Npuag Tub (2012)
Txoj kev ntseeg yog txoj kev zeem tau meej tias peb yuav txais yam uas peb cia siab tos. Kev ntseeg ua puav pheej tias yam uas peb tsis pom, yeej muaj tseeb tiag. Yog txoj kev ntseeg ua kom cov poj yawm txwv koob nto moo zoo. Nyob hauv txoj kev ntseeg, peb to taub zoo tias yog Tswv Ntuj ib lo lus tau tsim lub ntuj thiab lub ntiaj teb. Li ntawd, txhua yam uas peb pom tau yog tawm ntawm tej yam peb pom tsis tau tuaj.
Yog vim txoj kev ntseeg, mas As Npes thiaj cev ib thaj txi Ntuj muaj nqis dua Kas Ees thaj rau Tswv Ntuj: vim As Npes ntseeg, ces nws thiaj nto moo tias nws siab ncaj, Tswv Ntuj ua tim khawv pom tias As Npes cov paj tshab zoo. Nyem no, As Npes tuag lawm, tab sis vim txoj kev ntseeg, mas As Npes tseem hais lus thiab.
Yog vim muaj txoj kev ntseeg, mas Hes Nov thiaj li tsis raug txoj kev tuag. Nws cia li nce mus saum ntuj, neeg nrhiav tsis pom nws ntxiv vim Tswv Ntuj coj nws mus saum ntuj lawm.
Thaum nws tseem tsis tau mus saum Ntuj, nws nto moo tias nws yog ib tug neeg uas ntxim Tswv Ntuj siab. Yog tsis muaj txoj kev ntseeg mas neeg ua ntxim Tswv Ntuj siab tsis tau.
Tus neeg txav mus ze Tswv Ntuj mas nws yuav tsum ntseeg tias muaj Tswv Ntuj tiag, thiab ntseeg tias Tswv Ntuj yog tus pub nqi zog zoo rau cov neeg nrhiav Tswv Ntuj.
Vim Xas Las ntseeg, mas tab txawm nws twb laus heev lawm los nws tseem muaj peev xwm xeeb tau tub thiab. Xas Las ntseeg tias tus tau cog lus rau nws yeej yuav tsis fav xeeb. Vim li ntawd tus neeg twb yuav txog nws lub caij tuag tseem yug tau ib co tub xeeb ntxwv coob npaum li cov hnub qub nyob saum ntuj thiab cov suab zeb nyob ntawm ntuj hiav txwv uas suav tsis txheeb.
Cov neeg ntawd, thaum txog caij lawv tuag, lawv tseem tsis tau txais txhua yam uas Tswv Ntuj cog lus tias yuav muab rau lawv. Tab sis yog vim lawv ntseeg mas lawv nyob deb pom thiab tshua txog txhua yam ntawd, lawv zeem tseeb tias lawv tsuas yog ib co neeg pej kum tuaj ua qhua hla lub ntiaj teb no xwb.
Lawv ntseeg li no kom pom tias lawv nrhiav ib lub teb chaws nyob, yog lawv nco txog lub teb chaws yug lawv mas lawv tseem muaj caij rov mus nyob lawv qub teb qub chaw. Tab sis lawv tos txog ib lub teb chaws zoo dua, uas yog lub nyob saum Ntuj.
Yog vim Has Nplas Has ntseeg mas thaum Tswv Ntuj sim nws siab, kom nws muab nws tus tub His Xas Has tua txi Ntuj. Txawm His Xas Has yog nws tib leeg tub twm zeej xwb los nws yeej cia li muab txi rau Tswv Ntuj li Tswv Ntuj hais.
His Xas Has yog tus yuav txais tej yam uas Tswv Ntuj tau cog lus yuav pub. Tswv Ntuj twb hais rau Has Nplas Has tias koj yuav muaj ib co xeeb ntxwv tawm ntawm His Xas Has los.
Tiam sis Has Nplas Has paub tias Tswv Ntuj twb tsa tau cov neeg tuag kom cia rov los. Ces nws ntseeg tias nws yeej yuav rov tau nws tus tub rov los. Thaum Has Nplas Has tab tom tsa tes yuav tua nws tus tub His Xas Has, ces Ntuj tus Tshiab los cheem kiag Has Nplas Has tam sis ntawd kom nws txhob tua His Xas Has.
Vim His Xas Has ntseeg mas nws thiaj li foom hmoov zoo rau nws ob tug tub Yas Kos thiab Es Xas Ws nkawd.
Vim Yas Kos ntseeg mas thaum nws yuav tuag, nws thiaj li foom hmoov zoo rau nws cov tub txhua leej.
Vim Yos Xes ntseeg mas thaum yuav txog nws lub caij tuag, nws thiaj hias tias “Tsoom tub ki His Xais Lais yuav tsum tsiv rov mus, thiab kom khaws nws tej pob txha.”
