Vaj Qhia Les Os 14 muab zaj tus neeg mob pw ntawm lub pas dej Npes Xas Thas los nthuav qhia sawv daws kom txhob me siab (discouraged) thiab txhob poob rau hauv kev tsis muab siab rau sab ntsuj plig (spiritual apathy).

Hnub tim 18 lub 6 hli no, Vaj Qhia Les Os 14 tau caij tsheb tawm tuaj ntsib cov ntseeg nyob hauv Leej Ntshiab Pob Zeb lub tshav puam, kom tau qhia Ntuj kev cai rau sawv daws raws li zaj hau lus (theme) tias ‘Yes Xus Pleev yog peb chaw vam khom’ (Jesus Christ our Hope).

Vaj Qhia pib tias yog peb muab xav tias lub sij hawm peb khuam los yog daig (stuck) los yog nyob hauv ib qhov chaw tsis muaj chaw dim, thaum ntawd, peb pom zoo li kev tso siab tsis muaj qab hau dab ntsis ntxiv thiab yeem ua tus swb, raws li zaj lus hauv Zam Ntawv Moo Zoo (Z 5: 1-9) hais txog Huab Tais Yes Xus kho tus tuag ceg ntawm lub pas dej Npes Xas Thas.

Zaj Ntawv Moo Zoo piav tias thaum Huab Tais Yes Xus tuaj koom cov Yus Das lub hnub nyoog nqaum paj nqaum nruas pem Yes Lus Xas Les. Huab Tais Yes Xus xub mus ntawm lub pas dej nyob ze lub Qhov Rooj Yaj. Cov neeg muaj mob txiag nkeeg pw nyob ntawd, lawv tos lub caij dej npau kom tau ua tus xub nqes mus hauv lub pas dej; vim lawv ntseeg tias leej twg xub nqes mus hauv lub pas dej mas leej twg tus mob yuav zoo.

Tej yam li no ua teeb meem rau sawv daws, vim tus twg los twb xav ua tus xub mus kom txog, ces lawv muaj kev sib rub sib ntaus.

Vaj Qhia taw rau sawv daws pom tias lub npe ‘Npes Xas Thas’ (Bethesda) txhais tias ‘lub tsev khuv leej’ los yog ‘kev khuv leej lub tsev’ (house of mercy); yog daim duab tsom txog lub Koom Txoos, uas yog qhov chaws rau cov neeg mob thiab cov neeg txom nyem tau tuaj sib txoos, thiab yog qhov chaw Huab Tais Tswv Ntuj nqes los kho lawv thiab ua chaw vam khom rau lawv.

Nyob ntawd, Huab Tais Yes Xus pom tus neeg tuag ceg tau 38 xyoo los lawm, nws ua ib siab txais nws txoj hmoo phem ntawd. txoj kev tu siab rau yus txoj hmoov li ntawd, yog yam ua rau peb mob pw txaj sawv tsis taus, vim yuav ua kom peb me siab thiab tsis muab siab rau peb sab ntsuj plig.

Lo lus nug mas yog lo tias “Koj puas xav kom koj tus mob zoo?” (Z 5: 6). Ib yam li tus tuag ceg hauv zaj hnub no, peb daig ntev ces peb txoj kev xav kom rov zoo qauj zuj zus mus. Peb swm rau txoj kev mob thiab swm rau kev vam luag tej cev tes pab. Vaj Qhia tsis xav kom peb ua tus neeg zoo li ntawd, tsis xav kom tej no ua rau peb tsis xav txiav siab rau peb lub neej.

Yog peb saib tus neeg mob hauv zaj lus hnub no, pom tias nws hais rau Huab Tais Yes Xus tias “Thaum dej npau, tsis muaj leej twg pab muab kuv tso rau hauv dej.” Nws lo lus no txhais tau tias qhov txhaum tsis yog nws, tab sis qhov txhaum mas yog luag tej tsis pab nws. Vaj Qhia muab xav, mas Vaj Qhia ua xyam xyav tias puas yuav muaj tseeb uas nws tsis muaj leej twg pab!

Raws li Vaj Qhia ntsia pom, mas yog tus taug ceg ntawd tsis yog xav kom muaj ib tug cev tes mus pab coj nws must so hauv lub pas dej xwb, nws tseem xav tau kev pab ntawm Tswv Ntuj thiab.

Huab Tais Yes Xus pab kom tus neeg mob no hloov dua lub tswv yim tshiab ntsia txog nws lub neej; kom nws txhov xav tias vim txoj hmoov phem thiaj tsis muaj tus pab nws, tab sis qhov nws tsis txawj zoo vim nws tsis rov xub pab nws ua ntej tso. Nws daim lev rais ua lub cim txog nws kev mob thiab lub neej yav tas los. Nyem no nws muaj peev xwm mus kev tau lawm thiab nws txais lub tswv yim tshiab ua dua lub neej tshiab.

Kawg no, Vaj Qhia Les Os 14 ntuas cov tuaj mloog nws hauv hnub no thov Tswv Ntuj pub lub txiaj ntsim rau sawv daws, kom sawv daws ras tau tias muaj yam twg ua rau sawv daws khuam los daig cia, thiab yaum sawv daws kom tsa suab thov kev cawm ntawm Tswv Ntuj.