Tus sau: TP. Nyiaj Pov (Tim 23 lub 1 hlis 1997)
Xub piav me ntsis txog cov npe teb chaws thiab cov npe neeg tso.
Nas Xas Les yog ib lub zos nyob hauv lub xeev Nkas Lis Lais, nyob His Xais Lais qaum teb. Lub caij uas Mab Liab hlob nyob, mas Nas Xas Les yog ib lub zos me ; tej zaus muaj 200 yim neeg ua qoob ua loo nyob ib ncig ntawm lub zos.
Lub xeev Nkas Lis Lais tsis loj, tsis dav. Txij nrig teb sab Naj mus txog nrig teb sab Pej tsuas muaj 100 km xwb : mus ko taw yog peb hnub kev. Cov los pav tuaj cov teb chaws Toob Fab tuaj, lawv thauj lawv tej toob xib coj mus muag rau cov tswv nkoj hla lub Hiav Txwv Mes Dis Tes Las Nes, lawv hla lub xeev Nkas Lis Lais.
Nkas Nplias yog Tswv Ntuj ib tug Tshiab : Nkas Nplias xa Tswv Ntuj lo lus tuaj rau Ntxas Kas Lias tias nws poj niam Es Lis Xas Npes yuav xeeb tub; thiab nws xa Tswv Ntuj Lo lus tuaj rau Mab Liab tias nws yuav xeev tub.
Lub npe Nkas Nplias muaj lub ntsiab txhais tias : “ Twv Ntuj yog kuv lub zog”.
Mab Liab yog ib lub npe uas lub caij ntawd lawv tis kam rau ntau tus poj niam . Muaj tej tus kws txuj muab lub npe Mab Liab los txhais tias
“Lub hnub qub kaj lub hiav txwv”.
Yos Xes kuj yog ib lub npe uas lawv tis rau ntau tus txiv neeg
His Xais Lais thaud. Yos Xes yog ib tug kws ntoo. Yos Xes yog tus Vaj Das Vis ib tug xeeb ntxwv.
Ntawv ntshiab hais tias Yos xes lub xeev yog lub xeev Das Vis.
Es Lis Xas Npes yog Ntxas Kas Lias tus poj niam. Nws yog tus yug tus Ntxuav Plig Zam. Rau lub hli ua ntej, tus Tshiab Nkas Nplias tuaj hais tias Es Lis Xas Npes yuav xeeb tub. Ntawv Ntshiab hais tias Mab Liab thiab Es Lis Xas Npe yog ib pab kwv tij los yog neeg tsa : peb thiaj hais kam tias Es Lis Xas Npes yog Mab Liab tus phauj.
Cov lus uas Tswv Ntuj xa tuaj rau Mab Liab yog lus nyiaj lus kub qhia peb paub tias Yes Xus yog tus Huab Tais muaj lub hwj chim tuaj qhov twg tuaj, thiab paub tias Mab Liab yog tus poj niam muaj lub siab dawb siab huv npaum li cas.
Peb maj mam rov saib cov lus uas Tswv Ntuj tus Tshiab hais rau Mab Liab.
“koj nyob kaj lug, tus tau txiaj ntsim pub siab. Huab Tais nrog koj nyob. “
Mab Liab yog ib tug ntxhais lub hnub nyoog muaj 16 xyoo tej. Tswv Ntuj tus Tshiab xub hais ib co lus hwm Mab Liab, vim Mab Liab yog ib tug ntxhais siab dawb siab huv. Niaj hnub Xas Npas Tos nws mus hauv lub Tsev Txoos teev Ntuj nyob Nas Xas Les. Nws hnov cov saib lub Tsev Txoos nyeem cov Yaj Saub cov lus : xws li tus Yaj Saub His Xais xub hais 500 xyoo ua ntej tias ib tug Huab Tais pub kev thaj yeeb yuav sawv los hauv haiv neeg His Xas Lais. Mab Liab tos tus Huab Tais coj kev thaj yeeb thiab kev thoob tsib tuaj rau ntiaj teb neeg.
Mab Liab yog ib tug hluas nkauj xws luag nyob Nas Xas Les. Nws coj tus yam ntxwv tsim txiaj. Nws muaj Tswv Ntuj lub txiaj ntsim puv nws lub siab. Lo lus ntawd yog hais txog dab tsi ?
Tswv Ntuj lub txiaj ntsim yog Tswv Ntuj ua kom yus nco txog nws ntau, yus xav ua tas txhia yam xis Tswv Ntuj siab. Yus lub siab thiab yus lub tswv yim nrog Tswv Ntuj nraim. Mab Liab yog ib tug hluas nkauj zoo li ntawd.
Tus Tshiab kuj hais rau Mab Liab tias : “Huab Tais nrog koj nyob.”
