Es Lis Xas Npes yog tus vaj Hoos Nqias As Nres tim 2 (Andrew II of Huangary) tus ntxhais, nws yug xyoo 1207 tim 7 lub 7 hli. Thaum muaj 4 xyoos, lawv muab nws qhaib nrog Lus Is (Louis IV, Landgrave of Thuringia) uas yav tom ntej yuav ua tus nom kav Zes Mas Nias plawv teb. Xyoo 1221 Es Lis Xas Npes muaj 14 xyoos, Es Lis Xas Npes thiab Lus Is ua nkawd rooj tshoob.
Xyoo 1223 ib pab Txiv Twj Cuab Fas Ntshis Kas tuaj txog hauv lub teb chaws, Es Lis Xas Npes tau mus kawm txuj ntawm cov Txiv Twj Cuab, ces nws pib yoog raws li Fas Ntshis Kus nyob As Xis Xis tus qauv. Es Lis Xas Npes pib ua cov hauj lwm hlub zeej tsoom. Kwv huam piav tias muaj ib zaug Es Lis Xas Npes nyiag nqa ib co ncuav mov mus pub rau cov neeg tshaib plab noj, nws muab lub tw tsho los qhwv cov ncuav mov. Es Lis Xas Npes tus txiv thiab cov tub ncig los pom, tus txiv hais kom Es Lis Xas Npes muab tw tsho nthuav rau sawv daws saib. Es Lis Xas Npes thiaj muab nthuav tawm, qhov tus txiv thiab cov tub ncig pom mas yog muaj ib cov paj ntshua nplaim zoo zoo nkauj nyob hauv nws tw tsho. Es Lis Xas Npes kuj qhia nws tus txiv kom nkag siab tias thaum yus pub rau cov neeg tsis muaj, mas yog yus tab tom tsim ib lub cuab tam tsis txawj lwj nyob saum ntuj. Txij ntawd los tus txiv thiaj kheev cia Es Lis Xas Npes ua cov hauj lwm pub cuab tam rau cov neeg txom nyem.
Xyoo 1226 lub teb chaws raug dej nyab ua rau muaj neeg tshaib plab thiab tuag mob coob, ces Es Lis Xas Npes thiaj qhib tsev faib tsoos tsho thiab txhuv rau tsoom pej xeem.
Es Lis Xas Npes tus txiv nrog tsoom neeg ua Ntuj kev cai sawv kev mus ntaus ntsuj rog txeeb Yes Xus lub ntxa. Hnub tim 11 lub 9 hli 1227 Es Lis Xas Npes tau txais lub moo phem tias nws tus txiv tuag lawm, ces nws tu siab tas nrho, nws hais tias “Nws tuag lawm. Nws tuag lawm. Hnub no mas zoo li kuv lub ntuj tsaus nti lawm.”
Lus Is tuag lawm, nws tus kwv sawv los ua tus saib lub teb chaws mas nws tsis kheev Es Lis Xas Npes muaj cai rho lub cuab tam mus pub rau cov neeg txom nyem ntxiv, ces Es Lis Xas Npes thiaj tshais chaw mus nyob Mas Npuas (Marburg) hauv Hes Xes (Hesse).
Es Lis Xas Npes cog lus coj lub neej ua Niam Twj Cuab, nws muab nws lub cuab tam los tsim ib lub tsev cia kho thiab tu cov neeg mob pluag txom nyem nyob Mas Npuas.
Xyoo 1231 Es Lis Xas Npes muaj 24 xyoos xwb, nws cia li tso ntiaj teb tseg. Es Lis Xas Npes tuag tau tsis ntev, muaj ntau tus neeg mob tuaj vam txog Es Lis Xas Npes pab thov Ntuj kho lawv, mas lawv cia li zoo tuaj, ces xyoo 1235 Vaj Qhia Nqes Nkos Lis tim 9 (Pope Gregory IX) thiaj saib Es Lis Xas Npes yog Koom Txoos ib tug Leej Ntshiab.
Leej Ntshiab Es Lis Xas Npes nyob Hoos Nqias (St. Elizabeth of Hungary)
