Hnub tim 6 lub 8 hli no, Vaj Qhia Les Os 14 mus xyuas cov ntseeg nyob As Xis Xis hauv Is Tas Lias teb, Vaj Qhia tau ntsib cov tub ntxhais hluas tuaj koom lub ntees ‘GO! FRANCISCAN YOUTH MEETING 2026’. Muaj 3 tug hluas sawv cev sawv daws tau nug Vaj Qhia txog kev xaiv ua lub neej raws li Leej Ntshiab Fas Ntshis Kus nyob As Xis Xis, kev ua raws li Tswv Ntuj lub suab hu, thiab kev cia siab rau lub Koom Txoos ntuag thiab muaj kev sib cais pab cais pawg.
Thawj tug yog tuaj ntawm teb chaws Khos As Xis (Croatia) tuaj, nws nug tias Vaj Qhia yuav qhia cov tub ntxhais hluas loj hlob raws nraim li Leej Ntshiab Fas Ntshis Kus tus qauv li cas, kom lawv ua ib tug thwj tim pheej xeeb rau Huab Tais Yes Xus Pleev lub Moo Zoo, thiab coj kev tso siab mus pub rau lawv cov phooj ywg.
Vaj Qhia teb rau nws tias “Leej Ntshiab Fas Ntshis Kus qhia peb tias kev ua neej raws nraim lub Moo Zoo mus kom txog qhov kawg yog ib txoj kev rov qab rov quav txog kev ua neej nruj raws li txoj kev cai teev hawm, vim tias kev ua neej raws li lub Moo Zoo tsis tau ua kom peb dig muag los yog siv kev nruj kev tsiv tsim teeb meem, tab sis kev ua lub neej raws li lub Moo Zoo pab kom peb meej pem, muab siab rau, thiab zoo siab raws Huab Tais Yes Xus tas mus li. Li ntawd, peb thiaj li ua neeg tsis muab hlob thiab qhib siab txais sawv daws. Txoj kev no taug tsis yooj yim, tab sis tus taug txoj kev no yuav muaj kev zoo siab xyiv fab nyob hauv nws lub neej.” Ces Vaj Qhia taw kom pom tias zoo li lub zim txwv no kev siv tshuab vam meej ua rau sawv daws tsis swm txog kev sib ntsib tim ntsej tim muag. Tab sis cov ntseeg yuav tau txuag kev sib fim, kev kwv kev tij, thiab kev xyiv fab thaum lawv tau sib ntsib nyob ua ke cia. Txoj kev xyiv fab no pab neeg tshaj lub Moo Zoo tau zoo dua lo lus hais. Txoj kev xyiv fab no yuav muab npog cia tsis tau.
Tus hluas tim ob yog tuaj ntawm lub nroog Npos Los Nyas (Bologna) tuaj, nws nug tias peb yuav ua li cas thiaj yuav muaj cuab kav teb tau rau Tswv Ntuj lub suab hu, tsis yuav ua tus neeg tuav tus qhais laij liag lawm ho rov tig tom qab, thiab tsis mob siab rau kev txom nyem los yog tsis muab lub sij hawm fij rau cov xwm tau ntsib tau pom thaum taug txoj kev hu no. Nyob ntawm Vaj Qhia kev ua neej nyob hauv Tswv Ntuj lub suab hu, yam twg yog yam pab Vaj Qhia kom taug tau txoj kev no mus ntxiv.
Vaj Qhia teb li no “Thaum peb poob rau lub caij nyoog zoo li hais, peb ua siab loj siab tawv txiav saib yuav xaiv txoj kev twg taug, mas qhov ntawd ntshai yuav hloov tau lub ntiaj teb. Kev xaiv ib yam twg mus tas ib txhis, tsis tau muab peb kaw cia hauv nkuaj, tab sis kev xaiv ntawd yuav qhib peb txoj sia kom ua zog thiab hlob loj mus. Txoj kev nyiam yog peb rhais ruam tawm ntawm yus tus kheej mus, yog txoj kev peb maj mam nrhiav pom, thiab yog txoj kev muaj Tswv Ntuj ua kwv luag nrog peb mus ua ke. Qhov no yog lub ntsiab hauv Tswv Ntuj lub suab hu.”
