Zam yog tib tus thwj tim tsis tuag ua tim khawv thiab yog tus thwj tim tuag tom qab sawv daws. Zam yug xyoo 6 nyob hauv lub nroog Npes Xais Das, Zam txiv yog Ntxes Npes Dais, Zam niam yog Xas Los Mes, Zam muaj ib tus tij laug yog Yas Kos.

Thaum Zam thiab nws tus tij laug Yas Kos tab tom nrog nws txiv ntxiv vas ntses nyob hauv dej ntuj Nkas Lis Lais, Yes Xus hu kom nkawd raws Yes Xus qab. Zam thiab Yas Kos thiaj tso nws txiv tseg ces nkawd nrog Pob Zeb thiab As Nres raws Yes Xus mus.

Zam yog tus thwj tim uas Yes Xus nyiam thiab hlub heev, yog li Yes Xus thiaj ua ntau lub cim rau zam pom.

Nyob hauv pluas hmo kawg, Zam yog tus zaum ntawm Yes Xus ib sab thiab yog tus nug Yes Xus txog tus ntxeev siab. Zam yog tus thwj tim tsis tso Yes Xus pov tseg thaum Yes Xus raug ntes. Zam yog tus thwj tim raws nraim Yes Xus mus txog saum lub ncov roob Nkos Nkos Tas. Zam yog tus sawv nrog niam Mab Liab nyob hauv qab Ntoo Cuam.

Yog vim Zam muaj lub siab ruaj nreb rau Yes Xus, mas thaum Yes Xus yuav tuag, nws thiaj hais rau niam Mab Liab tias Zam yuav yog Mab Liab tus tub, thiab Mab Liab yuav yog Zam niam. Zam nco ntsoov thiab ua raws Yes Xus lo lus no, Zam saib xyuas thiab tu niam Mab Liab tib yam li yog nws leej niam.

Thaum Mab Liab Mas Ntas Las mus tom Yes Xus lub qhov ntxa, nws pom daim txiag zeb tshem ntawm lub qhov ntxa lawm. Mab Liab Mas Ntas Las khiav mus qhia rau cov thwj tim, Zam thiab Pob Zeb yog ob tug khiav mus xyuas. Zam khiav mus txog ua ntej, Zam khoov mus xauj, nws pom tej hlab ntaub; tab sis tsis pom tus neeg. Zam pom li ntawd, mas nws ntseeg tias Yes Xus sawv hauv cov tuag rov los raws li Ntawv sau cia.

Zam yog thawj tus thwj tim nco tau Yes Xus thaum Yes Xus nyob ntawm ntug dej ntuj Tis Npes Lias.

Tom qab Yes Xus nce saum Ntuj lawm, Zam tau mus tshaj lub Moo Zoo nyob As Xias Me. Nyob hauv Es Fes Xos, Zam tau siv lo lus ‘Leej Lo Lus’ thaum nws hais txog ‘Leej Pleev’, vim nyob hauv no cov neeg tsuas paub thiab hnov lo no xwb.

Nyob hauv Zam lub neej, nws tau sau ntau phau ntawv tseem ceeb; yog Zam ntawv Moo Zoo, phau ntawv Qhib Yav Tom Ntej thiab 3 tsab ntawv ntuas tsoom ntseeg sawv daws.

Xyoo 95 Dos Mes Xias sawv ua vaj kav Los Mas, nws yuam tsoom peb xeem kom hwm nws ua tswv ntuj, nws yuam kom sawv daws pe nws daim duab. Cov ntseeg txog Yes Xus tsis kam pe; ces lawv raug hiam. Zam raug ntes kaw hauv lub pov txwv Pas Mos. Tom qab tus vaj tuag lawm, Zam thiaj rov qab los nyob rau Es Fes Xos thiab tuag nyob hauv Es Fes Xos.

Zam hlub thiab txhawj xeeb tsoom sid heev, nws niaj zaus hais rau sawv daws tias “Cov zoo nyiam, yog Tswv Ntuj nyiam peb npaum li ntawd, mas peb kuj yuav sib nyiam sib hlub thiab” (1 Z 4: 11).