Hnub tim 1 lub 6 hli tas los Vaj Qhia Les Os 14 ua tus tswv cuab coj lub Txoos Txi Ntuj xaus lub ntees ua hmoov rau tsev neeg, cov me nyuam, cov poj yawm, thiab cov laus (celebration for the Jubilee of Families, Children, Grandparents and the Elderly) nyob hauv Leej Ntshiab Pob Zeb lub tshav puam, muaj cov tsev neeg sawv cev ntawm 131 lub teb chaws tuaj koom lub Txoos. Vaj Qhia nthuav lub Moo Zoo zaj hais txog Huab Tais Yes Xus thov ntuj rau cov thwj tim nyob hauv hmo kawg. Huab Tais Yes Xus thov ntuj pab kom cov thwj tim ua ib tug. Qhov no Vaj Qhia pom tias yog qhov zoo loj tshaj uas peb xav tau. Qhov kom cov thwj tim ua ib tug mas yog kom lawv sib haum xeeb nyob hauv kev nyiam ib yam li Tswv Ntuj tsim txoj sia thiab xa kev cawm los rau lub qab ntuj. Yog li mas kev haum xeeb no thiaj yog thawj yam paj tshab Huab Tais Yes Xus coj tuaj.

Tswv Ntuj kev nyiam yog kev nyiam tsis muaj nrim tsis muaj kawg. Kev nyiam Tswv Ntuj muaj rau peb ib tug rau ib tug mas tsis tsawg dua kev nyiam Tswv Ntuj muaj rau nws Leej Tub Yes Xus.

Vaj Qhia Les Os 14 hais txog Vaj Qhia Fas Ntshis Kus lo lus ‘peb sawv daws yog me tub me ntxhais, tab sis tsis muaj ib tug neeg twg xaiv yug tau’ tias txij thaum peb tawm hauv niam plab los, peb tsum vam txog lwm tus pab peb kom muaj txoj sia nyob. Hais tau tias niaj hnub no peb tseem muaj txoj sia yeeb vim kev sib khaub zig. Yog kev sib khaub zig yam twj lij ntawm neeg lub siab hlub mos nyoos (human kindness) thiab neeg kev sib txhawb sib nres (mutual care).

Ntau zaus muaj tej tus neeg ntxeev siab rau tus neeg muaj lub siab hlub mos nyoos; yam li Huab Tais Yes Xus nyiam thiab hlub peb, tab sis peb nquag tso Huab Tais Yes Xus pov tseg. Txawm li nyawd, los Huab Tais Yes Xus tseem thov ntuj rau peb tsis tseg. Huab Tais Yes Xus cov lus thov ntuj ua rau peb tej swm txheej hauv txoj kev nyiam muaj qab hau tuaj.

Hnub no, cov tsev neeg sawv cev tuaj nyob ua ke hauv Leej Ntshiab Pob Zeb lub tshav puam, lawv yog cov yuav xa lo lus tias ‘peb ua ib tug’ nyob hauv peb tsev neeg, los peb chaw nyob, los peb chaw ua num, los hauv peb chaw kawm ntawv mus rau lub qab ntuj tau hnov. Txawm tias peb ib leeg txawv ib leeg, los peb puav leej koom ua ib tug tau. Tswv Ntuj hu peb sawv daws tsis hais nyob rau lub caij nyoog twg los lub sij hawm twg, kom peb los ua ib tug.

Niaj hnub no peb pom nyob tas qhov txhia chaw muaj kev sib cov nyom thiab kev sib cais ua pab ua pawg, tab sis yog peb sib nyiam nyob hauv Leej Pleev mas peb yuav rhais ua ib lub cim hais txog kev thaj yeeb tau rau qab ntuj neeg pom. Peb yuav xub pib hauv peb tsev neeg ua ntej, vim tias tsev neeg yog lub hauv paus chiv neeg lub neej lawm pem suab.

Nyob hauv kaum xyoo dhau los no, pom tias muaj ntau nkawm niam txiv lub Koom Txoos tsa lawv ua cov tau txoj hmoov zoo thiab ua Leej Ntshiab; yam li Lus Is thiab Xes Lis Mas Tis (Louis, Zélie Martin) uas yog Leej Ntshiab Tes Les Xas niam thiab txiv, tsev neeg Us Mas (Ulma family) nyob Pos Kas (Poland). Vaj Qhia kuj nqua hu sawv daws kom hwm cov lus cog hauv lub Cim Cog Lus vim tias cov lus txij nkawm sib cog tseg tias nkawd ob leeg yuav ua ib tug ntawd muaj zog ntxeev tau lub qab ntuj.

