Ntawv Vaj (Book of Kings)

Ntawv Vaj cais ua 2 phau; yog Vaj phau Ib, thiab Vaj phau Ob. Ob phau ntawv Vaj puav leej piav cov xwm tshwm sim txij xyoo 972 ua Yes Xus ntej uas yog lub caij tus vaj Das Vis tuag los txog xyoo 561 yog lub caij Yos Yas Kis ua vaj.
Ntawv Vaj sau thawj zaug yog nyob ze xyoo 610 ua Yes Xus ntej. Tus sau yog ib tug Leej Choj, nws thiaj tau piav zoo txog Mais Xes txoj cai uas lawv nrhiav tau nyob hauv lub Tuam Tsev Teev Ntuj. Nws vam txog cov ntawv uas cov His Xas Lais xub sau ntxov los lawm; yam li cov kwv huam Xas Los Moos, cov kwv huam cov vaj Yus Das, thiab cov kwv huam cov vaj His Xas Lais. Xyoo 561 thaum cov His Xas Lais mus nyob txim nyob Npas Npis Los rov qab los, mas lawv rov sau ntawv Vaj ua zaum ob.
Cov xwm loj hauv ob phau ntawv Vaj yog zoo li no: Das Vis laus mas nws xaiv ‘Xas Los Moos’ ua tus yuav hloov nws. Xas Los Moos ua ib tug vaj muaj hwj chim tab sis nws ua txhaum, ces xyoo 931 thaum Xas Los Moos tuag mas nws lub teb chaws faib ua 2 lub teb chaws; yam li 10 lub xeem pem qaum teb ncaim mus ua His Xas Lais teb; lawv muaj lawv tus vaj thiab lawv muaj lawv chaw teev Ntuj nyob Npes Thes, lub xeem Yus Das thiab xeem Xis Mes Oos nram qab teb ua Yus Das teb; lawv muaj lawv tus vaj thiab lawv teev Ntuj nyob Yes Lus Xas Les. Xyoo 721 His Xas Lais teb tawg mas lawv raug mus nyob txim nyob Npas Npis Los teb. Xyoo 701 mas Yus Das teb raug tus vaj As Xis Lias hu ua ‘Xes Nas Kes Lis’ tuaj ntaus tab sis Yus Das teb tsis tawg. Xyoo 598 thiab xyoo 587 cov Npas Npis Los tuaj ntaus lub tsheej Yes Lus Xas Les tawg. Lawv raug mus nyob txim nyob Npas Npis Los.
Ob phau ntawv Vaj qhia dab tsi txog kev cawm neeg?
Cov sau ntawv Vaj lawv xub muab siab rau qhia tias cov vaj yuav tsum coj tsoom pej xeem mus taug txoj kev teev Tswv Ntuj tib leeg xwb. Hais txog cov vaj kav lawv lub teb chaws zoo li cas, los lawv tiv dab tsi, los lawv ua rog xyoo twg, los lawv ua rog zoo li cas, los lawv nrog cov vaj nyob ib ncig sib fim zoo li cas mas ntawv Vaj kuj piav txog thiab; tab sis lawv tsis xub muab siab rau qhia qhov ntawd. Li ntawd, mas thiaj muaj tej yam lawv hais tsis meej pes tsawg. Vim qhov ntawv Vaj xub saib loj tshaj mas yog qhov tias cov vaj puas mloog Yas Ves Tswv Ntuj lus zoo los tsis zoo. Ntawv Vaj hais ntau txog lub Tuam Tsev Teev Ntuj thiab hais txog txoj kev teev Tswv Ntuj raws li Tswv Ntuj nyiam. Zaj loj dua cov nyob hauv ntawv Vaj yog zaj piav txog lawv nrhiav tau Tswv Ntuj txoj cai nyob hauv lub Tuam Tsev Teev Ntuj thiab lawv tshaj txoj cai rau tsoom pej xeem mloog (2V 22-23). Ntawv Vaj txiav txim rau cov vaj His Xas Lais thiab saib lawv zoo los tsis zoo; yog nyob ntawm lawv tau coj Tswv Ntuj txoj cai zoo li cas.
Ntawv Vaj phau Ib tus txheej txheem:

1. Das Vis tsa Xas Los Moos ua vaj (1V 1-2).
2. Tus vaj Xas Los Moos lub neej (1V 3-11).
3. Cov xwm lub caij teb chaws sib ncaim (1V 12-13).
4. Cov vaj lub caij ua Es Lias ntej (1V 14-16).
5. Lub caij Es Lias ua Yaj Saub (1V 17-22).
   Ntawv Vaj phau Ob tus txheej txheem:
6. Lub caij Es Lis Xais ua Yaj Saub (2V 1-13).
7. Cov vaj His Xas Lais thiab Yus Das lub caij Es Lis Xais tuag mus txog lub caij Xas Mas Lias tawg (2V 14-17).
8. Cov vaj kav Yus Das teb txij xyoo 721 mus txog xyoo 587 lub tsheej Yes Lus Xas Les tawg (2V 18-25).