Cov lus hauv ntawv Les Vis yog muab hauv cov kwv huam Leej Choj los. Lawv qhia tias haiv His Xas Lais yog haiv neeg ntshiab, vim Tswv Ntuj yog tus Ntshiab. Ntawv Les Vis qhia txog kev txi Ntuj thiab cov kab ke uas cov Leej Choj yuav pab tsoom His Xas Lais coj raws. Lawv xaiv cov Leej Choj nyob hauv lub xeem Les Vis, mas phau ntawv ntawd thiaj hu ua ‘Ntawv Les Vis’. Lus Has Les hu ua ‘Levitikos’ , lus Las Tis Nas yog ‘Leviticus’ tab sis cov Yus Das hu lawv phau ntawv ua ‘Weyyiqra’ txhais tias ‘thiab Tswv Ntuj hu’.

Cov His Xas Lais muaj ib co neeg pab cov Leej Choj tu lub Tuam Tsev Teev Ntuj. Cov neeg ntawd hu ua cov Les Vis. Lawv kuj xaiv cov neeg ntawd nyob hauv lub xeem Les Vis. Tab sis Ntawv Les Vis tsis yog piav txog cov Les Vis tej hauj lwm; yog piav txog cov Leej Choj cov hauj lwm tib si.

Ntawv Les Vis tus txheej txheem zoo li no:

1. Cov kab ke ua thaj txi Ntuj (LV 1-7).

Cov thaj txi Ntuj uas cov His Xas Lais coj mas muaj ntau yam tuaj ntawm cov Kas Nas Has thiab ntawm cov haiv neeg uas txheej thaud lawv nrog cov His Xas Lais zov tsiaj nog zaub xws li Has Nplas Has lawv.

Chiv thawj tus ua Leej Choj yog tus txiv tsev los yog ib tug hau zos. Txij Mais Xes thiab As Loos los, thiaj muaj cov Leej Choj uas lawv tsa ua cov thaj txi Ntuj loj.

Muaj ntau yam thaj txi Ntuj: yam li muaj tej thaj txi Ntuj uas lawv hlawv tus tsiaj tib si (Burnt Offering), muaj tej thaj txi Ntuj uas lawv tua tus tsiaj thiab sawv daws koom noj cov txim (Communion Oferring), muaj tej thaj txi Ntuj uas lawv cev tej qoob loo los tej txiv ntoo (Cereal Offering), muaj tej thaj txi Ntuj uas lawv tua tsiaj los them txim txhaum (Reparation Oferring), muaj tej thaj txi Ntuj uas lawv tua tsiaj los thov txhaum (Sacrifice for Sin Oferring), thiab muaj tej thaj txi Ntuj uas lawv hlawv txab txiv yoov xwb.

Yas Ves Tswv Ntuj hu Mais Xes tuaj nrog nws tham hauv lub Tsev Tsam Phooj Sib Ntsib, nws hais tias “Koj hais rau tsoom tub ki His Xas Lais tias yog nej leej twg xav cev ib yam rau Tswv Ntuj, mas nej yuav muab tsiaj los txi, tsiaj loj tsiaj me los tau. Yog tus twg xav hlawv ib tug tsiaj loj txi Ntuj, mas nws yuav xaiv ib tug phaw uas tsis muaj ib qho xyeej. Nws yuav coj tuaj hlawv ntawm qhov rooj Tsev Tsam Phooj Sib Ntsib, ces Tswv Ntuj thiaj yuav zoo siab txais. Nws yuav tso nws txhais tes rau saum tus tsiaj taub hau, ces tus tsiaj ntawd thiaj li yuav them nws cov txim txhaum. Nws mam li tua tus tsiaj rau Tswv Ntuj. Cov leej choj yuav muab cov ntshav txi Ntuj hliv ywg ib ncig lub thaj txi Ntuj uas nyob ze ntawm lub qhov rooj Tsev Tsam Phooj Sib Ntsib. Ua li ntawd tas, tus tswv tsiaj yuav muab tus tsiaj laws tawv thiab muab txiav ua tej ces. Cov leej choj yuav muab cov ces nqaij, lub taub hau thiab cov roj coj mus teeb rau saum cov hluav taws nyob saum lub thaj txi Ntuj. Tus tswv tsiaj yuav muab dej ntxuav tej plab hnyuv thiab tej tes taw, ces tus leej choj yuav coj mus hlawv tas huv tib si rau saum lub thaj.

