Tus sau: TP. Nyiaj Pov (Tim 31 lub 5 hlis 1997)
Kwv tij, nyob hauv zaj no, qhov nej yuav nco yooj yim tshaj yog qhov tias 4 tug neeg nqa tus tuag ceg tuaj lawv tsis tau kev coj lawv tus neeg mob chaws mus hauv tsev thiab tso lawv tus neeg rau ntawm Yes Xus xub ntiag, ces lawv nce mus saum ru tsev, tho ib lub qhov dav hauv lub ru thiab tso tus neeg tuag ceg nqes los nyob ntawm Yes Xus taw.
Nyob teb chaws Yus Das ntawd, lawv ua tsev txawv peb teb chaws. Lawv muab tej tus nqaj thiab ib co ceg ntoo thiab ib co av nplaum nplaum los ua ib lub ru pheeb me ntsis kom xwv cov dej nag ntws saud.
Plaub tus neeg nqa tus tuag ceg mob siab thov kom Yes Xus kho lawv tus neeg, lawv tho ib lub qhov ntawm lub ru kom txaus tso tus tuag ceg nqes los hauv lub tsev. Ntshe cov neeg hauv tsev cem. Tab sis 4 tug neeg tsis mloog : lawv tseev kom thov Yes Xus kho lawv tus neeg tuag ceg.
Ntawm Yes Xus, nws xav li cas ? Ntawv Ntshiab hais tias Yes Xus pom lawv ntseeg, lawv tso siab rau Yes Xus. Yes Xus tsis nrog luag yws yws, nws tsis cem 4 tug neeg ntawd. Yes Xus tsuas pom tias cov neeg ntawd ntseeg tas siab tias Yes Xus muaj lub hwj huam tuaj ntawm Tswv Ntuj : nws yuav kho tau lawv tus neeg tuag ceg kom zoo hlo.
Kwv tij, zaj peb tau nyeem puas ta rau nej mloog tsis yog piav txog lawv tho ib lub qhov saum ru tsev xwb. Qhov loj nyob hauv zaj no yog cov lus Yes Xus tau hais rau cov neeg sawv nyob vij vog nws, thiab yog cov lus Yes Xus hais rau tus neeg tuag ceg.
Cov lus Yes Xus xub hais rau cov neeg ntsauv nws yog hais dab tsi ?
Yog hais zoo li no : “Me tub, koj cov txhaum daws tas lawm.”
Vim li cas Yes Xus thiaj xub hais lo lus ntawd ? Tus tuag ceg tsuas xav kom Yes Xus hais ib co lus kho nws kom nws sawv tau xwb !
Tus tuag ceg yeej tos cov lus ntawd tiag ! Tab sis Yes Xus xav qhia tej yam tob rau cov neeg nyob puv hauv lub tsev thiab sib txiv nyob sab nraud. Yes Xus pom tias nyob hauv cov neeg nyob ze ntawm nws muaj ib co Thoob Xwm Ntawv Ntshiab uas lawv niaj hnub nyas ntshis Yes Xus thiab hais tej lo lus tiv nws. Nws paub tias lawv tsis nyiam nws thiab lawv tsis kam zeem tias nws yog ib tug tuaj ntawm Tswv Ntuj.
Yes Xus paub tias nyob hauv lawv siab lawv tsuas xav li no : “Tus Yes Xus ntawd thuam Tswv Ntuj ! Leej twg yuav daws txhaum tau ? Tsuas kawg yog Tswv Ntuj tib leeg xwb !”
Yes Xus thiaj ncaj qha hais ob yam rau cov Thoob Xwm Ntawv Ntshiab :
Ib : Yes Xus rov hu nws ua “Leej Neeg Tus Tub.”
Ob : nws ua kom sawv daws pom tseeb tias nws muaj peev xwm kho tau neeg lub cev thiab neeg lub siab kom zoo tuaj.
