Tus sau: TP. Txhiaj Foom

Hnub Yes Xus dai saum ntoo cuam. Tas tsoom sid nyob ntawd ntsia ntsoov Yes Xus. Cov nom tswv hnyos Yes Xus tias “Nws cawm tau luag tej! Yog nws ua Tswv Ntuj Leej Pleev thiab tus Xaiv, mas kom nws rov cawm nws.” Ob tug tub sab dai saum ntoo cuam, muaj ib tug tsawm Yes Xus tias “Koj tsis yog Leej Pleev lod? Koj rov cawm koj mas! Thiab koj cawm wb nrog koj mas!” Hos lwm tus tub sab ntuas thawj tug tias “Koj tsis hwm Tswv Ntuj lod? Koj twb raug txim zoo li nws. Ntawm wb mas tsim nyog lawm, vim wb raug lub txim phim tej yam wb tau ua los. Tab sis Yes Xus tsis tau ua ib yam phem!” Tus tub sab ntawd tseem hais tias “Yes Xus, thaum koj mus txog koj lub Ceeb Tsheej, koj nco txog kuv mog!” Yes Xus hais rau nws tias “Kuv hais tseeb rau koj tias hnub no kiag, koj yuav nrog kuv nyob pem Tswv Ntuj lub Nras Lom Zem.” (LK 23: 39-43)

Zaj no muaj ob lo lus zoo qhia rau peb, zoo li no:

1. Tus ua neeg me nyob ntawm Tswv Ntuj lub xub ntiag, mas nws tau ua neeg ntseeg mus raws txoj qhov tseeb.

Peb tsoom neeg ntseeg nyob ntiaj teb no, mas peb teev hawm Tswv Ntuj. Thaum peb thov ib yam dab tsi ntawm Tswv Ntuj, mas peb ua neeg me nyob ntawm nws xub ntiag. Peb hais tias “Txiv, koj ua raws li koj pom zoo.”

Kwv tij, peb ua neeg me nyob ntawm Tswv Ntuj xub ntiag, ces tab txawm peb tsis tau txais tej yam raws li peb thov, mas peb tsis xav li cas. Peb tsuas rau siab teev Ntuj, peb hais rau Tswv Ntuj tias “Tswv Ntuj, peb raug tej yam nyuaj, tsis kav peb zoo siab ua koj cov me nyuam li qub.”

Nyem no yuav hais ob zag ua piv txwv:

1. Muaj ib tug npawg, nws cov kwv tij twb txais Yes Xus lub Moo Zoo, lawv tau txais lub Cim Ntxuav lawm. Tab sis tus ntawd xav tos me ntsis tso. Muaj ib hnub nws hais rau sawv daws tias “Kuv poj niam wb muaj ob tug tub xwb. Wb ntshaw ib tug me ntxhais los nplij wb siab, wb tau thov kom Tswv Ntuj pub ib tug ntxhais rau wb. Yog tias Tswv Ntuj mloog wb, mas wb yuav yuav ntseeg!”

Zaj no, peb pom tias tus kwv npawg ntawd cov lus thov Ntuj, zoo li xav yuam Tswv Ntuj kom Tswv Ntuj ua raws nws thiab nws poj niam siab xwb. Nkawd tsis tau ua neeg me los thov Ntuj. Thaum peb thov Ntuj, peb yuav ua neeg me nyob ntawm Tswv Ntuj lub xub ntiag, los thov Ntuj. Txawm tias peb tsis tau txais tej yam peb thov, mas peb tsis xav li cas.

2. Muaj ib tse neeg, lawv ntseeg Ntuj tau 20 tawm xyoo lawm. Lawv nrog zej zos sib haum xeeb zoo. Nyem no lawv txiv laus laus, lawv ntshai tsam lawv txiv yuav tsis zoo. Ib hmos lawv teev Ntuj, lawv hais tias “Tswv Ntuj, peb Txiv, hmo no peb thov koj pov hwm peb txiv. Peb tau ntseeg koj ntau xyoo los lawm, peb thov koj hlub peb. Peb xav kom koj ua hwj huam pab peb txiv nrog peb nyob.”

Zaj no, lawv thov Tswv Ntuj pab lawv txiv, lawv xav kom Tswv Ntuj hlub lawv, mas zoo lawm. Qhov ntawd muaj nqes kawg nkaus. Tiam sis qhov zoo tshaj, mas lawv yuav thov kom txog hnub kawg Tswv Ntuj txais lawv txiv mus nrog Tswv Ntuj nyob. Lawv yuav nco ntsoov ua neeg me nyob ntawm Tswv Ntuj xub ntiag, lawv hais rau Tswv Ntuj tias “Txiv siab zoo, peb xav kom koj pab peb txiv nrog peb nyob ntev niaj ntau xyoo. Tiam sis koj ua raws li kom pom zoo ua.”

2. Leej twg tu siab rau nws cov txhaum, thiab tso siab rau Tswv Ntuj mas nws tsim nyog mus pem Tswv Ntuj lub Ceeb Tsheej.

Huab Tais Yes Xus cog lus rau tus tub sab uas tu siab rau nws cov txhaum tias “Hnub no koj yuav tau nrog kuv nyob pem lub nras lom zem.” Tus tub sab ntawd tau mus pem Tswv Ntuj lub Ceeb Tsheej kuj yog vim nws txawj tu siab rau nws cov txhaum tiag, nws lees tias nws tau ua txhaum ces nws thov Huab Tais Yes Xus zam txhaum rau nws. Li ntawd, nyob hauv peb lub neej, niaj hnub peb yuav soj ntsuam saib peb puas tau ua tej yam tsis haum Yes Xus lub Moo Zoo. Peb thov Huab Tais Yes Xus zam txhaum rau peb. Tsis tas li ntawd, peb tseem cog lus tias txij no mus peb yuav tsis ua txhaum ntxiv, peb tseem yuav tso siab rau Tswv Ntuj, peb nco tias peb cov txhaum yog zoo li ib lub nra tsuam peb nraub qaum, peb daws peb tsis tau, peb vam txog Huab Tais Yes Xus txo peb lub nras hnyav ntawd.

Peb tso siab tias Tswv Ntuj muaj peev xwm ua tau tas ib puas tsav yam.

Tas peb sim neej peb muab siab rau thov txhaum ntawm Tswv Ntuj, thiab peb tso siab rau Tswv Ntuj mus li. Yog peb tau ua zoo li no, mas thaum peb qi muag zaum kawg peb yuav tau nyob dawb nyob huv, nyob ntawm Tswv Ntuj xub ntiag.

Peb lub neej yuav ntaus rog rau qhov phem tas mus li, ib sim neej. Peb txhob swb qhov phem. Peb thov Tswv Ntuj txhawb zog rau peb, vim peb tso siab tias Tswv Ntuj ua tau tas puas tsav yam. Peb thov Tswv Ntuj pab peb tiv kev phem, ib yam li tus tub sab uas nws thov Huab Tais Yes Xus tias “Huab Tais, thaum koj mus txog koj lub Ceeb Tsheej, mas koj nco txog kuv thiab.”