais peb txoj hauj lwm tshaj Ntuj Lus ntawm ib tug Txiv Tswv Qhia los sis ib tug Txiv Plig, mas peb ua Huab Tais Yes Xus txoj hauj lwm tshaj Ntuj Lus. Peb yuav nyiam Huab Tais Yes Xus, nyiam Tswv Ntuj thiab nyiam cov neeg ntseeg. Vim peb yog tus neeg ua tim khawv txog peb txoj kev ntseeg tias “Kuv yog ib tug ntseeg Kav Tos Liv. Kuv zoo siab hlo los npuab kuv txoj kev ntseeg. Kuv yuav tsis xav txog lwm txoj kev ntseeg.”
Thaum peb txais lub Cim Ntxuav, peb twb tau nrog Huab Tais cog lus tias peb nrauj ntxwg nyoog thiab nrauj cov dab uas tuaj haub ntxias peb. Peb lees ntseeg tias Tswv Ntuj yog tus tsim ntuj tsim teb, tsim tas puas tsav yam. Peb kuj lees ntseeg tias Huab Tais Yes Xus yog Tswv Ntuj Leej Tub Twm Zeej. Yog Leej Ntuj Plig Ntshiab ua kom nws xeeb ntawm Nkauj Ntshiab Mab Liab los. Nws tau tuag txhiv ntiaj teb neeg ntawm kev txhaum, kom lub ntiaj teb neeg tsim nyog rov mus cuag Tswv Ntuj uas yog Leej Txiv muaj hwj huam tas nrho. Thiab peb kuj cog lus tias peb ntseeg txog lub Koom Txoos Kav Tos Liv yog Tswv Ntuj cov me nyuam ua ke faib Ntuj cov txiaj ntsim nyob ntiaj teb no.
Peb twb tau nrog Huab Tais Yes Xus cog lus lawm, puas tsim nyog peb tseem ua xyem xyav thiab tsis muaj kev tso siab rau peb txoj kev ntseeg? Peb yog lub Koom Txoos faib Tswv Ntuj cov txiaj ntsim, puas tsim nyog peb los txwv tus ub tus no tias “Kuv yuav tsis pab koj, vim yog koj tsis nrog kuv koom taug tib txoj kev ntseeg.”
Huab Tais Yes Xus tsis tau xa nws cov thwj tim mus txwv thiab txiav ib tug neeg twg, uas tsis raws Huab Tais Yes Xus qab. Tiam sis Huab Tais Yes Xus hais tias “Nej mus tshaj lub Moo Zoo rau tas txhia haiv neeg, thiab ua lub Cim Ntxuav rau lawv, kom lawv ua kuv cov thwj tim.”
Vim li ntawd, tsim nyog peb yuav txais txhua leej txhua tus, tsis hais tus muaj los tus pluag, tus ntse los tus ruam huv tib si. Tsis hais nej, tsis hais kuv los lwm leej lwm tus, peb yeej xav tau ib yam nkaus. Yus yeej xav li Hmoob sawv daws hais kam tias “Ntsej hnov, mas xav kom muag pom. Muag pom, mas xav kom tau kov kiag, tuav kiag ntawm tes thiaj li ntseeg.” Tas txhia yam nyob ntiaj teb no, peb paub tias tshwm sim zoo li cas thiab nws tau nyob hauv ntiaj teb no pes tsawg txhiab xyoo los lawm. Tiam sis dhau lub ntiaj teb no lawm, peb paub tias txhua yam meej tseeb yog muaj Tswv Ntuj, muaj tus tsim txhua yam nyob saum ntuj thiab nyob hauv ntiaj teb no. Tas txhua yam uas peb pom nyob ib ncig peb, nyob saum ntuj thiab nyob hauv ntiaj teb no, mas yog Tswv Ntuj ua tus tsim.
Niaj hnub no, peb muab peb tej kab lis kev cai, muab peb lub neej, muab nyiaj txiag thiab lub koob meej los saib loj. Ces txhua yam kev ntshaw no npog peb lub siab thiab npog peb qhov muag, ua rau peb tsis pom qhov tseeb thiab Tswv Ntuj cov txiaj ntsim lawm.
Thaum ub, Tswv Ntuj tau kom Mais Xes ua tej zaj hwj huam yees ntxwv rau cov His Xas Lais pom kiag, tsis kav lawv lub siab tseem ua xyem xyav. Cov neeg teev Dab lawv teev ib tug dab, lawv tsis paub tias pab puas tau lawv. Tsis kav lawv kuj tseem ntseeg tias yuav pab tau lawv.