Yog tus twg xav hlawv ib tug tsiaj me txi Ntuj, ib tug yaj los ib tug tshis, mas nws yuav xaiv ib tug txiv uas tsis muaj chaw xyeej los txi. Nws yuav muab tus tsiaj tua pem qaum thaj txi Ntuj, ntawm Tswv Ntuj xub ntiag. Ces cov leej choj yuav muab cov ntshav hliv ncig lub thaj. Tus tswv tsiaj muab tus tsiaj hlais ua tej ces, ces leej choj yuav nqa cov ces ntawd nrog lub taub hau thiab cov roj mus teeb rau saum cov hluav taws uas rauv saum lub thaj. Tus tswv yuav muab dej ntxuav cov plab hnyuv thiab cov tes taw, ces tus leej choj yuav nqa mus hlawv huv tib si saum lub thaj.

Yog tus twg xav muab noog los hlawv txi Ntuj, mas nws yuav muab ib tug nquab tsug los ib tug nquab lwb rwg. Leej choj yuav nqa tus nquab mus saum lub thaj txi Ntuj, nws yuav zawm nquab caj dab, ces nws dam lub taub hau los hlawv kom ncho pa saum lub thaj txi ntuj. Nws tsi cov ntshav los pleev ib sab ntawm lub thaj. Nws de lub txia thiab dob cov plaub rau hauv lub tais cug cov tshauv xyaw roj uas nyob sab hnub tuaj ntawm lub thaj. Nws muab tus noog phua ob sab, ib sab nrog ib phab tis, tiam sis nws tsis txiav kom tu nrho. Tus leej choj mam li muab tus noog hlawv saum lub cub tawg uas nyob saum lub thaj txi Ntuj. Tus tsiaj hlawv txi Ntuj li no yuav yog ib taig qav ncho pa tsw qab ntxiag mus ua kom Tswv Ntuj zoo siab.

Yog leej twg muab qoob loo los txi rau Tswv Ntuj, mas nws yuav muab ib co hmoov nplej, nws hliv roj rau thiab nphoo hmoov xyab rau saud. Nws yuav nqa cov hmoov nplej ntawd tuaj rau cov leej choj. Nws yuav tsuab ib phoov tes hmoov nplej xyaw roj thiab xyaw hmoov xyab cev rau leej choj kom coj mus hlawv saum lub thaj txi Ntuj, ua ib roog qav ncho pa lug mus ua kom Tswv Ntuj siab nqig. Qhov seem, yuav muab rau cov leej choj vim yog ib qho seem ntshiab huv ntawm Tswv Ntuj rooj qav.

Yog xav muab cov ncuav ci hauv qhov txos los cev txi Ntuj, mas yuav ntse hmoov nplej xyaw roj thiab puab ncuav tsis xyaw poov xab, los yuav xub puab ncuav tsis xyaw poov xab, mam li pleev roj rau kuj tau. Yog muab cov ncuav ci saum daim hlau los cev txi Ntuj, mas yuav muab hmoov nplej ntse xyaw roj puab tsis xyaw poov xab. Yuav muab ntais ua tej daim, mam muab roj ywg rau. Qhov no yog tus kev cai cev qoob loo txi Ntuj.

Yog muab cov ncuav ci hauv tais los cev txi Ntuj, mas yuav muab cov hmoov nplej do xyaw roj puab.

