Tus sau: TP. Nyiaj Pov (Tim 20 lub 2 hlis 1997)
1. Yes Xus tau nyob 30 xyoo hauv ib lub tsev thiab ib lub zos zoo li cas ?
Lub caij ntawd, cov tsev nyob Nas Xas Les lub cuam khoov yog ntoo, cov phab ntsa yog av. Lub tsev muaj ob kem.
Thawj kem yog kem tsev uas lawv ua zaub ua mov, lawv noj mov. Nyob hauv thawj kem ntawd muaj lauj kaub av, muaj tshuab ntos ntaub, muaj tej lub hub cia rau nplej mov mog, rau roj, rau cawv txiv ntoo, rau dej. Muaj lub zeb zom. Saum cov txee muaj twj taig thiab cov teeb tsav.
Tej yim tsis muaj tsiaj ntau lawv kaw tus luj los tus tshis los tus yaj nyob hauv thawj kem tsev no. Tab sis tej yim xov nkuaj nyob ti lub tsev.
Lwm kem tsev yog kev tsev pw, muaj cov phij xab rau khaub ncaws. Thiab cov mej loos thiab ntim tej yam muaj nqe. Nyob rau ib sab lawv kauv cov lev pua chaw pw.
Hmo ntuj lawv pua lev pw.
Yos Xes thiab Mab Liab thiab Yes Xus lawv tau nyob hauv ib lub tsev zoo li ntawd.
Peb lub zim txwv no, Nas Xas Les yog ib lub nroog muaj txog 4 vam leej neeg nyob, muaj cov tsev ntiav so ntiav pw, ntiav noj mov, muaj cov tsev teev Ntuj ntau lub, thiab niaj hnub muaj txog ntau txhiab leej neeg tuaj xyuas thaj tsam uas Yes Xus hlob.
Tab sis thaum Yes Xus nyob mas Nas Xas Les yog ib lub zos me me uas muaj ob peb puas yim neeg nyob xwb. Lawv ua teb npleg. Lawv yug tus puav yaj thiab tshis los yug ib tug luj, yug qaib yug os. Tej yim yug nees los yug nyuj. Lawv cov txiv ntoo cawv, cog txiv ntoo roj.
Cov poj niam zom nplej thiab ua ncuav mov mog, mus kwv dej, ntos ntaub, tu vaj tu tsev. Mab Liab niaj hnub ua tej yam hauj lwm zoo li ntawd.
Yes Xus muaj 8 xyoo los 9 xyoo tej, nws nrog cov me nyuam hauv zos ua si.
Nws pom cov neeg ua hauj lwm, pom lawv zom cov txiv ntoo ua cawv, pom lawv cub cawv, ntim cawv hauv cov hnab tawv yaj. Yes Xus pom lawv coj lawv cov yaj mus nog zaub, pom lawv tseb nplej, hlais nplej. Nws pom lawv xuas cov luj thauj nra. Yes Xus cim xeeb zoo, nws pom luag ua yam twg, hnov luag hais dab tsi, nws khaws tas puas tsav yam tseg hauv nws nruab siab.
Thaum txog lub caij uas nws yuav mus tshaj lub Moo Zoo rau teb chaws mas nws yuav siv tas txhia yam nws pom nyob Nas Xas Les los piav Tswv Ntuj lo lus thiab piav tej zaj txhais. Tsoom sid yuav zoo siab mloog nws, vim nws txawj hais txog tej yam raug lawv lub neej, haum lawv siab zoo tas nrho.
2. Yes Xus yav hluas mus txog lub hnub nyoog muaj 30 xyoo nws ua dab tsi ?
Thaum Yes xus hlob me ntsis, nws muaj zog tuaj, nws nrog Yos Xes ua tus kws ntoo hauv lub zos Nas Xas Les. Nws nrog Yos Xes pab luag tsa cuam khoov tsev. Nws ua tej phij xab rau khaub ncaws, ua rooj noj mov. Nws txua tej rab voom thiab lwm yam twj uas sawv daws siv kam hauv tsev los siv mus ua liaj ua teb.
Yes Xus kuj niaj hnub fim cov neeg nyob hauv lub zos. Zaum puav nws mus xyuas cov kwv tij neej tsa nyob tsis deb tsis ze. Nws nrog sawv daws tham pem, nws nrog zej zog koom rooj qav. Rov txog tej hnub nyoog ua si, nws kuj nrog lawv so ua si. Hais tas lus nrho mas Yes Xus coj lub neej xws luag hauv ib lub zos me lub caij ntawd.
3. Yes Xus puas kawm ntawv?
Nyob Nkas Lis Lais teb, lub zos twg twb muaj ib lub tsev txoos. Lub tsev txoos yog lub tsev uas cov His Xas Lais sib sau nyeem cov Yaj Saub tej ntawv thiab teev Ntuj. Xya hnub lawv sib txoos ib zaug thaum hnub Xas Npas Tos.
Nyob ze lub tsev txoos muaj ib lub tsev qhia cov ntawv Hes Nplaws. Cov me nyuam tub tuaj kawm. Tus qhia ntawv yog tus saib lub tsev txoos.
Cov me nyuam tsis muaj phau ntawv. Tus xib hwb xuas tes sau ntawv saum daim tawv yaj. Cov me nyuam zaum pem teb, nyias muaj nyias ib daig txiag plooj ciab ntab. Lawv xyaum kos cov txwm ntawv hauv ciab ntab. Yes Xus tau xyaum sau thiab nyeem ntawv zoo li ntawd. Nws tsis tau mus kawm txuj hauv lub tsheej Yes Lus Xas Les. Tsuas muaj tsawg leej kawg mus kawm nyob ze cov xib hwb nto moo nyob Yes Lus Xas Les.
