Tus pog Xis Mas yug xyoo 1915 nyob Aus Rias teb. Nws yog ib tus ntseeg txog Yes Xus nyob hauv lub Koom Txoos Kav Tos Liv. Nws nyiam thov Ntuj rau cov ntsuj plig nyob hauv teb chaws them txim, ces thaum muaj 25 xyoos, nws thiaj pom cov ntsuj plig hauv teb chaws them txim los hais kom nws pab thov Ntuj rau lawv.

Xis Mas hais tias nws pib pom cov ntsuj plig los nrhiav nws, mas yog nyob hauv xyoo 1940. Nws hais tias “Muaj ib hmos kuv pom ib tug txiv neej mus mus los los hauv kuv chav pw, ces kuv thiaj ua ib siab hu tias ‘koj nkag los hauv no tau li cas?’ Tab sis tus txiv neej ntawd tsis teb kuv, nws ua zoo li nws tsis hnov kuv lub suab. Kuv rov hais tias ‘koj los ua dab tsi hauv no?’ Nws kuj tsis teb dab tsi thiab, ces kuv thiaj ua siab loj tib plhaw mus ntsiab tus txiv neej ntawd txhais tes kom nws khiav tsis tau. Tab sis ua cas kuv tuav tsis tau nws, nws tseem mus mus los los li qub. Kuv rov qab nthos dua ib zaug tab sis tsis tau dab tsi li. Tus txiv neej ntawd yaj ntshis mus.”

Xis Mas thiaj li piav tej xwm ntawd rau tus Txiv Plig mloog. Txiv Plig hais tias yog Xis Mas rov pom dua, mas nws ua tib zoo nug saib tus los rau nws pom ntawd xav tau dab tsi.

 Hmo tom qab, Xis Mas rov pom dua, ces nws ua raws li tus Txiv Plig qhia. Tus ntsuj plig ntawd hais rau Xis Mas tias “Koj pab thov Txiv Plig thov Ntuj rau kuv 3 zaug, ces kuv thiaj yuav dim hauv cov hluav taws!”

Xis Mas piav ntxiv tias txij hnub ntawd los, nws nquag pom cov ntsuj plig los thov nws tas zog li ntawd, tshwj xeeb mas yog lub 11 hlis. Cov ntsuj plig ntawd, feem ntau lawv hais kom Xis Mas pab thov Txiv Plig ua Thaj Txi Ntuj pub rau lawv, ib txhia kuj thov kom pab hais saw Mab Liab rau lawv thiab taug Yes Xus txoj kev txom nyem 14 theem.

Xis Mas hais ntxiv tias tab txawm cov ntsuj plig ntawd raug txom nyem nyob hauv teb chaws them txim, tsis kav lawv muaj kev xyiv fab thiab kev tso siab tias lawv tab tom yuav tau mus nrog Tswv Ntuj nyob mus li. Nyob ntawd, muaj ib lub caij niam Mab Liab yuav nqes los nplij lawv kom ua siab loj, thiab qhia txog lawv tej hauj lwm tsim koob hmoov uas lawv tau ua thaum lawv muaj txoj sia nyob. Lub caij niam Mab Liab los nplij lawv yog hnub Yes Xus Yug, hnub hwm tsoom Leej Ntshiab, Hnub Rau Ntshiab, hnub Mab Liab nce mus saum Ntuj, thiab hnub Yes Xus mus saum Ntuj.

Hais txog cov mus nyob hauv teb chaws them txim, mas thaum lawv tseem muaj txoj sia lawv tau ua tej yam txhaum tsis haum rau kev sib pab sib txhawb (charity) los txoj kev sib nyiam sib hlub (love), lawv tau ua siab ntxhib siab txhav (hardness of heart), ua neej nyob tsis sib haum nrog luag tej (hostility), hais lus xaiv (slandering), xyav luag moo (calumny).