Yog leej twg xav ua ib thaj txi Ntuj noj cov txim, mas nws yuav tua ib tug tsiaj loj, txiv los maum kuj tau, tus tsiaj yuav tsum tsis txhob muaj ib qho xyeej. Nws yuav cev txi rau Tswv Ntuj. Nws yuav tso nws txhais tes rau saum tus tsiaj taub hau, thiab yuav tua tus tsiaj nyob ntawm lub qhov rooj Tsev Tsam Phooj Sib Ntsib. Ces cov leej choj yuav muab cov ntshav ywg ncig lub thaj. Nws yuav muab tej yam no ntawm tus tsiaj noj txim mus hlawv ua ib rooj qav rau Tswv Ntuj xws li cov roj uas lo ntawm cov plab hnyuv thiab daim roj npog cov plab hnyuv, ob lub raum, cov roj uas lo rau ob sab ntsag, daim roj uas lo rau thooj siab thiab ob lub raum. Cov leej choj yuav muab tej no hlawv saum lub thaj, ntxiv cov txim hlawv saum lub cub tawg.

Qhov hais los no yog cov kab ke ua thaj txi Ntuj hlawv tsiaj, thaj txi Ntuj cev qoob loo, thaj txi Ntuj ntxuav txhaum, thaj txi Ntuj them txim, thaj txi Ntuj tsa leej choj thiab thaj txi Ntuj noj cov txim. Ua raws li Yas Ves hais rau Mais Xes saum roob Xis Nais, hnub uas Yas VesS qhia kom cov His Xas Lais txi Tswv Ntuj nyob hauv lub hav suab puam Xis Nais.

2. Cov kab ke tsa neeg ua Leej Choj (LV 8-10).

Mais Xes hu As Loos thiab nws cov tub kom txav los, nws muab dej ntxuav lawv. Nws muab lub tsho ntev rau As Loos hnav, muab txoj siv rau nws sia, muab lub tsho tshaj sab rau nws hnav tuaj saud, thiab muab lub tsho teev Ntuj rau nws npua. Ces nws muab txoj siv pav lub tsho teev Ntuj rau ntawm As Loos duav. Nws muab daim npog hauv siab rau As Loos coj, muab ob txwm kuam hu ua Yus Lis thiab Tus Mis tso rau hauv daim npog hauv siab. Nws muab ib txoj phuam rau As Loos ntoo, nws rhais ib lub paj kub rau saum txoj phuam ncaj ntawm hauv pliaj. Yog lub cim ua leej choj raws li Tswv Ntuj qhia kom Mais Xes ua.

Ces Mais Xes muab roj pleev lub Tsev Nyob thiab tas puas tsav yam toob xib nyob hauv, nws muab lub Tsev Nyob fij rau Tswv Ntuj. Nws pov dej xya zaus rau saum lub thaj txi Ntuj, thiab nws muab roj pleev lub thaj thiab pleev cov twj saum lub thaj, pleev lub rhawv rau dej thiab lub taw rhawv, nws muab lub thaj fij rau Tswv Ntuj.

Mais Xes hliv roj rau saum As Loos taub hau, nws pleev roj fij As Loos rau Tswv Ntuj.

Mais Xes kom lawv cab tus nyuj ntxuav txhaum los. As Loos thiab nws cov tub tso lawv txhais tes rau saum tus nyuj taub hau, ces Mais Xes muab tus nyuj tua. Mais Xes xuas ntiv tes tub nyuj cov ntshav los pleev cov kub uas nyob ntawm plaub ceg kaum thaj txi Ntuj, kom ntshav ntxuav cov kub ntawd tej qhov tsis huv. Nws muab ib qho ntshav los hliv rau hauv lub taw thaj txi Ntuj. Nws ua kab ke ntxuav txhaum saum lub thaj, vim nws yuav muab lub thaj fij rau Tswv Ntuj.

Mais Xes kom lawv cab tus tshis uas yuav muab hlawv txi Ntuj los. As Loos thiab nws cov tub tso lawv txhais tes rau saum tus tshis taub hau, ces Mais Xes muab tus tshis tua.