Cov Thoob Xwm Ntawv yog cov neeg tau kawm Phau Ntawv Ntshiab thiab kawm Mais Xes txoj cai ntau. Lawv paub tias 200 xyoo ua ntej no muaj ib tug Yus Das tau sau ib Phau Ntawv hu ua “Phau Ntawv Das Nias”. Tus sau Phau Ntawv Das Nias hais txog ib tug neeg hu ua “Leej Neeg tus Tub.”
Phau Ntawv Ntshiab Das Nias hais tias Leej Neeg tus Tub yog ib tug tuaj ntawm Tswv Ntuj thiab nws muaj peev xwm ua hwj huam xws li Tswv Ntuj pub.
Ces Yes Xus rov hu nws ua “Leej Neeg tus Tub”, Yes Xus hais rau cov Thoob Xwm Ntawv tias : “Kuv, uas yog Leej Neeg tus Tub, kuv muaj peev xwm daws txhaum tau !”
Yes Xus hais li ntawd rau lawv, ces lawv paub tias Yes Xus khav tias nws muaj lub peev xwm loj ib yam li Tswv Ntuj, vim nws daws txhaum tau.
Cov Thoob Xwm Ntawv hnov Yes Xus hais cov lus ntawd mas lawv tsis txais Yes Xus lo lus. Lawv muab lawv lub siab kaw nti. Lawv pib xav hauv nruab siab tias kawg yuav tsum muab Yes Xus tua ces zeej tsoom thiaj tsis raws nws qab.
Lo lus tim ob uas Yes Xus xav qhia yog qhov tias nws muaj peev xwm kho tau neeg lub cev thiab neeg lub siab kom zoo tuaj.
Cov ntxub Yes Xus, xws li cov Thoob Xwm Ntawv thiab cov Leej Choj Yus Das thiab tej tus Fas Lis Xais, lawv pom Yes Xus ua hwj huam kho cov neeg mob ntau zaus. Tas zeej tsoom kuj pom Yes Xus kho cov neeg mob kom zoo hlo.
Tsoom pej xeem xav tias Yes Xus kho tau cov neeg mob kom zoo hlo yog vim Tswv Ntuj pub nws lub hwj huam rau Yes Xus kom Yes Xus ua tau, ces lawv ua Tswv Ntuj tsaug.
Tab sis cov hlob, xws li cov Thoob Xwm Ntawv, lawv hais tias Yes Xus kho tau cov neeg mob vim nws hu txog dab los pab nws. Tsis yog Tswv Ntuj pab nws, vim nws rov muab nws los piv rau Tswv Ntuj. Lawv hais tias Yes Xus yog tsoom dab phem ib tug neeg.
Yes Xus thiaj hais rau cov Thoob Xwm Ntawv tias : “Kuv muaj peev xwm kho tus neeg tuag ceg ntawd, ib yam li kuv muaj peev xwm daws txhaum. Txoj hauj lwm uas Leej Txiv Tswv Ntuj muab rau kuv yog hlub neeg, yog pab neeg, yog cawm neeg, yog npo neeg lub cev ntawm kev raug txom nyem thiab npo neeg lub siab ntawm nws cov txhaum.”
Yes Xus xav ua kom cov Thoob Xwm Ntawv pom tias nws muaj lub hwj huam txawj kho neeg lub siab thiab lub cev. Ces Yes Xus hais rau tus neeg tuag ceg tias : “Nqa koj daim lev rov mus tsev mog !”
Tus tuag ceg cia li sawv tsees, nqa zoj daim lev hla ntawm sawv daws xub ntiag.
Cov Thoob Xwm Ntawv puas qhib lawv lub siab tig los ntseeg tias Yes Xus yog Tswv Ntuj tus neeg ? Lawv tsis qhib. Muaj ib hnub lawv yuav muab Yes Xus tua.
Tab sis tsoom pej xeem siab ncaj dua cov kawm txuj. Lawv cav txog Tswv Ntuj tias : “Peb tsis tau pom dua tej yam zoo li no ib zaug !”