Xis Mas piav tias nws pom ib tug poj niam rho me nyuam pov tseg, thiab ib tug txiv neej yog neeg ntseeg Ntuj zoo hauj sim, nkawd nyob hauv teb chaws them txim. Tab sis tsis ntev ces tus poj niam tau mus hauv Tswv Ntuj lub Ceeb Tsheej lawm, ntawm tus txiv neej mas tseem nyob hauv cov hluav taws. Nws pom li ntawd mas nws xav tias ntshai yog nws pom yuam kev lawm tiag. Tab sis tom qab nws soj ntsuam txog nkawd lub neej thaum tseem ua neej nyob, ces nws mam paub tias thaum nkawd ua neej nyob mas tus poj niam tau tu siab rau nws kev txhaum thiab nws ua neeg tsis muab hlob; ntawm tus txiv neej mas nws yeej yog ib tug neeg ntseeg Ntuj zoo tiag, tab sis nws muaj ib tug cwj pwm thuam (criticize) sawv daws; nws nquag yws (complaining) thiab hais lus tsis zoo txog lwm tus. Thaum nws paub li ntawd ces nws thiaj mam li to taub tias ua cas tus txiv neej thiaj ntxuav nws cov txhaum tag qeeb dua tus poj niam.

Xis Mas hais txog cov txim txhaum tsis haum rau kev sib pab tias yog lawv tsis lees txais cov neeg lawv tsis nyiam (like), lawv tsis kam tsim kev thaj yeeb (peace) nrog lwm tus, lawv tsis kam zam (forgive) rau lwm tus, thiab yog lawv rov tsim kev iab siab (bitterness) rau hauv lawv.

Hais txog tus yuav tsis poob rau teb chaws them txim, mas Xis Mas hais li no:

Yog tus nyiam sawv daws, nws ua siab zoo rau luag, nws nquag pab cov ntsuj plig nyob hauv teb chaws them txim, nws ua neeg me tsis muab hlob (humility).

Nyob hauv Ntawv Moo Zoo, Huab Tais Yes Xus hais rau tus tub sab raug dai nyob ntawm nws ib sab tias hnub no nws tau nrog Huab Tais Yes Xus nyob saum Tswv Ntuj lub Ceeb Tsheej lawm. Tos Huab Tais Yes Xus hais zoo li ntawd, vim tias tus tub sab no nws zoo siab txais nws txoj kev txom nyem yam tsis xyeej, nws hwm Ntuj thiab nws ua neeg me, mas nws thiaj li hais tias ‘kuv lub txim yog txoj kev ncaj vim kuv tau ua tej yam tsim nyog raug txim’, thiab tseem ntuas lwm tus kom txaus siab txais nws lub txim.

Xis Mas piav txog ib tug tub hluas tuag vim nws tawm mus pab cov neeg raug daus nphau los txhub. Tus tub hluas no yog ib tus neeg tsis tsim txiaj, tab sis hmo ntawd nws hnov cov suab hu kom pab, mas nws cia li tawm mus pab cov raug daus txhub. Nws tuag, nws mus rau teb chaws them txim, ces nws los hais kom Xis Mas pab hais tus Txiv Plig ua 3 thaj txi Ntuj rau nws, mas nws yuav dim hauv teb chaws them txim. Tos tus hluas tsis tsim txiaj tau txais kev cawm, vim nws muaj lub siab hlub cov raug xwv txheej, nws yeem siv nws txoj sia mus pab lawv, ces Tswv Ntuj thiaj txais nws mus nyob hauv Tswv Ntuj lub Ceeb Tsheej sai. Qhov no qhia tau tias kev nyiam thiab hlub lwm tus pab ntxuav neeg cov txhaum.

Tswv Ntuj yog tus khuv leej neeg, Tswv Ntuj tau muab ib lub sij hawm rau tus hluas tsis tsim txiaj no tau ua cov hauj lwm pab lwm tus. Yog tias tus hluas no tsis kam mloog Tswv Ntuj, mas tej zaum nws yuav tsis tuag, tab sis ntshai nws yuav ua neeg phem mus tas nws sid. Nws mloog Tswv Ntuj lub suab, nws yeem muab tas nws txoj sia los ua cov hauj lwm xis Tswv Ntuj siab, mas nws thiaj li tau mus nrog Tswv Ntuj nyob.