Mais Xes tseem kom lawv cab lwm tus tshis los, yog tus tshis ua thaj txi Ntuj tsa leej choj. As Loos thiab nws cov tub tso lawv txhais tes rau saum tus tshis taub hau, ces Mais Xes muab tua. Mais Xes tub ib qho ntshav los pleev As Loos daim nplooj ntseg xis, pleev As Loos tus ntiv tes xoo xis thiab pleev nws tus ntiv taw xoo xis. Ua tas, mas Mais Xes muab roj thiab muab cov ntshav uas nyob saum lub thaj txi Ntuj tsuag As Loos thiab As Loos cov ris tsho, nws muab tsuag rau As Loos cov tub thiab lawv cov ris tsho huv tib si. Nws muab As Loos thiab nws cov ris tsho fij rau Tswv Ntuj, nws muab As Loos cov tub thiab lawv cov ris tsho cev rau Tswv Ntuj li ntawd.

3. Txoj cai qhia yam huv thiab tsis huv (LV 11-16).

Cov His Xas Lais txheeb tias cov tsiaj twg huv thiab cov tsiaj twg tsis huv. Thaum twg yuav saib poj niam huv, thaum twg yuav saib poj niam tsis huv. Tseem hais txog neeg cov mob tias tus mob twg huv thiab tus mob twg tsis huv. Hais txog kev ua txij ua nkawm, lawv kuj qhia tias thaum twg yuav caiv thiab tsis caiv. Nyob hauv zaj 16 piav txog lub hnub nyoog ua cov kab ke them txim.

Cov tsiaj huv mas yam li cov tsiaj txhais taw muaj ob tug rau taw thiab zom zaub, cov ntses muaj nplai, kooj, kab npis, kab nqos vias, cov noog noj noob zaub; dhau ntawm cov tsiaj li hais los no mas yog txiaj tsis huv.

Cov poj niam coj khaub ncaws, cov yug me nyuam mas lawv tsis huv; lawv yuav tau ua kab ke ntxuav thiab cev cov txim rau Tswv Ntuj kom tau them txim. Tus txiv neej twg los phev mas nws kuj tsis huv. Cov neeg mob ruas mas lawv lub cev tsis huv, lawv tsum tawm mus nyob sab yeej nraud.

4. Txoj cai mus taug kev ntshiab (LV 17-26).

Tej txoj cai ntawd yog cov txoj cai qee cov Leej Choj kom lawv ua Tswv Ntuj tug, lawv txhob ua neej xws li luag, lawv thiaj tsim nyog txi Ntuj. Thiab yog cov txoj cai qee tej lub hnub nyoog los tej lub caij los ua Tswv Ntuj tug; yam li Hnub Xas Npas Tos, Hnub Hla, Hnub Tsib Caug, Hnub Them Txim Txhaum, Hnub Tsa Tsev Tsam Phooj, Lub Xyoo Xas Npas Tos, Xyoo Hom Khaj Lom Zem.

Tswv Ntuj hais rau Mais Xes hais tias “Yas Ves cov hnub nyoog nqaum paj nqaum nruas yog tej lub txoos ntshiab. Thaum txog caij txog nyoog, mas nej yuav hu cov His Xas Lais tuaj sib txoos ua ke, raws li no:

Lub ib hlis, xiab kaum plaub tsaus ntuj, yog Hmo Hla uas nej yuav muab qee rau Yas Ves. Lub hlis ntawd tim kaum tsib, yog hnub nco txog cov mov tsis xyaw poov xab; nej yuav noj mov tsis xyaw poov xab xya hnub sib law. Thawj hnub, nej yuav sib sau ua lub txoos ntshiab, nej yuav tsis txhob ua ib yam hauj lwm hnyav li. Xya hnub sib law, nej yuav niaj hnub txi ib pluas qav rau Yas Ves. Hnub xya, yog hnub sib sau ua lub txoos ntshiab dua, nej yuav tsis txhob ua ib yam hauj lwm hnyav li.

Thaum nej mus txog lub teb chaws uas kuv muab rau nej nyob, nej cog qoob loo siav, nej sau, mas nej yuav nqa thawj tes nplej tuaj rau tus leej choj. Leej choj yuav muab cev rau Yas Ves kom nws saib nej xis nws siab. Hnub lawv qab Xas Npas Tos, mas leej choj yuav cev cov qoob tshiab ntawd rau Ntuj.