Cov ntawv Yes xus tau kawm yog cov ntawv twg ?
Yov cov ntawv Hes Nplaws uas ib txwm cov His Xas Lais siv los sau Ntawv Ntshiab. Nyem no peb cov neeg ntseeg Yes Xus peb hu lawv cov Ntawv Ntshiab ua “Phau Ntawv Cog Qub Lus”, tab sis ib txwm cov Yus Das hu lawv cov Ntawv Ntshiab ua “Ntawv Tos Las”.
Cov hluas tub sawv daws kawm cov Ntawv Tos Las. Cov Ntawv Tos Las tsuas siv lus Hes Nplaws thiab cov txwm ntawv Hes Nplaws.
4. Yes Xus tau paub pes tsawg xeem lus ?
Yes Xus xub paub lus As Las Mais : yog xeem lus uas tsoom pej xeem sawv daws hais nyob nws lub teb chaws, txij Nkas Lis Lais teb mus txog Yus Das teb. Thiab cov teb chaws nyob tsis deb tsis ze ntawd lawv kuj siv lus As Las Mais. Nyob hauv Yes Xus lub tsev, nyob hauv nws lub zos sawv daws sib tham ua lus As Las Mais.
Yes Xus kuj paub lus Hes Nplaws, vim nws tau kawm cov ntawv Hes Nplaws thiab nyob hauv lub tsev txoos teev Ntuj nws niaj lis piam hnov lawv nyeem cov ntawv “Tos Las” uas yog lus Hes Nplaws tas huv tib si. Lus Hes Nplaws thiab lus As Las Mais tsis sib txawv ntau pes tsawg. Lus Hes Nplaws yog xeem lus uas cov neeg txheej thaud siv.
Yes Xus tseem paub lus Hes Las me ntsis thiab, vim lub caij Yes Xus nyob, mas cov nom tswv thiab cov tub rog, thiab cov neeg ua luam, thiab cov neeg paub txuj sawv daws siv lus Hes Las ntau. Yes Xus yeej hnov ntau leej hais lus Hes Las, nws mloog tau thiab hais tau me ntsis lus Hes Las.
Li ntawd, niaj hnub Yes xus nrog zeej tsoom hais lus As Las Mais. Nws kuj paub zoo lus Hes Nplaws uas nws nyeem hauv cov Ntawv Ntshiab. Thiab Yes Xus paub hauj sim lus Hes Las, vim Yes Xus fim kam ntau leej nyob hauv nws lub teb chaws.
5. Yes Xus teev Ntuj zoo li cas ?
Yes Xus teev Ntuj zoo li cov His Xas Lais teev kam nyob hauv nws lub teb chaws.
Muaj tej kab ke teev Ntuj uas lawv niaj hnub coj nyob hauv tsev, thiab muaj cov kab ke uas lawv niaj lis piam coj nyob hauv cov tsev txoos hnub Xas Npas Tos, thiab muaj cov kab ke uas lawv niaj xyoo coj nyob hauv Yes Lus Xas Les.
Niaj hnub, cov His Xas Lais teev Tswv Ntuj hauv lawv tsev peb zaug : thaum sawv ntxov lawv teev Ntuj ib zaug, thaum tav su lawv rov teev Ntuj, thaum tsaus ntuj lawv tseem rov teev Ntuj ib zaug.
Thaum lawv teev Ntuj hauv lawv tsev li ntawd, lawv muab ib txog phuam los npua xub pwg, lawv tig xub ntiag ncaj rau lub tsheej Yes Lus Xas Les. Lawv hais ib zag teev Ntuj hu ua “Zaj 18 “ , vim lawv hais 18 lo lus thov Ntuj thiab ua Ntuj tsaug.
Niaj lis piam, hnub xya los hais tias “Hnub Xas Npas Tos”, cov neeg nyob Nas Xas Les lawv ua ib yam li cov neeg His Xas Lais nyob tas qhov txhia chaw : lawv caiv hauj lwm, lawv ua ib hnub lom zem nyob hauv lawv tsev, lawv hnav zam zoo nkauj, lawv teem ib lub caij ua tas zej zog mus sib sau hauv lub tsev txoos, lawv ua ke teev Ntuj. Thaum lawv hu nkauj, lawv siv cov Nkauj Paj Nruag uas peb tseem niaj hnub siv los txog tav no. Thiab lawv nyeem lawv cov Ntawv Ntshiab uas lawv hu ua “Ntawv Tos Las.” Yog peb cov Ntawv Cog Qub Lus uas peb siv niaj hnub no.
Tas 30 xyoo niaj lis piam Yes Xus tau nrog cov neeg nyob Nas Xas Les teev Ntuj thiab mloog cov Ntawv Ntshiab zoo li ntawd.
Tseem tshuav tej kab ke uas cov His Xas Lais lawv niaj xyoo coj. Niaj xyoo lawv sib sau nyob Yes Lus Xas Les, lawv ua plaub lub ntees loj. Tab sis lub ntees loj tshaj yog lub Ntees Hla : yam li lawv ua lom zem xya hnub sib law cav txog lub caij uas thaum ub lawv dim ntawm Hais Nkws Tos teb, lawv hla lub Hiav Txwv Liab, lawv nyob 40 xyoo hauv teb chaw suab puam, ces lawv rov los nyob hauv His Xas Lais teb uas Tswv Ntuj tau pub rau lawv tus yawg koob Has Nplas Has.
Txij thaum Yes Xus muaj 12 xyoos lawm nws niaj xyoo mus ua lub Ntees Hla nyob Yes Lus Xas Les.