Hnub tim 4 lub 6 hli, Vaj Qhia Les Os 14 rov tuaj qhia Ntuj kev cai nyob hauv lub lis piam dua. Hnub no Vaj Qhia ntuas sawv daws kom ras tau tias Tswv Ntuj nthuav tes tos txais peb los nyob hauv nws, txawm peb yuav qeeb siab npaum cas los Tswv Ntuj tsis nkees tos peb, thiab yog tias cov hluas tab tom nrhiav lub ntsiab hauv neeg txoj sia mas kom lawv tig ntsia Tswv Ntuj, lawv yuav pom.

Vaj Qhia hais li no “Tsis muaj ib zaug Tswv Ntuj tso peb pov tseg; Tswv Ntuj tos ntsoov peb thiab pub lub ntsiab thiab chaw vam khom rau peb lub neej, tab txawm tias lub caij peb tsis muaj chaw tso siab, los tsis muaj leej twg pom txog qhov zoo hauv peb.”

Vaj Qhia hais cov lus no nyob hauv hnub nws qhia Ntuj kev cai ntu hais txog ‘Huab Tais Yes Xus Pleev yog peb chaw vam khom nyob hauv lub Xyoo Ntshiab’.

Lub lis piam no, Vaj Qhia muab Huab Tais Yes Xus zaj paj lug tus tswv teb siab zoo hauv Mas Tais Ntawv Moo Zoo (MT 20: 1-16) coj los nthuav qhia sawv daws. Nyob hauv zaj no Huab Tais Yes Xus hais txog tus tswv teb muab tus nqe zog rau cov tub zog tuaj tom qab ib yam li cov xub tuaj ua ntej; yog Huab Tais Yes Xus xav qhia txog Tswv Ntuj lub siab hlub khuv leej neeg tsis muaj chaw xyeej.

Vaj Qhia hais txog cov tub zog xub tuaj ua ntej, lawv tu siab tias ua cas lawv tau tus nqe zog tib yam li cov tuaj tom qab, ces lawv ntsia tsis pom tus tswv teb qhov zoo. Tsis yog tus tswv teb siab tsis ncaj, tab sis yog tus tswv teb siab zoo siab dav (generous); tus tswv teb tsis saib neeg qhov kev ua zoo (merit) xwb, nws tseem saib neeg qhov cheem tsum (need) thiab.

Zaj paj lug no twv peb kom ua tib zoo xav txog tseem kev ncaj tias yog zoo li cas tiag.

Tus tswv teb txiv cawv yog Tswv Ntuj. Kev ncaj yog txhua tus neeg tau txais qhov cheem tsum pab lawv ua lub neej. Pom tias tus tswv teb tawm mus nrhiav thiab hu cov neeg tuaj ua hauj lwm hauv nws daim teb, nws tawm mus nrhiav thiab hu vim nws hwm lawv thiab xav them tus nqe zog raws li lawv lub meej mom.

Ib yam nkaus, Tswv Ntuj pub nws lub Ceeb Tsheej rau sawv daws, nrog rau ib txog sia puv npo, ib txog sia nyob mus li, thiab ib txog sia xyiv fab.

Huab Tais Yes Xus ua zoo li ntawd rau peb. Huab Tais Yes Xus tsis tau hais kom peb sawv ua ib leej tuaj zuj zus. Tab sis yog tus twg qhib siab rau Huab Tais Yes Xus, tus ntawd yuav tau txais txhua yam ntawm Huab Tais Yes Xus.

Raws li zaj paj lug no, mas Vaj Qhia lees tias cov neeg ntseeg lub zim txwv no lawv xav tias “Ua cas thiaj yuav pib ua hauj lwm tam sid? Yog tias tus ua ntej los tus ua qab sawv daws yuav tib rug nqe zog, ua cas yuav siv lub sij hawm ua hauj lwm ntau dua cov tuaj ua qab?” Leej Ntshiab Aus Nkus tau muab lus teb rau cov lus nug zoo li no tias “Yog koj twb paub meej txog tus nqe koj yuav tau txais tab sis hnub tom ntej mas koj tsis paub tseeb, es ua cas koj thiaj laug lub sij hawm rau tus tuaj hu koj? Ceev faj txhob cia koj plam lub cib fim tus hu koj cog lus yuav pub rau koj vim koj txoj kev laug caij laug nyoog.”

Ua ntej yuav xaus cov lus qhia hnub no, Vaj Qhia xav hais me ntsis lus rau cov hluas, yog cov lus tias “Txob tos ntev, kav tsij rau siab ntso teb Huab Tais lo lus hu nej kom mus ua hauj lwm hauv nws daim teb txiv cawv. Txhob ncua sij hawm, tab sis kav tsij sawv tsees vim Huab Tais yog tus siab zoo siab dav, ces nej yuav tsis tu siab.”

Kawg no Vaj Qhia xaus tias kev ua hauj lwm nyob hauv Tswv Ntuj lub vaj txiv cawv, mas peb yuav ntsib lo lus teb rau lo lus nug tias kuv txoj sia muaj lub ntsiab zoo li cas. Yog li mas peb txhob me siab. Txawm tias yog lub caij peb poob rau hauv qhov tsaus nti, los lub caij peb tsis pom muaj ib lo lus teb peb cov lus nug, peb thov Huab Tais Yes Xus tawm tuaj nrhiav kom ntsib peb, vim tias Huab Tais Yes Xus yog tus siab zoo siab dav, Huab Tais Yes Xus yuav los sai sai no.