(Txiv Plig Txhiaj Foom piav txog nws mus tsham cov kwv tij Hmoob ntseeg Ntuj nyob Nyab Laj qaum teb.) TSEB NPLEJ 2014
Txij hnub tim 30 lub 5 hlis mus txog tim 9 lub 6 hli xyoo 2014, kuv tau muaj lus zoo siab rov mus xyuas ntau pawg ntseeg Hmoob Kav Tos Liv nyob Nyab Laj qaum teb.
Hnub tim 6 lub 6 hli 2014, Tswv Qhia Va Tat tau ua kab ke foom hmoov zoo rau ib lub tsev teev Ntuj tshiab, uas yog qhov chaw cov Hmoob Kav Tos Liv sib sau ua Thaj Txi Ntuj txhua txhia Hnub Chiv. Lub tsev teev Ntuj ntawd, nyob hauv lub zos hu ua Haus Thaus.
Tus Txiv Plig Thaib hu ua Txiv Plig Pob Zeb, uas nws tshaj Ntuj Lus rau peb cov Hmoob nyob hauv lub nroog Chiang Khong, nyob Thaib teb. Nws kuj tau mus txog Nyab Laj qaum teb thiab koom nrog cov neeg ntseeg ua cov kab ke hmoov foom hmoov zoo rau lub tsev teev Ntuj tshiab ntawd thiab.
Hnub tim 31 lub 5 hlis 2014, nyob hauv lub tuam ceeb Has Nais muaj li ntawm 300 tus tub kawm txuj npaj ua Leej Choj “Seminarians” Nyab Laj tuaj teev Ntuj. Vim tias lawv kawm ntawv tiav lawm, ces lawv tuaj sib sau cav txog Tswv Ntuj lub koob meej. Hnub ntawd, kuv nrog lawv 300 leej koom ua Tswv Ntuj tsaug thiab
Xyoo 2014 no, nyob hauv lub Cheeb Koom Txoos Hoos Huas kuj yuav muaj 7 tug Leej Tij Nyab Laj txais lub Cim Tiag Tes ua Txiv Plig.
Nyob Has Nais kuv kuj tau ntsib ib tug tub hluas Hmoob uas nws nrog 300 tus tub kawm txuj tuaj ua ke. Lawv yog cov tub kawm cov txuj ua Leej Choj. Nws lub npe hu ua Qiam Muas. Yuav tsum tos 5 xyoo ntxiv, ces nws thiaj mam txais lub Cim Tiag ua Leej Choj. Ces peb sawv daws yuav tsum thov Ntuj los pab nws tsis tseg.
Nyob hauv lub nroog Hom Cis Mees uas nyob Nyab Laj qab teb, kuj muaj ib tug hluas Hmoob uas tab tom kawm cov txuj npaj ua Txiv Plig thiab. Nws lub npe hu ua Teej Xyooj. Thov kom peb sawv daws sib pab thov Ntuj los txhab zog rau nws thiab os mog!
“Huab Tais siab zoo, thov koj pab peb xaiv ib cov tub hluas Hmoob los kawm cov txuj ua tub tshaj Ntuj Lus rau peb tsoom Hmoob ntxiv mus.”
Nyob hauv lub nroog Sas Pas, kuv kuj tau ntsib coob leej Hmoob thiab qhia 2-3 yam tseem ceeb rau 35 tug poj niam Nyab Laj uas lawv tab tom kawm cov txuj npaj ua Leej Phauj.
Hnub tim 7 lub 6 hli 2014, nyob hauv lub zos Haus Thaus, kuv kuj tau nrog 13 tug Xib Hwb koom sab laj ke. Nyob hauv lawv pab ntawd, kuj muaj 2 tug Xib Hwb uas tuaj ntawm lub xeev Dien Bien tuaj. Lub xeev Dien Bien yog nyob sab hnub poob hauv Nyab Laj teb, nyob npuas Los Tsuas teb. Txhua txhia Hnub Chiv cov ntseeg uas nyob hauv 2 tug Xib Hwb ntawd lub zos, lawv kuj sib sau teev Ntuj ua ke nyob hauv ib lub tsev, vim tseem hwv tsis tso lus rau lawv txhim tsa tej lub tsev teev Ntuj nyob hauv lawv zos.