Yam li Mab Liab lub siab nco nraim Tswv Ntuj. Tab sis Huab Tais nrog Mab Liab nyob thiab. Vim li cas Huab Tais thiaj nrog Mab Liab nyob ? Yog vim Huab Tais Tswv Ntuj xaiv Mab Liab kom nws ua ib txog hauj lwm muaj tsim tshaj. Tus Huab Tais saib tas lub ntuj lub teb ntsia ntsoov ib tug ntxhais 16 xyoo nyob hauv tas tsoom poj niam hauv lub qab ntuj. Tus ntxhais ntawd yog Mab Liab. Huab Tais yuav pub ib txog hmoov txawv tas zeej tsoom txoj hmoov rau Mab Liab.
Tus Tshiab Nkas Nplias cev Tswv Ntuj cov lus rau Mab Liab, nws hais tias : “Huab Tais nrog koj nyob !
Mab Liab xav hauv nruab siab tias : ” Kuv paub tias kuv lub siab nrog Tswv Ntuj nraim. Tab sis vim li cas Tswv Ntuj thiaj xa nws ib tug Tshiab tuaj hais rau kuv tias : “Koj nyob kaj lug, Mab Liab, tus tau txiaj ntsim puv siab ! Huab Tais nrog koj nyob !”
Tus Tshiab pom tias Mab Liab poob siab. Tus Tshiab hais txiv rau Mab Liab tias.
“Mab Liab, koj tsis txhob txhawj ! Tswv Ntuj saib koj ntxim Tswv Ntuj siab. Koj yuav xeeb tub. Koj yuav tis nws npe hu ua Yes Xus. Nws yuav yog tus Huab Tais nyob siab tus Tub. “
Tus Tshiab pib hais tias : “Koj tsis txhob txhawj”. Tab sis cov lus nws hais ntxiv yog ib co lus ua kom Mab Liab haj yam poob siab, haj yam tsis to taub, vim nws leej tub yuav yog tus Huab Tais nyob siab Leej Tub.
Tsis tas li ntawd, tus Tshiab Nkas Nplias tseem hais ntxiv tias :
“Koj Leej Tub yuav zaum saum tus Vaj Das Vis lub theej kiab. Yam li nws yuav ua vaj. Thiab nws yuav ua vaj tsis muaj caij kawg.”
Mab Liab tsis to taub tiag ! Nws yuav yug ib tug tub. Nws tus tub kuj yuav yog Tswv Ntuj Leej Tub. Thiab nws tus tub yuav ua vaj nyob mus li tsis muaj caij kawg, tsis tuag ib zaug li !
Tseem tsis tas li ntawd !
Mab Liab nug tias :
“Tej xwm ntawd yuav tsheej xeeb tau zoo li cas, vim tias kuv tsis paub ib tug txiv neej ?”
Mab Liab niam thiab txiv pom nkawd tus ntxhais hlob tiav hluas nkauj lawd, ces nkawd tau muab Mab Liab qhaib rau ib tug txiv neej hu ua Yos Xes. Tab sis Mab Liab tseem tsis tau xav txog qhov tias nws yuav pib ua nws lub neej sai.
Tus Tshiab teb dab tsi rau Mab Liab ? Nws tseem hais ib yam uas tsis muaj lwm tus poj niam nyob ntiaj teb tau hnov hais rau nws. Tus Tshiab hais li no :
“Leej Ntuj Plig Ntshiab yuav los nyob saum koj. Tus Huab Tais nyob siab lub hwj huam yuav los ntxoov koj. Koj tus me nyuam yuav yog ib tug ntshiab huv. Nws yuav yog Tswv Ntuj Leej Tub tiag !”
Mab Liab ib sij huam hnov Tswv Ntuj xa ib lub moo loj dhau rau nws mloog. Nws xav ntseeg lub moo ntawd tas nrho uas Tus Tshiab xa tuaj. Mab Liab lub tswv yim xav tsis tau dab tsi li.
Ces tus Tshiab Nkas Nplias hais ib co lus pab Mab Liab ntseeg tias txhia yam yuav tsheej xeeb xws li txoj xov Tswv Ntuj xa tuaj no. Tus Tshiab thiaj hais rau Mab Liab tias :
“Koj tus phauj Es Lis Xas Npes laus lawm. Nyem no nws xeeb tub tau 6 hli lawm. Vim tsis muaj ib yam uas Tswv Ntuj ua tsis tau.”
Mab Liab paub zoo nws tus phauj Es Lis Xas Npes. Nws kuj paub tias tas tsoom sid hu nws tus phauj tias : tus poj khaj seeb. Hos tau 6 lub hli nws xeeb tub lawm. Mab Liab yog tus niaj hnub muaj Tswv Ntuj lub txiaj ntsim puv nws siab. Nws lub tswv yim nrog Tswv Ntuj nraim. Nws pheej tos tus Huab Tais yuav tuaj cawm haiv neeg His Xas Lais. Nws pib to taub me ntsis tias Tswv Ntuj xaiv nws kom nws ua tus niam yuav yug tus Huab Tais uas tas haiv neeg His Xas Lais tos ntsoov txog. Mab Liab kuj pib mem tau tias tus nws yuav yug yuav yog ib tug Huab Tais txawv tus uas tas zeej tsoom tos. Nws tus tub tsis muaj txiv nyob ntiaj teb no, nws Txiv yog Tswv Ntuj. Thiab nws tus tub yuav tsis tuag : nws yuav nyob mus li tas ib txhiab ib txhis. Mab Liab tsis to taub. Nws tsuas qhuas txog txoj xov zoo nkauj ci ntsa iab nyuam qhuav ntxhe txog nws pob ntseg. Mab Liab ke qhuas, ke zoo siab. Nws lub siab tiaj tus.
