Nyob hauv hnub tim 2 lub hli no, Vaj Qhia qhib Rooj Cob Qhia hais txog kev tshaj Ntuj Lus rau cov tsev neeg nyob hauv hnub no thiab tag kis (Evangelizing with Families of Today and Tomorrow), mas Vaj Qhia hu cov neeg ntseeg, tsis hais cov cog lus qee lub neej rau Tswv Ntuj (Clergy) los cov pej xeem ntseeg (Laity) kom lawv hloov ua tus puav ntsev rau lawv tsev neeg.

Lub zim txwv no ntiaj teb neeg muab siab rau nrhiav tej yam pab rau neeg lub neej sab ntsuj plig, mas lub Koom Txoos tsum ntsia kom dav thiab deb lawv thiaj pom ntiaj teb neeg kev sib tw hauv lub caij nyoog no thiab pom kev cob qhia txog kev vam txoj kev ntseeg nyob hauv cov txiv neej thiab cov poj niam lawv nruab siab.

Vaj Qhia hais ntau txog kev muab siab rau cov tsev neeg nyob deb lub Koom Txoos, ces lawv saib zoo li lub Koom Txoos tau cais lawv tawm, tab sis tob tob hauv lawv mas lawv vam ntsoov tias muaj ib hnub lawv yuav rov los npuam lub Koom Txoos. Vaj Qhia nug tias “Muaj peb tsawg leej tsis tau hnov Tswv Ntuj hu lawv?”

Vaj Qhia kuj txhawj xeeb txog kev nthuav txoj kev ntseeg lub ntsiab raws li nyias zaj tswv yim nyob hauv lub zim txwv no tias yuav ua chaw khuam rau coob leej kom txhob paub txog lub Koom Txoos qhov nplua nuj thiab lub Koom Txoos cov paj tshab. Tos Vaj Qhia hais zoo li, vim ntau zaus cov neeg tshawb nrhiav kev zoo siab thiab lub neej lub ntsiab, mas lawv cia siab rau tej yam yuam kev raws li tej xov xwm nyem no nyiam tso tawm. Hos lub Koom Txoos mas Leej Pleev hu los ua tus puav neeg xws li puav ntses, kom tau pab neeg ntiaj teb hauv cov dej phem thiab kev tuag.

Kev ntseeg yog thawj txoj kev teb Leej Pleev kev nyiam, thiab tim ntsej nrog tus neeg. Ntau zaus cov neeg ntseeg tsis nco txog qhov tseeb no, ces lawv cev txoj kev ntseeg txog Yes Xus zoo li yog ib tsab cai hais txog kev tsim txiaj, yog ib lub nra, thiab yog ib txog kab ke tsis ntxim nyiam.

Ntawm cov Tswv Qhia mas lawv thawj txoj kev teb yog pov lub puav ntses rau hauv dej ntuj thiab rhais ua tub puav ntses hauv lawv tsev neeg. Ntawm cov pej xeem ntseeg mas lawv kuj raug hu los koom txoj hauj lwm no thiab; lawv raug hu los ua tus puav ntses hauv lawv tus txij nkawm, hauv cov hluas, hauv cov txiv neej thiab cov poj niam, hauv txhua lub caij lub nyoog, kom sawv daws tau ntsib Huab Tais Yes Xus.

Yog li mas Vaj Qhia thiaj caw sawv daws tuaj koom txoj hauj lwm no nyob hauv lub Koom Txoos; yog nrhiav tus neeg tsis los cuag lub Koom Txoos, xyaum nrog lawv taug kev mus ua ke, thiab pab lawv kom tau los nyob hauv txoj kev ntseeg. 

Vaj Qhia kuj ntuas cov ntseeg kom qhib siab rau txais txoj hauv kev tshiab thiab txawv txoj qub ke ib txwm ua los.