Ntau zaus peb ua hauj lwm rau tus Tswv Ntuj uas peb tsis pom, tiam sis nws nrog nraim peb, nws nrog peb nyob mus li. Thaum peb lees los ua Tswv Ntuj ib tug tub txib lawm, peb yuav nyiam Huab Tais Yes Xus cov yaj thiab Tswv Ntuj haiv neeg. Huab Tais Yes Xus cov yaj, yog tas ib tsoom neeg ntseeg txog Yes Xus. Peb tsoom neeg ntseeg txog Huab Tais Yes Xus, mas peb yog Tswv Ntuj haiv neeg. Vim li no, peb thiaj yuav tsis txhob sib cais, txhob sib thuam. Tsis hais cov coj kev ntseeg Kav Tos Liv, cov Plos Tes Taas los sis cov coj lwm txoj kev teev hawm. Hais txog peb cov ntseeg Kav Tos Liv, peb kuj muaj ntau pab ntau pawg nyob thoob ntiaj teb. Peb yeej yuav tsum muaj tej yam coj nyob rau hauv peb tej pab pawg sib txawv me ntsis, txawm muaj los peb txhob sib thuam, txhob sib rhuav. Vim tias lub Koom Txoos Kav Tos Liv niaj xyoo loj hlob thiab vam meej tuaj. Muaj qee pab pawg kuj hlob sai dua, tab sis muaj qee pab pawg hlob qeeb dua. Ces yeej yuav tsum muaj qee yam sib txawv me ntsis. Yog pab pawg twg coj yuam kev tsis raws lub Koom Txoos coj, mas sawv daws yeej paub zoo.
Cov tau kawm ua Txiv Plig thiab kawm ua Leej Tsob Hwb, mas lawv yeej to taub lub Koom Txoos zoo dua. Yog li no, cov uas tsis tau paub txog, los peb sawv daws yuav tau los sib qhia thiab kawm ua ke, kom peb sawv daws thiaj to taub thiab paub txog. Vim tias thaum sawv daws pom ib pab coj txawv zog los sis hu tej zaj nkauj txawv zog, tsis kav tej no luag hais tias yog kev loj hlob nyob hauv Huab Tais Yes Xus. Peb txhua leej txhua tus txoj kev xav, puav leej muaj nuj nqis rau peb. Yog thaum koj los ib tug thawj coj nyob hauv kev ntseeg ntsib tej yam no, mas koj yuav tsum qhib koj tus kheej, qhib koj lub siab thiab qhib koj lub tswv yim. Ces koj yuav rov muab coj los soj ntsuam txog yav tag los thiab zim txwv no, saib seb qhov twg thiaj yog qhov tseeb tiag. Yog thaum koj paub li no lawm, ces yuav tsis muaj qhov ua rau koj tsis nyiam. Nyob hauv peb txhua leej txhua tus, peb yeej muaj kev xaiv. Koj ua thiab tsis ua, koj nyiam thiab tsis nyiam, tsis txhob thuam. Tsam yus tsis pom lawv zaj tswv yim, ces yus ho yuam kev. Yog li no, peb sawv daws yuav tsum nco ntsoov tias yog peb zam rau luag, mas Tswv Ntuj kuj zam tas nrho rau peb. Lub Koom Txoos kuj qhia peb tias peb tsoom neeg ntseeg yog lub Koom Txoos tes taw, yog pob ntseg thiab yog qhov muag. Thaum ib txhais tes mob lawm, kuj yuav ua rau lub cev mob thiab. Peb yuav tsis txhob hais tias cia txhais ntes nws mob nws. Yog peb hais li ntawd, ces txhais tes uas mob kawg yuav tsum piam sij mus. Peb twb hais tias peb sib koom nyob hauv Huab Tais Yes Xus lub Cev, ces pob ntseg yuav tsum hwm qhov muag, qhov muag yuav tsum hwm 2 txhais tes thiab 2 txhais taw, vim sawv daws koom ib lub cev nqaij daim tawv. Lub cev thiaj yuav tsis raug mob tsis raug ntsaj. Yog thaum txhais tes los sis txhais taw raug mob lawm, peb yuav sib pab kho kom zoo. Ua li no thiaj yog ua raws Yes Xus lub Moo Zoo. Peb txoj hauj lwm, yog khuv leej Huab Tais Yes Xus lub Cev.
