Peb tau muab dej los ntxuav tej yam phem kom huv tuaj. Lub sij hawm thaum peb da dej, zoo li peb rov ua neeg huv neeg ntshiab, cov dej uas peb siv ntawd yog kev nyiam ntawm Tswv Ntuj, uas yog peb txiv tau hlub peb txij lub hauv paus los, kev nyiam ntawm Leej Tub uas nws tau tuag nyob saum ntoo cuam, kev nyiam ntawm Leej Ntuj Plig uas nws pab peb kom txawj sib nyiam sib hlub mus lawm yav tom ntej. Thaum peb txais lub Cim Ntxuav, mas Leej Choj los Xib Hwb hais tias “Hu txog Leej Txiv thiab Leej Tub thiab Leej Ntuj Plig lub npe kuv ntxuav koj.”
Thaum ub Zam Ntxuav Plig tau ntxuav neeg nyob hauv dej, nyem no peb tau ua raws li Zam tus piv txwv, tiam sis kuj muaj txiaj ntsim tshiab vim Huab Tais Yes Xus tau ntxuav peb nyob hauv nws txoj kev tuag thiab sawv rov los. Tus tau txais lub Cim Ntxuav nws thiaj yuav tsum coj lub neej mus raws li Huab Tais Yes Xus. Peb lub neej qub yam li tus neeg qub peb twb tau tso tseg thaum peb txais lub Cim Ntxuav lawm. peb twb txais Huab Tais Yes Xus txoj sia tshiab los nyob hauv peb lawm.
Peb txais lub Cim Ntxuav yog vim peb twb ntseeg txog Tswv Ntuj, uas nws yog peb txiv. Peb ntseeg Huab Tais Yes Xus tias nws muab nws txoj sia rau peb kom peb musj txoj sia. Peb ntseeg tias peb muaj txoj sia los ntawm Leej Ntuj Plig. Thaum peb yuav txais lub Cim Ntxuav, peb xyaum nyob hauv lub caij kawm kev ntseeg tshiab, kom peb paub kev ntseeg tob thiab muaj kev cog siab. Lub koom txoos thiaj muaj lub caij kawm ntev hauj sim. Peb ua neeg ntseeg vim peb twb ntseeg lawm.
Peb txais lub Cim Ntxuav, peb ua Tswv Ntuj haiv neeg yam li peb ua tes ua taw ntawm Huab Tais Yes Xus. Cov ntseeg ua tim khawv txog lub Moo Zoo, ua tus pab tas txhua leej neeg zoo li peb yog cov ntsev las lub ntiaj teb, thiab ua ntiaj teb qhov pom kev rau lwm tus.