Mab Liab teb tias :
“Kuv yog Huab Tais tus ntxhais txib. Kom muaj tuaj rau kuv raws li lo lus koj hais !”
Ces tus Tshiab rov mus, cia Mab Liab nyob tib leeg khaws Tswv ntuj txoj xov tseg hauv nws nruab siab.
Tswv Ntuj tau xa xov tuaj rau Mab Liab tias yuav tis npe rau nws tus tub hu ua “Yes Xus”. Lub npe “Yes Xus” txhais ua lus Hmoob tias : “Tswv Ntuj cawm”, yam li Yes Xus yog tus Huab Tais uas Tswv Ntuj xa tuaj cawm ntiaj teb neeg. Yes Xus yog Tswv Ntuj Leej Tub. Yes Xus yog tus vaj nyob mus li.
Mab Liab tau xub paub dua sawv daws tias Yes Xus yuav yog ib tug Huab Tais muaj hwj chim zoo li ntawd, Yes Xus cov thwj tim yuav paub tej ntawd 36 los 37 xyoo tom qab, thaum Yes Xus tau sawv rov los thiab xa Leej Ntuj Plig nqes los nyob hauv cov thwj tim. Mab Liab xub paub 37 xyoo ua sawv daws ntej. Mab Liab khaws cov lus ntawd tseg hauv nws nruab siab.
Mab Liab pom nws tus tub Yes Xus ua nws lub neej 36 – 37 xyoo, Mab Liab thiaj to taub zuj zus txoj xov nws xub txais ntxov. Mab Liab txoj hmoov zoo li ntawd. Mab Liab koob hmoov loj tas nrho.
Puas muaj ib tug txiv neej yug los nyob ntiaj teb no uas nws muaj koob hmoov zoo muab piv rau Mab Liab koob hmoov ? Tsis muaj li.
Qhov ntawd yog ib yam xwm zoo qhuab qhia tsoom txiv neej thiab tsoom poj niam sawv daws nyob ntiaj teb no.
Qhuab qhia dab tsi rau tsoom txiv neej ? Qhuab qhia tias Tswv Ntuj saib Mab Liab ntxim Tswv Ntuj siab. Tswv Ntuj hwm Mab Liab, nws xub xa xov qhia Mab Liab thiab nug Mab Liab tias nws puas kam ua Yes Xus niam. Mab Liab tuaj yeem hais tias : “Kuv yog Huab Tais tus ntxhais txib “, ces Tswv Ntuj ua tau kom Mab Liab xeeb tub.
Tsoom txiv neej nyob tas ntiaj teb xav saib cov poj niam tsis muaj nqi, tsis muaj hwj chim npaum li txiv neej. Tswv Ntuj saib Mab Liab muaj nqi siab. Tswv Ntuj qhuab qhia tsoom txiv neej kom lawv saib tsoom poj niam muaj tsim npaum li tsoom txiv neej. Peb tsoom txiv neej yuav tsum nco ntsoov lo lus ntawd : niaj hnub tsoom txiv neej yuav hwm tsoom poj niam sib npaum li hwm tsoom txiv neej.
Tswv Ntuj tau hwm Mab Liab, tau saib Mab Liab ntxim Tswv Ntuj siab. Tswv Ntuj tau ua kom Mab Liab xeeb Yes Xus thiab yug Yes Xus. Yam xwm no yog zoo qhuab qhia tsoom poj niam tias tsoom poj niam muaj nqi tas nrho nyob ntawm Tswv Ntuj xub ntiag. Ntau zaus tsoom poj niam raug cov txiv neej tsis saib lawv muaj nqi. Kom cov poj niam nco txog Mab Liab, ces lawv siab yuav tiaj tus xws li Mab Liab lub.
Tas nws sid Mab Liab tau ua ib tug poj niam tsis nto moo, nws tsuas rau siab tu Yes Xus hlob, saib Yes Xus ua nws tej hauj lwm. Tab sis Tswv Ntuj saib Mab Liab ntxim nws siab tas ib sim neej. Peb tsoom poj niam muaj Mab Liab ua tus zoo piv txwv rau tsoom poj niam thiab rau tsoom txiv neej tib si. Tsoom poj niam yuav nco nraim tias lawv puav leej muaj ib txog hmoov zoo nyob hauv Mab Liab : phim lawv lub siab yuav nyob tiaj tus tas ib sim neej.