Tseem muaj ib tus poj niam thaum nws txoj sia yuav tu, nws tsis yws tsis tu siab rau Tswv Ntuj, nws tsuas hais tias ‘Tswv Ntuj, kuv zoo siab txais txoj kev tuag no raws li koj tau pub rau kuv. Kuv thov cev kuv txoj sia no rau hauv koj txhais tes, kuv thov cev kuv 4 tug me nyuam ntsuag nos rau koj ua tus coj lawv kev, kuv paub zoo tias koj yuav pov hwm lawv.’ Tus poj niam no tso siab tag nrho rau Tswv Ntuj, ces nws tus ntsuj plig cia li ncaj hlo mus cuam Ntuj Ceeb Tsheej lawm, nws tsis raug them txim. Li ntawd, hais tau tias ‘kev nyiam’, ‘kev ua neeg me’, ‘kev yeem ua xis Tswv Ntuj siab’ yog tus yawm sij los yog txoj kev lug coj mus cuag Ntuj Ceeb Tsheej tau.

Xis Mas hais tias yam muaj zog tshaj plaws pab tau cov nyob hauv teb chaws them txim mas yog Thaj Txi Ntuj (Mass). Vim Huab Tais Yes Xus yeem muab nws ua yaj txi rau Tswv Ntuj kom tau txhiv tib neeg. Peb pom Leej Choj ua tus cev cov txim txi Ntuj, tab sis tus txi Ntuj mas yog Huab Tais Yes Xus. Lub Thaj Txi Ntuj pub rau cov tuag yuav muaj txiaj ntsim rau lawv yog tias thaum lawv tseem ua neej nyob, lawv kub siab thiab muab siab tiag tuaj koom lub txoos ua Thaj Txi Ntuj thiab lawv cev lawv cov lus teev Ntuj tawm hauv lawv nruab siab tuaj. Tus twg nquag mus koom lub txoos ua Thaj Txi Ntuj, tus ntawd yuav tau txais Ntuj txiaj ntsim ntau.

Cov tuag tus ntsuj plig, lawv yuav pom tias hnub lawv tso ntiaj teb tseg lawm, leej twg kub siab thov Ntuj rau lawv thiab leej twg lam mus koom lawv lub ntees xwb. Neeg lub kua muag tsis muaj txiaj ntsim dab tsi rau lawv, tsuas yog neeg lo lus teev Ntuj xwb thiaj yuav pab tau lawv.

Dhau ntawm kev thov Txiv Plig ua Thaj Txi Ntuj rau cov tuag lawm, tseem muaj lwm yam hauj lwm pab cov ntsuj plig nyob hauv teb chaws them txim tau; yog koom Huab Tais Yes Xus kev txom nyem, ua hauj lwm them txim txhaum, ua hauj lwm tsim koob hmoov.

Xis Mas hais tias kev raug txom nyem nyob yaj ceeb tsis zoo li yeeb ceeb. Nyob saum ntiaj teb peb yeem ntsib kev txom nyem vim txoj kev nyiam, mas peb yuav tau koob hmoov, peb xaiv tau tias yuav yeem los tsis yeem, tab sis nyob hauv teb chaws them txim yuav tsis zoo li ntawd. Peb raug txom nyem hauv teb chaws them txim yog kom cov hluav taws tau hlawv tau ntxuav peb tej txhaum, kom peb tus ntsuj plig huv, kom peb yog cov tseem kub, peb tsis kam tsis tau.

Yog peb ua tiag uv ua tiag nyiaj ris tej kev txom nyem me me tuaj nphav tuaj raug peb, yog peb zoo siab hlo txais cov xwv txheej txom nyem no, mas yuav muaj txiaj ntsim pab cawm tau lwm tus. Yam zoo tshaj mas yog peb cev peb tej kev txom nyem no los koom nrog Huab Tais Yes Xus kev txom nyem, peb thov cev cov koob hmoov hauv peb kev txom nyem rau hauv niam Mab Liab txhais tes, kom niam Mab Liab pab coj mus pub rau lwm tus. Vim peb tsis paub tias muaj puas tsawg tus neeg nyob ib puag ncig peb, lawv vam txog peb cov txiaj ntsim. Peb txhob xav tias peb cov txiaj ntsim yuav tas dawb, muaj ib hnub mas niam Mab Liab yuav rov qab pub rau peb, yog hnub peb txoj sia tab tom yuav tu. Peb kev txom nyem hauv ntiaj teb no, yog lub cuab tam muaj nuj nqis nyob rau lub ntuj tom ntej. Li ntawd, peb yuav sib ntuas thiab sib txhawb siab thaum peb muaj ib tug neeg twg raug kev txom nyem.