Txij hnub lawv qab xas npas tos uas nej tuaj cev thawj rev nplej txi Ntuj, nej yuav suav xya lub lis piam txwm nkaus. Nej yuav suav tsib caug hnub, txog hnub lawv qab xas npas tos dua, ces nej rov qab nqa dua ib co qoob loo tuaj ua dua cov kab ke cev qoob loo txi Ntuj rau Yas Ves.

Lub xya hli xiab kaum, yog hnub them txim txhaum. Nej yuav sib sau ua lub txoos ntshiab. Nej yuav yoo mov thiab nej yuav hlawv ib phaj qav txi Yas Ves. Hnub ntawd, nej yuav tsis txhob ua ib yam hauj lwm dab tsi li, vim hnub ntawd yog hnub them txim txhaum, uas luag ua kab ke them txim txhaum rau nej nyob ntawm Yas Ves nej tus Tswv Ntuj xub ntiag.

Kuv hais tseeb, yog leej twg tsis yoo mov hnub ntawd, mas nws yuav raug ntiab tawm hauv nws tsev neeg mus. Yog leej twg ua ib yam hauj lwm hnub ntawd, mas kuv yuav ua kom nws ploj hauv nws haiv neeg mus. Nej yuav tsis txhob ua ib yam hauj lwm dab tsi li, yog ib txog cai rau nej tsoom xeeb ntxwv coj mus ib txhis, txawm nej nyob lub teb chaws twg, los nej yuav tsum coj.

Hnub ntawd yog ib hnub uas nej yuav tsum so tiag. Nej yuav yoo mov, pib yoo hnub xiab cuaj lub hli ntawd, txij yav tsaus ntuj mus txog hnub xiab kaum tsaus ntuj, nej yuav tso hauj lwm tseg huv tib si.

Koj hais rau cov tub ki His Xas Lais tias lub xya hli tim kaum tsib, nej yuav pib ua Yas Ves cov kab ke nco txog cov Tsev Tsam Phooj xya hnub. Thawj hnub, nej ua lub txoos ntshiab, nej yuav tsis txhob ua ib yam hauj lwm hnyav li. Nej yuav niaj hnub hlawv ib phaj qav txi Yas Ves puv xya hnub sib law. Hnub yim, nej yuav sib sau ua lub txoos ntshiab, nej yuav hlawv ib phaj qav txi Yas Ves. Hnub nej sib sau ua ke, nej yuav tsis txhob ua ib yam hauj lwm hnyav.

Cov hnub nyoog no yog hnub nyoog qee cia nco txog Yas Ves, mas nej yuav hu cov His Xas Lais tuaj sib sau ua lub txoos ntshiab, hlawv tej phaj qav txi Yas Ves, hlawv tsiaj txi Ntuj, cev qoob loo txi Ntuj, ua thaj txi Ntuj noj cov txim, hliv dej hliv cawv txi Ntuj, raws li nyias tej kab ke kav nyias lub hnub nyoog.

Nej yuav txi Ntuj ua cov ntees nqaum paj nqaum nruas no rau Yas Ves ntxiv rau cov hnub xas npas tos huv tib si, thiab tseem ntxiv rau tej hnub uas nej tuaj yeem xav cev paj tshab rau Ntuj, thiab xav ua Ntuj tsaug, los xav pauj tej lub yeem rau Yas Ves

Thaum nej mus txog lub teb chaws uas kuv muab rau nej nyob lawd, mas tej av yuav tsum so ib xyoos xas npas tos cia hwm Yas Ves. Koj yuav cog noob qoob noob loo rau xyoo hauv koj daim teb, koj yuav tav koj cov hmab txiv cawv rau xyoo, thiab koj yuav sau qoob rau xyoo. Tab sis thaum txog Xyoo Xya, mas tas lub teb chaws, tej av yuav so ib xyoos xas npas tos hwm Yas Ves. Koj yuav tsis cog noob qoob rau hauv koj daim teb thiab koj yuav tsis tav koj cov hmab txiv cawv li. Koj yuav tsis hlais cov ntxaib nplej uas koj tsis tau cog, thiab koj yuav tsis de cov txiv cawv saum cov hmab uas koj tsis tau tav. Yog xyoo rau av so. Xyoo Xya, cia av so xyoo xas npas tos, mas koj yuav siv tas puas tsav yam uas tuaj hauv nruab teb ua txhiam xws rau koj, rau koj tus tub txib, tus ntxhais txib, koj tus tub zog, tus qhua tuaj so hauv koj tsev, rau tas txhua leej txhua tus uas nyob hauv koj tsev tib si. Koj cov tsiaj thiab tas cov tsiaj hauv lub teb chaws los yuav noj tej yam uas tuaj hauv nruab teb tib si thiab.

