Thaum cov neeg fiv Ntuj (Pilgrim) thiab cov sawv cev (Representative) tuaj ntawm As Fis Kas tuaj; lawv tab tom ua Thaj Txi Ntuj (Mass) nyob hauv Leej Ntshiab Pob Zeb lub Tuam Tsev Teev Ntuj (St. Peter’s Basilica) mas Vaj Qhia Les Os 14 tuaj xyuas lawv thiab caw lawv kom ua ib lub cim vam khom rau lub qab ntuj neeg nyob hauv lawv lub neej ua neeg ntseeg.

Hnub tim 26 lub 5 hlis yav hnub qaij, cov tiam lis (Ambassadors) As Fis Kas thiab cov tuaj fiv Ntuj sib txoos ua Thaj Txi Ntuj ua ke nyob hauv Leej Ntshiab Pob Zeb lub Tuam Tsev Teev Ntuj. Nyob nyob Vaj Qhia Les Os 14 cia li tshwm plaws rau lawv pom, ua rau sawv daws yoob thiab zoo siab kawg. Vaj Qhia hais cov lus li no rau lawv tias Xyoo Ntshiab 2025 no txhawb peb sawv daws thiab caw peb sawv daws kom tig nrhiav chaw vam khom, tsis tas li, Xyoo Ntshiab 2025 no tseem yog lub cim vam khom thiab. Yog li mas thiaj yog yam tseem ceeb kawg kiag uas cov tau txais lub Cim Ntxuav yuav hnov tias Tswv Ntuj hu lawv los ua lub cim vam khom rau lub qab ntuj. Kev ntseeg ua kom cov ntseeg muaj zog, kev ntseeg ua kom peb pom Huab Tais Yes Xus Pleev qhov pom kev nyob hauv peb lub neej thiab to taub tias kev ua neej nyob hauv kev ntseeg tseem ceeb li cas, tsis yog nyob hauv Hnub Chiv, los cov hnub fiv Ntuj, tab sis yog nyob hauv txhua txhua hnub.

Kev ntseeg ua kom chaw vam khom uas yog Huab Tais Yes Xus tib tug xwb pub rau peb puv npo tuaj. Vaj Qhia Les Os hais li. Li ntawd, Vaj Qhia tso siab tias sawv daws yuav taug txoj kev no mus ua ke yam li ib cuab kwv tij kom tau cav txog peb tus Tswv Ntuj, sawv daws ras tau tias txhua yam peb muaj thiab txhua yam yog peb tug ntawd yog ib lub paj tshab Tswv Ntuj pub rau peb kom tau coj mus pab lwm tus neeg.

Vaj Qhia kuj tau tsaug cov tiam lis thiab cov tuaj fiv Ntuj sawv daws uas lawv tseem ua neej mus raws txoj kev ntseeg txog Huab Tais Yes Xus Pleev.

Ua ntej yuav ncaim ntawm sawv daws, Vaj Qhia Les Os 14 caw lawv nrog nws thov Ntuj li no “Huab Tais Yes Xus, peb ua koj tsaug, thov kom koj lub npe nto moo mus li.”