Kev taug Huab Tais Yes Xus txoj kev txom nyem 14 theem yuav pab tau cov tuag tus ntsuj nplig nyob hauv teb chaws them txim. Vim tias thaum peb ua kab ke taug ib theem zuj zus, mas peb yuav nco txog Huab Tais Yes Xus tab tom ntsib kev txom nyem, ces peb lub siab yuav maj mam ntxub peb tej txhaum, peb lub siab nqhis txog txoj kev cawm. Thaum peb muaj ib lub siab tu siab rau kev txhaum, mas yog ib lub txiaj ntsim ntws mus txog cov ntsuj plig hauv teb chaws them txim.

Kev hais saw Mab Liab 15 zaj pub rau cov tuag kuj yuav pab tau cov ntsuj plig hauv teb chaws them txim.

Cov ntsuj plig hauv teb chaws them txim, lawv tsis muaj peev xwm rov pab lawv tau, lawv lub sij hawm tas lawm. Yog peb cov tseem muaj sia nyob tsis thov Ntuj pub rau lawv, lawv yuav raug tso pov tseg nyob hauv teb chaws them txim mus kom txog hnub ntiaj teb kawg.

Ua cas peb nyob hauv teb chaws them txim, yuav tsim koob hmoov tsis tau?

Vim tias thaum neeg tuag, mas neeg lub sij hawm Tswv Ntuj pub rau neeg tsim koob hmoov tas lawm. Tsuas yog thaum muaj txoj sia xwb thiaj yog lub sij hawm rau peb tsim koob hmoov. Tsuas yog thaum muaj txoj sia nyob, peb thiaj yuav txhim kho peb tej yam phem peb tau ua dhau los tau xwb. Cov ntsuj plig hauv teb chaws them txim thiab cov Tshiab mas lawv tsis muaj lub cib fim zoo cuag no lawm.

Peb yuav zoo siab txais txoj kev txom nyem los ris, vim kev txom nyem yog peb tus ntoo cuam, yog tus ntoo cuam muaj Tswv Ntuj txoj kev nyiam thiab yog tus ntoo cuam hais tias peb nyiam Tswv Ntuj tiag, yog peb cev tus ntoo cuam no pub rau Tswv Ntuj, mas nws yuav pab cov tuag tau ntau. Peb yuav tsum cev txhua yam rau niam Mab Liab, mas peb thiaj li zoo siab txais tus ntoo cuam los ris yam yog lub paj tshab tsis yog kev rau txim. Peb txhob saib tias kev txom nyem yog kev rau txim. Peb saib tias kev txom nyem yuav pab tau lwm tus tsis yog peb xwb, ces peb yuav txais tau kev txom nyem ntawd. Huab Tais Yes Xus yog tus tsis muaj txhaum, tsis kav nws twb yeem ris kev txom nyem hnyav tshaj plaws kom tau txhiv peb hauv peb cov txhaum.

Xis Mas hais txog kev tu siab los yog yuav siab tshiab thaum txoj sia yuav tu tias yog yam tseem ceeb tshaj. Tswv Ntuj yuav zam neeg cov txhaum, tab sis kev txhaum lub txiv tseem nyob. Thaum peb yuav tuag, yog peb tu siab rau peb cov txhaum mas Tswv Ntuj yuav zam rau peb, tab sis tseem tshuav kev txhaum lub txiv. Yog tus neeg twg xav kom hnub nws tuag, nws tus ntsuj plig cia li ncaj hlo mus Ntuj Ceeb Tsheej xwb, mas tus neeg ntawd tus ntsuj plig yuav tsum ntshiab huv tiag tiag, tsis lo ib tee txhaum li. Yam li ib tug poj niam ua neeg tsis tsheej haj, thaum nws tab tom yuav tuag, nws tu siab rau nws lub neej tsis tsheej haj ntawd, nws hais rau Tswv Ntuj tias ‘Huab Tais Tswv Ntuj, koj los coj kuv txoj sia mus, mas koj ua yog lawm, rau qhov tias tsuas yog koj ua li no rau kuv xwb, mas kuv thiaj yuav tsis muaj peev xwm ua txhaum rau koj ntxiv.’ Nws lo lus tu siab no ntxuav nws cov txhaum tas nrho, ces nws dim hauv dab phem teb chaws.