Koj yuav suav xya ntu xya xyoo, uas yog xya zaus xya xyoo, yam li plaub caug cuaj xyoos. Thaum txog lub xya hli xiab kaum, koj yuav tshuab hom nrov. Hnub them txim txhaum, mas tas lub teb chaws yuav tshuab hom nrov nrov. Nej yuav muab xyoo tsib caug ua Xyoo Ntshiab. Nej yuav tshaj rau cov neeg nyob hauv lub teb chaws tias sawv daws dim ntawm txoj kev ua qhev. Yog ib lub caij rau nej sawv daws hom khaj: nej nyias yuav rov mus nyob hauv nyias lub tsev, nyias yuav rov mus nyob hauv nyias lub xeem.

Xyoo tsib caug yuav yog ib xyoos nej hom khaj dhia daj dhia luag: Nej yuav tsis tseb noob qoob noob loo, nej yuav tsis sau cov nplej uas nej tsis tau cog, nej yuav tsis de txiv cawv saum cov hmab uas nej tsis tau tav ntsis. Vim yog ib xyoos hom khaj dhia daj dhia luag, yog ib Xyoos Ntshiab. Mas nej yuav noj tej txhiam xws uas tuaj nruab teb. Xyoo hom khaj ntawd, mas nej nyias yuav rov mus nyob hauv nyias tsev. Yog koj muag ib yam dab tsi rau ib tug neeg hauv koj lub teb chaws, los koj muas dab tsi ntawm nws los, mas yuav tsis txhob muaj ib tug noj paj ntawm nws tus kwv tij. Koj yuav suav saib lub xyoo hom khaj dhau tau pes tsawg xyoo lawm, ces koj yuav them tus nqi muas raws li ntawd. Tus muag rau koj kuj yuav suav saib yuav sau tau pes tsawg cim qoob, ces nws yuav hais tus nqi rau koj them raws li ntawd. Yog tseem tshuav ntau xyoo, mas tus nqe yuav kim, yog tshuav tsawg xyoo, mas tus nqe yuav pheej yig, vim tias nws yuav xam saib nws muag pes tsawg cim qoob rau koj. Nej ib leeg yuav tsis txhob dag ib leeg noj. Nej yuav ntshai Tswv Ntuj, vim kuv yog nej tus Yas Ves Tswv Ntuj. Nej ua raws li kuv cov cai lij choj thiab nej mloog kuv tej kev cai mog. Nej ua raws kuv cov cai lij choj, ces nej yuav nyob nyab xeeb hauv lub teb chaws. Tej av yuav txi txiv, nej yuav tau noj txaus siab, thiab nej yuav tau nyob nyab xeeb hauv lub teb chaws.

Nej hais tias ‘Yog peb tsis tseb noob qoob noob tsa thiab tsis sau qoob sau loo, mas peb yuav muab dab tsi los noj Xyoo Xya?’

Nej nco ntsoov tias Xyoo Rau, kuv yuav tsuag kuv lo lus foom hmoov zoo rau nej, ces Xyoo Rau nej yuav tau qoob loo txaus noj peb xyoos. Thaum txog Xyoo Yim, nej rov tseb nplej, nej tseem noj cov qoob uas nej sau Xyoo Rau tsis tau tas, nej tseem yuav noj mus txog Xyoo Cuaj, nej yuav noj cov qoob qub mus txog thaum cov qoob tshiab siav”(LV 23-25).

Cov His Xas Lais hais tias Tswv Ntuj yog tus Ntshiab mas yam twg ua Tswv Ntuj tug yuav tsum ua yam ntshiab. Yuav tsum coj txoj cai txwv.