Tus sau: TP. Nyiaj Pov (Tim 21 lub 4 hlis 1997)
Yes Xus ncaim ntawm nws lub zos tau ib ob hlis tej. Nws rov los. Cov neeg nyob Nas Xas Les pib hnov zeej tsoom nyob tsis deb tsi ze cav zom zaws tias lawv tus Yes Xus uas hlob hauv lawv lub zos muaj peev xwm ua tej hauj lwm txawv teb chaws thiab nws txawj qhuab qhia luag nyob hauv cov tsev txoos thiab nyob ntawm tej tshav puam.
Yes Xus rov los xyuas nws cov kwv tij, cov swm neeg. Lawv pom nws hauv lawv lub tsev txoos. Raws li lawv kev cai mas tus saib lub tsev txoos muaj cai thov kom ib tug txiv neeg nyeem thiab nthuav cov Ntawv Ntshiab. Tus saib lub tsev txoos pom Yes Xus nyob ntawd, nws cev tus Yaj Saub His Xais cov Ntawv rau Yes Xus kom Yes Xus nyeem thiab nthuav kauj ntawv His Xais.
Thaum ntawd lawv kauv ntawv, lawv tsis muab ntawv los ua tej phau. Yes Xus txais kauj ntawv His Xais. Yes Xus nrhiav His Xais ib co lus uas nws xav nthuav rau lawv mloog. Yog lo lus no :
“Huab Tais Leej Tswv Yim nyob saum kuv.
Nws pleev kuv kom kuv tshaj lub Moo Zoo rau cov pluag.
Nws xa kuv mus ceeb toom rau cov neeg nyob hauv tsev loj faj tias lawv yuav tawm mus, ceeb toom rau cov dig muag tias lawv yuav rov pom kev,
xa cov raug luag hiam mus ua neeg twj lij, ceeb toom tias yog lub xyoo Huab Tais pub Txiaj ntsim”.
Kwv tij sawv daws, hnub no Yes Xus ceeb toom cov lus no rau nej thiab.
Hnub no, Leej Ntuj Plig lub hwj huam pleev Yes Xus, qhwv Yes Xus tus kheej. Leej Ntuj Plig xa Yes Xus tuaj ceeb toom Huab Tais Tswv Ntuj cov lus rau nej mloog nyob hauv nej zos, nyob hauv ntej tsev.
“Leej Ntuj Plig pleev kuv kom kuv tshaj lub Moo Zoo rau cov pluag.”
Kwv tij Hmoob, peb yog cov pluag. Peb yog cov pluag tshaj nyob Suav qab teb, nyob Cob Tsib qaum teb, nyob pem cov roob hauv Los Tsuas teb, nyob hauv cov zos me nyob Thaib teb.
Muab peb tej tsev los piv rau luag tej tsev mas peb cov tsev tsis xws luag cov tsev. Peb niaj hnub hnav khaub ncaws tsis xws luag. Peb yog cov pluag tiag. Yes Xus xa nws lub Moo Zoo tuaj rau peb, xub cev nws lub Moo Zoo rau peb ua ntej, xws li nws tau xub qhia cov zos me nyob Nkas Lis Lais teb.
Nws lub Moo Zoo yog dab tsi ?
Yes Xus qhia peb tias Tswv Ntuj yog peb Txiv : Tswv Ntuj hlub peb tsoom neeg pluag. Tswv Ntuj txhob txwm xub tshoj peb cov neeg me thiab khwv ua noj kom peb to taub zoo dua luag thiab sai dua luag tias nws yog peb Txiv nrog peb nyob nraim : yog ib lub Moo Zoo kawg.
Tej zaus luag muaj nyiaj nplij lawv siab : kuv tsis paub tias nyiaj puas txawj nplij neeg siab. Tab sis Yes Xus tuaj hais rau peb tias peb tsoom neeg pluag muaj Tswv Ntuj ua peb Txiv thiab nws nplij peb lub siab : peb txais tau lub Moo Zoo ntawd mas peb lub siab kaj, peb nyob thaj yeeb. Tab txawm peb pluag kuj xij : peb to taub thiab pom tseeb tias peb muaj Tswv Ntuj ua peb Txiv : yog lub Moo zoo tshaj.
“Leej Ntuj Plig pleev kuv kom kuv ceeb toom rau cov dig muag tias lawv rov pom kev.”
Kwv tij Hmoob, peb yuav lees tias peb yog cov neeg dig muag. Peb tsis pom Tswv Ntuj lub txiaj ntsim. Peb tsis pom txoj kev ci ntsa uas Tswv Ntuj pub rau peb taug. Peb tsuas pom tej yam uas peb qhov muag pom. Peb dig muag. Yes Xus tuaj ceeb toom rau peb tias peb tsev neeg yog paj tshab tsim txiaj uas Tswv Ntuj pub rau peb. Yes Xus tuaj qhib peb qhov muag ces peb pom tias peb lub cev muaj qhov muag, muaj pob ntseg, muaj qhov ncauj, muaj tes taw txawj ua tau ntau yam.
Yes Xus tuaj haiv rau peb tias :
“Nej ntsia cov teb chaws zoo saib uas nej nyob, nej ntsia cov nroj, cov paj, xyoob ntoo, me kab me noog. Nej niaj hnub pom kam, tsis nco qab qhuas. Nej xws li muaj ib yam dab tsi plooj nej qhov muag thiab nej lub tswv yim. Nej qhuas txog lub ntuj, lub hnub, lub hli, cov hnub qub, cov dej nag, cov dej ntws, cov pas dej. Nej nco txog nej Txiv Tswv Ntuj tsim tas txhia yam, nws yuav qhib nej qhov muag : nej qhov muag yuav plhis, ces nej yuav pom lub teb chaws tshiab tuaj : Kuv tuaj ceeb toom tias nyem no nej thiab nej lub tswv yim nce mus txog Tswv Ntuj lawm ces nej yuav tsis dig muag ntxiv tas ib sim neej.”
