Tom qab ua lub Txoos Hwm Huab Tais Peb Leeg tas, Vaj Qhia Les Os 14 hais ib co lus ntuas cov tub ntxhais huam khaj (sport) tias kev huam khaj muaj peev xwm coj tau neeg rov los sib haum xeeb (reconciliation) thiab sib ntsib (encounter).

Hnub tim 15 lub 6 hli tas los no, Vaj Qhia Les Os 14 ua Tswv Cuab coj lub Txoos Teev Ntuj hwm Huab Tais Peb Leeg nyob hauv Leej Ntshiab Pob Zeb lub Tuam Tsev Teev Ntuj (St. Peter’s Basilica) rau cov tub ntxhais huam khaj ntau txhiab leej uas tuaj koom txi Ntuj ua ke.

Nyob hauv cov zaj nthuav Tswv Ntuj Lo Lus (homily) Vaj Qhia hais txog Huab Tais Peb Leeg thiab kev huam khaj tias zoo li yuav mus ua ke tsis tau. Txawm li ntawd los, Vaj Qhia kuj ntsia pom tias neeg cov hauj lwm zoo txhua tsav puav leej tsom txog qee yam hauv Tswv Ntuj qhov zoo nkauj tsis muaj nrim; kev huam khaj kuj yog ib yam tsom txog tej ntawd.

Tos hais li no, yeeb vim Vaj Qhia pom tias kev huam khaj pab tau kom peb ntsib Tswv Ntuj vim kev huam khaj ua kom peb fim nrog lwm tus neeg, tsis yog fim sab nraud xwb, tseem fim sab hauv thiab. Yog tsis muaj kev sib fim, mas kev huam khaj tsuas yuav yog kev sib tw qhuav qhawv ntawm neeg kev khav theeb xwb.

Vaj Qhia hais tias nyob hauv xeem lus Is Tas Lias, thaum lawv hais lo lus txhawb siab ntsws (cheer) mas lawv hais tias ‘Ntais’ (dai) txhais tias ‘pub rau’ (to give). Vaj Qhia xav kom txhua tus neeg muab siab xav txog qhov no. Kev huam khaj tsis yog hais txog kev yeej ntawm lub cev (physical achievement) xwb, kev huam khaj tseem nqua hu kom pub yus rau lwm tus thiab; tsis hais pub kom yus rov tau txhim kho yus, pub rau cov neeg pab txhawb nqa, pub rau cov neeg yus nyiam lawv, pub rau tus qhia yus, pub rau yus cov phooj ywg, pub rau ib zeej tsoom, thiab pub rau cov nrog yus sib tw.

Muaj ib zaug Leej Ntshiab Vaj Qhia Zam Paj Lug Ob tau hais tias “Kev huam khaj yog lub neej kev xyiv fab, kev huam khaj yog kev sib tw, kev huam khaj yog kev ua lub ntees lom zem. Yog li yuav tau txhawb kev huam khaj kom sawv tau ua qhov chaw tsim kev phooj ywg, kev sib tham thiab qhib dav rau txhua tus neeg.”

Tom qab hais cov lus li piav los tas, Vaj Qhia Les Os 14 tau muab ib lub tswv yim tias muaj 3 yam ua kom kev huam khaj yog ib txog kev zoo pab txhim kho neeg thiab cov ntseeg.

Yam ib, mas yog ‘kev twm zeej’ (solitude); yog lub hom thawj pom tseeb nyob hauv peb lub neej nyem no, vim tias niaj hnub no peb tsis hais tias ‘peb’ lawm, peb tsuas hais tias ‘kuv’ lawm xwb; yam li yus muab yus saib ua qhov tseem ceeb dua peb sawv daws yog tus tseem ceeb. Qhov no ua rau peb kev txhawj txog lwm tus tsawg tuaj. Tiam sis kev huam khaj tej zaus yuav yog txoj hau kev coj peb tawm hauv kev twm zeej tau, vim tias kev huam khaj qhia txog qab hau ntawm kev ua hauj lwm ua ke thiab sib faib hauj lwm. Li ntawd, kev huam khaj thiaj yog ib qhov tseem ceeb coj neeg sib haum xeeb thiab sib ntsib.

Yam ob, yog ‘lub neej nyob hauv cov twj txheej tshiab’ (digital society); yog lub neej niaj hnub no peb tab tom ntsib. Vaj Qhia hais tias kev huam khaj pab tiv cov twj tshiab zim txwv no (technology) uas ua rau neeg sib faib sib cais. Kev huam khaj pab rub neeg tawm hauv lub ntuj zem zuag (virtual world) los nyob rau lub ntuj tseeb, ces lawv tau txais tseem kev nyiam.

Thiab yam peb, yog ‘lub neej sib tw’ (competitive society); yog lub neej rau nqe rau tus neeg yeej thiaj yog tus muaj zog. Hos ntawm kev huam khaj mas qhia peb kom paub ua tus neeg swb, kev huam khaj yuam peb kom lees txais qhov tias peb yog ib tug neeg me, peb lub zog tsis loj, peb zoo tsis tas. Thaum peb lees tau tej no lawm, peb thiaj qhib siab rau nrhiav chaw vam khom

Vaj Qhia ntuas lawv tias tus neeg yeej; yog tus neeg thaum nws ntog lawm, nws muaj muaj peev xwm sawv taus ntseg.

Vaj Qhia hais txog Pob Zeb Fas Xas Tis (Pier Giorgio Frassati) tus tau txoj hmoov zoo uas lub Koom Txooos tab tom yuav tsa ua Leej Ntshiab pov hwm kev huam khaj rau lub 9 hli ntuj tom ntej no tias nws yog ib tug piv txwv qhia tias tsis muaj tus neeg twg yug los cia li ua tus yeej, tsis muaj tus neeg twg yug los cia li ua tus ntshiab. Tus tau txais kev yeej yog tus niaj hnub nquag xyaum.

Yog li mas Vaj Qhia Les Os 14 thiaj hais rau cov tub ntxhais huam khaj tuaj koom lub Txoos Teev Ntuj zaum no kom lawv tsom txog Huab Tais Peb Leeg kev nyiam nyob hauv lawv cov hauj lwm, qhov no tsis yog yuav ua qab hau rau lawv tab sis yog ua qab hau rau lawv cov kwv tij nkauj muam. Kawg no Vaj Qhia tseem ntuas lawv kom cev lawv rau niam Mab Liab ua tus saib xyuas lawv kom muaj ib hnub lawv tau txais kev yeej loj tshaj uas yog txoj sia nyob mus li los ua lawv paj tshab.