Txij dej nyab ntiaj teb zaum ntawd los, neeg tau tuag ploj mus tas tsuas tshuav Nos Hes tus Tswv Ntuj tau npo xwb. Thaum dej qhuav tas lawm Nos Hes thiaj li tau tawm hauv lub nkoj los thiab tas txhia yam tsiaj uas Tswv Ntuj tau qee tseg kuj tau nrog Nos Hes tawm los thiab. Ces Nos Hes thiaj li tsa ib lub thaj txi ntuj. Nws muab cov tsiaj huv thiab cov noog huv coj los tua txi Tswv Ntuj. Tswv Ntuj thiaj hais tias “Kuv yuav tsis tsawm ntiaj teb neeg ib zaug ntxiv, vim tias neeg lub siab yeej phem thaum yau los. Kuv tsis rhuav tas txhia yam muaj txoj sia uas kuv nyuam qhuav ua los. Ntiaj teb nyob txog thaum twg mas yuav muaj caij tseb muaj caij sau qoob loo. Yuav muaj kub muaj txias, yuav muaj caij no caij sov muaj hnub muaj hmo mus li. (HP 8: 20-22)
Thaum Tswv Ntuj hais li ntawd tas nws thiaj tau cog lus tias “Nej huam vam mus tas lub ntiaj teb tas txhia yam cov tsiaj muaj txoj sia yuav ntshai nej, lawv yuav yog nej tug. Nej noj tau tas txhia yam txawj mus kev thiab muaj txoj sia. Kuv muab tej ntawd tib si los ua txhiam xws rau nej noj ib yam li kuv muab tej nroj tsuag rau nej huv si thiab. Tab sis nej tsis txhob noj nqaij ntxuag ntshav, vim ntshav yog nqaij tus plig, leej twg tua neeg mas nws yuav raug neeg tua nws, vim neeg yog Tswv Ntuj tus duab.”
Tswv Ntuj nrog txhia yam muaj txoj sia cog lus zoo li no, Tswv Ntuj thiaj tsa ib lub cim nrog ntiaj teb cog lus tias “Yuav tsis tso dej nyab ntiaj teb ntxiv.” Tswv Ntuj thiaj tsa tus zaj sawv saum cov huab. Yog lub cim tias nws nrog ntiaj teb cog lus.
Kwv tij sawv daws, thaum peb tau kawm hais txog Tswv Ntuj nrog neeg cog lus mas yog ib zag qhia rau peb tias Tswv Ntuj yog tus siab zoo thiab siab ncaj, nws txawj zam rau neeg, tsis hais leej twg. Thiab Tswv Ntuj tau cog lus tas txhia yam tias nws yuav tsis rhuav ntiaj teb, nws tsis tso dej nyab lawm. Nws tau pub tas txhia yam ua txhiam xws rau peb noj lawm. Mas peb zoo siab noj tas txhia yam uas Ntuj tau pub noj mas peb zoo siab noj. Cov lus nyob hauv ntawv hauj lwm hais tias thaum Pob Zeb tshaib plab xav noj mov, nws yees pom lub ntuj qhip thiab pom ib yam zoo li ib daig ntaub pua rooj dav dav nqes los rau ntiaj teb.
Daim ntaub ntawd plaub ceg kaum khi ua pob, nyob hauv daim ntaub ntawd muaj tas puas tsav yam tsiaj uas muaj plaub txhais tes taw, muaj tas puas tsav yam tsiaj nkag hauv av, thiab tas puas tsav yam noog ya saum ntuj. Ces muaj ib lub suab hais rau Pob Zeb tias “Koj muab los tua noj mas!” Tab sis Pob Zeb teb tias “Huab Tais, kuv tsis noj, los txog tav no kuv tseem tsis tau noj dua ib yam tsis huv los caiv.” Lub suab ntawd rov qab hais ntxiv tias “Tej yam Tswv Ntuj ua kom huv tuaj koj tsis txhob hais tsis huv.” (HL 10: 11-15)
Cov kwv tij sawv daws, peb txhob ua xyem xyas li tus Hauv Paus Xa Lus Pob Zeb uas Tswv Ntuj qhia nws noj, tab sis nws kuj ua xyem xyas thiab.