Yes Xus tuaj ceeb toom cov lus no rau peb cov neeg dig muag.
“Leej ntuj Plig pleev kuv kom kuv hais rau cov nyob hauv tsev loj faj tias lawv yuav tawm mus.”
Kuv tij Hmoob, nej yuav hais tias nej tsis nyob hauv tsev loj faj. Yog zoo li nej hais.
Hos muaj tus puav raug kaw hauv tsev loj faj, vim lawv tau ua txhaum, los yog vim luag lam liam tias lawv tau ua txhaum. Ces lawv txom nyem hauv tsev loj faj uas muaj tub ceev xwm zov nruj nruj.
Thiab tseem muaj lwm cov tsev loj faj uas peb coob leej kawg raug zwm hauv. Muaj ntau hom tsev loj faj.
Yog koj ntshaw ntshaw mua nyiaj txiag ntau zuj zus tsis txaus siab ib zaug li : mas nyiaj txiag yog lub tsev loj faj muab koj khi.
Yog koj niaj hnub xav mus deev luag poj luag sev, los koj pheej nrhiav cov poj ntiav, koj lub tswv yim xav txog tej kev ntawd tsis tseg : mas koj kev ntshaw deev poj niam yog koj tsev loj faj ua kom koj lub siab nyob tsis tiaj tsis tus.
Yog koj ntxub ib tug neeg heev : koj txoj kev ntxub yog koj tsev loj faj kav koj lub siab.
Yes Xus tuaj xa lub Moo Zoo tias tab txawm peb nyob hauv hom tsev loj faj twg mas nws tuaj qhib peb cov tsev loj faj, nws rhuav peb cov tsev loj faj.
Nws qhia tias : koj xub muab siab rau nyiam Tswv Ntuj thiab hlub luag tej, pab luag tej. Koj tso kev ntshaw pov tseg. Kuv pab koj kom yeej tas txhia txoj kev ntshaw. Koj txhob nyob hauv koj cov tsev loj faj. Koj mloog kuv lub Moo Zoo. Koj thiaj yuav tau kev tawm ntawm koj cov tsev loj faj. Koj yuav luag ntxhi nyob hauv kuv lub Ceeb Tsheej kaj siab lom zem.
“Leej Ntuj Plig pleev kuv kom kuv ceeb toom tias cov raug luag hiam yuav sawv ua neeg twj lij.”
Kwv tij Hmoob, peb puas raug luag hiam ?
Nej ntau leej hauj sim xa ntawv tuaj rau peb lub chaw tshaj xo Zoo Tswv Zov Yaj tias luag tsis saib Hmoob muaj nqi dab tsi li. Luag ntiab nej tawm ntawm thaj av nej ua liaj ua teb tau ntev niaj ntau xyoo, kom nej txav mus ua noj nyob ntawm tej phab toj ntxhab.
Nej lwm tus xa ntawv tuaj hais tias luag tsis tso lus kawm Yes Xus cov lus. Tseem muaj tej tus hais tias luag tsis kheev siv ntawv Hmoob, tsis pom zoo kom nej nyeem cov ntawv Hmoob. Tseem muaj tej lub teb chaws uas luag xav kom nej tso nej cov npe Hmoob pov tseg los tis nej tej npe phim luag haiv neeg. Nej raug luag hiam raws ntau txoj kev.
Yes Xus hais rau nej tias :
“Nej yuav sawv ua neeg twj lij.”
Vim li cas Yes Xus thiaj hais tau lo lus ntawd ?
Vim Yes Xus pub lub siab loj siab tawv rau yus. Yus paub tias yus yeej yuav raug luag hiam ib lub caij ntev, tab sis Yes Xus tuaj hais rau yus kom yus tso siab rau yav tom ntej. Yes Xus pab peb kom peb rau siab kawm ntau yam txuj. Yes Xus pab peb kom peb tau kev ntsib cov paub txuj siab ncaj, ntsib cov paub txoj cai uas cov tseem hwv yuav tsum mloog, paub taij kom luag ua ncaj.
Yes Xus pab kom peb nrog luag hais lus sib haum xeeb.
Ces peb maj mam sawv ua neeg twj lij muaj cai xws luag.
Peb raug luag hiam mas tus twg tso siab rau Yes Xus lub Moo Zoo, tso siab rau Yes Xus cov lus mas nws nrog nws haiv neeg sawv daws maj mam sawv ua neeg twj lij, nws tsis cia luag hiam mus li tsis muaj caij kawg.
Nyob hauv lub tsev txoos hauv nws lub zos Nas Xas Les, Yes Xus nthuav cov lus nws nyuam qhuav nyeem nyob hauv Kauj Ntawv His Xais. Nws tseem hais tias :
“Hnub no, zaj nej pob ntseg nyuam qhuav hnov tsheej xeeb lawm.”
Yam li tus tuaj tshaj lub Moo Zoo rau cov pluag yog Yes Xus. Nws tuaj ua kom cov dig muag rov pom kev. Nws tuaj ua kom cov raug kaw hauv tsev loj faj lawv tawm. Nws tuaj ua kom cov raug luag hiam sawv ua neeg twj lij.
Yes Xus hais li ntawd tas nws cov swm neeg nyob Nas Xas Les ntsia ntsoov Yes Xus. Lawv qhuas txog cov lus puv txiaj ntsim tawm ntawm nws lub ncauj los.