Vaj Qhia ntuas tias kev tso tes khiav, kev tso tseg kev sib raug zoo, los kev hloov txoj hau kev tas mus li tsis pab tau kom peb txoj sia rhais ruam lawm tom ntej. Tej zaus tej ntawd yuav ua kom peb muaj swm txheej, muaj neeg paub coob, muaj cuab tam ntau tuaj, tab sis peb txoj sia tseem nres nyob qhov chaw qub. Tus nqe neeg yuav them mas siab heev, lub chaw khoob hauv neeg kuj yuav tob thiab.”
Hais txog Tswv Ntuj lub suab hu, mas Vaj Qhia teb tias thaum nws tig ntsia lub neej dhau los, nws pom tias Tswv Ntuj tsis cia nws nyob ib leeg twm zeej li, Tswv Ntuj nrog nraim nws, ntau zaus Tswv Ntuj xa tej tus neeg tuaj nyob ntawm nws ib sab ua nws kwv luag.
Vaj Qhia hais ntxiv tias nws yog ib tug Leej Choj, yog ib tug tub koom haum Aus Nkus, thiab yog ib tug tub tshaj Ntuj Lus, mas nws nrhiav tau lub teeb coj nws kev los txog niaj hnub no. Tab txawm tias nyob hauv lub zim txwv nws cheem tsum yuav teb tias ‘ua li’ rau Tswv Ntuj lub suab hu nws los ua tus Vaj Qhia.
Vaj Qhia faib nws zaj tswv yim rau cov hluas sawv daws tias “Tswv Ntuj lub suab hu tsis yog lub suab peb hnov tib lwm xwb, tab sis yog lub suab peb yuav niaj hnub muab tas peb lub siab ntseeg, kev tso siab, thiab kev pheej xeeb los teb.”
Tus hluas tim peb, yog tuaj ntawm lub pov txwv Xes Xis Lias tuaj, nws hais tias niaj hnub no cov hluas ntau tus hais tias lawv ntseeg txog Tswv Ntuj tab sis lawv tsis ntseeg lub Koom Txoos. Nyob hauv nws lub zos los ntau zaus kuj pom tias lub Koom Txoos muaj kev cais pab cais pawg, muaj kev tsis sib haum. Li ntawd, nws xav nug tias peb puas tseem yuav pheej xeeb rau txoj kev nyiam pab cawm thiab kho txoj kev tsis haum xeeb no tau li cas ntxiv, thiab vim dab tsi niaj hnub no peb thiaj ceeb laj ntsia lub Koom Txoos yog tus leej niam muaj qhov txhab tab sis tseem zoo siab txais peb thiab hlub peb.
Thaum mloog lo lus nug no tas, Vaj Qhia lees tias lub Koom Txoos tsis mus zoo li Huab Tais Yes Xus xav cia, mas tau ua chaw tu siab, ua qhov mob, thiab ua rau sawv daws tag kev cia siab. Thiab ntawm qee tus, lub Koom Txoos tseem ua teeb meem rau txoj kev ntseeg thiab. Txawm li ntawd, Huab Tais Yes Xus kev xav rau lub Koom Txoos yeej pom tseeb, lub Koom Txoos tsum yog Huab Tais Yes Xus lub cev thiab lub Koom Txoos ua qhov chaw kom pom txog Huab Tais Yes Xus txoj sia nyob hauv kev siv lub hwj chim sib txawv, yog lub hwj chim tsis nias ib tug kom qis dua ib tug tab sis yog lub hwj chim tsa lawv kom sawv taus.
Vaj Qhia muab Leej Ntshiab Fas Ntshis Kus nyob As Xis Xis los hais ua piv txwv rau sawv daws mloog, vim nws tsis hais lus tiv lub Koom Txoos tab sis nws ua tus pab txhim kho lub Koom Txoos.
Qhov kawg Vaj Qhia hais tias “Peb txhua tus muaj feem xyuam ua txoj hauj lwm no, peb nyias muaj nyias txoj kab xwm thiab nyias lub suab hu, tab sis peb rhais ruam mus ua ke, peb sib txhawb siab, peb sib ntxiv zog, thiab peb sib pab ntuas kom zoo dua tuaj. Qhov tseem ceeb yog peb nyias yuav tau pheej xeeb rau nyias txoj hauj lwm Tswv Ntuj pub rau.”
