Hnub tim 25 lub 6 hli tas los ntawd, yog hnub Vaj Qhia yuav tsum tawm tuaj qhia Ntuj kev cai, ces hnub ntawd Vaj Qhia Les Os 14 thiaj muab zaj ‘tus poj niam tsob ntshav thiab tsa Yais Los tus ntxhais sawv rov los’ (MK 5: 21-43) nthuav qhia rau sawv daws, kom pom tias lub siab ntseeg pab tau kom neeg yeej mob txiab nkeeg, kev ntshai, thiab kev tuag.

Xyoo 2025 no yog Xyoo Ntshiab, mas cov lus qhia Ntuj kev cai muaj zaj hau lus tias ‘Yes Xus Pleev yog peb chaw vam khom’ (Jesus Christ our Hope), ces cov lus thiaj yog hais txog Huab Tais Yes Xus lub neej. Hnub no yog hais txog Huab Tais Yes Xus kho mob (Healing); yog zaj 2 hais txog tus poj niam tsob ntshav thiab tsa Yais Los tus ntxhais sawv rov los.

Vaj Qhia pom tias niaj hnub no ntiaj teb muaj ib tug mob, yog ‘kev nkees ua neej’ (fatigue of living). Vaj Qhia muab peb kev nkees ua neej no piv rau tus poj niam tsob ntshav tau 12 xyoos thiab piv rau Yais Los tus ntxhais 12 xyoos tab tom yuav tuag.

Pom tias muaj neeg coob txiv Huab Tais Yes Xus thiab kov Huab Tais Yes Xus tab sis tsis muaj dab tsi tshwm sim rau lawv. Tsis zoo li tus poj niam tsob ntshav, nws ntseeg tias tab yog nws kov Huab Tais Yes Xus lub tw tsho xwb, mas nws yeej yuav dim ntawm tus mob. Nws ntseeg li ntawd, ces nws zoo hlo ntawm tus mob tsob ntshav.

Vaj Qhia Les Os 14 qiv Leej Ntshiab Aus Nkus lo lus los hais txog nqe lus no tias “Cov neeg sib txiv, tab sis lub siab ntseeg tau kov”, ces nws nthuav ntxiv tias “Txhua zaus peb rho peb lub siab ntseeg txog Huab Tais Yes Xus tawm los, mas peb yuav kov tau Huab Tais Yes Xus, ces Tswv Ntuj lub txiaj ntsim yuav tawm tuaj rau peb.”

Vaj Qhia tseem hais ntxiv tias ib zeej tsoom txiav txim rau tus poj niam tsob ntshav tias nws yog neeg tsis huv, nws raug lawv cais tawm hauv lub xeeb ceem mus; nws xav rov huv dua thiab sawv daws txais nws rov los nrog sawv daws koom zej koom zos. Nws ntseeg tias Huab Tais Yes Xus kho tau nws, mas nws lub siab loj tuaj, nws muaj cuab kav tawm los nrhiav Huab Tais Yes Xus, ces Huab Tais Yes Xus hais rau nws tias “Phauj, koj lub siab ntseeg cawm koj lawm” (MK 5: 34).

Hais txog Yais Los, nws yog tus piv txwv txog tus neeg muaj lub siab ntseeg ruaj, txawm tias lawv tuaj hais rau nws tias tus me nyuam tsis nyob lawm, tsis kav nws tseem tso siab rau Huab Tais Yes Xus, ces Huab Tais Yes Xus hais rau nws tias “Koj txhob ntshai, tsuav koj ntseeg xwb” (MK 5: 36).

Qhov no yog cov neeg ntseeg lub plawv; ntseeg thiab tso siab.

Huab Tais Yes Xus tsa tus me ntxhais sawv rov los, qhia peb tias Huab Tais Yes Xus tsis yog kho neeg tus mob cev xwb, nws tseem tsa neeg ciaj rov los thiab. Vim tias Tswv Ntuj yog tus muaj txoj sia mus li, lub cev kev tuag yog zoo li tsaug zog, kev tuag tiag mas yog tus ntsuj plig tuag (death of the soul). Qhov no yog qhov peb yuav tau ntshai.

Thaum Huab Tais Yes Xus tsa Yais Los tus ntxhais sawv rov los lawm, nws hais kom nrhiav dab tsi rau tus me ntxhais noj. Vaj Qhia pom tias nqe no muaj ib lub ntsiab tseem ceeb li no: Qhov no yog lub cim peb ntsia pom txog Huab Tais Yes Xus thiab ntiaj teb neeg qhov sib ze. Thiab qhov no tseem ua ib lo lus cia nug peb tias thaum peb cov me nyuam ntsib xwm txheej loj thiab vam txog cov txhiam xws yug sab ntsuj plig, mas peb puas yuav paub pub rau lawv. Peb yuav pub tau rau lawv li cas, yog tias peb tsis txais lub Moo Zoo los ua txhiam xws yug peb ua ntej tso.

Thaum hais cov lus qhia Ntuj kev cai tas, Vaj Qhia hais txog cov xwv txheej nyob hauv As Xias Nrab. Nyob Das Mas hauv Xis Lias teb, cov ntseeg npuab lub Koom Txoos Hes Las Os Thos Dos raug tua nyob hauv lub tsev teev Ntuj Mas Es Lias (Mar Elias), mas Vaj Qhia has tias lub Koom Txoos nrog nraim lawv. Nyob Kas Ntxas teb cov pej xeem ntsib kev tshaib plab, kev sib cov nyom ntawm cov His Xas Lais thiab Is Laas, mas Vaj Qhia txhawj xeeb txog lawv kev txom nyem, kev tsis thaj yeeb.