HNUB PLAUB LUB LIS PIAM 10 CAIJ NYOB NRUAB XYOO
17Yes Xus hais rau tsoom sid tias “Nej txhob xav tias kuv tuaj rhuav txoj cai los cov yaj saub. Kuv tsis tuaj rhuav, tab sis kuv tuaj qhia ntxiv kom thoob. 18Ua li kuv hais rau nej; lub ntuj lub teb yuav dua, tab sis tsis muaj ib tug txwm ntawv, los ib lub cim ntawv me me hauv txoj cai yuav ploj mus txog hnub ib puas tsav yam nyob hauv txoj cai yuav tsum tshwm sim tuaj tso. 19Tus twg hla ib qho me me hauv txoj cai, thiab nws qhia kom luag ua xws li nws, mas tus ntawd yuav yog tus qis tshaj cov nyob hauv Ntuj lub Ceeb Tsheej; hos tus ua raws txoj cai tas huv si, thiab nws qhia kom luag ua xws li nws, tus ntawd yuav yog tus loj nyob hauv Ntuj lub Ceeb Tsheej.”
‘Txoj Cai’ (The Law) Huab Tais Yes Xus hais txog mas yog Mais Xes txoj cai thiab cov Yaj Saub lus qhia. Cov kws ntawv thiab cov Fas Lis Xais muab Huab Tais Ntuj 10 Lo Lus los twm ces lawv ntxiv ntau yam rau mas thiaj ua ib lub nras rau tsoom pej xeem. Piv li lo lus tias ‘koj yuav caiv Tswv Ntuj hnub’, mas lawv hais tias Tswv Ntuj hnub mas cov Yus Das yuav tsis txhob ua hauj lwm, yog li hauj lwm yog dab tsi; ces lawv tias hauj lwm yog txhua yam neeg ua. Yog li yam hauj lwm twg ua tau thiab yam teg ua tsis tau. Lawv ntxiv tej yam me me li no rau hauv lo lus.
Cov kws ntawv thiab cov Fas Lis Xais ua li ntawd vim lawv xav nrhiav ua xis Tswv Ntuj siab, tab sis lawv tsis nco pom tias lub ntsiab hauv Huab Tais Ntuj 10 Lo Lus yog kom sawv daws ‘saib taus’ (Feverence) thiab paub ‘hwm’ (Respect). Koj yuav hwm Tswv Ntuj, hwm Tswv Ntuj lub npe, hwm Tswv Ntuj hnub, hwm koj niam koj txiv, hwm luag lwm tus, thiab koj yuav rov hwm koj.
Thaum Huab Tais Yes Xus hais tias “Kuv tsis tuaj rhuav, tab sis kuv tuaj qhia ntxiv kom thoob”, mas yog Huab Tais Yes Xus xav qhia tias txawm cov Yus Das yuav ntxiv dab tsi rau lo lust sis kav lawv yuav tau cim ntsoov tias lawv yuav tsum saib taus thiab sib hwm.
Huab Tais Yes Xus hais tias ‘ua li kuv hais rau nej’ mas Mas Tais sau tias ‘As Mees, kuv hais tias’ (Amen, I tell you). Lo lus ‘Amen’ muaj 2 lub ntsiab yog; pom zoo thiab muaj li ntawd tiag, ces peb muab ntxeev ua lus Hmoob tias ‘Ua li’.
Huab Tais Yes Xus hais tias tus twg xav ua tus loj nyob hauv Ntuj lub Ceeb Tsheej mas nws yuav ua 2 yam no; ua raws txoj cai thiab qhia txoj cai rau luag tej paub. Yog peb ua raws txoj cai tab sis tsis qhia lwm tus kom ua raws, mas kuj tsis txaus. Yog peb qhia luag tej paub txoj cai tab sis peb tsis ua raws txoj cai, mas peb yog tus neeg zoo sab nraud xws li cov Fas Lis Xais.
