Tus sau: TP. Nyiaj Pov (Tim 5 lub 3 hlis 1997)
Kwv tij phooj ywg, cov Fas Lis Xais uas lawv tuaj nug Yes Xus li ntawd yog ib pab neeg kub siab teev hawm Tswv Ntuj. Lawv niaj hnub nyeem Phau Ntawv Ntshiab qhia Mais Xes txoj cai thiab qhia cov Yaj Saub cov lus. Lawv paub zoo tas txhia yam uas cov His Xas Lais yuav caiv Hnub Xas Npas Tos. Lawv pom tias hnub Xas Npas Tos Yes Xus cov thwj tim tsis caiv ob yam : yam ib, lawv mus kev deb dhau; yam ob, lawv de cov hnab nplej. Cov His Xas Lais yuav tsum caiv ob yam ntawd.
Cov Fas Lis Xais paub Mais Xes txoj cai thiab paub cov Xib Hwb His Xas Lais tej lus piav Mais Xes txoj cai. Tab sis Yes Xus kuj paub Phau Ntawv Ntshiab thiab. Ces Yes Xus tau teb rau cov Fas Lis Xais tias muaj ib zaug tus Vaj Das Vis, 2000 xyoo ua Yes Xus ntej, nws noj ib co ncuav mov txi rau Ntuj. Cov mov ntawv caiv.
Yes Xus thiaj hais rau cov Fas Lis Xais tias : nej xav txiav txim rau kuv cov thwj tim tsis caiv vim lawv de hnab nplej. Ua li nej puas yuav txiav txim rau peb tus Vaj Das Vis thiab ?
Ces Yes Xus hais li no ntxiv :
“Hnub Xas Npas Tos yog cia rau neeg”, yam li kev hlub neeg yog ib txog kev cai loj dua caiv ub caiv no hnub Xas Npas Tos. Kev pub mov noj rau tus neeg tshaib plab yog txoj cai loj dua caiv tej qhov me me hnub Xas Npas Tos.
Thiab Yes Xus tus hais txog Leej Neeg tus Tub. Leej Neeg tus Tub yog leej tub?. Leej Neeg tus Tub yog Yes Xus.
Li ntawd Yes Xus hais rau cov Fas Lis Xais tias Yes Xus yog hnub Xas Npas Tos tus tswv. Yam li Yes Xus yog tus tswv muaj cai txiav tias yuav caiv Hnub Xas Npas Tos zoo li cas.
Yes Xus hais lo lus ntawd mas tsis xis cov Fas Lis Xais lub siab. Vim Yes Xus rov muab nws piv rau Tswv Ntuj. Cov Fas Lis Xais xav tias tsuas yog Tswv Ntuj tib leeg thiaj yog hnub Xas Npas Tos tus tswv. Cov Fas Lis Xais xam tias Yes Xus txhaum loj kawg. Ces lawv ntxub Yes Xus.