Xyoo 258 tus vaj Vas Les Lias Nus tsim txom cov neeg ntseeg txog Yes Xus thoob Los Mas thiab kom cov peeb zeej txeeb lub Koom Txoos tej cuab tam los ua tseem hwv tug.

Vaj Qhia Xis Tus tim 2 thiab 4 tug Tub Tshob Hwb raug ntes. Los Lees Ntxos yog ib tug Tub Tsob Hwb uas tsis tau raug ntes, nws quaj tu siab, Vaj Qhia thiaj nplij Los Lees Ntxos siab tias “Me nyuad, txhob quaj mog! Tshuav 3 hnub xwb, koj yuav raws kuv mus.”

Vaj Qhia Xis Tus tim 2 tuag tas, Los Lees Ntxos tau muab Vaj Qhia lub cuab tam muag los faib rau cov neeg pluag txom nyem.

Tus nom tswj Los Mas paub li ntawd, nws hu Los Lees Ntxos mus ntsib. Los Lees Ntxos thiab cov neeg pluag txom nyem tau kev pab ntawm lub Koom Txoos thiaj tuaj cuag tus nom. Los Lees Ntxos hais rau tus nom tias “Cov neeg no yog lub Koom Txoos lub cuab tam.”

Tus nom tswj Los Mas hnov li ntawd, nws npau taws, nws kom lawv coj Los Lees Ntxos mus txhiab hluav taws kom tuag.

Thaum Los Lees Ntxos raug txhiab hluav taws li ntawd, nws hais rau tus nom tias “Kuv sab no siav tas lawm, koj ntxeev kuv mas!”

Los Lees Ntxos hais li ntawd tas, nws tsa suab thov Tswv Ntuj tias “Huab Tais, thov kom tas tsoom neeg hauv tuam ceeb Los Mas no hloov siab tshiab los ntseeg txog koj Leej Tub Yes Xus Pleev, thov kom lub Moo Zoo ri mus thoob qab ntuj yuad!” Los Lees Ntxos thov li ntawd tas, nws txoj sia tu nrho.

Leej Ntshiab Los Lees Ntxos lub neej tau txhawb tsoom tub hluas kom lawv tig los ua lub Koom Txoos cov tub txib, los tsob hwb cov neeg pluag txom nyem. Li ntawd, Leej Ntshiab Los Lees Ntxos thiaj yog tus Leej Ntshiab pov hwm cov neeg pluag txom nyem thiab yog tus pov hwm tsoom Tsob Hwb.