Thaum neeg txoj sia yuav tu, Tswv Ntuj pub ib lub sij hawm ntev ob peb fiab rau neeg tau xaiv saib puas yuav tu siab rau neeg tej txhaum, puas yuav kam txais Tswv Ntuj lub txiaj ntsim. Thaum ntawd neeg yuav rov ntsia pom neeg lub neej yav tas los ib ntsais muag. Lawv yuav pom lawv lub neej thiab qhov txom nyem uas lawv yuav tsum tau txais. Thaum ntawd, dab phem kuj yuav tawm tuaj ntxias neeg kom txhob tu siab rau lawv cov txhaum. Yog neeg tsis quav ntsej txog dab phem kev ntxias mas dab phem yuav ntxias tsis tau neeg tus ntsuj plig. Li ntawd, thaum ib tus neeg yuav tuag, nws yuav tsum npaj tus kheej, cov muaj sia nyob los kuj ib yam.

Peb yuav cev peb tus kheej rau Tswv Ntuj, peb yuav cev peb tej kev mob kev txom nyem rau Tswv Ntuj, peb yuav tso siab rau Tswv Ntuj. Peb yuav nquag thov Ntuj pub rau tus yuav tuag, peb yuav npaj tus yuav tuag lub siab kom nws txaus siab txais txoj kev tuag, peb yuav tsis zais rau nws.

Hais txog lwm txoj kev teev hawm, lawv puas tau mus nyob hauv teb chaws them txim xws li cov ntseeg txog Yes Xus?

Xis Mas hais tias raws li nws pom mas muaj, lawv cov ntawd thaum ua neej nyob mas lawv ua neej raws nraim lawv txoj kev teev hawm, tiam sis tus twg ntseeg txog Yes Xus mas tus ntawd yuav tau kev mus saum Ntuj sai dua.

Nws tseem hais tias muaj cov neeg ua Tswv Ntuj txoj hauj lwm coob kawg nyob hauv teb chaws them txim, vim lawv tsis qhuab qhia kom cov neeg ntseeg tso siab rau lub Cim Yug, lawv ua rau tsoom neeg txoj kev ntseeg tsuag thiab tsis muaj zog. Ib co tub tshaj Ntuj Lus lawv mus nyob hauv teb chaws them txim kuj yog vim lawv tsis kub siab teev Ntuj. Tab sis muaj coob leej lawv tau mus saum Ntuj tom qab lawv tuag.”

Hais txog cov tuag thaum tseem yau mas lawv mus them txim tsis ntev thiab lawv raug txim tsis hnyav pes tsawg vim lawv tsis tau paub zoo tias yam twg yog kev txhaum thiab yam twg yog qhov zoo.

Hais txog cov ua plees los yog txhaum rau txoj kev zes luag txij nkawm, mas lawv tsis tau poob kiag mus rau dab phem teb, tab sis lawv yuav tsum raug txom nyem loj tso. Yog li thaum tus neeg twg nws paub tias nyob hauv nws tab tom xeeb ib lub tswv yim li ntawd, mas nws yuav nquag thov Ntuj pab kom nws muaj zog txaus tawm tsam dab phem kev ntxias thiab yuav thov tus Tuam Tshiab Miv Kas Es pab vim nws yog tus ntau thawj tawm tsam dab phem.

Yog thaum peb tus ntsuj plig hais tias peb tsis xav rov mus cuag Tswv Ntuj, los yog thaum peb tsis lees paub Tswv Ntuj, mas thaum ntawd peb yuav poob mus rau dab phem teb. Kev muab hlob kuj coj peb tus ntsuj plig mus hauv dab phem teb.

Dab phem teb yog thaj chaw thaum peb hais tias “Kuv tsis lees paub Tswv Ntuj.”