“Huab Tais muaj hwj huam loj tas nrho ! Thov koj txhawb zog rau cov kwv tij Hmoob ntseeg ntawd, kom xwv lawv tau nyob kaj lug kaj nrig hauv lawv txoj kev ntseeg Ntuj, yam tsis tu ncua os mog!”
Nyob hauv lub Cheeb Koom Txoos Hoos Huas, Txiv Plig Pob Zeb Binh kuj ua tus saib 12 pawg ntseeg nyob Nyab Laj qaum teb. 12 pawg ntseeg diam, mas tsis yog me me od ! Txiv Plig Pob Zeb Binh tau siv sij hawm ntau los thauj kuv mus xyuas 6 pawg neeg ntseeg uas lawv muaj tsev teev Ntuj nyob hauv lawv zos. Cov kwv tij Hmoob ntseeg nyob hauv 6 lub zos ntawd, lawv zoo siab nrog kuv koom ua Thaj Txi Ntuj ua ke.
Dhau qhov ntawd, mas kuv kuj tau mus tsham ib pawg ntseeg uas tsis muaj tsev teev Ntuj nyob hauv ib lub zos. Txhua txhia Hnub Chiv, lawv tsuas yog sib sau teev Ntuj nyob hauv ib yim neeg uas muaj lub tsev loj thiab dav. Hnub kuv mus xyuas lawv, mas muaj 80-85 leeg tuaj sib sau teev Ntuj ua ke nyob hauv lub tsev ntawd. Kuv tau qhia 4-5 zaj lus tseem ceeb txog kev tso siab rau Tswv Ntuj thiab txog kev cav txog Tswv Ntuj lub koob meej. Qhov kawg, ces sawv daws sib koom thov Ntuj pab txhawb nqa lawv tsev neeg thiab sawv daws muaj kev zoo siab heev.
Peb cov kwv tij Hmoob uas nyob Nyab Laj qaum teb, mas feem coob lawv yog neeg txom nyem thiab lub neej zoo tsis cuag cov Hmoob nyob Thaib teb. Lawv tsis muaj tej daim teb tshiab rau lawv cog qoob cog loo thiab ua noj haus.
Kuv tau nrog Txiv Plig Pob Zeb Binh tham thiab kom nws nkag mus xyuas peb lub Website, saib txog peb cov zaj lus tshaj tawm. Ces kom Txiv Plig Pob Zeb Binh xaiv tej zaj lus tseem ceeb los ntim rau CD thiab coj mus faib rau cov kwv tij Hmoob ntseeg. Yog ua li ntawd, mas vam tias peb cov kwv tij Hmoob nyob Nyab Laj qaum teb yuav tau hnov cov lus peb tshaj tawm nyob hauv xov tooj cua Zoo Tswv Zov Yaj.
Thaum kuv nyob hauv cov zos Hmoob nyob Nyab Laj qaum teb, mas muaj 2-3 tug Hmoob hais rau kuv tias “Txiv Plig, peb xav kom koj nrog peb nyob Nyab Laj teb. Koj txhob rov qab mus Thaib puas tau?”
Kuv thiaj teb lawv tias “Yuav ua raws li nej hais tsis tau. Ces thov kom nej txhob tu siab os mog!”
Txawm li cas los xij, kuv vam ntsoov tias yuav muaj ib hnub uas kuv rov mus fim lawv 2-3 zaug ntxiv. Peb sawv daws sib pab thov Leej Ntuj Plig Ntshiab los txhawb lub zog rau peb cov kwv tij Hmoob nyob Nyab Laj teb. Thov kom Huab Tais Yes Xus Pleev pub kev thaj yeeb nqes los rau sawv daws yam tsis tu ncua.