Vaj Qhia rov hais dua tias kev sib yuav yog tus pas ntsuas tus txiv neej thiab tus poj niam nkawd kev sib nyiam tias nkawd kev nyiam puas sib ntxiv (total), nkawd kev sib nyiam puas pheej xeeb (faithful), nkawd kev sib nyiam puas txi txiv (fruitful). Nkawd kev sib nyiam kuj yuav ua piv txwv rau cov me nyuam tau khaws yuav.

Hais txog ntawm cov me nyuam, Vaj Qhia ntuas kom lawv hwm niam hwm txiv, thiab niaj hnub ua niam txiv ib los tsaug rau qhov tias niam txiv tau pub txoj sia ua paj tshab rau cov me nyuam. Ntawm cov ua poj yawm thiab cov laus, mas Vaj Qhia muab ib txog hauj lwm rau lawv, kom lawv muab lawv kev thoob tsib, lawv lub siab hlub neeg, lawv kev tsis muab hlob, thiab lawv lub siab ntev los saib xyuas cov neeg lawv nyiam.

Vaj Qhia plov meej tias tsev neeg yog thaj tsam xa kev ntseeg ntawm ib phaj neeg mus rau ib phaj neeg, ib yam li cov neeg koom tsum lawv sib faib zaub mov thiab zoo li kev nyiam nyob hauv peb nruab siab. Li ntawd, tsev neeg thiaj yog qhov chaw peb ntsib Huab Tais Yes Xus.

Tom qab ntawd, Vaj Qhia nco txog cov tsev neeg raug txom nyem vim tsov rog nyob As Xias Nrab, Us Nkas Zis Nas, thiab txhua qhov chaw hauv lub ntiaj teb, mas Vaj Qhia thiaj thov ntuj li no tias “Thov Tswv Ntuj leej niam pab peb tshais ruam mus raws txoj kev thaj yeeb.”

Tom qab lub Txoos Txi Ntuj, Vaj Qhia Les Os 14 hais rau cov sawv cev tuaj ntawm cov teb chaws sawv daws tias tsev neeg yog lub Koom Txoos me uas txais thiab xa lub Moo Zoo mus. Vaj Qhia Les Os 14 hais ntxiv tias thaud Leej Ntshiab Vaj Qhia Zam Paj Lug Ob tau hais txog tsev neeg tias tsev neeg lub hauv paus yog kev nyiam xws li Tus Tswv Tsim (Creator) puag lub ntiaj teb nws tau tsim cia rau hauv nws xub pwg. Yog li mas thov kom kev ntseeg, kev tso siab, thiab kev nyiam nphau nphwv tuaj nyob hauv peb tsev neeg.

Vaj Qhia tau ua tsaug cov poj yawm thiab cov laus vim tias lawv yog tus qauv (model) hais txog kev ntseeg tseeb thiab lawv tseem ua kev txhawb siab (inspiration) rau cov phaum tom qab thiab.

Hais txog hnub hwm Yes Xus mus saum ntuj, mas Vaj Qhia hais tias yog hnub sawv daws ntsia ntsoov txog vim yog cov ntseeg lub hom phiaj thaum lawv tseem taug kev hla lub ntiaj teb no. Li ntawd, Vaj Qhia thiaj nco txog lub caij lub Koom Txoos tsa 15 tus phauj nyob hauv Leej Ntshiab Kas Tas Lis Nas lub haum xeeb nyob Pos Kas ua Tim Khawv nyob hauv Hnub Xyas tas los. Cov phauj no raug tua tuag xyoo 1945 thaum cov Tub Rog Liab (the Red Army) tuaj vij Pos Kas teb. Lub caij ntawd, cov Phauj tawm mus pab cov neeg mob thiab cov me nyuam ntsuag yam tsis ntshai tuag. Vaj Qhia thov kom cov phauj tuag ua Tim Khawv no pab thov ntuj rau cov poj niam muaj lub siab ntseeg nyob thoob ntiaj teb uas lawv tau qee lub neej rau Tswv Ntuj lub Ceeb Tsheej.