UA KOM LUAG TEJ CAV LUS TXOG TSWV NTUJ (MT 5 : 13-16)

HNUB CHIV LUB LIS PIAM 5 CAIJ NYOB NRUAB XYOO/ HNUB PEB LUB LIS PIAM 10 CAIJ NYOB NRUAB XYOO

¹³Yes Xus hais rau cov thwj tim tias “Nej yog cov ntsev las lub ntiaj teb; tab sis yog ntsev tsuag lawm, yuav muab dab tsi ua kom ntsev rov qab daw tuaj? Ntsev tsuag tsis zoo ua dab tsi, tsuas kawg muab pov tseg nraum zoov rau neeg tsuj xwb. ¹⁴Nej yog lub teeb ci rau lub ntiaj teb. Ib lub nroog txhim rau saum ib lub ncov roob, yuav muab zais tsis tau. ¹⁵ Luag kuj tsis taws teeb coj mus zais rau hauv qab txee, tab sis luag muab txawb saum tus ncej teeb, lub teeb ci rau tas cov neeg nyob hauv tsev pom kev. ¹⁶Li ntawd, nej lub teeb yuav tsum ci nyob ntawm zeej tsoom xub ntiag, kom lawv pom nej cov dej num zoo, ces lawv yuav cav txog nej Txiv nyob saum ntuj.”

Ntsev zoo ua ob yam no: ntsev ua kom nqaij tsis txhob lwj, ntsev ua kom txhiam xws qab tuaj.
Huab Tais Yes Xus hais rau nws cov thwj tim tias “Nej yog cov ntsev las lub ntiaj teb” yuav txhais tias “Nej tus yam ntxwv zoo nyob hauv zos ntxaum tas zej zog, ces zej zog thiaj muaj sia ntev nyiaj ntau xyoo. Nej tus yam ntxwv ua kom lub zos nej nyob qab tuaj, zoo tuaj, txawj sib hlub sib pab. Thiab lub Moo Zoo uas nej tshaj ua kom lub tsev nej nyob zoo tauj, lub zos nej nyob qab tuaj, vim cov neeg nrog nej nyob txais lub Moo Zoo uas nej qhia rau lawv; lawv tsim txiaj tuaj, lawv thoob tsib tuaj; lawv paub Yes Xus tus lwj lwm. Cov neeg nyob ib ncig natwm nej paub Tswv Ntuj lub siab zuj zus. Nej yog zoo li ib co ntsev las ntiaj teb tiag; nej las nej tsev neeg, las nej cov phooj ywg, las nej lub zos. Thaum coob leej nyob hauv lub teb chaws ua Yes Xus cov thwj tim mas lawv yog zoo li cov ntsev las tas lub teb chaws uas lawv nyob.”
Huab Tais Yes Xus hais rau koj tias koj yog ntsev las ntiaj teb; koj muab siab rau mloog Huab Tais Yes Xus cov lus, koj thiaj yog ib co ntsev qab, koj ua kom cov neeg nrog koj nyob zoo tuaj. Yog koj tsis kub siab txais Huab Tais Yes Xus cov lus, koj lub siab txias zuj zus, koj txia ua ib co ntsev tsis qab, tsuas zoo muab pov tseg rau cov neeg tsuj xwb.
Vim li cas Huab Tais Yes Xus hais tias nej yog lub teeb ci rau lub ntiaj teb? Yog vim Huab Tais Yes Xus cov thwj tim muaj ib lub tswv yim paub Tswv Ntuj, paub tus yam ntxwv xis Tswv Ntuj siab, paub meej tias lub neej nyob ntiaj teb no yog lub sij hawm xyaum mus cuag Tswv Ntuj, paub tias thaum tas sim neej nyob ntiaj teb no tus ntsuj plig mus pom Tswv Ntuj, muaj Tswv Ntuj ci ntsa iab ib txhiab ib txhis mus li.
Yog koj ntseeg Huab Tais Yes Xus cov lus thiab txais nws cov lus khaws tseg hauv koj nruab siab mas koj lub neej kaj kom pom kev. Luag ntsia koj mas lawv xav muaj lub siab kaj li koj lub. Koj yog lub teeb kaj lawv kom lawv nrog koj xav paub Tswv Ntuj.
Yog tias cov nyiam Huab Tais Yes Xus coob leej nyiam nyob ua ke mas lawv yog Huab Tais Yes Xus cov hwj im; lawv yog cov teeb ua kom teb chaws pom kev. Lawv yog zoo li lub nroog nyob saum lub ncov roob, hmo ntuj lawv cov teeb ci ci. Cov pab neeg ntseeg, yog lawv mloog Huab Tais Yes Xus tiag mas lawv yog zoo li lub nroog pom kev hmo ntuj; cov neeg nyob ib ncig xav pom, xav paub.
Peb yog Huab Tais Yes Xus cov thwj tim, peb yuav tsum yog ib co thwj tim tseem ceeb. Peb twb txais qhov pom kev ntawm Huab Tais Yes Xus los kaj siab thiab tswv yim mas peb yuav tsis txhob muab Huab Tais Yes Xus cov lus zais: yog zoo li peb muab peb lub teeb khwb hauv qab thoob. Cov neeg nyob hauv peb lub zos yuav tsum pom tias peb yog Huab Tais Yes Xus cov teeb tiag. Peb nrhiav kom tau kev hais txog Huab Tais Yes Xus rau cov neeg nyob ze peb: peb txawb peb lub teeb rau saum tus ncej teeb, yam li peb hais Huab Tais Yes Xus cov lus kaj neeg lub siab.
Peb ua kom qhov pom kev hauv peb siab ci ntsa iab nyob ntawm sawv daws xub ntiag.
Huab Tais Yes Xus hais zoo li no tias “Lawv pom nej cov dej num zoo, ces lawv yuav cav txog nej Txiv nyob saum ntuj.”
Lo lus ‘zoo’ (Good) uas Mas Tais piav txog yog ntxeev los ntawm lo lus Hes Las tias ‘Kalos’ txhais tias ‘zoo thiab ntxim sawv daws siab’. Li ntawd, cov neeg ntseeg cov dej num thiaj yuav yog cov hauj lwm zoo thiab ntxim sawv daws siab ces cov hauj lwm ntawd yuav ‘rub’ tau cov neeg nyob ib ncig kom los cav txog Tswv Ntuj lub koob meej. Cov hauj lwm zoo tab sis tsis ua rau luag tej cav txog Tswv Ntuj mas cov hauj lwm ntawd tsis yog cov dej num zoo.
Huab Tais Yes Xus cov thwj tim txhob muab lub siab ntseeg zais, txhob ua cov neeg txhob txwm tsis hais ib lo txog Huab Tais Yes Xus. Huab Tais Yes Xus cov thwj tim yuav tsum tshaj lawv txoj kev ntseeg rau luag hnov, yuav tsum coj tus cwj pwm uas Huab Tais Yes Xus qhia kom coj. Tab sis ceev faj tsam peb xav kom luag qhuas txog peb, ceev faj tsam peb xav kom luag cav lus zoo txog peb.
Peb ua Huab Tais Yes Xus cov teeb ci ntsa iab rau zeej tsoom pom mas peb tsis nrhiav ib lub koob meej rau peb. Peb tsuas xav kom luag cav lus zoo txog peb Txiv nyob saum ntuj.