Hnub tim 5 lub 8 hli tas los no, Vaj Qhia Les Os 14 qhia Ntuj kev cai rau cov neeg tuaj tsham nws nyob hauv Tuam Tsev Teev Ntuj Leej Ntshiab Pob Zeb, nws muab lub Rooj Ncauj Lus Vas Tis Kas Ob tsab ntawv ‘tshaj lus qhia txog Tuam Kev Teev Ntuj’ los yog Sacrosanctum Concilium ntu hais txog ‘kev thov Ntuj thiab cov kab ke teev Ntuj’ los nthuav qhia rau sawv daws.
Vaj Qhia pib nws cov lus, nws hais tias nyob hauv lub zim txwv sawv daws rau nqi rau ‘kev dhia tau zoo’ (efficiency) thiab ‘kev noj kev siv’ (consumption), mas saib zoo li ‘kev thov Ntuj’ tsis muaj qab hau; ib txhia nkag siab tias kev thov Ntuj tsuas yog ib zaj tswv yim fab kev xav (Psychological technique) thiab neeg kom xav txog qhov zoo xwb. Vaj Qhia hais li no “Nyob hauv lub ntuj sawv daws saib tias kev tshuaj xwm thiab kev siv tshuab vam meej (Science & Technology) teb tau tas txhua yam, mas kev thov Ntuj zoo li yog kev khiav tawm ntawm qhov tseeb. Tab txawm nyob hauv cov neeg ntseeg, ib txhia lawv tsis muab siab rau qhia lawv cov me nyuam thov Ntuj ntxiv lawm. Tseem muaj ib txhia to taub yuam kev tias kev thov Ntuj yog ib zaj tswv yim fab kev xav muaj lub hom piaj yog pab neeg kom xav txog qhov zoo. Txawm li cas los xij peem, kev thov Ntuj yog ib feem ntawm neeg lub hauv paus, thiab tsim nyog peb yuav tau tig los tshawb nrhiav kom to taub txog kev thov Ntuj lub ntsiab tseem ceeb.”
Vaj Qhia Les Os 14 vam txog Vaj Qhia Paj Lug 6 lo lus “Peb tsum muab Tswv Ntuj saib ua thawj, thiab kev thov Ntuj yog cov neeg ntseeg thawj txoj kab xwm. Kev teev Ntuj yog thawj lub qhov chiv txoj sia Tswv Ntuj pub rau peb thiab yog thawj qhov chaw qhia kev ua neej fab ntsuj plig rau peb” los txhib sawv daws.
Tos hais tias kev teev Ntuj yog thawj lub qhov chiv txoj sia thiab yog thawj qhov chaw qhia kev ua neej fab ntsuj plig vim tias kev teev Ntuj yog qhov chaw Tswv Ntuj nqes los nyob ze tib neeg nyob hauv Huab Tais Yes Xus uas yog Leej Lo Lus txais cev nqaij ua neeg. Peb txais Tswv Ntuj tau yog vim Huab Tais Yes Xus Pleev, yog nrog Huab Tais Yes Xus Pleev, thiab yog nyob hauv Huab Tais Yes Xus Pleev.
Hais txog kab ke ‘qhia hnub – xaus hnub’ mas Vaj Qhia hais tias yog lub Koom Txoos cov zaj thov Ntuj niaj hnub. Cov zaj qhib hnub thiab xaus hnub yog txuas nrog lub Cim Yug thiab tsim nyog yuav yog ib feem hauv tus neeg ntseeg thiab cov ntseeg lub neej.
“Ntawm cov xav paub txog kev thov Ntuj, tshwj xeeb yog cov npaj txais Cim Ntxuav, mas cov zaj qhib hnub thiab xaus hnub yuav pub txoj kev thiab ua chaw qhia txog kev thov Ntuj raws li txoj kev ntseeg tau rau lawv. Niaj lis piam thiab niaj hnub, Cim Yug thiab kev hais zaj qhib hnub thiab xaus hnub yog lub Koom Txoos txoj pa muaj txoj sia coj Leej Ntuj Plig Ntshiab tuaj rau lub Koom Txoos.” Vaj Qhia Les Os 14 hais rau sawv daws.
Nws hais ntxiv tias yog peb hais cov zaj qhib thiab xaus hnub, mas yuav pab peb kom nqa tau kev thov Ntuj los nyob hauv txhua lub sij hawm hauv peb lub neej; txij sawv ntxov mus txog tsaus ntuj, thiab pab kom peb kev ua neej niaj hnub rais ua kev tos ntsoov Tswv Ntuj yam muaj chaw tso siab. Vaj Qhia hais li no “Thaum sawv ntxov, peb pib hnub tshiab mas peb lub siab puv npo txoj kev ntseeg thiab peb ua Tswv Ntuj tsaug. Thaum tav su, peb thov Tswv Ntuj pub dag pub zog rau peb kom muaj ib lub siab ncaj ua peb tes hauj lwm. Thaum hnub tu siav, peb tso qav num tseg, peb hais zaj xaus hnub. Thaum tsaus ntuj, peb pw tsaug zog, mas peb muab peb cev rau Tswv Ntuj ua tus saib xyuas kom peb pw kaj siab lug nyob hauv Tswv Ntuj kev thaj yeeb.”
Vaj Qhia xaus tias “Txhua lub sij hawm peb thov Ntuj, yog lub caij peb ua kev tso siab tes hauj lwm. Nyob hauv lub neej khuam rau lub ntiaj teb no, peb nrog tas lub Koom Txoos zov hmo thiab tos ntsoov txog hnub Huab Tais Yes Xus yuav rov los nyob hauv Leej Txiv lub koob meej.”
